Keememej, Keememej

Ijo ij jokwe ie, jino jān allōn̄ in Nobōm̧ba, mejatoto eo ipeļaakū āinwōt n̄e ej kikiļo̧k. Bōlōk ko remaroro, mera in ainikien wōt aer pelto-peltak im rekam̧ōņōņōik eō ilo allōn̄ in spring im jem̧ar, em̧ōj aer jako im waļo̧k wōjke jeļo̧k kobbaer rej kōm̧m̧an ainikien bōļōk ko remōrā iumin neeō. Bao ko rekōn al rej ikōn̄, im melu in wūt ko im aer emourur ejako jān mejatoto. Men ko an laļin in me ij ekkeijel ippāer rej kamourur mour rej kakije ilo jidik iien, im ilo lur in aolep men kein im ta ko rej pād wōt—im ilo an kilōkļo̧k iiō in im mokta jān aō meļo̧kļo̧k in m̧ōņōņō wōt—menin letok an Kūrijm̧ōj ejāde.

Im ilo laļ in Anij ekar kōmanm̧ane, Ij keememej. Ij keememej in kalimjōk wut ko rej maroro wōt, aļaļ ko kar tili, bwiin mejatoto. Ij keememej in kappukot wut im berry ko me emeej aer būrōrō ak remouj im ron̄jake ainikien al ko ineeki ilo bōro im m̧oko im m̧ōn kabun̄jar ko, kajeeded “lan̄lōn̄ n̄an laļ,” ilo aō kappukot kōkaļļe in Kūrijm̧ōj ko me “lan̄ im mejatoto rej al” ippa im kipel eō n̄an keememej.

Juon iaan kabwilōn̄lōn̄ ko an jijen in ej an laļ in an Rikurijtin, ellāļo̧k jān wōrwōr ko ad, jej kōjerbal iien in n̄an kappukōt im kobrak mour kein ad kōn kōkaļļe in keememej ilo Kūrijm̧ōj.

Kūrijm̧ōj ej juon iaļ me jej etetalļo̧k n̄an seperd e kōj ilo iiō eo ekāāl. Im ilo ad etal ilo iaļ eo ļo̧k, em̧ōj kipel kōj n̄an ļōm̧ņak kōn kabwilōn̄lōn̄ eo an “Anij eo ej n̄an indeeo, Jeovari Kōm̧anm̧an jabōn ko jabōn laļ,”¹ eo eaar ļotak ilo wāween ettā ilo bukwon eo an Devid im kar “kirboke im ej babu lo menjer.”² Ilo ad kōm̧m̧an bwe Kūrijm̧ōj en juon iaaļ, bōlen jemaron̄ lo kōj make āinwōt rim̧aletlet em̧m̧aan im kōrā ro raan kein, bōlen kalimjōk iju ko ilan̄ ak wōjke maroro ko im lait ko erabōlbōl ipeeļakid, “m̧ōņōņō kōn kanooj eļap lan̄lōn̄”³ kōn kōkaļļe ko im̧aad n̄an tōl iaļ eo ad ļo̧k n̄an Jisōs Kraist, Eo ej “meram̧ in laļ.”⁴ N̄e jej et bwiin juon men ilo mejatoto ilo jijen in, bōlen ej n̄an kakeememej kōj n̄an boktok ippād tok mennin letok ko n̄an leļo̧k n̄an “Nejin Anij emour”⁵—ejjab “kooļ, ijur, im mōr”⁶ ak kabun̄-jar in kaarmejet “bōro e rup im jetōb ettā.”⁷ Im n̄an ro ilubwilijid rej iakwe im lale ajri ro, bōlen jej āinwōt seperd ro raan kein ej “lale bwijin sip ko [ad],”⁸ im ron̄jake enjeļ ro an laļin Irooj eaar jilkintok kōn karuwainene eo n̄an “jab mijak,” kōnke rej litok tōl ko n̄an ia eo jenaaj loe Rilo̧mo̧o̧r eo ie.⁹ Ta jejjab keememej in unoojdikdik kōn “jerbal ko rem̧m̧an eļap lan̄lōn̄” ilo lojiln̄in ajri ro nejid āinwōt juon naan in kam̧m̧ool? Bwe elan̄n̄e, bwilōn̄ āinwōt ajri, renaaj ļak loi kōļar būrōrō ko im maroro ko, gold im mouj an Kūrijm̧ōj, ren keememej en̄taan eo ewāppen im erreo an pinmuur an Ripinmuur, Jisōs Kraist, eo ej letok n̄an er mennin letok eo an lo̧mo̧o̧r im mour indeeo.

