Protektem Yumi long Ponografi—wan Hom we I Lukluk Moa long Kraes.
Filta we i wok gud moa long wol ia … i filta we i stap insaed long yumiwan, we i kam long wan dip testemoni blong stap obei.
Ol dia brata mo sista. Tedei mi gat blesing ia blong gat namba 13 bigfala apupikinini blong mi long kongregesen ia. Hemia nao i mekem mi wantem blong askem: “?Wanem nao mi wantem ol apupikinini blong mi blong save?” Long moning ia mi wantem toktok stret long famli blong mi, mo long famli blong yu.
Mifala olsem ol lida, i gat bigfala wari abaot wei we ponografi i prapa spolem laef blong ol memba blong Jos wetem famli blong olgeta. Setan i faet stap faet wetem niufala kros ia.
Wan risen yumi stap long wol ia i blong lan blong kontrolem ol samting we yumi bodi blong yumi i laekem, mo ol filing blong yumi. Ol filing ia we God i givim, oli helpem yumi blong yumi wantem mared mo gat pikinini. Mared bitwin wan man mo woman we i karem ol pikinini oli kam long wol ia, i blong gat wan naes eksperiens, we i joenem tufala hat we i tru long tufala tugeta, mo i joenem tugeta spirit mo bodi, mo i karem fulwan fasin blong stap glad mo hapi taem yumi lan blong putum narawan i kam faswan long yumi. Presiden Spensa W. Kimbol i tijim se, insaed long wan mared, “man, woman…i kam faswan long laef blong wan hasban o waef, mo … [i no gat] narafala intres long [wan] man [o] samting we bae i tekem ples blong man, woman blong olgeta. …
“Mared i minim blong stap tru mo fetful fulwan.”1
Plante yia i pas, wan long ol pikinini blong mifala, i luk olsem se i no glad. Mi go insaed long rum blong hem, taem hem i talem ful hat blong hem long mi mo i eksplenem se hem i stap long haos blong wan fren mo i mestem mo i luk ol pikja we i no stret mo ol aksen long televisen wetem wan man mo woman we tufala i no gat klos. Afta hem i stat blong i krae mo stap talem olsem wanem hem i sore abaot wanem hem i luk mo hem i wantem tumas blong hem i save karemaot pikja ia long maen blong hem. Mi glad tumas we hem i save talem long mi, givim mi janis ia blong save helpem hem mo hat blong hem we i soa, mo helpem save olsem blong kasem help tru long Atonmen blong Sevya. Mi tingbaot ol tabu filing ia we mitufala i bin gat taem mitufala i nil daon tugeta, olsem wan mama mo pikinini gel, mo krae blong askem help long Papa long Heven.
Plante pikinini, yut, mo ol adalt oli luk ponografi, be wan namba we i go antap, i namba blong ol man mo woman we oli jusum blong luk ponografi mo i pulum olgeta blong go luk bakegen i go kasem taem we i kam wan strong fasin, o wan adiksen. Olgeta ia, ating oli gat strong tingting wetem ful hat blong olgeta blong save kamaot long trap ia, be oli no save winim olgetawan nomo. Olsem wanem yumi glad tumas taem olgeta we yumi lavem tumas oli jusum blong talem long yumi, olsem wan papa, mama o wan Jos lida. Bae hem i waes blong yumi no sek, kros o sakemaot olgeta long taem olsem; kaen fasin ia bae i save mekem olgeta blong oli stap kwaet bakegen mo nomo toktok.
Yumi olsem papa, mama mo ol lida i nid blong kaonsel tugeta wetem ol pikinini mo ol yut blong yumi evri taem, mo stap lisin wetem lav mo andastanem olgeta. Oli nid blong save ol denja blong ponografi mo olsem wanem i save tekova laef blong wan, mekem wan i lusum Spirit, gat ol kruked filing, stap giaman, i spolem rilesensip, mo i lusum kontrol long hemwan, mo i kakae fulap taem, tingting mo paoa.
