ព្រះគ្រីស្ទ ព្រះអង្គសង្រ្គោះរបស់យើងប្រសូត្រហើយ
ការប្រជុំធម្មនិដ្ឋានពិធីបុណ្យគ្រីស្ទម៉ាស់របស់គណៈប្រធានទីមួយ ឆ្នាំ ២០២៣
ថ្ងៃអាទិត្យ ទី ៣ ខែ ធ្នូ ឆ្នាំ ២០២៣
បងប្អូនប្រុសស្រីជាទីស្រឡាញ់ រីករាយថ្ងៃបុណ្យគ្រីស្ទម៉ាស់ !
យើងជួបជុំគ្នាដោយអំណរគុណនៅក្នុងការប្រជុំធម្មនិដ្ឋាន ពិធីបុណ្យគ្រីស្ទម៉ាស់ជាមួយនឹងគណៈប្រធានទីមួយរបស់យើង ។ មិនថាបងប្អូននៅទីកន្លែងណាក្នុងរដូវបុណ្យគ្រីស្ទម៉ាស់នេះទេ សូមបងប្អូនអាចមានអារម្មណ៍នៃសេចក្តីស្រឡាញ់របស់ព្រះនៅក្នុងពិធីអបរអរសាទររបស់ព្រះយេស៊ូវគ្រីស្ទ ដែលជាមូលហេតុចម្បងនៃពិធីបុណ្យគ្រីស្ទម៉ាស់ ។
ពិធីបុណ្យគ្រីស្ទម៉ាស់គឺជាពេលវេលានៃតន្ត្រី ក្លិន និងរសជាតិ ការទន្ទឹងរង់ចាំ និងចិត្តសប្បុរស ។ ជាពេលវេលានៃការជួបជុំគ្នា មិនថាយើងរស់នៅជិត ឬឆ្ងាយនោះទេ ។
ជាញឹកញាប់ បុណ្យគ្រីស្ទម៉ាស់ក្លាយទៅជាពិធីបុណ្យគ្រីស្ទម៉ាស់ នៅពេលយើងនាំអំណរនៃពិធីបុណ្យនេះទៅឲ្យអ្នកដទៃដោយស្ងៀមស្ងាត់ ។ គ្រួសារជាច្រើនជួយដល់អ្នកខ្វះខាតដោយផ្ញើជាអំណោយជំនួសឲ្យលោកតាសាន់តា ។ បុគ្គលជាច្រើនបំភ្លឺពិភពលោកដោយពន្លឺនៃព្រះយេស៊ូវគ្រីស្ទ ។
អនុស្សាវរីយ៍ពិធីបុណ្យគ្រីស្ទម៉ាស់មួយដែលបានរំឭកឡើងវិញ គឺជាអនុស្សាវរីយ៍បុណ្យគ្រីស្ទម៉ាស់ដែលបានធ្វើឡើងជាថ្មី ។ មនុស្សប្រារព្វពិធីបុណ្យគ្រីស្ទម៉ាស់ម្តងហើយម្តងទៀត នោះកម្រងអនុស្សាវរីយ៍ពិធីបុណ្យគ្រីស្ទម៉ាស់ក្លាយទៅជាប្រពៃណី ដែលអាចធ្វើឲ្យយើងកាន់តែមានសេចក្ដីស្រឡាញ់ចំពោះព្រះយេស៊ូវគ្រីស្ទ—ជាកូនចៀមនៃព្រះ ព្រះរាជបុត្រានៃព្រះវរបិតាដ៏នៅអស់កល្បជានិច្ចដែលជាព្រះអង្គសង្គ្រោះនៃមនុស្សលោក ។១
ប្រសិនបើបងប្អូនមានអនុស្សាវរីយ៍នៃពិធីបុណ្យគ្រីស្ទម៉ាស់ដែលបងប្អូនចូលចិត្ត សូមឲ្យបងប្អូនរីករាយនៅក្នុងអនុស្សាវរីយ៍ និងប្រពៃណីទាំងនោះដោយអំណរក្នុងរដូវកាលនេះ ។ ប្រសិនបើ បងប្អូននៅកំពុងរកប្រពៃណីនៃពិធីបុណ្យគ្រីស្ទម៉ាស់របស់បងប្អូននៅឡើយទេ នោះសូមឲ្យអនុស្សាវរីយ៍ និងប្រពៃណីទាំងនោះអាចនឹងធ្វើឲ្យសេចក្ដីស្រឡាញ់របស់បងប្អូនកាន់តែស៊ីជម្រៅចំពោះព្រះយេស៊ូវគ្រីស្ទ ហើយប្រទានពរដល់បងប្អូនរៀងរាល់ឆ្នាំ ។
តើឲ្យខ្ញុំសុំចែកចាយប្រពៃណីនៃពិធីបុណ្យគ្រីស្ទម៉ាស់ដែលគ្រួសារ ហ្គង ចូលចិត្តចំនួនបីបានដែរឬទេ ?