Kūrijm̧ōj ej kōm̧m̧an bwe jen kōm̧m̧ane juon iaļ ekwojarjar n̄an Betleem n̄an bōk juon ad make kam̧ool kōn Rilo̧mo̧o̧r, Jisōs Kraist, innām ineek m̧aanļo̧k kam̧ool eo kōn juon lo im ne im pā ko repojak n̄an “kōjeļļā kake peļaakin laļ”¹⁰ im kwaļo̧k aolep men ko jejeļā kake E. Jemaron̄ kōm̧m̧an ial n̄an Rilo̧mo̧o̧r ilo ad keememej.

Anij ej letok n̄an kōj mennin letok in keememej bwe jen jab meļo̧kļo̧k eo Riletok, bwe jen en̄jake iakwe eo An ejjeļo̧k jon̄an n̄an kōj im ekkatak iakwe E. Rikanaan eo etto Moronai ekar kakkōl kōj n̄an keememej bwe “mennin letok otemjej em̧m̧an ej itok jān Kraist.”¹¹ Rilo̧mo̧o̧r eo ad ej letok menin letok ko ejjab āinwōt an laļin letok—jidik wōt iien, jab likio, im ekkā aer rup. Jisōs Kraist ej letok mennin letok ko indeeo, bar mennin letok ko raorōk, ekoba:

• Mennin letok eo an Jetōb, āinwōt māletlet, jeļāļo̧kjeņ, naan in kam̧m̧ool, im tōmak.¹²

• Menin letok eo an Jetōb Kwojarjar.

• Mennin letok eo an mour indeeo.

Im ilo ad reilokļo̧k iumin aetok in juon mour ioon “mennin letok em̧m̧an” reļļap ak reddik me rekar itok n̄an mour ko ad, jemaron̄ lo pein Irooj an kōjpārok kōj, kōkajoor kōj, im letok aenōm̧m̧an.

Jet iien kōļmenļo̧kjeņ im būruōd rej etal etoļo̧k jān E, An kōm̧m̧an ej kwaļo̧k n̄an kōj ke Irooj ejjab meļokļo̧k kōj—ilo Kūrijm̧ōj ak jabdewōt iien. Irooj em̧ōj an kwaļo̧k ke aolepen jej eddāp ioon pā ko Pein.¹³ Ej aolep iien dāpij kallim̧ur ko An. Ej keememej bujen ko Eeaar kōm̧m̧ani ippād im ro jemād. Ej ron̄ im keememej jar ko ad n̄an Jemedwōj Ilan̄, jekdo̧o̧n n̄e jej bukwelōlō ak akweļap ippān jān aor ko ad ak kajjitōk ko ilo būruōd. Ej keememej, āinwōt an Būreejtōn Nelson kar katakin, n̄an “bōk koņaan ilo mour ko an ro otemjej rej tōmak ilo E.”¹⁴ Ej keememej in jeorļo̧k ad bōd aolep iien jej ukweļo̧k. Ej keememej in kōnono n̄an kōj jān jeje ko rekwojarjar im rikanaan ro n̄an jipan̄ kōj kappukōt iaļ eo ad n̄an ad ro̧o̧lļo̧k—jekdo̧o̧n ewi jon̄an ad jebwābwe im n̄an n̄āāt. Im E ej keememej in jilikintok Jetōb eo An n̄an pād wōt ippād n̄e jej kijejeto in kōjparok kallim̧ur ko ad rekwojarjar im “keememej e aolep iien.”¹⁵

Būreejtōn Spencer W. Kimball ekar katakin: “N̄e kwoj lale dictionary eo n̄an lale ewi naan eo eaorōk tata, … [emaron̄] keememej Kōnke kom̧ kar aolep kōm̧m̧ani bujen ko[,] … aikuj eo ad eļaptata ej n̄an keememej.” Ekar waanmaanļo̧k, “Unin an aolep etal n̄an kweilo̧k in kwojkwoj aolep Jabōt—n̄an bōk kwojkwoj eo im [n̄an] ron̄jake an pris ro jar bwe ren ‘keememej E iien otemjej im kōjparok kien ko An ko Eaar leļo̧k n̄an er.’ … Keememej ej naan eo. Keememej ej naan būrookraam̧ eo.”¹⁶

Keememej Anij ej im̧we kōj n̄an tile kajoor eo an iien ko an jetōb im kipel kōj n̄an jerbal ilo wāween eo an anij. Ļōmņak kōn katak kein me Būreejtōn Nelson ekar kipel kōj n̄an keememeji.

