Mga Bukid nga Taklaron

Nabatian ko si Pangulong Spencer W. Kimball, sa isa ka sesyon sang komperensya, nga nagapangayo nga ang Dios maghatag sa iya sang mga bukid nga taklaron. Siling niya: “May dalagku nga mga hangkat sa aton atubangan, higante nga mga oportunidad nga dapat sugataon. Ginabaton ko inang makagalanyat nga mga kahigayunan kag nakabatyag nga hambalon ang Ginuo sing mapainubuson, ‘Ihatag sa akon ining bukid,’ ihatag sa akon ining mga hangkat.”¹

Ang akon tagipusuon napukaw, kay nakahibalo ako, sang pila ka mga hangkat kag mga pagtilaw nga iya na ngadaan ginaatubang. Nakabatyag ako sang kaluyag nga mangin mas pareho sa iya, isa ka maisog nga alagad sang Dios. Gani isa ka gab-i nagpangamuyo ako para sa isa ka pagtilaw nga magpamatuod sang akon kaisog. Madumduman ko pa ini sing maathag. Sang gab-i, nagluhod ako sa akon kwarto nga may pagtuo nga dawsa nagpuno sang akon tagipusuon nga daw mabuka ini.

Sa sulod sang pila lang ka adlaw ang akon pangamuyo ginsabat. Ang pinakamabudlay nga pagtilaw sang akon kabuhi nagkibot kag nagpakaubos sa akon. Naghatag ini sa akon sang doble nga leksyon. Una, may yara ako sang maathag nga ebidensya nga ang Dios nagpamati kag nagsabat sang akon pangamuyo sang pagtuo. Apang ikaduha, ginsugdan ko ang pagtulun-an nga nagapadayon pa sa gihapon agud mahangpan kon ngaa nagbatyag ako sing may tuman nga kaseguruhan sadto nga gab-i nga isa ka daku nga bugay ang mahimo mag-abot gikan sa pagtilaw nga makabayad sing labaw pa sangsa bisan ano nga bili.

Ang pagtilaw nga nag-igo sa akon sadtong madugay na nga panahon karon daw kagamay na lang ikumparar sa kon ano ang nag-abot halin sadto—sa akon kag sa akon mga pinalangga. Madamo sa inyo ang karon nagaantus sa pisikal, pangkaisipan, kag emosyonal nga mga pagtilaw nga mahimo mangin kabangdanan agud kamo magpanalambiton subong sang isa ka halangdon kag matutom nga alagad sang Dios nga kilala ko gid. Ang iya nars nakabati sa iya nga nagasinggit sa iya hiligdaan sang kasakit, “Gintinguhaan ko man nga mangin maayo sa bug-os ko nga kabuhi, ngaa natabo ini sa akon?”

Nakahibalo kamo kon paano ang Ginuo nagsabat sinang pamangkot para sa Propetang si Joseph Smith sa iya prisohan:

“Kag kon ikaw ihaboy sa buho, ukon sa mga kamot sang mga manugpatay, kag ang sentensya sang kamatayan ihatag sa imo; kon ikaw ihaboy sa kadadalman; kon ang dalagko nga mga balod maghimbon kontra sa imo; kon ang mamadlos nga mga hangin mangin imo kaaway; kon ang kalangitan magtipon sang kadulom, kag ang mga elemento magtingob agud lambatan ang alagyan; kag labaw sa tanan, kon ang mismo baba sang impiyerno magnganga sing daku sa imo, hibaloa, anak ko, nga ini tanan nga mga butang magahatag sa imo sang eksperiyensya, kag mangin para sa imo kaayuhan.

“Ang Anak sang Tawo nag-agi sini tanan. Masobra ka pa bala sa iya?

“Gani, magpadayon sa imo padulungan, kag ang priesthood magapabilin sa imo; kay ang ila dulunan napahamtang na, indi sila makalabay. Ang imo mga adlaw nahibaloan, kag ang imo mga tinuig indi mabuhinan; gani, indi magkahadlok kon ano ang mahimo sang tawo, kay ang Dios magaupod sa imo tubtob sa katubtuban.”²

Para sa akon daw wala na sing mas maayo pa nga sabat sa pamangkot kon ngaa ang mga pagtilaw nagaabot kag kon ano ang dapat naton himuon sangsa mga pulong sang Ginuo Mismo, nga nag-antus sang mga pagtilaw para sa aton nga sobra kaayo sangsa aton mahunahuna.

