« ឈប់ប្រៀបធៀប ! អ្នកគឺល្អគ្រប់គ្រាន់ » ដើម្បីកម្លាំងនៃយុវជន ខែ មករា ឆ្នាំ ២០២៤ ។
ចូរមកតាមខ្ញុំ
ឈប់ប្រៀបធៀប ! អ្នកគឺល្អគ្រប់គ្រាន់
នេះជារឿងបួនយ៉ាងដែលយើងរៀនពីបងប្រុសម្នាក់របស់នីហ្វៃ ។
រចនារូបភាពដោយ ខូរី អេចបឺត
មានសិស្សម្នាក់នោះនៅក្នុងថ្នាក់ដែល តែងតែ ដឹងចម្លើយត្រឹមត្រូវ ។ ក្មេងនោះនៅក្នុងក្រុមបាល់បោះដែលតែងតែបោះចូលច្រើនជាងអ្នក ។ មនុស្សនោះដែល មនុស្សគ្រប់គ្នា ចង់ធ្វើជាមិត្តជាមួយ ។ នៅក្នុងពិភពនៃការប្រៀបធៀប វាហាក់ដូចជាតែងតែមាននរណាម្នាក់ដែលល្អប្រសើរជាង ។
ការប្រៀបធៀបអាចពិបាកខ្លាំងណាស់ នៅពេលដែលនិយាយទាក់ទងទៅនឹងការរស់នៅតាមដំណឹងល្អ ។ អ្នកប្រហែលជាគិតថា អ្នកដទៃសុចរិតជាង មានទីបន្ទាល់រឹងមាំជាង ឬមានអារម្មណ៍ពីព្រះវិញ្ញាណច្រើនជាងអ្នក ។ ប៉ុន្តែការប្រៀបធៀបខ្លួនឯងបែបនេះមិនមានប្រយោជន៍នោះទេ ។
ពីព្រះគម្ពីរមរមនអ្នកប្រហែលជាដឹងហើយថា នីហ្វៃគឺជាអ្នកដឹកនាំដ៏អស្ចារ្យ និងជាព្យាការី ។ ប៉ុន្ដែតើអ្នកដឹងច្រើនប៉ុណ្ណាអំពីសាំ ជាបងប្រុសដ៏ស្មោះត្រង់របស់នីហ្វៃ ? គាត់មិនមែនជាអ្នកដឹកនាំ ឬព្យាការីដូចជានីហ្វៃទេ ប៉ុន្តែគាត់មិនចាំបាច់ធ្វើដូចនីហ្វៃដើម្បីបានល្អគ្រប់គ្រាន់នោះទេ ។
១. សាំជឿ
នីហ្វៃបានអធិស្ឋាន ហើយបានទទួលចម្លើយសម្រាប់ខ្លួនលោកផ្ទាល់ថា ព្រះអម្ចាស់បានបញ្ជាឲ្យក្រុមគ្រួសាររបស់ពួកគេចាកចេញទៅក្នុងទីរហោស្ថាន ។ ហើយសាំ « បានជឿតាមពាក្យសម្ដីទាំងឡាយរបស់ [ នីហ្វៃ ] » ( សូមមើល នីហ្វៃទី១ ២:១៦–១៧ ) ។ សាំប្រហែលជាមិនមានទីបន្ទាល់ដ៏ល្អឥតខ្ចោះនោះទេ ។ លោកប្រហែលជាមានសំណួរ ។ ប៉ុន្តែ លោកបានជ្រើសរើសជឿលើពាក្យសម្តីរបស់ប្អូនប្រុសលោក ហើយបន្ទាប់មកលោកបានធ្វើសកម្មភាពទៅតាមជំនឿរបស់លោក ។ កុំប្រៀបធៀបសេចក្ដីជំនឿ ឬទីបន្ទាល់របស់អ្នកទៅនឹងមនុស្សដទៃ ។ ពេលអ្នកធ្វើសកម្មភាពនៅក្នុងសេចក្ដីជំនឿដូចជាសាំបានធ្វើ នោះទីបន្ទាល់របស់អ្នកអំពីព្រះអង្គសង្គ្រោះនឹងរីកចម្រើនបន្តិចម្ដងៗ ។ ( សូមមើលផងដែរ គោលលទ្ធិ និងសេចក្តីសញ្ញា ៤៦:១៣–១៤; អាលម៉ា ៣២ ) ។
