“Itok, Jen Nebar E”

Ro jeiū im jatū rejitenbōro, ej bar juon iien m̧ōņōņō n̄an keememej Kūrijm̧ōj jijen in ilo ad keememej ļotak eo an ad Rilo̧mo̧o̧r im Ripinmuur, Irooj Jisōs Kraist.

Ej juon iien ekwojarjar aolep iien n̄e juon ajri ej ļotak. Alooje m̧ōņōņō eo an juon iaan ļaddik ro jibum̧ ej jibūri nin̄nin̄ eo jatin.

[video]

Ejjab menin ilbōk bwe ilo bon̄on eo ekwojarjar enan̄in 2,000 iiō ko remootļo̧k juon jikin edik ilo Betleem, ribōktok ennaan ro jen lan̄ raar al kōn m̧ōņōņō! Enjeļ eo eaar katakin seperd ro kōn m̧ool in eaorōk:

“Lo, Ij bōkwaj n̄an kom̧ naan ko rem̧m̧an kōn lan̄lōn̄ eļap, eo ej n̄an aolep armej.

“Bwe rainin e ļotak n̄an kom̧ ilo jikin kweilo̧k an Devid, Rilo̧mo̧o̧r, E Kraist Irooj.”¹

Im kiiō, ro jeiū im jatū, “Itok, jen nebar E.”²

Āinwōt elōn̄ iami, Kūrijm̧ōj ekar oktak n̄an eō ilo iiō ko m̧aantak. Ememļo̧kjeņ eo aō ke iaar ajri ekar pedped ioon Great Depression ilo 1930 eo. Ekar jabwe jāān. Menin letok ko rekar aorōk.

Ro jinō im jema rekar kōm̧m̧an bwe Kūrijm̧ōj en aibojooj n̄an n̄a im ajri ro jeiū im jatū. Aolep iiō kōmij āinwōt “Santa” n̄an baam̧le ko jet. Kōm kar kepooj menin leļo̧k ko rekkar im būkiļo̧k ilo joteen eo m̧okta jen Raan in Kūrijm̧ōj. Ke kōmij etal jān m̧weo m̧weer, aer iak-iakwe im obrak mejeer kōn dānnin kōmjaaḷaḷ eaar bōktok n̄an kōm m̧ōņōņō in leļo̧k eo em̧ool.

Em̧m̧an ippa al in Kūrijm̧ōj—im ej wōt n̄an kiiō. Aolep iiō, em̧m̧an ippam̧ro Sister Nelson ron̄jake im al al eo Handel’s Messaia. Em̧m̧an ippa meļeļein naan in Hebraic eo hallelujah. Lukkuun meļeļein “nebar Irooj Anij Jeova.”³ Al ko kar al kaki ilo oratorio in rejjab jerbal wōt n̄an ļotak eo an Irooj ak n̄an An irooj ioon taujin iiō:

Ilo iien eo ke ej em̧m̧an detta iaar jino bōk juon naan in kam̧ool kōn Anij Jemān im Nejin Emake Wōt, Jisōs Kraist. Iaar jeļā kōn n̄a make bwe Jisōs Kraist ekar ļotak jān virgin Meri, juon “jāpe e aorōk im kar kāālete.”⁵ Ijeļā bwe E ej lukkuun Nejin Anij⁶ im bwe ej unjen aolep bwebwenato an aolep armej.

Baj ļōmņak kōn menin kabwilōn̄lōn̄ eo Jisōs Kraist ekar kōm̧m̧ane—ekkar n̄an ankilaan Jemān! Jisōs eaar baj wōt juon Anij ke Eaar kōņaan itok n̄an laļ in n̄an kadedeļo̧k jerbal eo ej make wōt aorōk n̄an kōj kajjojo. Kar juon jerbal n̄an lo̧mo̧o̧ren mour im ukōt mour. Juon jerbal me ejjeļo̧k juon iaad emaron̄ kōm̧m̧ane n̄an kōj make.

Rilo̧mo̧o̧r “eaar en̄taan kōn metak im kaen̄taanan ko im kapo ko otemjeļo̧k”⁷ bwe E en jeļā “ekkar n̄an kanniōk ekōjkan jipan̄ [kōj] ekkar n̄an m̧ōjņo̧ ko [ad].”⁸

Ilo allōn̄ ko rej mootļo̧k, iaar katak eļapļo̧k kōņ metak im kajoor eo an. Būruwō eaar epaakeļo̧k ad Rilo̧mo̧o̧r ilo aō kar kajjieon̄ in pijaik en̄taan eo An. Ļōmņak eo aō ilo kanniōk eban keidi ewi jon̄an An kar bōk Ioon Make aolep metak, aolep jerawiwi, aolep en̄taan, im aolep kaen̄tanaan ko an aolep ro renaaj mour!

Ilo aolep jerbal in tūriam̧o me ej kwaļo̧k meļeļe an kanniōk ak meļeļein, Rilo̧mo̧o̧r eaar leļo̧k E Make n̄an en̄taan ilo jetōb im kanniōk eo ban kōmeļeļeiki.