ដំបូង រៀងរាល់ឆ្នាំស៊ីស្ទើរ ហ្គង និងខ្ញុំចូលចិត្តមើលគ្រឿងតុបតែងលម្អដើមគ្រីស្ទម៉ាស់ម្ដងទៀតដែលប្រាប់អំពីដំណើររឿងនៃគ្រួសាររបស់យើង ។
នៅពេលជាគូស្វាមីភរិយាវ័យក្មេង ស៊ីស្ទើរ ហ្គង និងខ្ញុំបានចូលរៀនថ្នាក់បណ្ឌិតនៅប្រទេសអង់គ្លេស ។ យើងបានរស់នៅក្នុងផ្ទះជួលតូចមួយ ដោយពឹងលើកញ្ចប់ថវិកាដែលមានកំណត់ក្នុងនាមជាសិស្ស ។ យើងបានរាប់ប្រាក់កាក់របស់យើងមុនពេលទិញដើមគ្រីស្ទម៉ាស់ដ៏តូចមួយ សូម្បីតែ ឆាលី ប្រោន ក៏នឹងមានអារម្មណ៍សោកសៅដែរ ។
ស៊ីស្ទើរ ហ្គង មានគំនិតច្នៃប្រឌិត បានប្រើដង្គៀបគៀបខោអាវមកតុបតែងធ្វើជាទាហានអង់គ្លេសតូចៗសម្រាប់ដើមគ្រីស្ទម៉ាស់របស់យើង ។ គាត់បានធ្វើមួករោមខ្មៅ និងស្នាមញញឹមឲ្យទាហាននីមួយៗនោះ ។
អស់រយៈពេល ៤៣ ឆ្នាំ ទាហានអង់គ្លេសដែលធ្វើពីដង្គៀបខោអាវទាំងនេះបានឈរការពារនៅលើដើមគ្រីស្ទម៉ាស់របស់យើង ។ ទាហានទាំងនោះរំឭកយើងអំពីពិធីបុណ្យគ្រីស្ទម៉ាស់ដំបូងនៃអាពាហ៏ពិពាហ៏របស់យើង—កាលនៅឆ្ងាយពីផ្ទះ—ហើយពិធីបុណ្យគ្រីស្ទម៉ាស់ដែលជោគជ័យក្រោយៗមកទៀត ។
គ្រួសារកូនប្រុសរបស់យើងបានធ្វើ « រូបមនុស្សតូចៗ » ពីដង្គៀបហាលខោអាវ ។ រូបទាំងនោះពិពណ៍នាអំពីពួកអ្នកផ្សព្វផ្សាយសាសនានៅជុំវិញពិភពលោក ។ តើបងប្អូនមើលឃើញស្នាមញញឹមរបស់ពួកគេដែរទេ ? សម្លៀកបំពាក់គ្រប់សាសន៍ ? ស្លាកឈ្មោះ ? មានគេប្រាប់ខ្ញុំថាមានរូបមួយដូចខ្ញុំ ។
កម្រងអនុស្សាវរីយ៍មួយចំនួនរបស់គ្រឿងតុបតែងលម្អរបស់យើងទាំងនោះ រំឭកឡើងវិញនូវការចងចាំដ៏កក់ក្តៅរបស់មិត្តភ័ក្តិ និងបទពិសោធន៍នៅក្នុងកន្លែងនានា ។ កម្រងអនុស្សាវរីយ៍នៃក្បួនដង្ហែបុណ្យគ្រីស្ទម៉ាស់ ដ៏សប្បាយរៀងរាល់ឆ្នាំធ្វើឲ្យយើងញញឹម ។