Ponografi i kam moa rabis, moa nogud, mo i gat moa ditel i bitim bifo. Taem yumi kaonsel wetem ol pikinini blong yumi, tugeta yumi save krietem wan famli plan wetem ol standet mo baondri, stap oltaem blong protektem ol hom blong yumi wetem ol filta long ol lektronik tul blong yumi. ?Papa, mama? ?Yumi save se ol mobael tul wetem Intanet nao, i no ol kompiuta, we oli ol bigfala rong tul?2
Ol yang pipol mo ol adalt, sapos yufala i fas long trap blong Setan we i ponografi, tingbaot olsem wanem Sevya we yumi lavem tumas i gat sore long yumi. ?Yu luk save olsem wanem Lod i lavem yu bigwan, iven naoia? Sevya blong yumi i gat paoa, blong i klinim mo hilim yu. Hem i save karemaot ol harem nogud we yu filim mo mekem yu kam klin bakegen tru long paoa blong Atonmen blong Hem.
Yumi, olsem ol lida, yumi gat bigfala wari abaot ol waef o hasban, mo ol famli blong olgeta we oli stap safa long adiksen blong ponografi. Elda Richard G. Scott i talem: “Sapos yuwan yu fri long bigfala sin, yu no nid blong safa from risal blong ol sin blong ol nara man. … Yu save filim lav mo sore. … Yet yu no nid blong filim se yu nao yu responsibol from ol aksen ia.”3 Yu mas save se yu no stap yuwan. I gat help i stap. I gat ol miting blong ol waef o ol hasban we oli gat adiksen, mo i gat ol telefon miting, we i mekem se i posibol blong ol patna oli ring i kam long wan miting mo stap long hom mo tekpat.
Ol brata mo sista. “?Olsem wanem nao yumi stap protektem ol pikinini mo ol yut blong yumi? Ol filta, oli ol gudfala tul, be filta we i wok gud moa long wol ia, wan ia nomo we bae i wok gud, i filta we i stap insaed long yumiwan, we i kam long wan dip testemoni blong stap obei, mo wan testemoni abaot lav blong Papa long Heven mo sakrifaes ia we i pem praes from wanwan long yumi, we i kam long Sevya blong yumi.
?Olsem wanem yumi save lidim ol pikinini blong yumi long wan dip jenis long laef, mo blong gat akses long Atonmen blong Sevya? Mi laekem wanem profet Nifae i talem abaot wanem ol pipol blong hem i mekem blong mekem yut blong taem blong hem oli kam strong: “Yumi tokbaot Kraes, yumi glad long Kraes, yumi prij long saed blong Kraes … blong mekem se ol pikinini blong yumi oli save gat save long wanem ples oli save lukluk long hem blong kam klin aot long ol sin blong olgeta?”4
?Olsem wanem nao yumi save mekem sem samting insaed long ol hom blong yumi? Sam long yufala maet i harem mi talem hao hasban blong mi, Mel, mo mi i filim olsem papa mo mama blong fo pikinini. Taem yumi fesem ol jalenj blong stap olsem wan papa mo mama, mo stap traehad blong folem wanem laef i askem, yumi wantem tumas blong kasem help. Mifala i prea mo askem strong blong save wanem blong mekem. Ansa i kam klia nomo: “Hem i Oraet, sapos wan haos i olbaot mo ol pikinini oli stap werem yet klos blong silip, mo sam responsabiliti yufala i no mekem. Samting we yu mas mekem, we i nid blong yu finisim long hom blong yu hem i: stadi long skripja, mo prea evri dei, mo gat famli haos naet evri wik.”
Mifala i bin stap traem blong mekem ol samting ia, be oli no bin kam faswan oltaem, mo, long medel blong ol trabol, oli kam ol samting we mifala i no lukluk gud long olgeta. Mifala i jenisim stamba lukluk blong mifala mo traem blong no wari tumas long ol samting we oli no impoten tumas. Stamba samting blong mekem i blong toktok, stap glad, prij, mo testifae abaot Kraes, taem mifala i stap traehad blong prea mo stadi olgeta skripja mo gat famli haos naet evri wik.
