ព្រះគ្រីស្ទប្រសូតមកដើម្បីសង្គ្រោះ
ការប្រជុំធម្មនិដ្ឋានបុណ្យគ្រីស្ទម៉ាស់របស់គណៈប្រធានទីមួយឆ្នាំ ២០២៣
ថ្ងៃ អាទិត្យ ទី ៣ ខែ ធ្នូ ឆ្នាំ ២០២៣
ខ្ញុំចូលចិត្តបុណ្យគ្រីស្ទម៉ាស់ ! ដំណើររឿងព្រះគម្ពីរ តន្ដ្រី និងអារម្មណ៍នៃសុឆន្ទៈ និងសេចក្ដីសប្បុរសហាក់ដូចជាជោរជន់ច្រើនលើផែនដីនៅអំឡុងពេលដ៏ពិសិដ្ឋនេះ ។
អស់ជាច្រើនឆ្នាំ ភរិយាខ្ញុំ និងខ្ញុំបានទៅប្រទេសជាច្រើនក្នុងអំឡុងរដូវបុណ្យគ្រីស្ទម៉ាស់ ។ យើងចូលចិត្តមើលទំនៀមទម្លាប់ និងរបៀបផ្សេងៗជាច្រើន ដែលគេប្រារព្ធធ្វើបុណ្យគ្រីស្ទម៉ាស់ ។ ការគិតអំពីបទពិសោធន៍ទាំងនេះបានជួយខ្ញុំឲ្យដឹងថា បុណ្យគ្រីស្ទម៉ាស់គឺសម្រាប់មនុស្សគ្រប់គ្នា ។ វាគឺសម្រាប់កុមារ ឪពុកម្ដាយ ជីដូនជីតា ពូមីង និងបងប្អូនជីដូនមួយ ។ វាគឺសម្រាប់មនុស្សដែលមានជីវិតកំពុងដើរយ៉ាងរលូន និងសម្រាប់អ្នកដែលរស់នៅដោយមានជំងឺ រស់ក្នុងភាពក្រីក្រ និងការសាកល្បង ។ វាគឺសម្រាប់អ្នកដែលរងគ្រោះដោយសង្គ្រាមដ៏ព្រៃផ្សៃ និងសម្រាប់អ្នកដែលរស់នៅក្នុងស្ថានភាពពេញដោយសន្តិភាព និងចម្រុងចម្រើន ។ វាគឺសម្រាប់អ្នកដែលព្យាយាមធ្វើតាមព្រះអង្គសង្គ្រោះ សម្រាប់អស់អ្នកមិនដែលឮពីព្រះនាមរបស់ទ្រង់ និងថែមទាំងសម្រាប់អ្នកដែលបដិសេធទ្រង់ទៀតផង ។ វាក៏សម្រាប់អ្នកដែលបានរស់នៅ មុនពេលទ្រង់បានប្រសូតមកផងដែរ ។ បុណ្យគ្រីស្ទម៉ាស់គឺសម្រាប់មនុស្សគ្រប់គ្នា !
បុណ្យគ្រីស្ទម៉ាស់គឺសម្រាប់មនុស្សគ្រប់គ្នា ពីព្រោះព្រះបានបញ្ជូនព្រះរាជបុត្រាទ្រង់មកឲ្យយើងទាំងអស់គ្នា និងសម្រាប់យើងម្នាក់ៗ ។១ « ដ្បិតមានបុត្រ១កើតដល់យើង » ។២
ដោយសារព្រះអង្គសង្គ្រោះបានប្រសូតមក រស់នៅដោយគ្មានអំពើបាប ធ្វើដង្វាយធួនដើម្បីយើង ហើយបានរស់ឡើងវិញ នោះយើងម្នាក់ៗនឹងទទួលបានអំណោយដ៏អស្ចារ្យនៃការរស់ឡើងវិញពីសេចក្ដីស្លាប់ ។ គ្មានព្រលឹងណាមួយដែលធ្លាប់បានរស់នៅលើផែនដីនេះ មិនទទួលបានអំណោយដ៏អស្ចារ្យនេះទេ ។ ក្រៅពីអំណោយនេះ « សេចក្តីដែលភ្នែកមិនដែលឃើញ ត្រចៀកមិនដែលឮ … គឺសេចក្តីនោះឯងដែលព្រះបានរៀបចំទុកសម្រាប់ពួកអ្នកដែលស្រឡាញ់ទ្រង់ » ។៣
