Indi Kitá Magtalang

Ang diutay nga batang lalaki nagapraktis sang piyano, kag ang mamaligya nga tawo, nga nagatulok sa iya sa bintana nagpamangkot, Ara balá dira si nanay mo?”

Sa sina nga pamangkot, ang batà nagsabat, “Kag … ano ayhan sa imo?”

Ang amon lima ka pinalangga nga mga anak nagatokar sang piyano, salamat sa pagpahulag sang akon asawa! Kon mag-abot ang manunudlo sang piyano sa amon balay, ang amon anak nga si Adrian nagadalagan kag magpanago para laktawan ang iya leksyon. Pero sang isa ka adlaw, ang makatalanhaga natabo! Nag-umpisa ang daku niya nga kaluyag sa musika kag siya nagpadayon nga magpraktis sa iya kaugalingon.

Kon maabot naton ang ina nga tion sa sistema sang aton pagbaylo, ini makatalanhaga. Mangin maayo gid kon kita may luyag tudok sa aton mga tagipusuon nga magtuman sang mga kasuguan nga walâ sing sin-o nga padayon nga nagapahanumdom sa aton kag kita may mabakod nga pagtuo nga kon ginasunod naton ang husto nga banas, makaagum kitá sang mga bugay nga ginapanaad sa balaan nga mga kasulatan.

Sang madamo nga tuig nga nagligad nagkadto ako sa Arches National Park upód ang akon asawa, ang amon babaying anak nga si Evelin, kag ang isa ka abyan sang panimalay. Isa sa pinakabantog nga mga baliko didto amó ang ginatawag nga Delicate Arch. Kami nagpiho nga maglakat sang mga 1.5 ka milya (2 ka kilometro), pasaka sa bukid para maabot ang baliko.

Nag-umpisa kami sa amon dalan nga punô sing kapagsik, apang matapos makalakat kami sing indi malayo, sila nagkinahanglan nga magpahuway. Bangud sang akon luyag nga makaabot didto, ako nagpiho nga maglakat sing isahanon. Walâ sa akon hunahuna sang dalan nga akon sundon, ginsunod ko ang tawo sa akon atubang, nga daw nagalakat sing may daku nga kaseguruhan. Ang dalan nangin masyado gid kabudlay, kag ako napilitan nga maglukso sa isa kag isa ka mga bato. Bangud sang kabudlay, naseguro ko nga ang mga babaye sa akon grupo indi makaabot didto. Sang hinali lang nakita ko ang Delicate Arch, apang sa akon daku nga katingala, nakita ko nga ini indi ko malab-ot.

Sa daku nga kalugaw-an, nagpiho ako nga magbalik. Walâ sing pasensya nga naghulat ako tubtob nga magkitaay kami liwat sang akon grupo. Gilayon ako nga nagpamangkot “Nalab-ot ninyo ang Delicate Arch?” Malipayon sila nga nagsiling nga ila ini naabot. Sila nagpaathag nga ginsunod nila ang mga palatanda-an nga nagatudlo sa dalanon, kag sing may pag-andam kag kabudlay, naabot nila ang ila destinasyon.

Sa kadimalason, ginsunod ko ang di-tama nga dalan. Daw ano ka daku nga panudlo ang akon natun-an sina nga adlaw!

Daw ano ka masunson nga kita nagasalâ sa tama nga paagi, nagatugot sa aton kaugalingon nga giyahan sang mga huyog sang kalibutan? Dapat padayon nga pamangkuton naton ang aton mga kaugalingon kon balá kita manughimo sang mga pulong ni JesuCristo.

Ang makatalanhaga nga panudlo makita sa libro ni John:

“Magpabilin kamo sa akon, kag magpabilin man ako sa inyo. Katulad nga ang sanga indi makapamunga kon indi naangot sa puno; amó man kamo sina, indi kamo makapamunga, kon kamo magbulag sa akon.

“Ako ang punò sang ubas kag kamo ang mga sanga: Ang tawo nga nagapabilin sa akon, kag nagapabilin man ako sa iya, siya ang amó nga magpamunga sing madamo: kay kon walâ ako sa inyo walâ gid kamo sing mahimo” (John 15:4–5).

Sa paggamit sining paanggid, makita naton ang masyado kalapit, labaw sa tanan nga kaangtanan nga nagaluntad upód kay Jesucristo kag ang importansya nga iya ginahatag sa aton tanan. Siya ang gamut kag punò nga nagadala sang buhi nga tubig sa aton, ang dugos nga magtugot sa aton nga mahatagan sang sustansya agud nga kita makapamunga sing madamo. Si JesuCristo nagtudlo sa aton sa paagi nga bilang mga sanga − ukon mga nilalang nga nagadepende sa Iya − indi gid kitá magpakanubo sang bili sang Iya mga panudlo.

May yara nga mga kasayupan nga daw masyado ka grabe, kag indi naton ini ihustuhon sa madali nga tinion, sila makapatalang sing permanente sa aton. Kon kita maghinulsol kag magbaton sang paghusto sini, ining mga inagihan magtugot nga magpaubos sa aton mga kaugalingon, magbaylo sang aton mga buluhaton, kag sa liwat pa magpalapit sa aton Langitnon nga Amay.