Madumduman ninyo ang Iya mga pulong sang Sia naglaygay nga kita kinahanglan, bangud sang pagtuo sa Iya, maghinulsol:

“Gani ginasugo ko kamo nga maghinulsol—maghinulsol, kay basi kastiguhon ko kamo paagi sa akon pulong, kag paagi sa akon kaugot, kag paagi sa akon kaakig, kag ang inyo pag-antus mangin tuman kasakit—daw ano kasakit wala kamo makahibalo, daw ano kagrabe wala kamo makahibalo, huo, daw ano kabudlay wala kamo makahibalo.

“Kay yari karon, Ako, ang Dios, nag-antus sini nga mga butang para sa tanan, nga indi sila mag-antus kon sila maghinulsol;

“Apang kon indi sila maghinulsol kinahanglan sila mag-antus kasubong ko;

“Sinang pag-antus nga nangin kabangdanan nga ako mismo, nga Dios, ang pinakadalayawon sa tanan, nagkurog bangud sang kasakit, kag nagdugo sa tagsa ka buho sang akon panit, kag nag-antus alangay sa lawas kag espiritu—kag naghandum nga indi na lang kuntani mag-inom sa mapait nga kupa, kag manalaw—

“Wala’y sapayan, himaya sa Amay; kag gin-ambit ko kag gintapos ang akon mga pagpanghanda para sa mga anak sang katawhan.”³

Kamo kag ako may pagtuo nga ang paagi nga malampuwasan ang mga pagtilaw amo ang magpati nga may “banyos sa Galaad”⁴ kag nga ang Ginuo nagpromisa, “Indi Ako … magbiya sa imo.”⁵ Amo sina ang gintudlo ni Pangulong Thomas S. Monson sa aton agud buligan kita kag ang aton mga ginaalagaran sa kon tan-awon masubo kag mabug-at nga mga pagtilaw.⁶

Apang si Pangulong Monson maalamon man nga nagtudlo nga ang pundasyon sang pagtuo sa kamatuoran sinang mga promisa kinahanglanon sang malawig nga panahon sa pagpasad. Ayhan nakita ninyo ang kakinahanglanon sinang pundasyon, subong sang nakita ko, sa tupad sang isa [ka tawo] nga handa na magpangampo sa away sang pagpadayon hasta sa katapusan. Kon ang pundasyon sang pagtuo wala natanom sa aton mga tagipusuon, ang gahum sa pagpadayon mapugday.

Ang akon katuyuan karon amo nga isaysay ang akon nahibaloan kon paano naton mapahamtang inang mapag-on nga pundasyon. Ginahimo ko ini sing mapainubuson sa duha ka rason. Una, ang akon ihambal mahimo magpaluya sang pila nga nagahimud-os sa tunga sang dalagku nga mga kabudlayan kag nagabatyag nga ang ila pundasyon sang pagtuo nagakapugday. Kag ikaduha, nakahibalo ako nga mas dalagku pa gid nga mga pagtilaw ang nagahulat sa akon antes matapos ang kabuhi. Gani, ang reseta nga ginatanyag ko sa inyo kinahanglan pa probahan sa akon kaugalingon nga kabuhi paagi sa pagpadayon hasta sa katapusan.

Sang lamharon pa ako nag-obra ako sa isa ka kontraktor nga nagapasad sang mga sadsaran kag mga pundasyon para sa bag-o nga mga balay. Sa kainit sang summer mabudlay nga obra ang maghanda sang duta para sa pormas nga sa diin ginabubo namon ang semento para sa sadsaran. Wala sang mga makinaryas. Ginagamit namon ang piko kag pala. Ang magpasad sang mabakod nga mga pundasyon para sa mga bilding mabudlay nga obra sadto nga mga panahon.

Nagakinahanglan man ini sang pasensya. Pagkatapos namon mabubo ang sadsaran, nagahulat kami nga magtig-a ini. Bisan gusto gid namon nga magpadayon ang trabaho, nagahulat pa gid kami pagkatapos mabubo sang sadsaran antes namon kuhaon ang mga pormas.

Kag labi pa gid ka talalupangdon para sa isa ka bag-ohanon nga kantero amo ang kon tan-awon mauti kag malawig nga proseso sang pagpahamtang sang mga kabilya sing maid-id sa sulod sang mga pormas agud mangin mabakod ang nahuman nga pundasyon.

