iTuvatuva Tudei nei Qasenivuli

Kemuni na taciqu kei na ganequ, kei ira noqui tokani, edua na gauna vinaka ni da mai soqoni vata ka sarava na totoka ni yaloyalo oqo ka vakaraitaka tiko vei keda na lewenilotu kei ira kece na tamata ena veiyasai vuravura ni rawa ni da vakavulici ira na tamata ena yabaki ni bula cava ga kei na veitabatamata ena nona vakarau na iVakabula

Au marau meu maliwai kemuni na noqu tamata taleitaki: qasenivuli—ena veigauna sa oti, edaidai, kei na veisiga ni mataka! Me vaka ni da qasenivuli kece ena vei ituvaki eso, au nanuma kina ni noqu ilawalawa tamata taleitaki e dau veiciqomi. Au lomani ira na qasenivuli. Au taleitaka na veimaliwai vata kei ira. Au lomani ira kei na dinau levu au sega ni sauma rawa vei ira na qasenivuli ena noqu bula.

O ira na kenadau era sa vulica tiko mai ena vica vata na drau na yabaki na cava e yaco kina e dua me qasenivuli uasivi ka ra vakatura, kacivaka, tabaka vakararaba na nodra nanuma ena vuna e yaco kina e dua na ituvaki vakavuli me vuavuai vinaka.

Eda sa mai kalougata kece me da vuli mai vei koya na qasenivuli levu duadua ena veitabagauna, Jisu Karisito. E dua nai wase levu ni rua na udolu na yabaki sa oti, kau nanuma ni sega ni sivi e dua na sekodi ni—ena dua na vanua e vuravura—na Nona i vakavuvuli a sega ni sega ni vakamareqeti, vulici, vakananumi, cavuti wasoma, ka bulataki.

E sega beka ni o koya o ya na nodra takete na vei qasenivuli kece? Me vakayacora e dua na veisau tudei ki na vinaka? Me vakalougatataka na nodra bula na tani ena dua na sala ka tete yani ki taudaku ni lesoni se rumu ni vuli?

O Jisu na kai Nasareci e tiko sara ga vua na mataqali veivakayarayarataki vaka o ya—mai na veigauna sa oti, edaidai, kei na siga sa bera mai. O cei tale e vinaka vei keda meda vulica? Ke da vuli mai Vua, eda na sega ga ni vinaka cake vaka qasenivuli, veitalia na ituvaki ni noda bula, ia eda na vinaka sara vaka tamata yadua.

O koya gona, e ka ni marau ka dokai vei au meu vosa vei kemuni nikua me baleta na iVakabula—baleta na sala vinaka duadua meda yaco kina me qasenivuli vinaka sai koya meda yaco meda imuri vinaka i Jisu Karisito.

Niu a se pailate voli ni waqavuka, ena veigauna kece au dau dabeca kina nai dabedabe ni kavetani, e dau dua ga noqu vakasama—meu kauti au, iratou noqu kaimua, kei ira noqu pasidia me yaco bula ki na vanua keimami gole tiko kina. Nai nakinaki oqo e gadreva na vakanamata kei na qaqarauni.

Me rawati oqo, era dau cakava taumada na pailate eso na ivakarau tudei, na vakatovotovo ni tataqomaki kei na dikevi ni misini kei na gacagaca ni waqavuka me cakacaka vinaka kece tu. Na veika yadua ena lisi oqo e sa dau vakayacora vaka vica vata na drau (se mani udolu sara) na gauna.

Na pailate matai vinaka ena sega ni nanuma kina ni sega ni gadrevi me vakayacori nai vakarau tudei ni bera na vuka se caka ga me rawa baleta ni sa dau vuka vakawasoma.

Na ivakataru tudei ni vuka oqo e vukei ira na pailate me vakanamata kina veika e gadrevi me na rawa vinaka kina e dua na vuka.

Me vaka ga ni tiko vua e dua na pailate e dua na inaki ni veidusimaki vakatabakidua, sa vakakina vei keda na qasenivuli ni Vosa: meda kauti ira na tamata vakavoleka vei Karisito. Ena gauna e yaco mai kina e dua na madigi ni veivakatavulici, na inaki o ya e dodonu me dei tiko ena noda vakasama.