ព្យាការី អាលម៉ា ថ្លែងទីបន្ទាល់អំពីផែនដីដែលវិលជុំវិញខ្លួនតាមទម្រង់ទៀងទាត់ ដែលបញ្ជាក់ថាគឺមានព្រះមួយអង្គ ។ ពិធីបុណ្យគ្រីស្ទម៉ាស់គឺជាពេលវេលាជាក់លាក់មួយនៅក្នុងភពផែនដីដែលមានថ្ងៃចំនួន ៣៦៥ វិលជុំវិញព្រះអាទិត្យជារៀងរាល់ឆ្នាំ ។ នៅពេលការវិលជុំវិញប្រចាំឆ្នាំនេះនាំយើងត្រឡប់ទៅរដូវពិធីបុណ្យគ្រីស្ទម៉ាស់ដ៏មានតម្លៃជារៀងរាល់ឆ្នាំ ខ្ញុំគិតអំពីអ្វីដែលអ្នកនិពន្ធ អ៊ី ប៊ី វ៉ាយ បានសរសេរអំពី « រង្វង់នៃពេលវេលា » ។២
លោកបានណែនាំថាមានតែជាមួយនឹងបទពិសោធន៍ប៉ុណ្ណោះដែលយើងយល់ថា « ពេលវេលាពិតជាមិនវិលនៅក្នុងរង្វង់មូលទាល់តែសោះ » ។ រង្វង់ពេលវេលាអាចហាក់ដូចជា « បានបង្កើតឡើងយ៉ាងល្អឥតខ្ចោះ មិនផ្លាស់ប្តូរ អាចទាយទុកបាន គ្មានការចាប់ផ្តើម ឬទីបញ្ចប់ឡើយ » ។ ប៉ុន្តែមានតែពេលយើងនៅក្មេងប៉ុណ្ណោះដែលយើងស្រមៃថា យើងអាចរស់នៅមួយថ្ងៃពេញ ហើយបញ្ចប់ដោយមិនមានការផ្លាស់ប្តូរអ្វីទេ ។
សម្រាប់ខ្ញុំ ការមកដល់នៃពិធិបុណ្យគ្រីស្ទម៉ាស់ម្តងៗពេលខ្លះដូចនៅដដែល ហើយពេលខ្លះដូចជាខុសគ្នាអំពីរបៀបដែលពេលវេលា ( និងលំហ ) អាចមានលក្ខណៈជាបន្ទាត់ និងជារង្វង់ក្នុងពេលដំណាលគ្នា ។ តើ « ផ្លូវតូច ហើយចង្អៀត »៣ និង« វង់មួយដ៏នៅអស់កល្បជានិច្ច »៤ អាចជាការពិពណ៌នាបំពេញបន្ថែមអំពីភាពពិតនៃសេចក្តីសញ្ញាដែលផ្តោតទៅលើព្រះគ្រីស្ទដែលជាព្រះឱរសប្រសូត្រនៅបេថ្លេហិមដោយរបៀបណា ។
ក្នុងន័យនេះ ផ្នែកមួយនៃពិធីបុណ្យគ្រីស្ទម៉ាស់ដ៏មហស្ចារ្យសម្រាប់ខ្ញុំគឺត្រូវធ្វើជាកូនក្មេង និងជាមនុស្សធំក្នុងពេលតែមួយ ។ នៅក្នុងពេលឥឡូវនេះ យើងមានអារម្មណ៍រីករាយជាមួយនឹងអ្វីដែលយើងធ្លាប់ជួបប្រទះកាលពីយើងនៅក្មេង ។ ហើយយើងរីករាយដូចកូនក្មេង នៅពេលយើងបង្កើតនិងរំឮកអនុស្សាវរីយ៍និងប្រពៃណីឡើងវិញជាមួយនឹងគ្នា ។
ទំនៀមទម្លាប់ពិធីបុណ្យគ្រីស្ទម៉ាស់ជាគ្រួសារដែលយើងចូលចិត្តទី២នោះគឺ ការតាំងបង្ហាញរូបអំពីការប្រសូត្ររបស់ព្រះយេស៊ូវគ្រីស្ទរបស់ក្រុមគ្រួសារយើង—ពិពណ៌នាអំពីការប្រសូត្ររបស់ព្រះគ្រីស្ទជាព្រះឱរសដ៏បរិសុទ្ធ ។