Sa amo man nga paagi, ang duta kinahanglan ihanda sing maayo para sa aton pundasyon sang pagtuo nga makabatas sang mga unos nga magaabot sa tagsa ka kabuhi. Inang mapag-on nga sadsaran para sa pundasyon sang pagtuo amo ang personal nga integridad.

Ang dalayon naton nga pagpili sang husto sa tagsa ka tion nga ang pagpili ginapahamtang sa aton atubangan nagahimo sang mapag-on nga sadsaran sang aton pagtuo. Mahimo ini magsugod sa pagkabata bangud ang tagsa ka kalag natawo upod ang libre nga dulot sang Espiritu ni Cristo. Upod sinang Espiritu mahimo naton mahibaloan kon nakahimo kita sang maayo sa atubang sang Dios kag kon nakahimo kita sang malain sa Iya panulok.

Inang mga pagpili, ginatos sa kalabanan nga mga adlaw, nagahanda sang mapag-on nga duta sa diin ang aton balay sang pagtuo ginapasad. Ang kabilyada nga sa iya sini palibot ang kaundan sang aton pagtuo ginabubo amo ang ebanghelyo ni Jesucristo, upod ang tanan sini nga mga kasugtanan, mga ordinansa, kag mga prinsipyo.

Isa sang mga yabi sa nagapabilin nga pagtuo amo ang husto nga pagbanta sang kinahanglanon nga tiempo sa pagpabakod (curing time). Amo gani sina kon ngaa kabuangan ang ginhimo ko nga magpangamuyo gilayon sa akon kabuhi para sa mas mataas nga mga bukid nga taklaron kag mas dalagku nga mga pagtilaw.

Inang pagpabakod indi maangkon gilayon sa pagligad sang panahon, pero nagakadugayan gid ini. Ang pag-edad lamang indi makahimo sini. Yara sa pag-alagad sa Dios kag sa iban [nga tawo] sing wala untat upod ang bug-os nga tagipusuon kag kalag nga ang panaksihon sang kamatuoran nagabaylo sa mapag-on nga espirituhanon nga kabakod.

Karon, luyag ko paisogon inang yara sa tunga sang mabudlay nga mga pagtilaw, nga nagabatyag nga ang ila pagtuo ayhan nagaluya sa puwersa sang mga kahul-anan. Ang kahul-anan mismo mahimo nga mangin inyo paagi agud mapabakod kag sa ulihi maangkon ang malig-on nga pagtuo. Si Moroni, nga anak ni Mormon sa Ang Libro ni Mormon, nagsugid sa aton kon paano inang bugay mahimo matabo. Ginatudlo niya ang simple kag matam-is nga kamatuoran nga ang pag-akto sa bisan isa ka ugbos sang pagtuo nagatugot sa Dios sa pagpatubo sini:

“Kag karon, ako, si Moroni, nagahambal sing pila ka bagay nahanungod sining mga butang; ipakita ko sa kalibutan nga ang pagtuo amo ang mga butang nga ginalauman kag wala makita; gani, indi magsuay sanglit wala kamo makakita, kay indi kamo makabaton sang saksi tubtob nga pagkatapos sang pagtilaw sang inyo pagtuo.

“Kay paagi sa pagtuo nga ginpakita ni Cristo ang iya kaugalingon sa aton mga katigulangan, pagkatapos nga nagbangon sia gikan sa mga minatay; kag wala niya pag-ipakita ang iya kaugalingon sa ila tubtob pagkatapos nga nag-angkon anay sila sing pagtuo sa iya; gani, kinahanglan gid nga may pagtuo sa iya ang pila, kay wala niya pag-ipakita ang iya kaugalingon sa kalibutan.

“Apang tungod sang pagtuo sang mga tawo ginpakita niya ang iya kaugalingon sa kalibutan, kag ginhimaya ang ngalan sang Amay, kag ginhanda ang isa ka paagi nga sa sini ang iban mahimo nga mangin umalambit sang hiyas nga langitnon, agud mahimo sila nga maglaum sadtong mga butang nga wala nila makita.

