Waelwin long Saed blong Spirit

Mi welkamem yufala long moning ia—speseli yufala ol yangfala we i stap long ples ia long Konfrens Senta mo raon long wol. Jeneresen blong yufala nao, Lod i jusum, mo mi toktok speseli long yufala ol yangfala.

Plante yia i pas, taem mi visitim wan famli blong mifala long Florida, wan waelwin i bin kasem wan ples kolosap long mifala. Wan woman we i stap laef insaed long mobael haos, i go haed long ples blong swim blong hem from sefti. Mobael haos ia i stat blong muvmuv. Sam minit i pas. Hem i harem voes blong neiba blong hem: “Mi hemia long fored blong rum.” Taem hem i kamaot long ples blong swim, hem i sek se waelwin ia i karem mobael haos blong hem mo putum gud antap long mobael haos blong neiba blong hem.

Ol yang fren blong mi, bae wol bae i no stap kwaet kasem taem long Seken Kaming blong Sevya. Skripja i talem se “evri samting bae i muvmuv.”¹ Brigham Yang i talem se: “Oli bin talem long mi long revelesen long stat blong Jos, se, Jos bae i go olbaot long ol ples, i kam bigwan, i gro mo i go long evri ples, mo folem hamas ples we bambae Gospel i kasem long ol nesen blong wol, bae paoa blong Setan tu i girap folem.”²

I moa bitim long ol etkwek mo ol wo³ hem i ol waelwin long saed blong spirit we i save karemaot yu long ol fandesen blong yu long saed blong spirit mo putum yu long ol ples we yu neva ting se bae yu stap long hem, samtaem bae yu no save se oli muvum yu i go stap long ples ia.

Ol waelwin we oli nogud moa oli ol temtesen blong enemi. Sin, hem i pat blong wol oltaem, be hem i neva bin isi blong kasem, blong lego, mo blong akseptem. I gat, yes, wan strongfala win we bae i save winim ol waelwin blong sin. Oli singaotem fasin blong sakem sin.

I no evri waelwin long laef blong yu we i wanem yu bin mekem . Sam i kam from ol rong joes blong ol narawan, mo sam i kam from se yumi pat blong laef long wol ia.

Taem hem i yangfala boe, Presiden Boyd K. Packer i bin safa from hem i kasem polio. Taem we Elda Dallin H. Oaks i gat seven yia, papa blong hem i ded. Taem we Sista Carol F. McConkie blong presidensi blong Yang Woman i bin yangfala, mama mo papa blong hem i divos. Ol jalenj bae oli kam long yu, be taem yu putum tras blong yu long God, bae oli mekem fet blong yu i kam strong moa.

Long neja, ol tri we oli gro long ples we i gat fulap win long hem, oli kam strong moa. Taem win i stap blo long yangfala tri ia, i fosem insaed long tri ia blong mekem tu samting. Faswan, i mekem ol rus blong oli gro hariap mo blong i spred i go moa. Nambatu, ol fos insaed long tri i stat blong krietem ol smosmol samting we oli mekem stamba long wud mo ol branj oli tik moa, mo blong mekem i save benben gud moa long win we i strong. Ol strong rus mo ol branj oli protektem tri long ol win we bae i kambak.⁴

Yu, yu moa impoten long God bitim wan tri. Yu, yu pikinini boe mo pikinini gel blong Hem. Hem i mekem spirit blong yu i strong mo i save winim ol waelwin long laef. Ol waelwin long ol yang taem blong yu, i olsem ol win we i stap blo long yangfala tri, i save mekem paoa blong yu long saed blong spirit i kam antap moa, mekem yu rere from ol yia we oli stap kam.