តើបងប្អុនចូលចិត្តរបៀបដែលរូបនៃការប្រសូត្ររបស់ព្ឬះយេស៊ូវផ្តោតទៅលើ ព្រះយេស៊ូវគ្រីស្ទ ដែលអញ្ជើញយើងឲ្យធ្វើដូចគ្នា ។ ដូចអ្នកផ្សព្វផ្សាយសាសនាដែលទើបបានវិលត្រឡប់មកវិញថ្មីៗបាននិយាយថា ៖ « ពីមុនបេសកកម្មរបស់ខ្ញុំ ព្រះយេស៊ូវគ្រីស្ទគឺជាផ្នែកមួយនៃជីវិតរបស់ខ្ញុំ ។ ឥឡូវនេះ ទ្រង់គង់នៅក្នុងជីវិតរបស់ខ្ញុំ » ។
រូបដាក់តាំងអំពីការប្រសូត្ររបស់ព្រះយេស៊ូវគ្រីស្ទរបស់ក្រុមគ្រួសារយើងមានគ្រប់ទំហំ និងសណ្ឋាន បានធ្វើឡើងពីសម្ភារៈផ្សេងៗមកពីគ្រប់កន្លែងទាំងអស់ តាមដែលយើងស្រមៃចង់បាន ។ រូបដាក់តាំងអំពីការប្រសូត្ររបស់ព្រះយេស៊ូវគ្រីស្ទនីមួយៗធ្វើសាក្សីឲ្យព្រះយេស៊ូវគ្រីស្ទ និងព្រះពររបស់ទ្រង់ទៅដល់គ្រប់អស់ទាំងសាសន៍ គ្រប់ពូជមនុស្ស គ្រប់ភាសា និងគ្រប់ប្រជាជាតិ ។
យើងពេញចិត្តដែលបុត្រាបុត្រីរបស់ព្រះនៅគ្រប់ទីកន្លែងដាក់បង្ហាញពីព្រះឱរសព្រះយេស៊ូវ ម៉ារី យ៉ូសែប អ្នកប្រាជ្ញ អ្នកគង្វាល និងសត្វជាមួយនឹងការដាក់តាំង លក្ខណៈពិសេស និងសេចក្តីលម្អិតដែលពួកគេធ្លាប់ស្គាល់ និងអាចយល់បាន ។ រូបដាក់តាំងអំពីការប្រសូត្ររបស់ព្រះយេស៊ូវគ្រីស្ទទាំងនេះក៏រំឭកយើងផងដែរ ថាព្រះស្រឡាញ់បុត្រាបុត្រីទាំងអស់របស់ទ្រង់ យើងមើលឃើញសេចក្ដីស្រឡាញ់របស់ព្រះនៅក្នុងលក្ខណៈពិសេសនៃរូបដាក់តាំងអំពីការប្រសូត្ររបស់ព្រះយេស៊ូវគ្រីស្ទរបស់យើងនៅគ្រប់កន្លែងណាដែលរូបទាំងនោះបានមក ។
ទំនៀមទម្លាប់ដែលគ្រួសារហ្គងចូលចិត្តទី ៣ ដោយបន្ថែមពីលើការអានដំណើររឿងបទគម្ពីរអំពីការប្រសូត្ររបស់ព្រះអង្គសង្រ្គោះរបស់យើងជាមួយគ្នា គឺការអានឲ្យឭៗនូវរឿង A Christmas Carol របស់ ឆាល ឌីកខេន ក្នុងក្រុមគ្រួសារ ។
ប្រសិនបើខ្ញុំបង់កន្សែងនិងពាក់មួកខ្ពស់ តើអ្នកអាចស្រមៃឃើញខ្ញុំថាដូចជា អេបេនេហ្សឺ ស្គ្រូច នៅក្នុងរឿង A Christmas Carolដែរទេ ?
