“Mo Le Malosi o le Autalavou: O Le Savali a le Faaola ia te Oe,” Mo le Malosi o le Autalavou, Mat. 2024.
O Se Taiala i Lona Malosi
Mo Le Malosi o le Autalavou: O Le Savali a le Faaola ia te Oe
O lenei taiala e fesoasoani ia te oe e faafesootai ai au filifiliga ia Iesu Keriso ma Lana aoaoga faavae.
Ou te Tu i le Faitoto’a ma Tu’itu’i Atu, saunia e J. Kirk Richards
Manatu faapea o loo e nofo i Kalilaia anamua, i le 2,000 tausaga ua mavae. Ua valaaulia oe ma au uo i se faigalotu a le autalavou i le sunako i le lotoifale, o le a i ai se failauga valaaulia faapitoa: o Iesu le Nasareta. Ma i se taimi faapitoa i Lana savali, ua valaaulia ai e Iesu le autalavou i le aofia e fesili atu ia te Ia ni fesili.
O a ituaiga o fesili e te manatu o le a e faalogo i ai?
Ou te manatu o nisi o fesili o le a atagia ai le aganuu ma tulaga o lena taimi. Ae ou te talitonu moni o le tele o fesili o le a foliga mai o ni fesili o loo i ai i le asō.
Mo se faataitaiga, i le Feagaiga Fou, sa fesili tagata i le Faaola i fesili faapenei:
-
O le a se mea e tatau ona ou faia e maua ai le ola e faavavau?1
-
E talia ea a’u? Pe ou te auai?2
-
Afai e agasala lo’u uso ia te a’u, e faafia ona ou faamagalo ia te ia?3
-
O le a le mea o le a tupu i lenei lalolagi i le lumanai? Pe o le a ou saogalemu ea?4
-
E mafai ona E faamaloloina ē pele ia te a’u?5
-
O le a le upumoni?6
-
E faapefea ona ou iloa o loo ou ui i le ala sao?7
Tatou te le taumanatunatu ea i le mea e tasi mai lea taimi i lea taimi? I le aluga o seneturi, e lei suia tele ia fesili. Ma e faapena foi le lē suia o le agaalofa o le Faaola ia i latou o e faia nei fesili. Na te silafia le faigata ma le fenumiai o le olaga. Na te silafia le faigofie tele o le leiloa o lo tatou ala. Na te silafia tatou te popole i nisi taimi e uiga i le lumanai. Ma ua fetalai mai o Ia ia te oe ma a’u, e pei lava ona Ia fetalai mai i Ona soo i se taimi ua leva:
Pe a i ai ni au filifiliga taua e faia, o Iesu Keriso ma Lana talalelei toefuataiina o le filifiliga aupito silisili lea. A i ai ni au fesili, o Iesu Keriso ma Lana talalelei toefuataiina o tali aupito silisili ia.
O le mea lea ou te fiafia ai i le Malosi o le Autalavou: O Se Taiala mo le Faia o Filifiliga. E faasino atu ai i tatou ia Iesu Keriso ina ia mafai ona tatou maua Lona malosi. Ou te teuina se kopi i la’u taga i taimi uma. A o ou feiloai atu i tagata i le lalolagi atoa o e fia iloa pe aisea tatou te, i le avea ai ma tagata o le Ekalesia a Iesu Keriso, e faia ai mea tatou te faia, ou te faasoa atu lenei taiala ia i latou.
O leMo le Malosi o le Autalavou ua aoao mai ai upumoni e faavavau e uiga i le Faaola ma Lana Ala. E valaaulia ai oe e fai filifiliga e faavae i na upumoni. Ma ua faasoa mai ai faamanuiaga folafolaina ia Na te tuuina mai ia i latou o e mulimuli ia te Ia. Faamolemole faitau, mafaufau loloto, ma faasoa atu lenei taiala!
Valaaulia o Ia i Totonu
E finagalo Iesu Keriso e avea o Ia ma se vaega o lou olaga—o se mafutaga faifai pea, i aso taitasi, i taimi lelei ma taimi leaga. E le na o Lona tu i le faaiuga o le ala, ma faatalitali mai mo oe e te oo atu ia te Ia. O le a Ia savali ma oe i laasaga uma lava o le ala. O Ia o le Ala!