Ni da qasenivuli, e tiko beka edua na noda lisi me dikevi me vukei keda meda vakanamata ki na noda inaki tabu? Io!

Ena vula oqo, ena tabaka kina Na Lotu i Jisu Karisito ni Yalododonu Edaidai e dua na ilavelave vou ni Veivakavulici ena iVakarau ni iVakabula. Oqo e dua na idusidusi vei ira kece na vakatavulica na kosipeli—e vale vakakina ena Lotu. Ena vakarautaki ena 70 na vosa ena Gospel Library app. Na ilavelave tabaki ena qai sala muria mai ena veivula ka bera.

Na ivurevure oqo e tomitomi mai na bula kei nai vakavuvuli i Jisu Karisito me noda idusidusi ka vakauqeti keda na qasenivuli. Oqo e vukei keda meda vakanamata ki na ivalavala ni Nona dau veivakatavulici.

Na Veivakavulici ena iVakarau ni iVakabula ena vukei ira kece era veivakatavulici. Ena rawa ni vakarautaka na veiuqeti kei na idusidusi vei ira na itubutubu, na kai noda, na tacida kei na ganeda era veiqaravi, na kaulotu, kei ira kece na tisaipeli i Jisu Karisito. Na vei vakatisaipelitaki e kena ibalebale na loloma, veikauwaitaki, vakalougataki ka laveti ira na tani, ka sai koya o ya na veivakatavulici.

Se au rawa ni kaya, ke o tovolea tiko mo loloma ka veiqaravi me vaka a cakava o Jisu, o iko sa dua na qasenivuli, ka sa baleti iko na Veivakavulici ena iVakarau ni iVakabula Au nuitaka ni o na vakamareqeta, se o se vou ena ilakolako oqo se o sa lakova tiko mai ena vuqa na yabaki.

Ena 3 ni wase ni Veivakavulici ena iVakarau ni iVakabula, e tiko kina e dua na dikevi keda vakaikeda—e dua na ivakarau tudei ni vuka, eda rawa ni kaya—ka na rawa ni vukei keda meda vakanamata vakalevu cake ena noda sasaga ni veivakavulici. Ena veimuataki ki na ilovi keda, vakatakilai eso na ka e buwawa tu, ka uqeti na veivakayarayarataki baleta na sala eda rawa ni vakatorocaketaki kina. Ena rawa ni yaga sara vei ira na qasenivuli me vaka na yaga ni ivakarau tudei ni vuka vua na pailate.

Ke o vakatara meu dabe e yasamu ena rumu ni pailate, meu kaya mada, au vinakata meu cakava vata kei iko e dua na ivakarau tudei ni bera na vuka baleta na veivakavulici. Au sureti iko mo dreta mai e dua na vavakilipi ka vakasamataka na sala o na dikevi iko kina ena veitikina yadua. Oqo ena rawa ni dua na veivakalougatataki levu—nikua kei na gauna kece o vakavakarau kina mo veivakavulici ena ivakarau ni iVakabula.

Na imatai vei ira oqo ena noda ivakarau tudei ni sebera ni da vakrau vuka sai koya na “Raimatua vei Jisu Karisito.” Oqo e dua na madigi meda vakananumi kina se sa i usutu dina tiko ni noda veivakavulici na iVakabula. Yalovinaka vakasamataka mada na veitaro oqo:

• Au vakavuvulitaki Jisu Karisito tiko beka se cava ga au vakatavulica tiko?

• Au vakabibitaka tiko beka na ivakaraitaki i Jisu Karisito?

• Au vukei ira tiko beka na vuli me ra kila na loloma, kaukauwa, kei na loloma cecere ni Turaga ena nodra bula?

• Au vukei ira tiko beka na vuli me ra segata vakaidina me ra vakataki Jisu Karisito vakalevu cake?

Oqo era taro bibi!

Oqo e dua na dina: Na kosipeli e sa rui rabailevu ka na rawa ni taura e dua na gauna ni bula taucoko ni vuli ia ko na kila vakatikina ga. Vakasamataka mada mo boroya e dua na takete e yasa ni dua na valekau balavu ka raba me matataka na rabailevu ni kosipeli.

O keda kece e tiko na veika eda dau taleitaka ena kosipeli—na veika e vakamarautaki keda. iTukutuku makawa ni Lotu, veiparokaramu ni Lotu, ulutaga vakaivunau, se veitiki ni qaqana ni volanikalou. E rawa ni da mai temaki me da vakanamata tiko ga ena veiulutga taleitaki vei keda.