មិនថាពេលវេលា ឬកាលៈទេសៈអ្វីនោះទេ ការប្រសូតរបស់ព្រះអង្គសង្រ្គោះតែងតែជាហេតុផលមួយដើម្បីអររីករាយជានិច្ច ។ ទ្រង់បានយាងមកដើម្បីប្រទាន « សេចក្ដីសុខសាន្តនៅនាលោកិយនេះ និងជីវិតដ៏នៅអស់កល្បជានិច្ចនៅបរលោក » ដល់បុត្រាបុត្រីម្នាក់ៗរបស់ព្រះវរបិតាសួគ៌ ។៤
តាំងពីជំនាន់លោកអ័ដាម និងនាងអេវ៉ាមក មនុស្សសុចរិតបានទន្ទឹងចាំការប្រសូតរបស់ព្រះអង្គសង្គ្រោះ ដែលនឹងយាងមកផែនដីដើម្បីសម្រេចផែនការរបស់ព្រះវរបិតាសម្រាប់បុត្រាបុត្រីរបស់ទ្រង់ ។៥ អេសាយ និងនីហ្វៃបានព្យាករអំពីការប្រសូតរបស់ទ្រង់នៅក្នុងបរិបទនៃបេសកកម្មរបស់ទ្រង់ ។៦ ការប្រសូតរបស់ទ្រង់មិនអាចបំបែកចេញពីមូលហេតុ ដែលទ្រង់បានយាងមកផែនដីបានទេ ។
សូមគិតអំពី អាណា និងលោកស៊ីម្មាន ដែលបានឃើញព្រះឱរសយេស៊ូវ ហើយបានដឹងថា ព្រះឱរសនេះគឺជា « ពន្លឺសម្រាប់បំភ្លឺ »៧ ពិភពលោកទាំងមូល និងជាក្តីសង្ឃឹមសម្រាប់ការប្រោសលោះ ។៨ យើងមិនឆ្ងល់សោះឡើយថា ទេវតាបានជ្រើសរើសសារទាំងនេះ « ដំណឹងល្អដល់អ្នករាល់គ្នាពីសេចក្ដីអំណរយ៉ាងអស្ចារ្យដែលសម្រាប់បណ្ដាជនទាំងអស់គ្នា » ។៩ យើងអររីករាយ ពេលទារកកើតមក ប៉ុន្ដែការប្រសូតនេះ និងព្រះឱរសនេះគឺខុសពីគេ ។
ព្រះយេស៊ូវគ្រីស្ទ ដែលជាពន្លឺ និងជីវិតនៃពិភពលោកនេះ បានប្រសូតមកជាព្រះឱរសដ៏តូចមួយនៅក្នុងស្នូកដ៏ទន់ទាប ប៉ុន្តែមានផ្កាយថ្មីមួយបានបង្ហាញពីការប្រសូតរបស់ទ្រង់ ។ ព្រះគម្ពីរមរមនប្រាប់ពីព្រឹត្តិការណ៍ដ៏គួរឲ្យរំជួលចិត្តមួយ—គឺមួយថ្ងៃ មួយយប់ និងមួយថ្ងៃដែលមិនងងឹត—ដែលជាទីសម្គាល់នៃការយាងមករបស់ទ្រង់ ។ ទីសម្គាល់ប្រកបដោយអព្ភូតហេតុទាំងនេះត្រូវបានផ្តល់ឲ្យដើម្បីប្រកាសពីការមកដល់នៃពន្លឺលោកីយ៍១០ ដែលនឹងរំដោះយើងពីភាពងងឹតនៃអំពើបាប និងសេចក្ដីស្លាប់ ។ យើងអាចជួយចែកចាយពន្លឺរបស់ទ្រង់ជាមួយពិភពលោកបាន ។
នៅរដូវបុណ្យគ្រីស្ទម៉ាស់ សូម្បីតែកុមារតូចៗក៏អាចមានអារម្មណ៍ពីឥទ្ធិពលនៃសេចក្ដីស្រឡាញ់របស់ព្រះអង្គសង្គ្រោះយើងដែរ ។ ប៉ុន្មានឆ្នាំកន្លងទៅ កូនស្រីម្នាក់របស់យើងឈ្មោះ សុនយ៉ា បានសរសេរអំពីការសន្ទនាមួយ ដែលនាងមានជាមួយកូនប្រុសអាយុប្រាំឆ្នាំរបស់នាង ។