២. សាំមានចិត្តរាបសា
លេមិន និងលេមយួល មិន សប្បាយចិត្តទេដែលនីហ្វៃជាប្អូនប្រុសរបស់ពួកគេ បានក្លាយជាអ្នកដឹកនាំលើពួកគេ ។ ប៉ុន្ដែសាំ ដែលជាបងប្រុសរបស់នីហ្វៃដែរនោះ ប្រាកដជាមានចិត្តរាបសា ។ លោកបានស្ដាប់ដល់នីហ្វៃ ហើយបានធ្វើតាមដំបូន្មានរបស់លោក ( សូមមើល នីហ្វៃទី២ ៥:៣–៦ ) ។ ប្រសិនបើអ្នកផ្សេងទៀតនៅជុំវិញខ្លួនអ្នកត្រូវបានសុំឲ្យដឹកនាំ ហើយគេមិនសុំឲ្យអ្នកធ្វើជាអ្នកដឹកនាំ សូមមានចិត្តរាបសា ហើយកុំប្រៀបធៀបឡើយ ។ គាំទ្រពួកគេ រៀនពីពួកគេ ហើយធ្វើឲ្យបានល្អបំផុតដើម្បីជ្រើសរើសអ្វីដែលត្រឹមត្រូវ ។
៣. សាំមានការអត់ធ្មត់
វាហាក់ដូចជាមនុស្សគ្រប់គ្នានៅជុំវិញខ្លួនអ្នកកំពុងរស់នៅក្នុងជីវិតដ៏ល្អឥតខ្ចោះ ប៉ុន្តែមនុស្សគ្រប់គ្នាគឺឆ្លងកាត់គ្រាលំបាកដូចគ្នា ។ សាំមិនមែនជាករណីលើកលែងនោះទេ ។ លេមិន និងលេមយួលបានបែរទៅប្រឆាំងនឹងសាំ ដូចដែលពួកគេបានបែរទៅប្រឆាំងនឹងនីហ្វៃដែរ ។ ពួកគេថែមទាំងវាយសាំនឹងដំបងដូចពួកគេវាយនីហ្វៃដែរ ! ( សូមមើល នីហ្វៃទី១ ៣:២៨; នីហ្វៃទី១ ៧:៦ ) ។ ប៉ុន្តែសាំបានស៊ូទ្រាំនឹងការសាកល្បងរបស់លោកដោយអត់ធ្មត់ ។ ការឆ្លងកាត់គ្រាលំបាកមិនចាំបាច់មានន័យថាអ្នកកំពុងធ្វើអ្វីមួយខុសនោះទេ ។ កុំប្រៀបធៀបការសាកល្បងរបស់អ្នកទៅនឹងមនុស្សដទៃ ។ សូមអត់ធ្មត់ និងទុកចិត្តលើព្រះអម្ចាស់ ។ ទ្រង់នឹងជួយអ្នក ។
៤. សាំត្រូវបានប្រទានពរ
ឪពុករបស់សាំ លីហៃ បានប្រាប់សាំថា « កូននឹងបានពរអស់មួយជីវិតរបស់កូន » ( នីហ្វៃទី២ ៤:១១ ) ។ សាំប្រហែលជាមិនមែនជាអ្នកដឹកនាំ ឬព្យាការីទេ ប៉ុន្តែលោកនៅតែដើរតាមព្រះយេស៊ូវគ្រីស្ទដោយស្មោះត្រង់ ហើយលោកបានទទួលពរដោយសារធ្វើដូច្នោះ ។ ដោយមានជំនួយពីព្រះអង្គសង្រ្គោះ នោះ លោកគឺល្អគ្រប់គ្រាន់ហើយ ។ ហើយអ្នកក៏អាចល្អគ្រប់គ្រាន់ដែរ ។