Wan fren i jes talem: “Taem yu askem ol sista blong ridim olgeta skripja mo prea moa, i mekem olgeta oli wari tumas. Oli filim se i oli gat plante samting tumas blong mekem.”
Ol brata mo sista. From se mi save, aot long eksperiens blong miwan, mo aot long eksperiens blong hasban blong mi, mi mas testifae abaot ol blesing blong stadi long olgeta skripja mo prea evri dei, mo blong holem famli haos naet evri wik. Tru long ol praktis ia i helpem blong karemaot ol wari ia, givim daereksen long laef blong yumi, mo i ademap proteksen long hom blong yumi. Afta, sapos, ponografi o ol narafala jalenj oli kam mo spolem famli blong yumi, yumi save askem Lod blong i help mo wantem bigfala gaed we i kam long Spirit, mo semtaem save se yumi mekem wanem Papa blong yumi i askem yumi blong mekem.
Ol brata mo sista.Sapos i no ol praktis blong yumi long ol hom blong yumi, yumi save stat naoia. Sapos ol pikinini blong yumi we oli bigwan oli no wantem joenem yumi, yumi save statem wetem yumiwan. Taem yumi mekem olsem, bae Spirit i stat blong fulumap haos blong yumi mo laef blong yumi, mo, sam taem afta, bae ol pikinini oli stat blong mekem semmak.
Tingbaot se sam Aposol we oli stap laef oli promes se taem yumi lukaotem ol bubu blong yumi mo rere long ol nem blong famli blong yumiwan blong tempol, bae yumi gat proteksen naoia mo truaot long laef blong yumi taem yumi kipim yumi i klin inaf blong gat wan tempol rekomen.5 !Ol promes ia oli gud tumas!
Yufala Ol Yut, tekem responsabiliti blong stap strong yuwan long saed blong spirit. Ofem fon sapos i nid, singsing wan Praemeri singsing, prea from help, tingting long wan skripja, wokaot long wan muvi we i nogud, pikjarem Sevya, stap klin inaf blong tekem sakramen, stadi long buk ia: Blong Ol Yut Oli Kam Strong Moa, soem eksampol long ol fren blong yu, toktok wetem mama o papa, go luk bisop, askem help, mo lukaotem profesonol kaonseling, sapos i nid.
?Wanem nao mi wantem ol apupikinini blong mi blong oli save? Mi wantem olgeta mo yu blong save se Sevya i laef mo i lavem yumi. Hem i pem praes blong ol sin blong yumi, be yumi mas nildaon long fored blong Papa blong yumi long Heven, wetem wan tingting we i stap daon, we yumi konfesem ol sin blong yumi, mo askem fogivnes long Hem. Yumi mas wantem blong jenisim hat blong yumi mo wanem yumi wantem, mo gat tingting i stap daon blong save askem help mo fogivnes long olgeta we yumi mekem nogud long olgeta.
Mi save Josef Smit i luk God, Papa blong yumi long Heven mo Sevya blong yumi, Jisas Kraes. Mi testifae se yumi gat wan profet we i stap laef long wol ia, Presiden Thomas S. Monson. Mi testifae tu se bae yu neva go rong sapos yu stap mekem folem ol kaonsel blong profet blong God, Mi testifae abaot paoa blong ol kavenan blong yumi mo ol blesing blong tempol.
!Mi save se Buk blong Momon i tru! Mi no save eksplenem paoa blong gudfala buk ia. Mi save se, tugeta wetem prea, Buk blong Momon i karem paoa blong protektem ol famli, mekem ol rilesensip i kam strong moa, mekem yu stanap yuwan wetem tras long fored blong Lod. Mi talem ol samting ia long nem blong Jisas Kraes, amen.