Ia na ka levu ni takete ena vuku ni vakavuvuli ni kosipeli na lomadinu ni takete (bullseye)—me da kakua ni da dau guilecava—e ka lailai sara. Sai koya na uto ni itukutuku e soli mai vei keda e sega ni vakamacalataki, se na veika ka era nanuma ka sega ni dau kani veibataki. Na iVakabula vakaikoya a solia mai vei keda.

Na cava beka?

Lomana na Kalou ka lomana na kai nomu.

Sa ikoya oqori na utona.

Na veika tale eso e rawa ni marautaki vei keda. Era rawa sara ga ni bibi. Ia era sega ga ni utona.

Era tu ga mera veitokoni mai. Era ikuri ga ni keda magiti; se kakana draudrau ena veleti ni ulu ni keda kakana. Era rawa ni vakuria na i kanakana se veimataqali, ia era sega ga ni ulu ni magiti.

Na cava na inaki levu ni noda veivakavulici?

Na noda inaki sai koya meda vukei ira eda vakavulica mera toro voleka mai vei Karisito, tubu cake ena nodra kila ka lomana na Kalou, ka qarava na Kalou ena nodra dolele yani ena yalololoma vei ira kece na Luvena.

Sa ikoya oqori na utona.

Evei eda na kunea kina na noda ivakaraitaki cecere?

Ena bula kei na ivakavuvuli ni noda iVakabula ka noda Dauveivueti.

Ni da kauti ira mai na yalo vei Karisito, eda vukei ira me vakalevutaka na nodra vakabauta kei na loloma vua na Kalou. Ka vukei ira me vakalevutaka na nodra yalololoma kei na loloma vei ira na tani.

Ni da temaki meda gole vakatikitiki ka vagolei tani ena so tale na i ulutaga eda taleitaka, e dodonu meda tarogi keda:

“Au raimatua tiko beka vua na iVakabula, se cava ga au vakavuvulitaka tiko?”

“Na veika au vakavulica tiko e vukei ira tiko beka na tani mera tubu ena nodra lomana na Kalou ka vakaraitaka na loloma oqori ena loloma kei na veiqaravi?”

Ni da qasenivuli, eda rawa ni vosataka na nodra vosa na agilosi; eda rawa ni veivakamarautaki, veivakalasai, ka veivakurabuitaki. Ia kevaka eda sega ni raimatua vei Jisu Karisito eda sa calata na maka ¹ kei na noda veivakatavulici e tiki lailai sara ni veika e dodonu me rawati.

Mo vakanamata tiko ga vua na noda iVakabula ka Dauveivueti, o Jisu Karisito.

Na iKarua ni iWase ni iVakarau Tudei Sai Koya mo “Lomani ira o Vakavulica.” Na iwase ni ivakarau tudei oqo e vakatara vei keda meda vakasamataka na noda inaki vaqasenivuli, ka vakananumi keda meda vakotora na lomada ena nodra lomani ka vakamareqeti o ira eda vakavulica. Oqo eso na taro me vakasamataki:

• Au segata beka meu raici ira na gonevuli me vaka na nona raici ira na iVakabula?

• Au dau segata beka meu kilai ira au vakavulica—meu kila vinaka na nodra ituvaki, nodra gagadre, kei na veika era kaukauwa kina?

• Au dau masulaki ira beka na vuli ena dui yacadra?

• Au dau tauyavutaka beka e dua na ituvaki e veitaqomaki ka ra rokovi kece kina ka ra kila ni taleitaki na nodra cau?

• Au dau raica beka eso na sala e veiganiti meu vakaraitaka kina na noqu loloma?

Au a rogoca me baleta e dua na marama ka kenadau ni veivakavulici ena vuli torocake. Sa vakayagataka e vuqa na yabaki me vakatorocaketaka kina na ivakarau ni nona veivakavulici ka cau vakalevu ki na nodra bula na gonevuli ena vuli torocake. Sa kila vakavinaka na iwalewale ni nodra qaravi na ilawalawa ena itaba yabaki oqo.