“Gani, mahimo man kamo nga makaangkon sing paglaum, kag mangin mga umalambit sang hiyas, kon kamo makaangkon lamang sing pagtuo.”⁷

Inang bahin sang pagtuo nga tuman ka malahalon kag nga dapat ninyo protektahan kag gamiton sa inyo masarangan amo ang pagtuo sa Ginuong Jesucristo. Si Moroni nagtudlo sang gahum sang pagtuo sa sini nga paagi: “Kag wala sa ano man nga tion sing bisan sin-o nga nakahikot sang mga milagro tubtob pagkatapos nga makaangkon anay sila sang pagtuo; gani nagpati anay sila sa Anak sang Dios.”⁸

Nakasugilanon ako sa isa ka babayi nga nagbaton sang milagro sing bastante nga kabakod agud mabatas ang indi matungkad nga mga pagkawad-an paagi lang sa simple nga ikasarang sa pagliwat-liwat sing wala’y untat sang mga tinaga “Nakahibalo ako nga ang akon Manunubos buhi.”⁹ Inang pagtuo kag inang mga pulong sang panaksihon nagapabilin sa gihapon sa tunga sang gal-om nga naglipod pero wala nagpanas sang mga handurawan sang iya pagkabata.

Nakibot ako nga mahibal-an nga isa pa gid ka babayi ang nagpatawad sang isa ka tawo nga nakasala sa iya sa madamo nga tinuig. Natingala ako kag namangkot sa iya kon ngaa ginpili niya nga magpatawad kag kalimtan ang madamo nga tinuig sang madinumtanon nga pag-abuso.

Matawhay sia nga nagsiling, “Amo ina ang pinakamabudlay nga butang nga akon nahimo, pero nakahibalo lang ako nga kinahanglan ko gid himuon. Gani ginhimo ko.” Ang iya pagtuo nga ang Manluluwas mapatawad sa iya kon patawaron niya ang iban naghanda sa iya sa pag-atubang sang kamatayon nga may balatyagon sang katawhay kag paglaum pila gid lang kabulan pagkatapos nga ginpatawad niya ang iya di-mahinulsulon nga kaaway.

Ginpamangkot niya ako, “Pag-abot ko didto, ano ayhan sa langit?”

Kag nagsiling ako, “Nakahibalo ako sa nakit-an ko sa imo nga ikasarang sa pagdapat sang pagtuo kag pagpatawad nga mangin manami ini kaayo nga pagpauli para sa imo.”

May isa pa gid ako ka pagpaisog para sa mga ginaligban kon bala ang ila pagtuo sa Ginuong Jesucristo mangin bastante agud sila makapadayon sing maayo hasta sa katapusan. Bulahan ako nga nakilala ko ang iban sa inyo nga nagapamati karon sang kamo bataon pa, mapagsik, pinasahi ang ikasarang sangsa kalabanan sa inyo palibot, pero ginpili ninyo nga himuon kon ano ang himuon kontani sang Manluluwas. Sa inyo kabugana nakakita kamo sang mga paagi nga buligan kag atipanon yadtong mga mahimo ninyo kontani nga gin-balewala ukon ginpakanubo sa inyo nahamtangan sa pangabuhi.

Kon mag-abot ang mabudlay nga mga pagtilaw, ang pagtuo sa pagbatas sang mga ini sing maayo mangin inyo, napasad na kasubong sang inyo matalupangdan karon pero wala ninyo [matalupangdan] sang tion nga nagbuhat kamo suno sa putli nga gugma ni Cristo, sa pag-alagad kag pagpatawad sa iban pareho sang himuon [kontani] sang Manluluwas. Nagpasad kamo sang pundasyon sang pagtuo gikan sa pagpalangga pareho sa pagpalangga sang Manluluwas kag sa pag-alagad para sa Iya. Ang inyo pagtuo sa Iya nagtuytoy sa mga buhat sang kaayo nga magadala sa inyo sang paglaum.

Indi pa ulihi kaayo agud pabakuron ang pundasyon sang pagtuo. May ara gid pirme sang tiempo. Nga may pagtuo sa Manluluwas, sarang kamo maghinulsol kag mag-ampo para sa kapatawaran. May ara gid sang isa [ka tawo] nga sarang ninyo patawaron. May ara gid sang isa nga sarang ninyo pasalamatan. May ara gid sang isa nga sarang ninyo alagaran kag itib-ong. Sarang ninyo ini himuon bisan diin man kamo kag bisan daw ano ka naga-isahanon kag ginsikway ang inyo nabatyagan.