?Olsem wanem nao yu rere from ol waelwin blong yu? Tingbaot… se hem i antap long strong ston blong Ridima blong yumi, we i Kraes, Pikinini blong God, we yutufala i mas bildim fandesen blong yutufala; blong mekem se taem we devel bae i sendemaot ol strongfala win blong hem, … ol spia blong hem long wael win, … taem we ol ston blong aes blong hem mo strong win blong hem bae i foldaon long yutufala, bae oli no gat paoa … blong pulum yutufala i go daon … hemia i from ston we yutufala i bin bildimap yutufala antap long hem.”⁵ Hemia i sefti blong yu long waelwin ia.

Presiden Thomas S. Monson i talem: “Long wan taem, ol standet blong Jos mo ol standet blong sosaeti, kolosap oli joen nomo, be naoia, i gat bigfala hol long medel blong yumi, mo hol ia i gro i bigwan moa.”⁶ Bigfala hol ia, blong sam, i stiarem ol strong wael win long saed blong spirit. Bae mi givim yu wan eksampol.

Long manis we i jes pas Fas Presidensi mo Kworom blong Olgeta Twelef Aposol oli pablisim wan leta i go long ol lida blong Jos raon long wol. Long wan pat blong leta ia i rid olsem:“Ol jenis long sivil loa oli no jenisim, i tru, i no save jenisim loa blong klin fasin we God i putum i stap. God i wantem yumi blong holem antap, mo kipim olgeta komanmen blong hem i nomata long ol defren tingting o wanem i stap hapen raon long yumi. Loa blong jastiti blong Hem i klia: rilesensip long saed blong seks i stap nomo bitwin wan man mo woman we tufala i mared tufala i kam hasban mo waef. Mifala i wantem yufala blong luklukbak …long doktrin we i stap insaed long ‘Famli: Wan Ofisol Toktok I Go long Wol.’”⁷

Taem we wol i stap kamaot long loa blong jastiti we i kam long Lod, yumi, yumi no kamaot. Presiden Monson i talem: “Sevya blong ol man i tokbaot Hemwan olsem se Hem i stap insaed long wol ia, be Hem i no blong wol ia. Yumi tu, yumi save stap insaed long wol, be i no blong wol ia taem yumi sakemaot ol giaman tingting mo ol giaman tijing, mo stap tru long komanmen we God i stap givim . ”⁸

Taem we fulap gavman mo ol man mo woman we oli impoten oli jenisim mining blong mared, be Lod, Hem i no jenisim. Long stat evriwan, God i mekem mared bitwin wan man mo woman—Adam mo Iv. Hem i mekem stamba tingting blong mared i go moa bitim wanem bae i mekem yu hapi, mo i go long wanem ol adalt oli wantem, i go kasem wanem we i moa impoten, we i blong mekem wan gudfala ples blong ol pikinini oli bon long hem, oli groap long hem mo blong oli fidim gud olgeta long hem. Ol famli oli ol rij samting blong heven⁹

?From wanem yumi gohed blong tokabaot ol samting ia? Olsem Pol i talem: “Nao mifala i no moa tingbaot ol samting ya we yumi save luk long ae blong yumi. Mifala i stap tingbaot ol samting ya we yumi no save luk, from we ol samting ya we yumi save luk long ae blong yumi, oli blong stap smoltaem nomo. Be ol samting ya we yumi no save luk, oli blong stap oltaem, gogo i no save finis.”¹⁰ Olsem Ol Aposol blong Lod Jisas Kraes, mifala i gat wan responsabiliti ia blong tijim plan blong Krieta blong yumi long ol pikinini blong Hem, mo blong wonem olgeta long wanem i kamaot long ol aksen blong olgeta taem oli no folem ol komanmen blong Hem.

Samtaem i pas, mi toktok wetem wan Lorel long Yunaeted Stet. Mi kwot long imel blong hem:

“Long yia we i pas sam long ol fren blong mi long Fesbuk oli stat postem tingting blong olgeta abaot mared. Fulap long olgeta oli agri long mared we i stap wetem man mo man o woman mo woman, mo sam long ol LDS yut oli ‘laekem’ ol toktok blong olgeta ia. Mi no givim wan komen.

“Mi disaed blong talemaot bilif blong mi long fasin blong mared long wan wei we i gud.