នៅឆ្នាំខ្លះ គ្រួសាររបស់យើងអានរឿងអំពី A Christmas Carol ពីដើមដល់ចប់ ។ ពួកយើងឆុងសូកូឡាក្តៅជាមួយស្ករអំពៅ ហើយសើចនៅត្រង់សេចក្ដីយោងថា« Norfolk biffins » និង« smoking bishop » ។ យើងព្រឺព្រួចនៅពេលដែលខ្មោចរបស់ យ៉ាកុប ម៉ាលី គ្រលាស់ច្រវាក់របស់គាត់ ។ យើងមានចិត្តរីករាយដែលវិញ្ញាណនៃពិធីបុណ្យគ្រីស្ទម៉ាស់ពីអតីត បច្ចុប្បន្ន និងអនាគតជួយ អេបេនេហ្សឺ ស្គ្រូច ក្លាយជាមនុស្សថ្មីម្នាក់ ។
មានឆ្នាំខ្លះទៀត គ្រួសាររបស់យើងអានកំណែសង្ខេបមួយអំពី A Christmas Carol ដែលកូនប្រុស និងកូនប្រសាស្រីរបស់យើងបានបង្រួមវាឲ្យខ្លីដើម្បីឲ្យត្រូវជាមួយនឹងការយកចិត្តទុកដាក់ខ្លីរបស់សមាជិកគ្រួសារក្មេងៗរបស់យើង ។
ហើយឆ្នាំខ្លះ ជាមួយនឹងស្នាមញញឹម និងកំប្លែង គ្រួសាររបស់យើងអានស្ទីគ័រពាក្យស្លោកបិទជាប់កាងឡាននៅក្នុងរឿងA Christmas Carol ។ នៅលើស្ទីគ័រមានតែពីរបន្ទាត់ប៉ុណ្ណោះ ៖ « Bah, humbug ( បា ហ៊ឹមបឹក ) » និង « ព្រះប្រទានពរដល់យើងគ្រប់គ្នា » ។
ឆាល ឌីកខេន បានសរសេររឿង A Christmas Carol នៅខែ តុលា ហើយបានបញ្ចប់នៅដើមខែ ធ្នូ ឆ្នាំ ១៨៤៣—ដែលមានរយៈពេលត្រឹមតែ ៦ សប្តាហ៍តែប៉ុណ្ណោះ ។ ការបោះម្ពលើកទីមួយចំនួន ៦០០០ ក្បាលត្រូវបានបោះពុម្ពផ្សាយនៅទីក្រុងឡុងដ៍ នៅថ្ងៃទី ១៩ ខែ ធ្នូ ឆ្នាំ ១៨៤៣ ។ វាបានលក់ដាច់អស់នៅមួយថ្ងៃមុនពិធីបុណ្យគ្រីស្ទម៉ាស់ ។
ឯកសារចងក្រងទាំងនោះជាឯកសារអំពីប្រវត្តិរបស់ A Christmas Carolបានបង្ហាញថា ឆាល ឌីកខេន បានសរសេរនៅពេលដែលប្រទេសអង់គ្លេសសោយរាជដោយម្ចាស់ក្សត្រី វីកតូរៀ កំពុងពិចារណាឡើងវិញនូវអត្ថន័យនៃពិធីបុណ្យគ្រីស្ទម៉ាស់ ។ តើរដូវបុណ្យគ្រីស្ទម៉ាស់ដើមឈើគ្រីស្ទម៉ាស់ ការស្វាគមន៍បុណ្យគ្រីស្ទម៉ាស់ ការជួបជុំគ្រួសារបុណ្យគ្រីស្ទម៉ាស់ កាតជូនពរបុណ្យគ្រីស្ទម៉ាស់ សូម្បីតែចម្រៀងបុណ្យគ្រីស្ទម៉ាស់ អាចជាឬគួរមានតួនាទីជាអ្វីនៅក្នុងសង្គម ?
