Ang Pinili Nga Henerasyon
Ni Randall L. Ridd
Ikaduhang Manuglaygay sa Pangkabilogan nga Pangulohan sang Young Men
Kamo ginpili nga makigbuylog sa Iya trabaho sa sini nga tion bangud Siya nagasalig sa inyo nga maghimo sang matarong nga mga pagpili.
Lamharon nga mga kalalakinhan, seguro nakabati na kamo sang una nga kamo amó ang “ginpili nga henerasyon,” nga nagakahulugan nga ang Diyos nagpili sa inyo kag naghanda sa inyo nga magkadto sa kalibutan sa sini nga panahon para sa daku nga katuyuan. Nahibal-an ko nga ini matuod. Pero sa sini nga gab-i gusto ko maghambal sa inyo bilang “pinili nga henerasyon” bangud walâ pa gid sa maragtas nga ang mga katawhan ginbugayan sang may madamo gid nga mga pagpili. Ang madamo nga mga pagpili nagakahulugan sang mas madamo nga mga kahigayunan; ang madamo nga mga kahigayunan nagakahulugan sang mas madamo nga ikasarang sa paghimo sang maayo kag, sa kadimalasan, paghimo sang malain. Nagapati ako nga ang Diyos nagpadala sa aton sa sini nga panahon diri bangud nagasalig Siya sa inyo nga magmadinalag-on sa paghangop sang mga makalilibog nga mga pagpili.
Sang 1974, si Presidente Spencer W. Kimball nagsiling, “Ako nagapati nga ang Ginuo indi makahulat nga maghatag sa aton sang mga imbento nga kita nga mga kinaandan walà pa makahunahuna” (“When the World Will Be Converted,” Ensign, Okt. 1974, 10).
Kag siya naghimo sini! Kamo nagadaku sa isa ka pinakamaayo nga mga galamiton sa kaayuhan sa maragtas sang katawhan: ang Internet. Upód sini ang bugana sa kadamuon sang mga pagpili. Ining kadamuon sang pagpili ugaling nagadala upód sini ang katumbas nga bahin sang responsibilidad. Ini nagapadali sang inyo pagsulod pareho sa masyado kapinakamaayo sa tanan kag sa pinakamalain man nga ginatanyag sang kalibutan. Sa ini magmadinalag-on kamo sa madamo nga mga butang sa sulod sang malip-ot nga panahon, ukon kamo masiud sa mga butang nga walâ sing bili nga nagausik sang inyo tiyempo kag nagapanubo sang inyo ikasarang. Sa pagtum-ok sang butón, makasulod kamo sa bisan diin man nga gusto ninyo. Ina ang prinsipyo ano ang inyo gusto? Sa diin ang inyo ginapadulungan? Sa diin nagapadulong ang inyo mga luyag?
Dumdumon ninyo nga ang Diyos “nagahatag sa mga tawo suno sa ila mga handom” (Alma 29:4) kag Siya “maghukom sa tanan nga mga tawo suno sa ila mga binuhatan, suno sa mga katuyuan sang ila mga tagipusuon” (D&C 137:9; tan-awa man ang Alma 41:3).
Si Elder Bruce R. McConkie nagsiling: “Sa tunay apang malarawanon nga isip, ang libro sang kabuhi isa ka sinulat sang mga binuhatan sang mga tawo bangud nga ina nga sinulat gin-ukit sa ila mismo mga kaugalingon. … Ini amó, nga ang kada isip, pulong, kag binuhatan mya isa ka [kaabtanan] sa lawas sang tawo; ini tanan nagabilin sang ila mga marka, mga marka nga mabasa Niya, Siya nga Walay Katapusan sing mahapos katulad sang mga pulong sa isa ka libro nga mabasa” (Mormon Doctrine, ikaduha nga imprinta [1966], 97).
Ang Internet nagasauló sang inyo mga kaluyagan, nga ginapautwas sa porma sang pagpangita kag mga pagtum-ok sang butón. May mga panong sang mga butang nga nagahulat nga magpunô sang inyo mga kagustuhan. Samtang kamo nagapanalakayon sa Internet, nagabilin kamo sang mga inagyan kon ano ang inyo ginapahayag, kon diin kamo nagakadto, kon ano kadugay kamo didto, kag tanan nga mga butang nga inyo naluyagan. Sa sining paagi ang Internet nagahimo sang inyo larawan nga nagaugyon sa pang-internet nga teknolohiya sa sini nga kahulugan, ang inyo “online nga libro sang kabuhi.” Katulad sang kabuhi, ang Internet nagahatag sa inyo sing padayon nga kadamo sang anuman nga inyo ginapangita. Kon ang inyo mga naluyagan putli, ang Internet makapadaku sa ila, padayon nga magpahapos nga magtigayon sang takos nga mga halangdon. Apang ang kasulian sini matuod man.