Jej wūjtake Nin̄nin̄ eo ilo Betleem kōnke tokālik E kar bōk, en̄taan eo ejjeļo̧k jemļo̧kin ilo Jikin Kallib Gethsemane im ioon Debwāāl eo. Menin letok ej pinmuuri kōj kajjojo ilo ad kāālet n̄an ukweļo̧k im ļoor E. Innām, kōn jerbal eo An ioon laļin, Eaar jerkak jān ļōb ilo raan eo kein kajilu, letok n̄an kōj kajjojo kōjeraam̧m̧an in jerkakpeje eo ejej uwaan n̄an mour ālkin mej.

Ilo jijen in, emakijkij ad al ak ba, “Kōmij kōņaan lewaj naan in mere Kūrijm̧ōj.” Ro jeiū im jatū rejitenbōro, kōtmāne eo an būruwō n̄an kajjojo iami joteenin elōn̄ m̧ōttan ko. Ilo m̧ool, ejjab aō kōņaan n̄an kom̧; ak ej aō jar n̄an kom̧ ilo iien Kūrijm̧ōj in ekwojarjar.

Juon, ij jar bwe kwonaaj lukkuun en̄jake, iakwe eo an ad Rilo̧mo̧o̧r ejjeļo̧k jemļo̧kin n̄an eok make. Jisōs eaar jeļā kajjiem jen mour eo m̧okta. E ejeļā im ej lo eok kiiō. E ej lo am̧ m̧ōņōņō im am̧ būrom̧ōj. E eaar iooni aolepeer.

Ewōr Ippān tūriam̧o eo eweeppān kōn apan̄ im m̧ōņōņō ko am̧ aolep iien kwoj bun̄ m̧aanļo̧k ilo jim̧we, ilo iien ko rem̧m̧an im nana.

Ij jar bwe kwonaaj bōk kam̧ool eo am̧ make bwe Jisōs Kraist ej Nejin Anij, bwe E epād ippān aolep kajoor, im kōn wōt pinmuur in en̄taan ko An kar letok, kwojjab aikuj en̄jake bwe kwoj make jelm̧ae apan̄ ko an mour in. Ilo am̧ lukkuun kajjitōk, kappukot, im kaļļaļļaļ,⁹ kwonaaj bōk An kajoor n̄an jipan̄ eok, n̄an kōkajoorļo̧k eok, im n̄an kōmour eok.¹⁰

Ij jar bwe kwonaaj bōk likieo in Pinmuur eo an Rilo̧mo̧o̧r ilo ukweļo̧k kajjojo raan, kakwojarjarļo̧k mour eo am̧, im pukot tōl an lan̄ ilo aolep men ko kwoj kōm̧m̧ani. Ilo naan ko jet, ij jar kōn kwe n̄an en̄jake m̧ōņōņō aolep iien n̄an ļōmņak kōn selestial.

Ij bar jar bwe kwonaaj kōjerbal holiday jijen in n̄an jino juon jijen in kabun̄jar eļap am̧ make. Jino bar ekkatak katak ko im kōn Pinmuur eo an Jisōs Kraist. Ejjeļo̧k juon ioon laļin ej iakwe eok jen E. Ejjeļo̧k juon ijin emeļeļeļo̧k kōn kwe ak lukkuun jeļā būrom̧ōj ko am̧ im m̧ōjņo̧ ko am̧. Ejjeļo̧k juon ioon laļin ewōr an kajoor jen Jisōs Kraist. Ejjeļo̧k juon ijin ekijerjerlo̧k bwe kwon erom jabdewōt men eo kokōņaan erom. Ejjeļo̧k juon ej akweļap n̄an Jemen ilo etam̧ jen E.

Irooj Jisōs Kraist ej ad Rilo̧mo̧o̧r im ad Ripinmuur. E ej nejin Anij, eo Rikwojarjar in Israel. E eo kar Kapiti.¹¹ Ium̧win tōl eo an Jemed, E ej Rikōm̧anm̧an eo an aolep men kar kōm̧anm̧ane.¹² Jisōs Kraist ekar Jeova Eļap, Anij an Kallim̧ur M̧okta.¹³ E ekar Immanuel eo kar kallim̧ur kake.¹⁴ E ej ad Riwaanjon̄ak eļap¹⁵ im ad Rijojomar ippān Jemān.¹⁶ Kōn wōt gospel in An em̧ōj an jepļaaktok, aolep kōjeraam̧m̧an ko kōn An priesthood rej pād n̄an aolep armej ilo aer itok n̄an E im weppān ilo E.

Ro jeiū im jatū, jen mour ilo jetōbin “hallelujah,” n̄an nebar Irooj Anij Jeova. Ilo Kūrijm̧ōj jijen in eaiboojoj, itok, jen nebar E, Kraist Irooj!

Ijeļā bwe Anij emour! Jisōs ej RiKraist eo! En̄in ej Kabun̄ eo An. Ej tōl Jepļaaktok in gospel eo An. Eo Ij kam̧ool ilo āt eo ekwojarjar etan Jisōs Kraist, amen.