រឿង A Christmas Carol របស់ ឌីកខេន បានបង្ហាញអំពីការចង់បាននូវចំណងមិត្តភាពមួយដ៏ជ្រាលជ្រៅ សេចក្តីស្រឡាញ់ និងការចងយុថ្កានៃគុណតម្លៃរបស់គ្រីស្ទបរិស័ទ ដូចដែល អេបេនេហ្សឺ ស្គ្រូច បានរកឃើញសេចក្តីសុខសាន្ត និងការព្យាបាលនៅក្នុងអតីតកាល បច្ចុប្បន្នកាល និងអនាគតកាលរបស់គាត់ ។
ដូចពេលនេះ អត្ថន័យពិតប្រាកដនៃពិធីបុណ្យគ្រីស្ទម៉ាស់បានធ្វើឲ្យយើងខិតទៅកាន់តែជិតព្រះយេស៊ូវគ្រីស្ទ ដែលប្រសូត្រមកជាព្រះឳរសនៅក្នុងស្នូក ។ ព្រះយេស៊ូវគ្រីស្ទជ្រាបដឹងស្របតាមសាច់ឈាមអំពីរបៀបដើម្បីជួយយើងដោយព្រះហឫទ័យពោរពេញទៅដោយសេចក្ដីមេត្តាករុណា ។ ដូចនៅពេលនេះ ពិធីបុណ្យគ្រីស្ទម៉ាស់អបអរនូវសេចក្ដីសញ្ញាដែលជាការមានចំណែក ការរួបរួម និងសហគមន៍នៅក្នុងព្រះយេស៊ូវគ្រីស្ទ និងរវាងគ្នាទៅវិញទៅមក ។
ឥឡូវឲ្យខ្ញុំសូមសួរសំណួរ A Christmas Carol មួយផ្សេងទៀត ។ តើមូលហេតុអ្វី នៅពេលយើងគិតដល់ស្គ្រូច តើយើងគិតជាចំបងអំពីមនុស្សចាស់ដែលក្រអឺតក្រទម ជាអ្នកចំអកដល់ពិធីបុណ្យគ្រីស្ទម៉ាស់ ហើយថាជាការមិនពិតដ៏ធំមួយមែនទេ ?
ហេតុអ្វីយើងមិនទទួលស្គាល់ ស្ក្រូច ដែលជាមនុស្សថ្មីម្នាក់ទៀត ? តួអង្គស្គ្រូចថ្មី ដែលបានផ្ញើរង្វាន់មាន់ទួកគីយ៉ាងសប្បុរសជាការភ្ញាក់ផ្អើលមួយនៃពិធីបុណ្យគ្រីស្ទម៉ាស់ ? ស្ក្រូចថ្មី ដែលស្រុះស្រួលជាមួយក្មួយប្រុសដ៏គួរឲ្យស្រឡាញ់របស់គាត់ ហ្វ្រេតឌី ? ស្រ្កូចថ្មី ជាអ្នកតំឡើងប្រាក់ខែឲ្យ ប៊ប ក្រាចជីត និងមើលថែដល់ ធីមដ៏តូច ?
សូមឲ្យពួកអ្នកសង្ស័យចំអកចុះ ។ ស្រ្កូចថ្មី « បានធ្វើវាទាំងអស់ ហើយមានច្រើនទៀត » ។ គាត់បានក្លាយជាមនុស្សល្អ និងជាមិត្តដ៏ល្អ ដូចដែលមនុស្សពិមុនបានធ្លាប់ស្គាល់ ។
ដូច្នេះហេតុអ្វីយើងមិនចងចាំលោក ស្រ្កូចនោះ ? តើមានអ្នកដែលនៅជុំវិញយើង ប្រហែលជាខ្លួនយើងផ្ទាល់ ដែលអាចក្លាយជាមនុស្សផ្សេងប្រសិនបើយើងឈប់គិតស្មាន ឬវាយតម្លៃពួកគេថាដូចមនុស្សដដែលកាលពីមុន ?
