“Mi Mi wan Disaepol blong Jisas Kraes,” Blong Ol Yut Oli Kam Strong, Jenuware 2024.
2024 Yut Stamba Toktok
Mi mi wan Disaepol blong Jisas Kraes
Yu save folem Sevya mo serem toktok blong Hem long ol narafala man.
?Yu yu save from wanem, afta we Hem i hilim ol man, Jisas i talem long sam long olgeta blong no talem long eniwan (luk long Mak 7:36)? Wan risen hem i from ol kaen man we Hem i nidim blong oli folem Hem. Yu maet tingting se, sapos ol pipol oli tokbaot ol hiling blong olgeta bae i wan gudfala wei blong Jisas i pulum moa man blong folem Hem. Be, Jisas i no nidim ol man blong folem Hem nomo. Hem i nidim ol disaepol.
Jisas i talem long Pita mo Andru, “Kam Folem Mi” (Matiu 4:19). Josef Smit Translesen blong ves ia i rid olsem, “Mi, mi man ia nao we ol profet oli bin raet abaot mi; kam folem mi.” (Josef Smit Translesen, Matiu 4:18 [long Matiu 4:19, futnot a]). Invitesen ia i no blong stap folfolem Hem blong sot taem. Hem i wantem olgeta blong stap olsem ol disaepol blong Hem blong oltaem.
Hem i no bin wantem olgeta blong wajem Hem i tijim, lavem ol pipol mo mekem ol merikel. Hem i bin wantem olgeta blong mekem semmak. Hem i bin wantem se wok blong Hem i kam wok blong olgeta. Blong jusum Kraes i minim se, bae oli lanem blong givim seves olsem we Hem i bin givim seves, mo tingting olsem we Hem i tingting. Bae oli praktis blong laef olsem we Hem i bin laef, mo bae Hem i tijim olgeta, mo givim olgeta help we oli nidim blong kam moa olsem Hem.
Grik toktok blong disaepol hem i mathetes. I minim moa long wan man we i folem wan man o wan studen. Oli transletem olsem man we i stap go tru long trening. Long taem blong Kraes, ol disaepol oli jusum masta we oli wantem blong lan aot long hem wetem tingting ia blong oli kam ol masta olgetawan. Kraes i no folem nomol praktis ia. Be Hem i tanem tingting ia mo Hem i lukaotem ol disaepol blong Hem. Tedei, Kraes i singaotem yumi blong kam folem Hem. Hem i singaotem yumi blong kam ol disaepol blong Hem mo serem toktok blong Hem long medel blong ol pipol blong Hem, blong oli save gat laef we i no finis (luk long 3 Nifae 5:13).
Wan yangfala woman blong Haiti long Caribbean i soem se hem i wantem blong kam wan disaepol blong Kraes taem hem i invaetem fren blong hem we i no memba blong Jos blong folem hem i go long FSY konfrens. Faswan, papa blong fren blong hem i no wantem letem pikinini gel blong hem blong go taem hem i askem. Ol Jos lida oli eksplenem abaot ol gudfala eksperiens we oli stap wet long hem, mo ol gudfala yang adalt kaonsela we bae oli stap lukaotem gud hem. Papa ia i givim raet blong gel blong hem i go, mo afta we hem i stap luk jenis long laef blong gel blong hem, hem i givim raet blong gel blong hem i go long ol Jos miting mo —sikis manis afta—hem i baptaes.
Wan yangfala man blong Ajentina long Saot Amerika i soem se hem i wantem blong kam wan disaepol blong Kraes tru long fasin blong serem sam loli blong hem wetem wan fren taem oli stap ron long bas i go long skul. Taem hem i kam long loli ia we i gat kofi insaed, hem i eksplenem se hem i neva testem kofi bifo from i no gat wan long famli blong hem i drink kofi. Hemia i lidim storian i go abaot Jos, we i lid i go long wan invitesen blong kam long ol miting, we long en i lidim fren blong hem blong joenem Jos mo sevem wan misin long Chile.
I no evriwan we yu toktok long olgeta abaot Jos o invaetem blong kam long wan Jos aktiviti bae oli wantem blong joen. Hemia i ORAET. I no evriwan we Kraes i bin toktok wetem olgeta long taem we Hem i bin stap mekem wok blong Hem long wol oli bin joenem Hem. Be, taem yumi jusum blong stap olsem ol disaepol blong Jisas Kraes mo talemaot toktok blong Hem,bae Hem i givim long yumi strong paoa long tingting mo tabu help. Bae yumi lanem olsem wanem blong kam moa olsem Hem, mo hemia nao wanem ol disaepol oli bin mekem.