“Long pikja blong mi, mi putum wan toktok i go wetem: ‘ Mi bilif long mared we i stap bitwin man mo woman.’ Stret afta nomo mi stat blong kasem ol mesej. ‘Yu selfis.’ ‘Yu save jajem man.’ Wan i komperem mi long wan man we i gat ol slef. Mo mi risivim toktok ia i kam long wan gudfala fren we i wan strong memba blong Jos: ‘Yu nid long kajap wetem taem. Ol samting oli stap jenis, mo yu tu, yu mas jenis.’

“Mi no faetbak,” hem i talem, “be mi no tekemaot pos blong mi.”

Hem i talem: “Samtaem, olsem Presiden Monson i talem, ‘Yu mas stanap yuwan.’ Hop se olsem ol yut, bae yumi stanap tugeta mo stap tru long God mo long ol tijing blong ol profet blong Hem we oli stap laef.”¹¹

Mifala i wari tumas long olgeta we i gat ol jalenj ia blong laekem wan we i sem seks olsem hem. Hem i wan waelwin we strong tumas. !Mi wantem serem lav long mi mo glad long olgeta we oli gat strong tingting long stanap strong mo winim tes blong fet blong olgeta, mo stap tru long ol komanmen blong God!¹² Be evriwan, i nomata se hem i disaed wanem o i biliv long wanem, oli nidim kaen fasin mo luk save blong yumi.¹³

Sevya i tijim yumi no blong lavem ol fren blong yumi nomo, be tu, blong yumi lavem olgeta we oli no agri wetem yumi—mo olgeta tu we oli sakemaot yumi. Hem i talem: “?Yufala i ting se sipos yufala i stap lavem olgeta ya nomo we oli stap lavem yufala, God bambae i givim pei long yufala from? … ?Sipos yufala i stap toktok wetem ol fren blong yufala nomo, hemia yufala i no mekem wan samting we i gud moa i winim ol narafala man?”¹⁴

Profet Josef Smit i wonem yumi se “lukaot long fasin blong stap ting se yumi, yumi nomo i stret mo gud evriwan,” mo yumi mas mekem hat long yumi i open bigwan long evriwan man mo woman kasem taem we yumi filim “blong tekem olgeta antap long solda blong yumi”.¹⁵ Insaed long gospel blong Jisas Kraes, i no gat ples blong spolem wan man, mekem nogud long wan man, o mekem hem i sem.

Sapos yu gat wan kwestin abaot ol kaonsel blong ol lida blong Jos, plis talemaot tru tingting blong yu long ol mama mo papa blong yu mo ol lida blong yu. Yu nidim paoa ia we i kam taem yu stap trastem ol profet blong Lod. Presiden Harold B.Lee i talem: “Sefti we yumi ol memba blong jos ia yumi gat i … blong lanem blong folem ol toktok mo komanmen we Lod bae i givim tru long ol profet blong Hem. … I gat sam samting we bae i nidim fasin blong wet longtaem mo fet. Maet bae yu no laekem wanem i kam afta. … Bae i save go agensem tingting blong yu long saed blong politik … wei we yu luk sosaeti … bae i save kam blokem sam samting insaed long … sosol laef blong yu. Be sapos yu lisin long ol samting ia, olsem we i kamaot long maot blong Lod Hemwan, … ‘ol get long hel bae oli no save win agensem yu … mo bae Lod i ronemaot ol paoa blong tudak long fored blong yufala … (D&K 21:6).”¹⁶

Wan nara paoa we i strong we i save protektem yumi long ol waelwin blong laef, hem i Buk blong Momon.