Dua na yabaki, a vakaitavi kina ena dua na parokaramu ni vuli ni vulaikatakata ka vakatavulici ira kina na gone sara, duidui sara o ira na gone oqo, ira talega na yabaki lima. Io, era a malaude ka waribariba na gone ni ra curu yani ki na nona rumu ni kalasi. Era a mamaue ka veidredrevaki, kaikaila, veiciciyaki e maliwa ni vei desi, ka veicemuri vakataki ira. Na qasenivuli oqo, a vakayagataka na “domo vaqasenivuli” me kauti ira vata mai na lewe ni kalasi mera tiko malua ka dabe kina ka kila ni dau mana vei ira na gonevuli ena vuli torocake. Ia na cava a yaco?

A vagagalu na rumu ni kalasi. Era a muduka na gone na veika era a cakava tiko ka, vakusakusa yani ena kurabui ki na dua na desi lala. Ka vakavo ga e lewe rua.

Na imatai ni gone, e dua na goneyalewa lailai, e a dabe sobu ena vuloa ka tabaka na tagi. E dina ni a sega ni vakila e dua na cudru na qasenivuli vei koya, ia a vakila na goneyalewa lailai oqo ni a rairai cakava beka e dua na ka cala ka sa mani tonawanawa kina na wai ni matana.

Na i karua ni gone, e dua na gonetagane lailai, a raica na qasenivuli ena rere ka ciciva na katuba, ka yali yani kina vakatotolo. A vakananuma na qasenivuli se na lesu tale beka mai se sega.

Ena siga o ya, a vulica kina na qasenivuli e dua na lesoni bibi: na iwalewale e dau vakayagataka vei ira na itabagone e sega ni mana vei ira na gonelalai.

Oqori e dua talega na lesoni vei keda kece kei iko vata kei au talega.

Na vei tamata kece eda vakavulica e luve ni Kalou ka tiko na nodra itovonibula yadua.

Eda raici ira beka ena sala e raici ira kina na Tamada Vakalomalagi—ni ra tamata duidui ka tiko na nodra dui nanuma vakai ira, veika era vakila, nodra vakatovolei, kei na nodra dredre? Eda tauyavutaka tiko beka e dua na ituvaki ni vuli e veitaqomaki—na vanua e vakila kina na tamata yadua ni taqomaki ka ciqomi?

Se cava na noda vosa vaka itaukei, era kila beka na noda gonevuli ni da vosataka na vosa raraba ni loloma? Eda mareqeti ira, ka lomani ira ka da rokovi ira?

A vakayagataka na iVakabula e levu na Nona gauna vata kei ira na tamata biligi tani ka sega ni taleitaki.

E a rawa vua me vunauci ira ka beitaki ira. Ia, e a ciqomi ira, vakabulai ira, ka vakacegui ira.

Io, a vakavulici ira mera “lako ka kakua ni valavala ca tale.”² Ia vei ira na tauvimate, na ivalavalaca, kei na lokiloki, e a vosa o Koya ka cakacaka ena loloma, veikauwaitaki kei na veirokovi.

E raici keda vakayadua o Koya meda luvena tagane kei na yalewa na Kalou Kaukauwa—sega ni lailai mai vei Koya, ia ka tiko vei ira na kaukauwa tawamudu mera na yaco me tautauvata kei Koya ena lagilagi.

Na dauvola ivola Vakarisito rogo o C.S.Lewis e duavata kei na rai oqo ena nona vakavulica “E ka bibi dina meda bula ena dua na ilawalawa ka rawa ni ra yaco me kaloutagane se kalouyalewa, ka nanuma ni tamata gogo ka sega ni taleitaki duadua o vosa vua e rawa ni yaco ena dua na siga me dua, ke o raica ni kua, o na rawa ni temaki sara ga mo sokalou vua.” A tomana, “E sega na tamata wale. O sega ni veivosaki tiko kei na dua na tamata wale. … sai ira na tawamate rawa eda veiwali vata tiko, cakacaka vata, vakamautaka, sega ni kauwaitaka ka vakayagataka — tawamate rawa… lagilagi tawa vakaiyalayala.”³oti na cavu vosa]

Ni da lomani ira na tani ena itovo ni veirokovi vakaoqo, eda vakaraitaka tiko na ivakaraitaki i Jisu Karisito. Me vaka na Nona loloma, eda loloma vakakina. Me vaka na Nona veilaveti, eda veilaveti vakakina. Me vaka na Nona veivakavulici, eda veivakavulici vakakina.

