“Binotelya nga Gugma,” Higala, Abril 2024, 40–41.
Imong Sinulat
Binotelya nga Gugma
Mitabang ko sa usa ka proyekto sa eskuwelahan sa paghimo og “binotelya nga gugma,” nga mao ang mga plastik nga botelya nga puno sa mga plastik nga kausa ra magamit. Mga aytem kini nga gigamit og kausa ug gilabay, sama sa mga plastik nga bag. Ang matag pamilya mihimo og binotelya nga gugma ug gidala kini sa eskuwelahan. Ang mga botelya gipadala ngadto sa usa ka organisasyon nga mihimo niini nga plastik nga mga bloke. Ang mga bloke gamiton sa paghimo og panggawas nga mga bangko ug mga balay alang sa mga tawo nga nanginahanglan.
Nakaamgo ko nga ang among pamilya naggamit og daghang plastik kada adlaw, nga maoy usa sa tinuod nga problema sa palibot. Gusto ko nga magsugod sa pag-atiman sa palibot. Apan dili ako makahimo niini nga ako ra. Mao nga nakahukom ko sa paghangyo sa mga tawo sa simbahan nga motabang usab. Nakigsulti ko sa akong mga lider ug sa bishop sa ward. Gihangyo ko niya sa paghisgot mahitungod sa proyekto atol sa miting. Daghang tawo ang miapil sa proyekto. Human sa pipila ka bulan, nakakolekta mi og sobra sa 100 ka binotelya nga gugma!
Ang proyekto nagpadayon karon. Dihang nakakolekta ko og daghang botelya, mikuyog ko sa akong pamilya ug sa mga higala sa Primary didto sa hatdanan nga dapit. Among gibilin ang mga botelya didto aron himoon nga mga materyal para sa bilding.
Ganahan ko niini nga proyekto. Nakapahimo kini kanako nga mobati nga makatabang gyod ko niining kalibotan nga gihimo sa Dios alang kanato. Nakatabang kini kanako nga hatagan og bili ug pagtahod ang kinaiyahan ug mga hayop. Ang pag-atiman sa mga hayop maoy usa ka paagi nga makasunod ko sa Manluluwas. Ganahan usab ko nga usa kana ka paagi sa pagtabang sa uban.
Usahay dili sayon ang paggahin og panahon sa paghimo og mga botelya sa gugma. Apan gibati nako nga makapausab kita ug makapili sa paghimo og ginagmay, maayong mga buhat kada adlaw. Nakat-onan usab nako nga aron makahimo og “dako “ nga butang kinahanglan kita nga motabang sa uban. Makaimpluwensya kita sa uban ug makatabang nila nga moapil sa kausaban. Nagtuo ko nga usa kini ka importante nga bahin sa ebanghelyo ni Jesukristo: ang pag-usab, pagtabang sa uban, ug paghimo og maayo dinhi sa kalibotan.
Mga paghulagway pinaagi ni Simini Blocker