Gusto ko maghatag sang ehemplo sang sining panghunahuna paagi sa pagtumod sa isa ka pinakamagamo nga mga tinion nga inagyan ni Joseph Smith. Paagi sa sini nga eksperiyensya, ang Manluluwas naghatag sa aton sang importante nga mga panudlo nahanungod sa mga prinsipyo nga dapat naton panumdumon sa aton bug-os nga mga kinabuhi. Ini natabo sang gindula ni Martin Harris ang 116 nga nalubad na nga mga pahina sang nahauna nga bahin sang Libro Ni Mormon.

Pagakatapos sang iya paghinulsol sunod sa iya pagbali-walâ sang laygay sang Diyos, ang Propeta nakabaton sang bugna nga makita sa section 3 sang Doktrina kag mga Katipan (tan-awa ang Teachings of Presidents of the Church: Joseph Smith [2007], 69–71). Sa ginsulat sa bersikulo 1 asta sa 10, gusto ko magtumod sa tatlo ka mga prinsipyo nga dapat naton padayon nga dumdumon:

1. Ang mga buluhaton kag mga katuyuan sang Diyos indi sarang malutos.

2. Indi dapat nga mas kahadlukan ang tawo sang sa Diyos.

3. May yara nga kinhangalnon sang nagapadayon nga paghinulsol.

Sa bersikulo 13, ang Ginuo nagapanudlo sa aton sang apat ka butang nga indi gid naton dapat nga himuon:

1. Ang pagbali-walâ sang mga laygay sang Diyos.

2. Maglalis sang pinakasagrado nga mga kasugtanan nga ginhimo sa atubang sang Diyos.

3. Magdepende sa aton kaugalingon nga ihibalo.

4. Magpahambog sang aton kaugalingon nga kinaalam.

Nagapangamuyo ako nga indi kitá magdula sang aton dalan agud nga padayon kitá nga naga-ugyon sa mga kalangitan, agud nga ang mga balud sang kalibutan indi mag-anod sa aton.

Kon ang isa man sa inyo makaabot sa panahon sa pagbiya sang banas sang Ginuo − sa anuman nga tion sa sina nga banas − sa daku nga paghinulsol mabatyagan ninyo ang kapaitan sa pagsikway sang mga pang-ubay sang Diyos, sa paglalis sang pinakasagrado nga mga kasugtanan nga ginhimo sa Iya atubang, sa pagsalig sa inyo kaugalingon nga ihibalo, ukon sa pagpahambog sang inyo kaugalingon nga kinaalam.

Kon ini ang kahimtangan, nagapaisog ako sa inyo nga maghinulsol kag magbalik sa husto nga banas.

Sang isa ka bes ang apo nagtawag sa iya lolo sa pagtamyaw sa iya sing maayo nga kaadlawan. Nagpamangkot ang apo kon ano ang edad sang lolo. Nagsiling siya nga 70 anyos. Ang iya apo nagpaino-ino sing madali kag pagkatapos nagpamangkot, “Lolo, nag-umpisa ka balá halin gid sa isa?”

Sa sulod sang pagkabatà kag pagkalamharon, ang mga tawo nagaisip nga sila indi gid magtigulang; ang ideya sang kamatayon walâ nagatudok − ina, para sa mga tama na gid ka tigulang nga mga tawo − kag ang pag-abot sa sina nga tinion daw sa walay katapusan nga malayô. Samtang ang tiyempo nagalakat, mga binulan kag mga pangadlaw nagataliwan, tubtob nga ang mga kurinot nagasugod nga magpakita, ang enerhiya nagakubos, ang pagkinahanglan sang mga pagbisita sa doktor nagadamo, kag iban pa.

Ang adlaw mag-abot nga sa diin magkitaay kita liwat upód sa aton Manunubos kag Manluluwas, nga si JesuCristo. Nagaampo ako nga sa sina nga pinakadungganon nga kahimtangan makilala naton Siya bangud sa aton natun-an nahanungod sa Iya kag bangud sa aton pagtuman sang Iya mga panudlo. Siya magpakità sang mga pilas sa Iya mga kamot kag mga tiil, kag kita ululupod nga mag-ugyon sa walay katapusan nga paghaksanay, paghilibion sa kasadya nga kitá nagsunod sa Iya banas.

Nagapamatuod ako sa apat ka ukbong sang kalibutan nga si JesuCristo buhi. Siya nagapaisog sa aton, “Magpamati, O, mga kapungsuran sang kalibutan, kag pamatian ang mga pulong sinang Diyos nga nagtuga sa inyo” (D&C 43:23). Kabay pa nga kita may ikasarang nga magkapyot, magpamati, maghangop, kag husto nga maghatag sang kahulugan sa “sinang Diyos nga nagtuga sa [aton]” agud nga indi kita magtalang halin sa Iya banas, ako nagapangabay sa ngalan ni JesuCristo, amen.