Mauaina o Lou Malosi ia Iesu Keriso

E te le o i ai iinei i se avanoa faafuasei po o se mea sese. Sa e filifili e sau i le lalolagi e aoao, tuputupu a’e, faia mea ofoofogia, ma avea atili e pei o lou Tama Faalelagi. I lenei malaga, o le a e feagai ai ma taimi o faigata, tofotofoga faaletagata lava ia, faalotovaivaiina, ma le le fiafia lea e mafai ona lagona ai le lofituina. Atonu ua e lagona le maileia i se taimi faapena i le taimi nei.

I taimi faapena, faamolemole ia manatua e alofa lou Tama Faalelagi ia te oe. Na Ia alofa lava, ma o le a Ia alofa pea. Ona o Lona alofa e le iu ma atoatoa, na Ia auina mai ai Lona Alo, o Iesu Keriso, e faamalosia oe ma fesoasoani ia te oe e agai i luma. Ma na afio mai Iesu ona e alofa tele foi o Ia ia te oe.

O le mea e faanoanoa ai, o nisi tagata e le iloaina lo latou manaomia o se Faaola. Latou te le malamalama o i latou, e pei o tagata uma, o le a latou faia ni mea sese e le mafai ona latou faaleleia, i ai i ni tulaga o le leiloloa lea e le mafai ona latou toe fo’i mai ai, ma feagai ma faafitauli ma faalavelave e le mafai ona latou tauaveina ma onosaia na o i latou lava. E le mafai foi ona latou faatoilaloina le agasala ma le oti na o i latou lava. O lona uiga o i latou—ma tagata uma—e manaomia le Togiola a Iesu Keriso, faatasi ai ma le malosi e mafai ona aumaia ai.

“Manaia tele, Elder Holland,” atonu o loo e mafaufau ai, “ae e mafai faapefea ona ou faia Iesu Keriso ma o’u malosiaga?” Ina ia fesoasoani e tali lenei fesili, faamolemole sei o’u faasoa atu lava na o ni nai auala e le mafaitaulia e faamalosia ai oe e Iesu Keriso i aso taitasi.

I Lona po mulimuli i le olaga nei, sa alu atu ai Iesu Keriso i le Faatoaga o Ketesemane. O iina, na Ia tootuli ai i le vaega o i ai laau olive ma amata ai ona tauaveina i Ona lava luga agasala a le lalolagi. O lenei puapuaga tele ma le lē iu “na oo ia te [ia], … o lē ua silisili i tagata uma, le gatete ona o le tiga, ma tafe toto ai i pu afu ninii uma,” (Mataupu Faavae ma Feagaiga 19:18).

Ona avatu ai lea o Iesu i Kalevaria ma faasatauroina. O iina na Ia faamae’aina ai Lana taulaga togiola. Sa Ia tuu atu ma le loto atoa Lona soifua, ona Ia toetu manumalo ai lea mai le oti. I lenei vaitau o le Eseta, ou te olioli i le tautino atu o loo soifua Iesu Keriso! Ou te tautino atu foi e le gata ina Ia aveesea le avega o le agasala ae sa “mafatia i tiga ma puapuaga ma faaosoosoga o ituaiga eseese uma” i le faia o lena mea (Alema 7:11; ua faaopoopo le faamamafa).

Sa lagonaina e le Faaola lototiga uma ma le faavavau ma onosaia, i se auala patino, o tiga ma mafatiaga uma na oo ia te oe, o a’u, ma tagata uma o e na soifua pe o le a soifua mai. Ona o mea sa Ia oo i ai faaletino, faalemafaufau, ma faaleagaga mo oe, ua Ia silafia ai le auala e faamalosia ai oe.

Atonu e faigata ia te oe ona talitonu o le a fiafia Iesu e fesoasoani ia te oe i le tulaga o se tagata e toatasi mai le miliona o tagata e tausaga tutusa. Afai e i ai se taimi e te manatu ai o loo i ai ni mea e sili atu ia te Ia ona fai nai lo le faamalosia o oe i taimi e te manaomia ai, mafaufau ia te Ia i lena togalaau, mafaufau ia te Ia i luga o lena satauro. “Sa puapuagatia o Ia, sa manu’a ma maliu”² mo oe ona sa Ia silafia e te agavaa i ai. O loo Ia silafia pea lena mea. E matua’i fiafia lava o Ia, naunau, ma e mafai ona fesoasoani ia te oe—i le taimi nei ma le faavavau. Na Ia tuuina mai Lona soifua ina ia mafai ona Ia faamalosia oe a o e taliaina Lana valaaulia e suia ai le olaga: “O mai ia te a’u” (Mataio 11:28).

O lau filifiliga le mulimuli ia Iesu Keriso ma avea o Ia ma ou malosiaga. Ua Ia “faailogaina le ala ma taitai le auala”³ e toe foi atu ai i le Tama Faalelagi. O le mea moni lava, O Ia o “le ala, ma le upu moni, ma le ola” (Ioane 14:6).

E te maua le ala i le taliaina o le talalelei a Iesu Keriso a o e faatinoina le faatuatua ia te Ia ma salamo i au agasala. E te faalolotoina lou sootaga ma Ia pe a e filifili e papatiso i Lona suafa ma maua le meaalofa o le Agaga Paia. Ona e faaauau ai lea i le ala o Lana talalelei e ala i le tausia o poloaiga, mauaina o sauniga, faamamaluina o feagaiga, ma le ola ai o ni Ona soo.

O nei faatinoga e fausia ai se sootaga mamana—o se sootaga faalefeagaiga—lea e fusia ai oe ma le saogalemu ia Keriso—ma Ia iā te oe. A o e savali faatasi ma Ia, e avea o Ia ma le Tama ma au punavai autu o le taitaiga ma le malosi faaleagaga. Ona mafai lea ona e fetaomi atu i luma ma le saogalemu ma le fiafia i aso uma, avea atili e faapei o i Laua, ma toe foi atu i se aso e mau faatasi ma i Laua ma maua le ituaiga olaga o loo soifua ai i Laua.

Faatasi ai ma lo’u loto atoa, ou te molimau atu o Iesu o le Keriso. Pe a e savalia ni laasaga agai atu ia te Ia, aapa atu mo Ia, ma valaaulia o Ia e avea ma ou malosiaga, o le a afio mai o Ia ia te oe ma o le a e mauaina o Ia.⁴ E leai se filifiliga e mafai ona e faia ina ia mafai ai ona e le mafaia ona aapa atu ia te Ia. Ou te talitonu ma le loto atoa i le mea sa ou fai atu ai muamua: “E le mafai e oe [po o soo se tasi] ona magoto ifo i lalo atu o le malamalama e le muta o le Togiola a Keriso.”⁵

Afai o le a e sau ia Keriso, muamua ma tausia e le aunoa Ana poloaiga ma le “faamoemoe atoa o le loto” (3 Nifae 18:32), o le a Ia savalia le malaga o le olaga faatasi ma oe. O le a Ia uuina lou lima ma avea ma ou faamoemoe. O le a avea o Ia ma ou malosiaga. Ma o le a Ia aumaia le fiafia tumau, filemu moni, ma le olioli tele ia te oe.

I le avea ai ma se tasi o Ana molimau faapitoa, ou te molimau ma folafola atu e moni lenei mea.