• “Komin kaanjo̧ik Anij ilo mour ko ami” im “leļo̧k n̄an E juon ajej eo ejim̧we an iien eo ami.”

• “Kappukot im kōtmāne kabwilōn̄lōn̄ ko.”

• “Kabōjrake poktak ilo mour eo … am̧”¹⁷ im erom̧ juon rikaenōm̧m̧an.¹⁸

Kūrijm̧ōj emaron̄ juon iien em̧m̧an n̄an jerbale karuwainene kein im boktok anemkwoj n̄an ad keememej in ļōmņak kōn Jisōs Kraist, im pidodo ad reilikļo̧k n̄an kabwilōn̄lōn̄ eo an ļo̧tak eo An, im en̄jake im jerbal jemjerā eo em̧m̧anļo̧k ippān ajri ro jet nejin Anij. Kein kōkaļļe in kemeemej ko an Kūrijm̧ōj naaj ikutkut an pidodo kili ilo ad:

• Keememej in kajeeded naan in Kūrijm̧ōj n̄an ro m̧ōttad, baam̧le ko ad, im ro jet

• Keememej in leļo̧k mennin letok ko kwaļo̧ki ilo iakwe.

• Keememej in jouj n̄an ro raikuj im kea n̄an ro rej deļo̧n̄e m̧oko m̧ōd.

• Keememej in kameej aorōkin ippān doon ko an baam̧le im iminene ko me rej kōm̧m̧an bwe Kūrijm̧ōj en oktak.

Elōn̄ ro ilo iien in, iakwe eo am n̄an keppooj ejja m̧ōn̄ā ko wōt, bar bwebwenato kōn ejja bwebwenato ko an baam̧le, im kainōknōk wōjke in Kūrijmōj kōn men ko jej kwāļo̧ki kajjojo iiō rej m̧ōttan men ko raorōk me jej dāpij ikdeelel eo ad n̄an keememej iien em̧m̧an ko me raorōk ippād. M̧ōn̄ā ko rejenolo̧k, jet bwebwenato, im kōkadudu ko an holiday me rej jerbal āinwōt kein kakeememej ko ad. Ikdeelel eo ad ekajoor bwe jen iakwe jouj ilo iien in emaron̄ kūr kōj n̄an kōņaan eo ad bwe jen kam̧m̧oolol. Kain iakwe in ijenolo̧k me ej pād ippād ilo iien Kūrijm̧ōj ej bar juon iien em̧m̧an kar likūt im̧add n̄an kajejjōt kōtōpar ko ad im jerbal ko ad ioon Jisōs Kraist:“Keememej, keememej bwe ej ioon ejm̧aan in ad Ripinmuur, eo ej Kraist, eo Nejin Anij, bwe kom̧ij aikuj kalōk pedped ko ami.”¹⁹ Keememej bwe ilo ad epaakelok jem̧ļo̧k in juon iiō im kōm̧m̧ane iaaļ in ad n̄an eo ekāāl—āinwōt em̧m̧aan im kōrā ro remāletlet, āinwōt seperd ro rej lale—bwe ej kōn kajoor in pein Irooj²⁰ āindein jej kōm̧m̧an.

Kiiō, jekdo̧o̧n ia eo kwoj jokwe ie ilo laļin, keememej in mejmej karuo n̄an kōkaļļe ko me rej kipel eok n̄an kappukot Kraist. Ilo aolep men jej bōk ad iien ie ilo iiō in, kōn aolep naan in iak-iakwe, n̄an aolep armej, jen jab likjab in keememej Riletok eo em̧ool—E eo ejamin meļo̧kļo̧k kōj im ej letok n̄an kōj kajoor n̄an keememej E kōn Jetōb eo An, ilo iien Kūrijm̧ōj im ilo aolep iien. E ej boktok “lan̄lōn̄ n̄an laļ” im kipel būruōd n̄an “kepooj jikin”²¹ n̄an bōk ad Kiin̄. E ej pedped eo em̧ool jej em̧akūtkūt ie. E ej Meram̧ in Laļ im Nejin Anij eo emour. Ij kam̧ool ilo āt eo Etan, em̧ool Jisōs Kraist, amen.