Taem Presiden Henry B. Eyring i wan yangfala boe, famli blong hem i muv i go long wan niu siti. Hem i faenem muv i had tumas mo hem i no mekem tumas fren. Hem i filim se hem i no go wetem ol fren blong hem long skul we hem i stap go long hem. Ol waelwin ia oli stap go raon. ?Hem i bin mekem wanem? Hem i putum ful paoa blong hem blong ridim Buk Blong Momon, hem i bin ridim fulap taem.¹⁷ Sam yia i pas, Presiden Eyring i testifae se: “Mi [lavem blong] gobak long Buk Blong Momon mo dring fulap long hem mo evri taem.”¹⁸ ‘[Hem i] wan strong testemoni we oli raetem we yumi gat se Jisas Hem i Kraes.”¹⁹

!Lod i givim wan nara wei blong yumi stanap strong; hem i wan presen blong Spirit we i gat moa paoa bitim paoa blong waelwin blong enemi! Hem i talem: “Stanap… long ol tabu ples, mo no muv.”²⁰

Taem mi yangfala long tetaem ia, i gat 13 tempol nomo long Jos. Naoia i gat 142. Deitlaen pesen blong ol memba blong Jos oli laef long 320 kilometa longwe long wan tempol. Lod i givim jeneresen blong yumi, moa bigfala janis blong save go long tabu haos blong Hem bitim ol narafala jeneresen long histri blong wol.

?Yu yu stanap finis insaed long tempol, we yu werem waet klos, mo yu wet blong mekem baptaes? ?Olsem wanem nao yu bin filim? I gat wan filing we i gat paoa, mo filing ia i tabu insaed long tempol. Pis blong Sevya i winim ol waelwin blong wol we oli stap swing raon.

Wei we yu filim insaed long tempol i wan paten long olsem wanem nao yu wantem filim long laef blong yu.²¹

Faenem ol bubuman mo bubuwoman blong yu mo ol kasen blong yu we oli stap longwe long yu we oli ded finis fastaem long yu. Karem ol nem blong olgeta i go long tempol wetem yu.²² Taem yu stap lanem abaot ol bubu blong yu, bae yu luk ol paten blong laef, blong mared, blong ol pikinini; paten blong fasin blong stap stret mo gud; mo samtaem ol paten we yu no wantem folem.²³

Afta samtaem, long tempol, bae yu lanem moa abaot Kriesen blong wol, abaot ol paten blong laef long Adam mo Iv, mo moa impoten nao, abaot Sevya blong yumi, Jisas Kraes.

Ol yang brata mo sista blong mi, mifala i lavem yufala, admaerem yufala, mo prea from yufala. No letem ol waelwin oli pulum yu i go daon. Hemia i dei blong yufala—blong stanap strong olsem ol disaepol blong Lod Jisas Kraes.²⁴

Bildimap fandesen blong yu i moa strong antap long ston blong Ridima blong yufala;

Lukaotem moa fulwan gudfala laef blong Hem mo ol tijing blong Hem we i no gat wan samting moa i stap blong komperem wetem.

Wok wetem strong tingting blong folem gud ol eksampol blong Hem mo ol komanmen blong Hem.

Akseptem moa fulwan lav blong Hem, sore blong Hem mo gladhat blong Hem, mo bigfala presen we i Atonmen blong Hem.

Taem yu mekem olsem, mi promesem yu se bae yu luk ol waelwin blong laef olsem we oli stap—ol tes, ol temtesen, ol samting we oli pulum tingting blong yu, o ol jalenj, se oli stap blong helpem yu blong gro. Mo taem yu stap laef long fasin we i stret mo gud yia afta yia, mi save talem long yu se ol eksperiens blong yu bae oli talem long yu bakegen mo bakegen se, Jisas, Hem i Kraes. Ston long saed long spirit andanit long leg blong yu bae i strong mo bae i no save muv. Bae yu glad se God i putum yu long ples ia blong yu pat long ol las wok blong rere from taem ia we Kraes bae i kambak wetem glori.

Sevya i talem: “Mi no save lego yufala i stap nomo olsem. Bambae mi mi save kambak bakegen long yufala.”²⁵ Hemia i promes blong Hem long yu. Mi save se promes ia i ril. Mi save se Hem i stap laef, long nem blong Jisas Kraes, amen.