Meda nanuma meda dau loloma, veirokovi ka laveti ira eda vakavulica.

Na iKatolu ni iWase ni iTuvatuva Tudei Sai Koya Na “Raimatua vei Jisu Karisito” Yalovinaka vakasamataka mada na veitaro oqo:

• Au dau vakarautaki au beka vakayalo meu veivakavulici?

• Au dau vakayacora beka na veivakauqeti vakayalo ena vuku ni nodra gagadre na vuli?

• Au dau vakavurea beka na ituvaki kei na madigi eso vei ira na vuli me ra vakavulici mai vua na Yalo Tabu?

• Au dau vukei ira beka na vuli me ra vaqara, kila, ka cakacakataka na nodra dui ivakatakila yadua?

• Au dau wasea beka vakawasoma na noqu ivakadinadina ka vakakayaloqaqataki ira na vuli mera cakava vakakina?

Au dau tovolea meu vakananumi au vakawasoma ni ena noqu sasaga kece meu vakavulica na kosipeli ka kauti ira mai na tamata vei Jisu Karisito, au na sega ga ni rawa ni saumaka mai e dua.

Na Yalo Tabu duadua ga e rawa ni cakava o ya.

E rawa meda cavuta na vosa, ia na saumaki e cakacaka ga kina na Yalotabu. E yaco ena Nona tara na loma na Yalo Tabu ka cakava na tamata na Nona veivakayarayarataki ena nona muria na iVakabula.

Kevaka, sa “vakadeitaka” e dua me muri Jisu Karisito, ena vuku ni vosa veirawai se vosa ka tuvanaki vinaka, na veivakadeitaki oqori ena lekaleka wale me vaka ga na sorenikau ka lutu e dela ni vanua veivatu.⁴

Na noda cakacaka e sega meda da saumaka na tamata. Oqori e sega ni noda itavi.

Na cava na noda cakacaka? Meda vakatavulica na itukutuku vinaka kei Jisu Karisito kei na Nona kosipeli ka sa vakalesui tale mai ena noda gauna! Ka noda cakacaka talega meda tokona ka vakadinadinataka na noda vosa ena noda itovo dina ka sega ni veivakaisini! Noda bula, eda bulataka tiko.

Na nona saumaki mai se sega e dua na tamata ena vuku ni veika eda vakatavulica sa baleti koya ga kei na Kalou. Ia o keda eda rawa ni ikawakawa ka semati ira vata kei na Yalo Tabu. Eda rawa ni katubaleka ka na rawa kina vua na Yalo Tabu me curuma na nodra bula. Na noda vosa kei na ivakarau e rawa ni vakatavulica na ivunau i Karisito ena dua na sala ka na vukei ira na gonevuli mera vakila na veimasulaki ni Yalo Tabu.

Me vaka a vakavulica ena gauna o ya o Elder Dallin H. Oaks, “Na vuli kei na vakasama e rawa ni kunei kina na dina, … ia na ivakatakila ga e rawa ni vakadeitaka.”⁵

Meu cavuta tale mada na yatuvosa oya “Na vuli kei na vakasama e rawa ni kunei kina na dina, … ia na ivakatakila ga e rawa ni vakadeitaka.”

Ena so na gauna e vaka meda dau taubale mocemoce tu ena noda bula. Eda raica tu na ka ia eda sega sara ga ni dau nanumi ira. Na volitaki ivoli, cavu vosa mai na sala ni vakau itukutuku raraba, na ivakatakilakila mada ga ni gaunisala. E vuqa vei ira e lakosivita ga na noda vakasama ka sega ni curu ki lomada.

Ia kevaka e vosa ki lomamu na Yalo Tabu, kina lomaqu vata kei iko ena dredre mo guilecava, baleta ni na veisautaki iko ka veisautaki keda kece. Nanuma na veika a cavuta o Josefa Simici ni wilika na Jemesa 1:5: “A sega mada ni dua na tiki ni ivolanikalou me tara vakaukauwa na yalo ni tamata me vaka na kena tara na yaloqu na kena oqo ena gauna oqo.”⁶

Na Yalotabu e rawa ni taura e dua na vakanananu ka cavuti wale tu ga ka vakavuna me kama vaka buka.