Indi ako makapromisa sang katapusan sa inyo mga pag-antus sa sini nga kabuhi. Indi ko kamo mapasalig nga ang inyo mga pagtilaw mangin daw malip-ot lamang para sa inyo. Isa sang mga kinaiya sang mga pagtilaw sa kabuhi amo nga dawsa ginapahinay sang mga ini ang orasan kag dayon daw halos nagauntat.

May mga rason para sina. Ang paghibalo sinang mga rason ayhan indi maghatag sang tuman nga kaumpawan, pero makahatag ini sa inyo sang balatyagon sang pagpasensya. Inang mga rason nagahalin sa sining isa ka kamatuoran: sa Ila perpekto nga pagpalangga sa inyo, ang Amay nga Langitnon kag ang Manluluwas luyag nga mangin takos kamo sa pag-upod sa Ila agud magpangabuhi sa mga pamilya tubtob sa wala’y katapusan. Ang mga nahugasan lang sing perpekto nga katinlo paagi sa Pagpasag-uli ukon Atonement ni Jesucristo ang makakadto didto.

Ang akon iloy nagpakigbato sa kanser sa malapit 10 ka tuig. Ang mga pagpabulong kag mga operasyon kag sang ulihi ang pagkabukot sa iya hiligdaan ang pila sang iya mga pagtilaw.

Nadumduman ko ang akon amay nga nagsiling samtang ginalantaw niya sia nga nagahugot sang iya katapusan nga ginhawa, “Isa ka diutay nga bata ang nagpauli na agud magpahuway.”

Isa sang mga manughambal sa iya lubong amo si Pangulong Spencer W. Kimball. Kalakip sa mga pagdayaw nga iya ginhatag, madumduman ko ang isa nga daw pareho sini: “Ang pila sa inyo ayhan nagpanumdum nga si Mildred nag-antus sing malawig kaayo kag sing tuman bangud sang isa ka sala nga iya nahimo nga nagkinahanglan sang mga pagtilaw.” Dayon nagsiling sia, “Indi, bangud lang ina kay luyag sang Dios nga mag-uswag pa gid sia.” Madumduman ko sadto nga tion ang pagpanumdum, “Kon ang isa ka babayi nga amo sina kaayo kinahanglan sang amo sina nga pagpauswag, ano ang nagahulat sa akon?”

Kon may pagtuo kita kay Jesucristo, ang pinakamabudlay subong man ang pinakamahapos nga mga tinion sa kabuhi sarang mangin bugay. Sa tanan nga mga kahimtangan, mahimo kita magpili sang husto upod ang paggiya sang Espiritu. May yara kita sang ebanghelyo ni Jesucristo agud magporma kag maggiya sang aton mga kabuhi kon pilion naton ini. Kag upod ang mga propeta nga nagapahayag sa aton sang aton lugar sa plano sang kaluwasan, mahimo kita magkabuhi nga may perpekto nga paglaum kag balatyagon sang katawhay. Indi kita kinahanglan magbatyag nga nagaisahanon kita ukon ginapabay-an sa pag-alagad sa Ginuo bangod wala gid kita [nagaisahanon ukon ginapabay-an]. Mabatyagan naton ang pagpalangga sang Dios. Ang Manluluwas nagpromisa sang mga anghel sa aton wala kag sa aton tuo agud magsakdag sa aton.¹⁰ Kag Sia nagatuman sang Iya mga pulong sa tanan nga tion.

Nagapamatuod ako nga ang Dios nga Amay buhi kag nga ang Iya Pinalangga nga Anak aton Manunubos. Ang Balaan nga Espiritu nagpamatuod sang kamatuoran sa sining komperensya kag magapamatuod sa liwat sa inyo pagpangita, sa inyo pagpamati, kag sa inyo pagtuon sa ulihi sang mga mensahe sang awtorisado nga mga alagad sang Ginuo nga ari diri. Si Pangulong Thomas S. Monson amo ang propeta sang Ginuo sa bug-os nga kalibutan. Ang Ginuo nagabantay sa inyo. Ang Dios nga Amay buhi. Ang Iya Pinalangga nga Anak, nga si Jesucristo, aton Manunubos. Ang Iya pagpalangga wala’y katapusan. Ginapamatud-an ko ini sa ngalan ni Jesucristo, amen.