នាងបានសរសេរថា « អេនឌ្រូ បាននិយាយប្រាប់ខ្ញុំយប់នេះ ពេលខ្ញុំដាក់គាត់ឲ្យគេងថា ‹ ឆ្នាំក្រោយ កូននឹងមិនផ្ដោតខ្លាំងលើអំណោយទេ តែកូននឹងផ្ដោតលើអ្វីដែលកូននឹងថ្វាយព្រះយេស៊ូវវិញ › ។ ខ្ញុំបានសួរគាត់ថា តើគាត់បានគំនិតបែបនេះមកពីណា ហើយគាត់ប្រាប់ខ្ញុំថា មកពីគ្រូបង្រៀនថ្នាក់កុមាររបស់គាត់ ។ អស្ចារ្យមែនថ្នាក់កុមារ ! »១១
ប្រាកដណាស់ ។ អស្ចារ្យមែនថ្នាក់កុមារ ។ ឥឡូវនេះ ១៤ ឆ្នាំក្រោយមក អេនឌ្រូ កំពុងបម្រើបេសកកម្ម និងចំណាយពេលក្នុងរដូវបុណ្យគ្រីស្ទម៉ាស់នេះដើម្បីចែកចាយសារលិខិតអំពីព្រះយេស៊ូវគ្រីស្ទទៅកាន់អ្នកដទៃ ។ ថ្មីៗនេះ គាត់បានសរសេរថា « ព្រះយេស៊ូវបានប្រទានអ្វីគ្រប់យ៉ាងដល់យើង … [ហើយ]នឹងទទួលយកអំពើបាបរបស់យើងទាំងអស់ ។ នោះជាមូលហេតុដែលខ្ញុំមកបម្រើបេសកកម្មនេះ » ។១២
រដូវបុណ្យគ្រីស្ទម៉ាស់គឺជាពេលដ៏ពិសេសមួយ ដើម្បីគិតពីអ្វីដែលសំខាន់បំផុតដែលត្រូវផ្តល់ឲ្យ ។ យើងអាចជួយអ្នកដទៃឲ្យមានអារម្មណ៍ « រំភើបនៃសេចក្ដីសង្ឃឹម »១៣ដែលជាលទ្ធផលនៃការស្គាល់ព្រះអង្គសង្រ្គោះ និងការថ្វាយដួងចិត្តរបស់យើងដល់ទ្រង់ ។
កូនស្រីរបស់យើង អាលីសា បានលាចាកលោកដោយសារជំងឺមហារីកកាលពីប៉ុន្មានឆ្នាំមុន ហើយខ្ញុំពេញចិត្តទស្សនវិស័យរបស់នាងអំពីបុណ្យគ្រីស្ទម៉ាស់ ទោះជានាងបានប្រឈមមុខនឹងការព្យាករសុខភាពដ៏អាក្រក់ក៏ដោយ ។ នាឆ្នាំមួយ នាងបានសរសេរ ៖
« ខ្ញុំបានទទួលការភ្ញាក់ផ្អើលមួយសម្រាប់បុណ្យគ្រីស្ទម៉ាស់ ។ ជាកាដូ ដ៏ធំ មួយ ។… ខ្ញុំបានទទួលអ៊ីម៉ែល មុនបុណ្យគ្រីស្ទម៉ាស់ពីគិលានុបដ្ឋាយិកានៅការិយាល័យអ្នកឯកទេសជំងឺមហារីករបស់ខ្ញុំ ។ គាត់បាននិយាយថា ‹ រីករាយបុណ្យគ្រីស្ទម៉ាស់—គីសរបស់អ្នកបានតេស្ដវិជ្ជមានសម្រាប់ការផ្លាស់ប្តូរ [ ហ្សែនជាក់លាក់មួយ ] › ។ … តើការណ៍នេះមានអត្ថន័យយ៉ាងណាចំពោះខ្ញុំ ? ពួកគេបានអនុម័តឲ្យប្រើ … ថ្នាំ … ដែលរារាំងដល់ផ្លូវដែលផ្ដល់សញ្ញានៃកោសិកាមហារីក [ សម្រាប់អ្នកខ្លះដែលមានការផ្លាស់ប្តូរនោះ ] ។ វាមិនមែនជាថ្នាំព្យាបាលទេ តែជាថ្នាំអព្ភូតហេតុមួយ ដែលអាចបង្រួម … ការដុះគីសយ៉ាងលឿនបាន ។ … ជាអកុសល នៅទីបំផុត រាងកាយរកឃើញផ្លូវមួយយកឈ្នះវា ហើយជំងឺមហារីកក៏ត្រឡប់មកវិញ ។ … ប៉ុន្ដែខ្ញុំមានអារម្មណ៍ថា នរណាម្នាក់ទើបតែពន្យារពេលជីវិតខ្ញុំបានប៉ុន្មានខែទៀត ។ ហើយតើវាអាចជាអ្វីទៅ ? … រដូវក្ដៅបន្ថែមមួយទៀត ? រដូវឈប់សម្រាកមួយទៀតជាមួយនឹងកូនៗរបស់ខ្ញុំ ? ខ្ញុំយំ ពេលខ្ញុំបើកអ៊ីម៉ែលនោះ ហើយបានអរព្រះគុណព្រះចំពោះការភ្ញាក់ផ្អើលដ៏ល្អបំផុតដែលខ្ញុំមិនធ្លាប់មាននេះ » ។១៤
អាលីសា បានចំណាយពេលដ៏មានតម្លៃបន្ថែមទៀតជាមួយគ្រួសាររបស់នាង ។ នាងបានចែកចាយបទពិសោធន៍មួយ ដែលគ្រួសាររបស់ពួកគេបានមាន ពេលកំពុងយកអំណោយបុណ្យគ្រីស្ទម៉ាស់អនាមិកមួយឲ្យអ្នកជិតខាងម្នាក់ ។ វាបង្ហាញថា រាល់សេចក្ដីលម្អិតនៃការផ្ដល់អំណោយរបស់យើងប្រហែលជាមិនល្អឥតខ្ចោះជានិច្ចនោះទេ ។ នាងបានសរសេរ ៖
« យើងបានទម្លាក់អំណោយអាថ៌កំបាំង … នៅយប់មួយ ។ ពួកប្រុសៗបានគ្រោងរបៀបរត់គេចដ៏ល្អបំផុតរបស់ពួកគេ និងកន្លែងលាក់ខ្លួន ។
« សេម និយាយដោយម៉ឺងម៉ាត់ ទាំងដែលពីរនាក់ទៀតបានអោនមុខដោយភ័យៗ ថា ‹ តែក្នុងករណីដែលពួកគាត់ឃើញយើង … › ។ ‹ យើងគួរតែមានដុំបាល់ព្រិលខ្លះក្នុងដៃយើង › ។
« ជេមស៍ យល់ហើយ ។ ‹ អូខេ អ៊ីចឹង ។ គប់ឲ្យចំទ្វារដើម្បីបិទទ្វារឬ ? ›
« ‹ អត់ទេ › [ សេម ឆ្លើយ ] ‹ យើងគប់ឲ្យចំមុខគាត់កុំឲ្យមើលឃើញយើង › » ។១៥
អាលីសា បានចែកចាយការសន្ទនាដ៏គួរឲ្យស្រឡាញ់មួយទៀតជាមួយកូនប្រុសពៅរបស់នាងឈ្មោះ លូក ដែលមានអាយុត្រឹមតែប្រាំមួយឆ្នាំប៉ុណ្ណោះនៅពេលនោះ ។ នាងបានសរសេរ ៖
« យប់នេះ ពេលយើងគេងលើគ្រែរបស់គាត់ ដែលបំភ្លឺដោយភ្លើងពណ៌លម្អនៅពីលើបង្អួចរបស់គាត់ ខ្ញុំសួរគាត់ថា …‹ អ៊ីចឹង តើកូនចង់សូមអ្វីដែរ … ? ›
« ‹ មែនហើយ កូនអាចគិតដល់អ្វីមួយ › ។
« ‹ អូ ? ›
« ‹ វាអាចប្រើបាននៅគ្រប់រដូវ › ។
« ‹ អូ ? ›
« ស្ងាត់មួយសន្ទុះធំ ។ ‹ ការឱប និងការថើបពីម៉ាក់ › ។
« កូនសមនឹងទទួលបានការថើប ១០០ ដង និងការឱបដ៏ធំប៉ុនខ្លាឃ្មុំនៅពេលនោះ ។ ‹ កូនលូកឆ្កួតៗ កូនអាចឱប និងថើបម៉ាក់បានគ្រប់ពេល ! ›
« តែពេលខ្ញុំដើរផុតទ្វារ ខ្ញុំពិបាកចិត្តបន្ដិចដែរ ។ ខ្ញុំគិតថា ប្រហែលជាវាមិនពិតនោះទេ ។ ខ្ញុំមានអំណរគុណយ៉ាងខ្លាំងដែលឆ្នាំនេះ គាត់នៅអាចឱបថើបខ្ញុំបាន និងបានអំណោយទៀត » ។១៦
