!Stop blong Stap Komperem Samting! Yu Yu Gud Inaf,” Blong Ol Yut Oli Kam Strong, Jenuware 2024.
Kam Folem Mi
!Stop blong stap Komperem Samting! Yu Yu Inaf
Hemia fofala samting we yumi lanem aot long wan long ol bigfala brata blong Nifae.
Ol pikja droing i kam long Corey Egbert
I gat wan studen blong klas we oltaem hem i save raet ansa. Pikinini ia long basketbol tim we oltaem i sutum plante poen. Man ia we evriwan oli wantem blong fren wetem hem. Long wol blong stap komperem samting, i luk olsem se i gat wan we i gud moa bitim evri man.
Fasin blong stap komperem samting i save had taem i kam long taem blong stap laef folem gospel. Yu maet ting se ol narafala man oli moa stret gud, oli gat wan strong testemoni, o filim Spirit moa klia bitim yu. Be blong komperem yu olsem i no help.
Insaed long Buk blong Momon, yu save se Nifae i bin wan gudfala lida mo profet. ?Be hamas nao yu save abaot bigfala brata blong Nifae, Sam we i fetful? Hem i no wan lida o profet olsem Nifae, be hem i no nidim blong stap semmak olsem Nifae blong hem i gud inaf.
1. Sam I Bin Stap Biliv
Nifae i bin prea mo kasem wan ansa blong hemwan se Lod i bin komandem famli blong hem blong aot i go long wael ples we i no gat man long hem. Mo Sam “i bilivim ol toktok blong [Nifae]” (luk long 1 Nifae 2:16–17). Maet Sam i no gat wan testemoni we i stret gud evriwan. Maet hem i gat ol kwestin. Be hem i jusum blong bilivim long ol toktok blong brata blong hem, mo afta hem i mekem folem ol biliv blong hem. No komperem fet o testemoni blong yu wetem blong ol narafala pipol. Taem yu wok folem fet olsem Sam i bin mekem, testemoni blong yu long Sevya bae i gro smolsmol. (Luk tu long Doktrin mo Ol Kavenan 46:13–14; Alma 32.)
2. Sam i Putum Tingting i Stap Daon
Laman mo Lemyul oli no hapi we yangfala brata blong olgeta, Nifae, i stap kam wan lida ova long olgeta. Be Sam, we hem i bigfala brata blong Nifae tu, i bin putum tingting i stap daon. Hem i lisin long Nifae mo folem ol advaes blong hem (luk long 2 Nifae 5:3–6). Sapos ol narawan raon long yu oli askem olgeta blong lidim be i no yu, putum tingting i stap daon, mo no komperem hem wetem yu. Sapotem olgeta, lan aot long olgeta, mo mekem bes blong yu blong jusum raet.
3. Sam i gat fasin blong save wet longtaem
Hem i olsem se evriwan raon long yu oli stap laef long wan laef we i stret gud be evriwan oli go tru long had taem. Sam i no defren nomo. Laman mo Lemyul oli go agensem Sam, olsem we oli agensem Nifae. !Oli bin kilim Sam tu wetem wan aean, olsem we oli bin kilim Nifae! (Luk long 1 Nifae 3:28; 1 Nifae 7:6.) Be Sam wetem longfala tingting i bin go tru long ol hadtaem blong hem. Blong stap go tru long ol had taem i no minim se yu stap mekem samting i rong. No komperem ol hadtaem blong yu wetem blong ol narafala pipol. Gat wan fasin blong save wet longtaem mo trastem Lod Bae Hem i helpem yu go tru.
4. Sam I bin kasem Blesing
Papa blong Sam, Lihae, i talem long Sam se , “Bae yu kasem blesing long evri dei blong yu” (2 Nifae 4:11). Sam i no bin wan lida o profet, be hem i fetful blong folem Jisas Kraes, mo hem i bin kasem blesing from hemia. Wetem help blong Sevya, hem i bin gud inaf. Mo yu tu, yu save olsem.