Si Elder Neal A. Maxwell nagsiling sa sining paagi:
“Kon anuman ang aton ginapadayon nga luyag, sa sulod sang mga panahon, amó ang aton mangin pagkatawo sa ulihi kag kon ano ang aton mabaton sa walay katapusan nga kabuhi. …
“… Ang pag-edukar kag pagdumala lamang sang aton mga kaluyagan nga kitá mangin mga kaupod kag indi mga kaaway!” (Suno sa Luyag Sang [Aton] Mga Tagipusuon,” Ensign, Nob. 1996, 21, 22).
Mga lamharon ko nga mga kauturan, kon indi kamo maukod sa pag-edukar sang inyo mga luyag, ang kalibutan maghimo sini para sa inyo. Kada adlaw ang kalibutan naga-impluhensya sang inyo mga luyag, nagaganyat sa inyo nga magbakal sa isa ka butang, magtum-ok sang butón sa isa ka butang, maghampang sang isa ka butang, magbasa ukon magtan-aw sang isa ka butang. Sa ulihi, ang pagpili yara sa inyo. Kamo may pagbuót. Ini indi lang gahum nga magdumala sang inyo mga luyag apang magpaugdang, magpaputli, kag magpataas sang inyo mga luyag. Ang pagbuót amó ang gahum nga mangin. Ang kada isa sang inyo pagbuót nagadala sa inyo palapit sa ukon palayo halin sa inyo pagmangin; ang kada isa ka tum-ok may kahulugan. Masami ninyo pamangkuton ang inyo kaugalingon, “Sa diin nagapadulong ining akon pagpili?” Magpatubo kamo sang abilidad nga makakita labaw pa sa sining tinion.
Si Satanas gusto magpugong sang inyo pagbuót agud nga mapunggan niya ang inyo pagmangin. Siya nakahibalo nga isa sa mga pinakamaayo nga mga paagi sa paghimo sini amó ang pagsiud sa mga kahuyugan ninyo. Ang inyo mga pagpili nagapat-ud kon balá ang teknolohiya maghatag sing gahum sa inyo ukon mag-ulipon sa inyo.
Tuguti ninyo nga maghatag ako sang apat ka prinsipyo nga magbulig sa inyo, ang pinili nga henerasyon, sa pag-edukar sang inyo mga luyag kag magtuytoy sa inyo paggamit sang teknolohiya.
Nahauna: Ang Pagkahibalo Kon Sin-o Gid Kamo Nagapahapos Sang Mga Pagpamat-od
May isa ako ka abyan nga nakatuon sining kamatuoran sa personal gid nga paagi. Ang iya lalaking anak ginpadaku sa ebanghelyo, pero daw siya espirituhanon nga nagadalang-dalang. Masunson siya nga nagapangindi nga maghimo sang iya priesthood. Ang iya mga ginikanan nalugaw-an sang siya nagpautwas nga indi siya magmisyon. Ang akon abyan maukod nga nagpangamuyo para sa iya anak, sa paglaum nga magbaylo ang iya tagipusuon. Ang yadtong mga paglaum narumpag sang ang iya anak nagpahayag nga siya may kasugtanan nga magpakasal. Ang amay nagpakitluoy sa iya anak nga magkuha sang bendisyon sang patriyarka. Ang lalaking anak sang ulihi naghangdo pero nagpamilit nga isahanon siya nga magduaw sa patriyarka.
Sang iya pagbalik pagkatapos sang bendisyon, siya masyado ka mabinalatyagon. Gindala niya ang iya nobya sa gwa, nga sa diin naghambalanay sila sang pribado. Ang amay naglingling sa bintana sa pagtan-aw sa ila nga nagapahiray sang ila mga luha.
Sang ulihi nagpaambit siya sa iya amay sang natabo. Nga may daku nga pagbatyag siya nagpaathag nga sang nagabaton siya sang bendisyon, nasiplatan niya kon sin-o siya sa premortal nga kalibutan. Nakita niya kon daw ano siya ka isog kag gamhanan sa pagganyat sa iban sa pagsunod kay Cristo. Sa pagkahibalo kon sin-o gid siya, paano nga indi siya makaalagad sa misyon?
Lamharon nga mga lalaki, dumduma ninyo kon sin-o gid kamo. Dumduma ninyo nga kamo nagakapot sang balaan nga priesthood. Ini mag-inspirar sa inyo nga maghimo sang matarong nga mga pagpili samtang kamo nagagamit sang Internet kag sa lubos ninyo nga kinabuhi.