ខ្ញុំភ្ញាក់ផ្អើលជាពិសេសនឹងគំនិតរបស់ អាលីសា អំពីក្តីសង្ឃឹមនៅជុំវិញបុណ្យគ្រីស្ទម៉ាស់ ។ នាងបានសរសេរ ៖
« ខ្ញុំចាប់អារម្មណ៍នឹងក្តីសង្ឃឹមយ៉ាងខ្លាំងក្នុងរដូវកាលនេះ ។ កាលខ្ញុំគិតអំពីអព្ភូតហេតុរបស់ព្រះគ្រីស្ទ និងអំណោយជាច្រើនរបស់ព្រះ ខ្ញុំមានក្ដីសង្ឃឹមចំពោះអ្វីៗគ្រប់យ៉ាង និងមនុស្សគ្រប់គ្នា ។ មិនចាំបាច់តែការមានក្ដីសង្ឃឹមថា អ្វីៗគ្រប់យ៉ាងនឹងល្អឥតខ្ចោះនោះទេ តែថាអ្វីៗគ្រប់យ៉ាងនឹងមិនអីទេ ហើយនៅទីបំផុត សេចក្ដីល្អនឹងយកឈ្នះ [ បាន ] ។ ក្នុងជីវិតយើងទាំងអស់គ្នា ។ ខ្ញុំគិតថា វាមិនយឺតពេលពេកនោះទេសម្រាប់អព្ភូតហេតុ សម្រាប់ការផ្លាស់ប្តូរ សម្រាប់សេចក្ដីសុខសាន្ដ ។ ខ្ញុំពិតជាជឿលើរឿងនោះនៅក្នុងចិត្តខ្ញុំយ៉ាងស្មោះសរ និងទាំងស្រុង ។ ខ្ញុំសារភាពថា វាហាក់ដូចជាងាយស្រួលជាងដើម្បីមានអារម្មណ៍ក្ដីសង្ឃឹមនេះសម្រាប់អ្នកដទៃ ហើយវាពិបាកអនុវត្តដោយខ្លួនឯងជាង ។ ប៉ុន្តែខ្ញុំកំពុងរៀន ។ ‹ ជឿគ្រប់ទាំងអស់ សង្ឃឹមគ្រប់ទាំងអស់ ស៊ូទ្រាំគ្រប់ទាំងអស់ › ។ សាមញ្ញ ។ ស្រស់ស្អាត » ។
ពេលនិយាយពីកូនប្រុសរបស់នាង នាងបានបន្តថា « នៅរាត្រីមុនបុណ្យគ្រីស្ទម៉ាស់ ជេមស៍ បានលេង [ បទចម្រៀងគ្រីស្ទម៉ាស់ ហើយខ្ញុំ ] ស្រឡាញ់ទំនុកបទចម្រៀងនេះណាស់ ៖
ពួកគ្រីស្ទានល្អ អររីករាយ
ក្នុងចិត្ត និងព្រលឹង និងសំឡេង
ឥឡូវអ្នកមិនត្រូវខ្លាចផ្នូរឡើយ ៖
សេចក្ដីសុខសាន្ដ ! សេចក្ដីសុខសាន្ដ !
ព្រះយេស៊ូវគ្រីស្ទប្រសូតមកដើម្បីសង្គ្រោះ !
ហៅអ្នកម្នាក់ ហើយហៅអ្នកទាំងអស់គ្នា
ឲ្យទទួលបានទីដ៏អស់កល្បជានិច្ចរបស់ទ្រង់ ៖
ព្រះគ្រីស្ទប្រសូតមកដើម្បីសង្គ្រោះ !
ព្រះគ្រីស្ទប្រសូតមកដើម្បីសង្គ្រោះ ! »១៧
ទ្រង់ប្រសូតមកដើម្បីសង្គ្រោះ ។ ដើម្បីសង្គ្រោះបងប្អូន និងដើម្បីសង្គ្រោះខ្ញុំ ។ ឱ នោះជាអំណោយដែលមិនអាចប្រៀបផ្ទឹមបាន ដែលមានតែទ្រង់ប៉ុណ្ណោះទើបអាចប្រទានឲ្យបាន ។ មិនថាកាលៈទេសៈបច្ចុប្បន្នរបស់យើងយ៉ាងណាទេ សូមឲ្យយើងអាចដឹងយ៉ាងពេញលេញពីអំណោយរបស់ទ្រង់ក្នុងជីវិតរបស់យើងក្នុងរដូវបុណ្យគ្រីស្ទម៉ាស់នេះ ។
នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