Andam na ang Pamahaw

Imahe

Batang lalaki nga nagsul-ob og pangluto nga hapin sa kamot ug epron

Ang kahomot sa sauce sa espagheti mipadaguok sa tiyan ni David. “Kanus-a man maandam ang panihapon?”

“Pipila na lamang ka minuto,” miingon si Papa, nga nag-ukay sa sauce. Mipasiplat siya ni David. “Unsay imong gibuhat?”

Giisa ni David ang iyang Giya nga Basahon sa Kabataan. “Nagsulay ko sa pagpili og bag-ong tumong. Apan dili ako segurado kon asa niini ang buhaton. Pulos kini maayo.”

“Unsa ang ubang mga opsiyon?”

Gipakli ni David ang giya nga basahon. “Mokanta og awit sa Primary, moserbisyo sa imong mga silingan, moabi-abi sa uban …” Dayon naa siyay laing nakit-an. “Uy! Papá, mahimo bang tabangan kon nimo nga makat-on sa pagluto?”

“Siyempre,” miingon si Papá. “Maghimo ko sa akong espesyal nga pamahaw sa Dominggo ugma. Mahimo bang mobangon ka og sayo ug motabang nako?”

“OK!” Miingon si David.

Pagkasunod buntag, mibangon og sayo si David ug miadto ni Papá sa kusina. Samtang gipagawas ni Papá ang mga sagol, nanghunaw si David sa iyang mga kamot.

Gipakita ni Papá kang David kon unsaon sa paggunit sa kutsilyo ug paghiwa sa prutas nga luwas sa peligro. Iyang gisugo si David sa pagmasa sa tanang sagol sa pancake. Dayon panahon na alang sa labing nindot nga bahin. Bacon!

Migamit si David og kimpit aron hinay nga balihon ang bacon sa sulod sa kaha. Nagpiti-piti ang bacon, ug ang ubang mantika mipisik sa iyang mga tudlo. “Agay!” Miingon si David.

“Amping,” miingon si Papá. Gipaagas niya ang gripo ug gisugo si David sa pagbutang sa iyang kamot sa ubos sa bugnaw nga tubig sulod sa usa ka minuto. Dayon gihatagan niya si David og pangluto nga hapin sa kamot aron isul-ob aron moprotekta sa iyang mga kamot gikan sa init nga mantika.

“Dili sayon ang pagluto” miingon si David.

“Oo,” miingon si Papá. Ang pagkat-on og bag-ong mga butang usa ka malisod nga buhat. Mao nga kinahanglan nimong makat-onan ang saktong mga pamaagi.”

“Ug magsige og praktis,” miingon si David. “Nakat-onan nako sa Primary nga bisan si Jesus wala mahibalo sa tanang butang sa sinugdanan.”

Mitando si Papa. “Bisan siya kinahanglan nga makakat-on sa paghimo og mga butang sa hinayhinay.”

Nahuman nila sa pagluto ang bacon ug gibutang ang tanang pagkaon sa lamesa. Ang tibuok pamilya ganahan kaayo niini.

Ang ilang iring, si Nacho, ningmiyaw sa ilawom sa lamesa.

“Morag ganahan usab si Nacho nga hatagan!” Ang igsoong babaye ni David nga si Sarah miingon.

Si David nagsige na og tabang ni Papá sa kusina human niadto. Gipakita siya ni Papá og daghang mga resipi sa ilang libro sa resipi. Si David nakat-on kon unsaon sa pagsukod sa mga sagol sa cookies, unsaon pagkutil sa itlog, unsaon sa paghimo sa iyang paborito nga ilimnon, ang horchata. Samtang mas nagpraktis siya sa pagluto, mibati siya nga mas masaligon.

Dayon usa ka Dominggo sa buntag, gibati ni David nga andam na gayod siya. “Papá, puwede ba nga ako lang ang magluto sa pamahaw karon?” Mihangyo si David samtang miadto siya ni Papá sa kusina.

“Sige,” miingon si Papá. Anaa ra ko dinhi kon nagkinahanglan ka og tabang.”

Gipagawas ni David ang mga butang nga iyang gikinahanglan ug misugod sa pagtrabaho. Gihiwa niya ang mga strawberry ug ang mga saging sama sa paagi nga gipakita ni Papá kaniya. Mainampingon niyang gibali ang mga pancake nga walay bisan unsa ang mapaig.

Ug sa dihang iyang giluto ang bacon, nakahibalo na siya kon unsa gayod ang buhaton. Nagsul-ob siya og pangluto nga hapin sa kamot ug epron aron dili siya mapiskan sa mantika.

Dihang nahuman na siya, gibutang ni David ang tanang pagkaon sa lamesa. Ang tibuok pamilya nanglingkod. Ang iyang manghod nga igsoong babaye nga si Emily nag-ampo, ug misugod sila sa pagpangaon.

“Lami kaayo kini,” miingon ang iyang igsoong lalaki, si Jeremie. “Salamat, Papá.”

“Sa pagkatinuod,” miingon si Papá, “Si David rang usa ang nagluto niining tanan.”

“Tinuod?” Miingon si Jeremie. Mitan-aw siya ni David. “Maayo na gyod kaayo ka!”

Dako kaayo ang pahiyom ni David. Nagkinahanglan kadto og daghan nga pagpraktis, apan nindot nga pagbati ang pag-andam og pamahaw sa iyang pamilya. Naghinam-hinam siya nga makasulay sa paghimo og dugang nga mga resipi.

Imahe

Istorya nga naa sa PDF

Paghulagway pinaagi ni Liz Brizzi