Na nona saumaki e dua na tamata e sega ni vakatautaki ki na noda matai ena vosa se noda kila vinaka na ivolanikalou. E sega ni vakatautaki ki na maqosa ni noda veivakatavulici se noda taqomaki ivunau. E sega ni vakatautaki ki na noda vuku, noda taleitaki, se noda kila vinaka na vosa.

Na ka ga meda cakava sai koya meda kila vakai keda. Sa na qai sureti keda na Tamada Vakalomalagi “meda dolava tiko ga [na] gusu[da] ena veigauna kece, ka vunautaka tiko na [Noqu] kosipeli ena yalomarau.”⁷ Ke da vakayacora o ya, na Yalo Tabu ena vakadinadinataka na kena dina.

E sega ni gadrevi “meda” levu se lailai mai na keda ituvaki dina—vaka luve ni Kalou ka imuri i Jisu Karisito.

E rawa beka vei iko, ena marau, mo vakaraitaka na nomu loloma vua na iVakabula, na Nona kosipeli, kei na Nona Lotu?

Ke o vakayacora na nomu itavi, ena vakayacora na Nona itavi na Yalotabu. O ya na sala eda “veivakavulici kina ena Yalotabu.”

Na ikava ni ka ena noda vakavakarau ni bera na vuka sai koya na “Vakatavulica na iVunau”—sega ni dua ga na ivunau e rawa, ia na ivunau ga a ciqoma o Jisu Karisito mai vei Tamana. E cavuta na iVakabula, “Sa sega ni noqu na noqui vakavuvuli, sa nona ga ka talai au mai.”⁸ Me dikevi na ivakatagedegede ni nomu muria tiko na Nona ivakaraitaki, vakasamataka na vei taro oqo:

• Au dau vulica beka na ivunau me yaga vei au?

• Au dau veivakavulici beka mai na ivolanikalou kei na nodra vosa na parofita ni gauna oqo?

• Au dau vukei ira beka na vuli me ra raica rawa ka kila vakavinaka na dina ena ivolanikalou?

• Au dau vakanamata beka ki na dina ena tara cake na vakabauti Jisu Karisito?

• Au dau vukei ira beka na vuli me ra dau raica na veika e yaga vei ira mai na ivunau?

Ena noda itabagauna na Turaga e cavuta: “Kau sa solia talega vei kemudou e dua na ivakaro mo dou veivakavulici vakai kemudou ena ivakavuvuli ni matanitu. “Ia mo dou gumatua sara ena veivakavulici, ena qai tiko vata kei kemudou na noqu loloma soli wale.”⁹

Na cava na ivunau meda vakatavulica?

Sai koya na vosa e lako mai na ivolanikalou tabu kei na gusudra na i apositolo kei na parofita. Sai ira ka tiko vei ira na dodonu kei na lewa mera vakamacalataka ka vakamatatataka na ivunau. Ka dau vakayagataki ira e veigauna na Kalou me vakatakila mai kina na Nona vosa, me veidusimaki ka solia na kila ka vei ira na Luvena.

Na usutu ni ivunau veivakabulai ni Lotu i Jisu Karisito ni Yalododonu Edaidai sai Jisu na Karisito, na iVakabula ka Dauniveivueti ni tamata kecega. Na i Apositolo o Paula, o koya ka raica ka veivosaki kei na iVakabula ka sa tucaketale, a vola vei ira mai Koronica, “Ia kau sa vakatakila veikemudou nai tukutuku vinaka kau a vunautaka vei kemudou … ni sa mate ko [Jisu Karisito] ena vuku ni nodai valavala ca … ni sa bulu talega, ka ni sa tucake talega enai katolu ni siga… ni sa rairai talega vei Kifa vei ira emuri na le tinikarua.”¹⁰

Eda vakaroti meda “taura matua na vosa ni Kalou, na ka sa bula ka kaukauwa… ka [na] tubera na tamata i Karisito ena sala qiqo ka rabailailai … ka vakatikora na yalodra, io, na yalodra tawamate rawa, ena liga imatau ni Kalou ena matanitu vakalomalagi.”¹¹

