« ខ្ញុំជាសិស្សម្នាក់នៃព្រះយេស៊ូវគ្រីស្ទ » ដើម្បីកម្លាំងនៃយុវជន ខែ មករា ឆ្នាំ ២០២៤ ។
បាវចនា យុវវ័យ ឆ្នាំ ២០២៤
ខ្ញុំជា សិស្ស ម្នាក់នៃ ព្រះយេស៊ូវគ្រីស្ទ
ក្មួយៗអាចធ្វើតាមព្រះអង្គសង្រ្គោះ ហើយផ្សព្វផ្សាយព្រះបន្ទូលរបស់ទ្រង់ទៅកាន់អ្នកដទៃទៀត ។
តើក្មួយៗធ្លាប់ឆ្ងល់ទេថា ហេតុអ្វីបានជាក្រោយពីព្យាបាលមនុស្ស ព្រះយេស៊ូវបានប្រាប់ពួកគេមួយចំនួនកុំឲ្យប្រាប់នរណាឡើយ ( សូមមើល ម៉ាកុស ៧:៣៦ ) ? ហេតុផលមួយប្រហែលជាទាក់ទងនឹងប្រភេទនៃអ្នកដើរតាមដែលទ្រង់ត្រូវការ ។ ក្មួយៗប្រហែលជាគិតថា ប្រសិនបើមនុស្សនិយាយអំពីការព្យាបាលរបស់ពួកគេ នោះវានឹងជាវិធីដ៏ល្អមួយសម្រាប់ព្រះយេស៊ូវដើម្បីទាក់ទាញអ្នកដើរតាមទ្រង់ ។ ទោះជាយ៉ាងណា ព្រះយេស៊ូវមិនគ្រាន់តែត្រូវការអ្នកដើរតាមប៉ុណ្ណោះទេ ។ ទ្រង់ត្រូវការ ពួកសិស្ស ។
ព្រះយេស៊ូវបានមានបន្ទូលទៅកាន់ពេត្រុស និង អនទ្រេថា « ចូរមកតាមខ្ញុំ »( ម៉ាថាយ ៤:១៩ ) ។ ការបកប្រែរបស់ យ៉ូសែប ស្ម៊ីធ អំពីខគម្ពីរនេះគឺ « ខ្ញុំនេះហើយដែលបានចែងទុកដោយពួកព្យាការី ចូរមកតាមខ្ញុំ » ( ការបកប្រែដោយ យ៉ូសែប ស្ម៊ីធ ៤:១៨ ) ។ ការអញ្ជើញនេះមិនមែនដើម្បីទៅដើរលេងជាមួយទ្រង់មួយរយៈនោះទេ ។ ទ្រង់ចង់ឲ្យពួកលោកក្លាយជាសិស្សរបស់ទ្រង់ជារៀងរហូត ។
ទ្រង់មិនគ្រាន់តែចង់ឲ្យពួកលោកមើលទ្រង់បង្រៀនដល់មនុស្ស ស្រឡាញ់មនុស្ស និងសម្តែងអព្ភូតហេតុនោះទេ ។ ទ្រង់ចង់ឲ្យពួកលោកធ្វើដូចទ្រង់ដែរ ។ ទ្រង់ចង់ឲ្យកិច្ចការរបស់ទ្រង់ក្លាយជាកិច្ចការរបស់ពួកលោកដែរ ។ ការជ្រើសរើសព្រះគ្រីស្ទមានន័យថា ពួកលោកនឹងរៀនបម្រើដូចជាទ្រង់បម្រើ ហើយគិតដូចដែលទ្រង់បានគិត ។ ពួកលោកនឹងអនុវត្តការរស់នៅដូចជាទ្រង់បានរស់នៅ ហើយទ្រង់នឹងបង្រៀនពួកលោក និងប្រទានជំនួយដែលពួកលោកត្រូវការ ដើម្បីក្លាយកាន់តែដូចទ្រង់ ។
ពាក្យក្រិកសម្រាប់សិស្ស ( disciple ) គឺ mathetes ។ វាមានន័យលើសពីអ្នកដើរតាម ឬសិស្ស ។ ជាញឹកញាប់វាត្រូវបានបកប្រែថាជាអ្នកហាត់ការងារ ។ នៅសម័យព្រះគ្រីស្ទ ជាធម្មតាពួកសិស្សបានជ្រើសរើសចៅហ្វាយដែលពួកគេចង់រៀនតាម ដោយសម្លឹងទៅការក្លាយជាចៅហ្វាយដោយខ្លួនឯង ។ ព្រះគ្រីស្ទមិនបានធ្វើតាមការអនុវត្តធម្មតាទេ ។ ទ្រង់បានបង្វែរវា ហើយស្វែងរកពួកសិស្សរបស់ទ្រង់ជំនួសវិញ ។ សព្វថ្ងៃនេះ ព្រះគ្រីស្ទអំពាវនាវឲ្យយើងមកឯទ្រង់ ។ ទ្រង់ហៅយើងឲ្យធ្វើជាសិស្សរបស់ទ្រង់ ហើយប្រកាសព្រះបន្ទូលរបស់ទ្រង់ក្នុងចំណោមប្រជាជនរបស់ទ្រង់ ដើម្បីឲ្យពួកគេអាចមានជីវិតដ៏អស់កល្បជានិច្ច ( សូមមើល នីហ្វៃទី៣ ៥:១៣ ) ។