គ្មានមនុស្សណា ហើយគ្មានគ្រួសារណាល្អឥតខ្ចោះឡើយ ។ យើងម្នាក់ៗមានចំណុចខ្សោយ និងកំហុស–រឿងខ្លះដែលយើងចង់ធ្វើឲ្យបានល្អជាងមុន ។ ពិធីបុណ្យគ្រីស្ទម៉ាស់នេះប្រហែលជាយើងអាចទទួលបាន—ហើយផ្ដល់ជូន—នូវអំណោយដ៏មានតម្លៃរបស់ព្រះយេស៊ូវគ្រីស្ទនៃការផ្លាស់ប្ដូរ និងការប្រែចិត្ត នៃការអភ័យទោស និងការបំភ្លេចចោល ផ្ដល់ទៅកាន់អ្នកដទៃ និងសម្រាប់ខ្លួនឯងផ្ទាល់ ។
សូមយើងធ្វើឲ្យមានសេចក្តីសុខសាន្តដូចកាលឆ្នាំមុន ។ សូមបោះបង់ចោលការខឹងសម្បារ និងសម្លេងរំខាន អារម្មណ៍ទាស់ទែងគ្នា និងការរំខាននានា ដែលធ្វើអោយជីវិតរបស់យើងរញ៉េរញ៉ៃ ។ សូមឲ្យយើងផ្តល់នូវលទ្ធភាពថ្មីដល់គ្នាទៅវិញទៅមកជំនួសឲ្យការកម្រិតទៅលើដែនកំណត់អតីតកាលរបស់យើង ។ សូមផ្តល់ឱកាសឲ្យ ស្រ្កូចថ្មីនៅក្នុងខ្លួនយើងម្នាក់ៗ ដើម្បីមានឱកាសផ្លាស់ប្ដូរផង ។
ព្រះអង្គសង្រ្គោះរបស់យើងបានមកឯពិធីបុណ្យគ្រីស្ទម៉ាស់ ដើម្បីរំដោះពួកអ្នកដែលត្រូវជាប់ឃុំឃាំង—ហើយមិនត្រឹមតែអ្នកជាប់គុកប៉ុណ្ណោះនោះទេ ។ ទ្រង់អាចរំដោះយើងចេញពីស្រមោលងងឹតនៃអតីតកាលរបស់យើង ដោះស្រាយការស្តាយក្រោយពីអំពើបាបរបស់យើង និងអ្នកដទៃ ។ ទ្រង់អាចប្រោសលោះមនុស្សអាត្មានិយម គិតតែពីខ្លួនឯងរបស់យើងតាមរយៈការកើតជាថ្មីនៅក្នុងទ្រង់ ។
« “ដ្បិតនៅថ្ងៃនេះមានព្រះអង្គសង្គ្រោះមួយអង្គប្រសូតដល់អ្នករាល់គ្នានៅក្រុងហ្លួងដាវីឌ … គឺជាព្រះគ្រីស្ទដ៏ជាព្រះអម្ចាស់ » ។៥
ដូចនេះ សូមរីករាយថ្ងៃបុណ្យគ្រីស្ទម៉ាស់ !
សូមឲ្យទំនៀមទម្លាប់ និងអនុស្សាវរីយ៍ពិធីបុណ្យគ្រីស្ទម៉ាស់របស់អ្នកបានរីករាយនិងភ្លឺត្រចះត្រចង់ ។
សូមឲ្យយើងរីករាយក្នុងព្រះយេស៊ូវគ្រីស្ទ នៅថ្ងៃបុណ្យគ្រីស្ទម៉ាស់ និងជារៀងរាល់ថ្ងៃ ។
ខ្ញុំសូមថ្លែងទីបន្ទាល់ដ៏រីករាយអំពីទ្រង់នៅក្នុងព្រះនាមដ៏ពិសិដ្ឋ និងបរិសុទ្ធរបស់ទ្រង់ គឺព្រះយេស៊ូវគ្រីស្ទ អាម៉ែន ។