Ae Na te le faamalosia Lona ala i lou olaga. E te valaaulia o Ia i totonu, e ala i au filifiliga. O le mafuaaga lea, o se taiala mo le faia o filifiliga, e pei o le Mo Le Malosi o le Autalavou, o se mea taua tele. O taimi uma lava e te faia ai se filifiliga amiotonu e faavae i upumoni e faavavau a le Faaola, e te faaali atu e te manao ia te Ia i lou olaga. O na filifiliga e tatalaina ai faitotoa o le lagi, ma o Lona malosiaga o le a liligiina mai i lou olaga.11
Fai se Fesootaiga Malosi
Atonu e te manatua na faatusatusa e le Faaola i latou o e faalogo ma faia Ana fetalaiga i le tagata poto o le na “atiae lona fale i luga o se papa.” Na ia faamatalaina mai:
“Ma sa to mai uaga, ma oo mai lologa, ma agi mai matagi, ma taia lena fale; ma sa lei pau lava, ona sa faavaeina i luga o se papa.”12
E le tu lava pea se fale i se afa ona e malosi le fale. E le sao foi ona e malosi le papa. E sao le fale mai le afa ona ua maua’a i lena papa malosi. O le malosiaga o le sootaga i le papa e taua.
E faapena foi, a o tatou fausia o tatou olaga, e taua le faia o filifiliga lelei. Ma e taua le malamalama i le upumoni e faavavau a le Faaola. Ae o le malosi o le a tatou manaomia e tetee atu ai i afa o le olaga e oo mai pe a tatou faafesootai a tatou filifiliga ia Iesu Keriso ma Ana aoaoga faavae. O le mea lena e fesoasoani ai le Mo Le Malosi o le Autalavou ia i tatou e fai.
Mo se faataitaiga, atonu e iloa e au uo e te taumafai e aua nei faaaogaina gagana masoa ma faatiga. Atonu latou te vaai atu ia te oe o aapa atu i lena tamaitiiti i le aoga, lea e toatele lava tagata e le amanaiaina pe faasaua foi i ai. Ae latou te iloa e te faia nei filifiliga ona ua aoao mai Iesu Keriso e faapea “o tagata uma o ou uso ma tuafafine—e aofia ai … tagata e ese mai ia te oe”?13
Atonu e iloa e au uo e te alu i le lotu i Aso Sa uma. Atonu latou te matauina pe a e tapeina se pese patino pe le taliaina foi se valaaulia e matamata i se ata tifaga patino. Ae ua latou iloa e te faia nei filifiliga aua ua ia te oe “se sootaga fiafia faalefeagaiga ma le Tama Faalelagi ma Iesu Keriso,” ma o se vaega o lena tautinoga e mulimuli i le Faaola, ua e faafetai ai “i le i ai o le Agaga Paia e fai ma au soa tumau”?14
Atonu e iloa e tagata e te le inu pe ulaula pe faaaoga isi fualaau faasaina. Ae pe latou te iloa e te faia nei filifiliga aua na aoao mai Iesu Keriso e faapea “o lou tino e paia,” “’o se meaalofa ofoofogia mai lou Tama Faalelagi,” na faia i Lona faatusa?15
Atonu e iloa e au uo o le a e le kopi pe pepelo ma e te manatu mamafa i le aoga. Ae pe ua latou iloa ea o lenei mea ona sa aoao mai Iesu Keriso e faapea “o le upumoni e faasaolotoina ai oe”?16
O le mea sili lava, pe o iloa e au uo e te faia nei filifiliga e le taualoa i nisi taimi ina ia tumau faamaoni ai i tulaga faatonuina a Keriso aua ua e iloa “o Iesu Keriso o lou malosi lea”?17
O Ia o Lou Malosiaga
Ou te tuuina atu ia te outou la’u molimau mautinoa o Iesu Keriso o le Ala i se lumanai manuia ma le mamalu—lou lumanai. Ma o Ia foi o le Ala i se olaga manuia ma le mamalu i le taimi nei. Savali i Lana ala, ma o le a Ia savali faatasi ma oe. E mafai ona e faia lena mea!
A’u uo talavou pele, o Iesu Keriso o lo outou malosi. Faaauau pea ona savavali faatasi ma Ia, ma o le a Ia fesoasoani ia te oe e lele “i apaau e pei o aeto”18 e agai atu i le olioli e faavavau ua Ia saunia mo oe.