យុវនារីម្នាក់មកពីប្រទេសហៃទី ក្នុងតំបន់ការ៉ាបៀន បានបង្ហាញពីបំណងប្រាថ្នារបស់នាងក្នុងការធ្វើជាសិស្សនៃព្រះគ្រីស្ទ ដោយអញ្ជើញមិត្តរបស់នាងដែលមិនមែនជាសមាជិកសាសនាចក្រឲ្យមកចូលរួមសន្និសីទ ដ.ក.យ ជាមួយនាង ។ ដំបូង ឪពុកមិត្តរបស់នាងមិនចង់អនុញ្ញាតឲ្យកូនស្រីគាត់ទៅទេ ។ ថ្នាក់ដឹកនាំសាសនាចក្របានពន្យល់អំពីបទពិសោធន៍វិជ្ជមានដែលនៅរង់ចាំនាង និងទីប្រឹក្សាយុវមជ្ឈិមវ័យដ៏អស្ចារ្យដែលនឹងមើលថែនាង ។ ឪពុកបានអនុញ្ញាតឲ្យកូនស្រីគាត់ចូលរួម ហើយបន្ទាប់ពីបានឃើញភាពខុសគ្នាដែលបានកើតឡើងក្នុងជីវិតរបស់នាង គាត់ក៏បានផ្តល់ការអនុញ្ញាតឲ្យនាងចូលរួមការប្រជុំសាសនាចក្រ ហើយ—ប្រាំមួយខែក្រោយមក—ក៏បានទទួលពិធីបុណ្យជ្រមុជទឹក ។
យុវជនម្នាក់មកពីប្រទេសអាហ្សង់ទីន នៅទ្វីបអាមេរិកខាងត្បូង បានបង្ហាញបំណងប្រាថ្នារបស់គាត់ក្នុងការក្លាយជាសិស្សនៃព្រះគ្រីស្ទ ដោយចែកចាយស្ករគ្រាប់មួយចំនួនរបស់គាត់ជាមួយមិត្តភក្តិម្នាក់នៅពេលពួកគេជិះរថយន្តទៅសាលារៀន ។ ពេលគាត់រើសប៉ះចំស្ករគ្រាប់រសជាតិកាហ្វេ គាត់បានពន្យល់ថា គាត់មិនដែលស្គាល់រសជាតិនោះទេ ដោយសារតែគ្មាននរណាម្នាក់ក្នុងគ្រួសាររបស់គាត់ផឹកកាហ្វេនោះទេ ។ ការណ៍នោះបាននាំឲ្យមានការសន្ទនាអំពីសាសនាចក្រ ដែលបាននាំឲ្យមានការអញ្ជើញមកឯការប្រជុំនានា ដែលនៅទីបំផុតបាននាំឲ្យមិត្តរបស់គាត់ចូលរួមក្នុងសាសនាចក្រ និងបម្រើបេសកកម្មមួយនៅប្រទេសឈីលី ។
មិនមែនមនុស្សគ្រប់គ្នាដែលក្មួយៗអាចនិយាយអំពីសាសនាចក្រជាមួយ ឬអញ្ជើញឲ្យចូលរួមសកម្មភាពសាសនាចក្រនឹងចង់ចូលរួមនោះទេ ។ វាមិនថ្វីនោះទេ ។ មិនមែនមនុស្សគ្រប់គ្នាដែលព្រះគ្រីស្ទបានមានបន្ទូលជាមួយអំឡុងពេលនៃការងារបម្រើនៅលើផែនដីរបស់ទ្រង់បានចូលរួមនោះទេ ។ តែយ៉ាងណាក៏ដោយ នៅពេលដែលយើងជ្រើសរើសធ្វើជាសិស្សនៃព្រះយេស៊ូវគ្រីស្ទ ហើយប្រកាសព្រះបន្ទូលរបស់ទ្រង់ នោះទ្រង់នឹងប្រទានសេចក្ដីក្លាហាន និងជំនួយដ៏ទេវភាពដល់យើង ។ យើងនឹងរៀនពីរបៀបដើម្បីក្លាយកាន់តែដូចទ្រង់ ហើយនោះគឺជាអ្វីដែលពួកសិស្សធ្វើ ។