Ikaduha: Mag-angot sa Ginahalinan sang Gahum
Yara mismo sa inyo palad kamo may kaalam sang kapanahunan labi sa tanan, ang mga pulong sang mga propeta, halin sa Dumaan nga Testamento tubtob sa kay Presidente Thomas S. Monson. Apang kon indi ninyo padayon nga ginaangot sa koryente ang inyo cell phone, ini walay pulos, kag kamo makabatyag sang pagkadula kag indi maka-angot sa iban. Indi kamo makapensar nga maghulag sa isa ka adlaw nga indi maangot sa koryente ang inyo baterya.
Katulad nga importante ang maghalin sa puluy-an kada adlaw nga may punô nga karga sa inyo cell phone, ini masyado ka importante nga kamo espirituhanon nga punô sing karga. Kada tion nga ginaangot ninyo sa koryente ang inyo cell phone, gamiton ninyo ini nga pahanumdom nga magpamangkot sa inyo kaugalingon kon kamo nakaangot sa espirituhanon nga gahum pangamuyo kag pagtuon sang kasulatan, nga maghatag sa inyo sing karga sang inspirasyon halin sa Balaan nga Espiritu (tan-awa ang D&C 11:12–14). Magbulig ini sa inyo sa paghangop sang painoino kag pagbuót sang Ginuo sa paghimo sang diutay pero importante nga pang-adlaw-adlaw nga mga pagpili nga nagapat-od sang inyo kaladtuan. Ang kalabanan sa aton maabtik nga nagauntat sang aton ganahimo sa pagbasa sang mensahe sa text indi balá naton hatagan sang mas importante pa nga lugar ang mga mensahe halin sa Ginuo? Ang pagpabaya nga mag-angot sa sining gahum dapat nga indi gid ninyo pag-isipon! (tan-awa ang 2 Nephi 32:3).
Ikatlo: Ang Pagpanag-iya sang Smartphone Indi Nagapaalam sa Inyo, pero ang Maalamon nga Paggamit sini Makapaalam sa Inyo
Mga lamharon nga mga lalaki, indi kamo maghimo sang mga may kamanguan nga mga butang sa inyo smartphone. Nahibal-an ninyo ang buót ko silingon (tan-awa ang Mosiah 4:29). May di-maisip nga mga paagi nga ang teknolohiya nga magbanga sa inyo halin sa pinakaimportante. Sunda ang hulubaton “Mangin yara kamo kon yara kamo dira.” Kon kamo nagamaneho, magmaneho kamo. Kon kamo yara sa klase bug-uson ang isip sa panudlo. Kon kamo kaupod sa mga abyan, hatagi sila sang dulot sang imo pagtalupangod. Ang inyo utok indi makabug-os sang isip sa duha ka butang sa pareho nga tion. Ang paghimo sang madamo nga bagay sa pareho nga tion nagapaabot sa maabtik nga pagbaylo sang inyo tumod halin sa isa ka butang pakadto sa iban. Ang isa ka halambalanon nagasiling, “Kon lagson ninyo ang duha ka koneho, indi ninyo madakpan ang bisan isa.”
Ikaapat: Ang Ginuo Nagahatag sang Teknolohiya Agud Matuman ang Iya mga Katuyuan
Ang balaan nga tuyò sang teknolohiya amó ang pagpadasig sang buluhaton sang kaluwasan. Bilang mga miyembro sang pinili nga henerasyon, kamo nakahangop sang teknolohiya. Gamiton ninyo ini sa pagpadasig nga magdaku pakadto sa pagkahimpit. Bangud kamo ginhatagan sang madamo, kamo man dapat maghatag (tan-awa ang “Bangud Ako Ginhatagan sang Madamo,” Mga Himno, numero 219). Ang Ginuo nagapaabot nga kamo maggamit sining maayo nga mga sangkap sa pagpadaku sang Iya buluhaton, sa pagpaambit sang ebanghelyo sa mga paagi nga mas lapaw pa sa indi gid naisip sang akon henerasyon. Nga sa diin ang nagligad nga henerasyon nag-impluhensya sang ila mga kasilingan kag mga banwa, kamo may gahum paagi sa Internet kag social media nga maka-impluhensya sa mga tawo bisan sa diin pa kag sa bilog nga kalibutan.
Nagapamatuod ako nga ini ang Simbahan sang Ginuo. Kamo ginpili nga mag-ugyon sa Iya buluhaton sa sining panahon bangud Siya nagasalig sa inyo nga maghimo kamo sang matarong nga mga pagpili. Kamo ang pinili nga henerasyon. Sa ngalan ni JesuCristo, amen.