Ni da qasenivuli, e dodonu meda kakua ni maduataka na kosipeli i Jisu Karisito.¹² Ia, meda kacivaka yani ena marau na vakatavulici ni Nona i vunau dina ga ni ra na tarabe kina eso ka na ka lialia vei ira tale eso.¹³ “Ni sai koya oqo na kaukauwa ni Kalou me vakabulai kina ko ira yadua era sa vakabauta.”¹⁴

Na iotioti ni ka ena noda vakavakarau ni bera na vuka sai koya na “Sureta na Vuli Gugumatua.” Oqo e vakananumi keda ni veivakavulici gugumatua eda vakayacora e veimama ga ni tiki ni ka me caka. Na ikarua ni veimama—ena cici balavu, ka rairai na tikina ka bibi—sai koya na vuli gugumatua era cakava na noda gonevuli. Oqo eso na taro me vukei keda meda kila kina se sa veimuataki tiko ki na vuli gugumatua na noda veivakavulici vagumatua:

• Au dau vukei ira beka na vuli me ra lewa vakataki ira na nodra vuli?

• Au dau vakayaloqaqataki ira beka na vuli me ra vulica na kosipeli e veisiga?

• Au dau vakayaloqaqataki ira beka na vuli me ra wasea na veidina era sa vulica tiko?

• Au dau sureti ira beka na vuli me ra bulataka na veika era vulica tiko?

Na yaloda e gadreva me vakani vakawasoma meda rawa kina ni vakataka na tamata ni rarama kei na lagilagi e a buli keda kina na Kalou meda vakataka. Ni da vulica ka vakananuma na nodra vosa na parofita ni Kalou, eda sa gunuva tiko na wai bula ka kana magiti tiko ena vosa i Karisito.

E sega ni rauta meda wilika walega na vosa. E gadrevi meda vakatudaliga kina; e gadrevi meda vakasamataka vakatitobu ka tugana sara ki yaloda.¹⁵

Meu cavuvosataka mada e dua na vosa vakaibalebale, “Vakavulica na kosipeli vua e dua na tamata ka o na vakalougatataki koya ga ena dua na siga. Vakavulica e dua na tamata me kana magiti ena vosa ni Kalou ka semati koya vua na Yalo Tabu, ka o na vakalougatataki koya me dua na gauna ni bula taucoko.”

Oqo na i walewale ni veivakayarayarataki kei na ivakatakila yadua ka da tara cake kina na noda bula ena uluvatu ni noda Dauveivueti.¹⁶ Ena gauna oqori sa na qai yaco kina na kosipeli i Jisu Karisito mei “kelekele ni yaloda.”¹⁷

Na vakatavulici ni kosipeli e bibi. Na vakavulici ira na tani mera vakaogai ira ena masu, vakasaqara na Yalotabu, ka bulataka na veika era sa vulica e bibi vakakina.

Kemuni na taciqu kei na ganequ lomani, itokani lomani, kemuni na qasenivuli lomani ka talei, vinaka vakalevu na nomuni yalodina kei na gagadre mo ni caka vinaka. Vinaka vakalevu na levu ni aua ko ni vakayagataka ena vakavakarau, veiqaravi ka vakavulici ira na tani ena kosipeli ena yalo marau.

Au sureti iko mo vulica na ivoladusidusi vou ni Veivakavulici ena iVakarau ni iVakabula ka vakayagataka na dikevi iko vakai iko me vakananumi iko tiko ena nomu i naki.

Ena nomu taura matua na vosa ni Kalou ka vakavulici ira na tani me cakava vakakina—ena veivakavulici ena ivakarau ni iVakabula—eda vakaraitaka kina na noda lomana na Kalou kei ira na noda kawa tamata. Ni da lakova na sala rabailailai ka qiqo, eda vakaitavi tiko ena veikacivi tabu duadua me tubera na yaloda tawamate rawa kei na yalodra na tani ki na “liga imatau ni Kalou ena matanitu vakalomalagi, me dabe vata kei Eparaama, kei Aisake kei Jekope, kei ira kecega na tamada tabu, me kakua tale vakadua ni curu ki tuba.¹⁸

Me qai vakalougatataki kemuni na Kalou, oi kemuni na noqui tokani qasenivuli, ena nomuni cakacaka ena lomadina me veivakavulici ena ivakarau ni iVakabula. Ena yaca tabu ni qasenivuli levu duadua ni veitabagauna, Na yaca ni noda Qasenivuli vata kei koya na yaca ko Jisu Karisito, emeni.