Nsanmuyi horow

Enuanom na nkyerɛbaa, ansaana mebɛhyɛ m’asɛm a ɔakyerɛw ndɛ ase no, mebɛpɛ dɛ medze temple afofor anan a, abosoom nye mfe a ɔreba no mu wobesi no, ho amandzɛɛ to gua. Wobesi no wɔ dɛm mbea yinom a odzi do yi: Quito, Ecuador; Harare, Zimbabwe; Belém, Brazil; na temple a otsĩa ebien wɔ Lima, Peru.

Ber a mebɛyɛɛ Asomafo Duebien no hɔn Quorum mu ba wɔ afe 1963 no, nna temple 12 na wodzi mu dwuma wɔ Asɔr ne nyina mu. Provo City Center Temple a wotuii hyɛ Nyame nsa adapɛn ebien a abɛsen kɔ no kã ho no, sesei temple horow 150 na wodzi mu dwuma wɔ wiadze nyina mu. Mbrɛ hɛn enyi si sɔ nhyira a yegye no wɔ fie krɔnkrɔn yinom mu.

Afei, enuanom na nkyerɛbaa, mepɛ dɛ mekyerɛ m’enyisɔ dɛ menya kwan a menye hom rebɛkyɛ adwenkyerɛ kumabaa yinom anapa yi.

Ndaansa yi madwendwen afa nsanmuyi horow ho. Wɔakã dɛ nsɛndo nketsenketse do na nsɛm tsitsir abobow dandan wɔ do, dɛmara na nkorɔfo hɔn abrabɔ so tse. Nsanmuyi horow a yɛyɛ no na ɔkyerɛ hɛn nkrabea.

Ber a yefii hɛn abrabɔ a ansaana nyimpa reba asaase yi do mu na yɛhɛɛn ɔnnkyebo abrabɔ yi mu no yɛdze nsanmuyi akyɛdze bae. Hɛn botae nye dɛ yebenya celestial enyimnyam no, na nsanmuyi yinom a yɛyɛ no, na ɔbɛkyerɛ kɛsenara, dɛ yebenya hɛn botae no anaa yennkenya.

Hom mu dodowara nyim Alice a ɔwɔ Lewis Carrol ne buukuu Alice’s Adventures in Wonderland, a ɔayɛ atsenkã no mu no. Hom bɛkaa dɛ okodu nkwantanan a anamɔn kwan ebien tsen kɔ kan naaso ɔson ma kor biara kɔ no. Ber a ɔdwendwen kwan kor a ɔbɛman do no, ohyia Cheshire Egyinambowa, ɔno na Alice bisa no dɛ, “Ebɛn anamɔn kwan kor na menfa do?”

Egyinambowa no bua dɛ, “Ɔno gyina beebi a epɛ dɛ ekɔ. Sɛ nnyim beebi a epɛ dɛ ekɔ a, anamɔn kwan kor a ebɛfa do no nnhia.”¹

Yɛnntse dɛ Alice, yenyim beebi a yɛpɛ dɛ yɛkɔ, na anamɔn kwan kor yɛfa do no hia, osiandɛ anamɔn kwan a yɛfa do wɔ abrabɔ yi mu no begya hɛn akɔ hɛn asoɛe wɔ abrabɔ a ɔreba no mu.

Nkyɛ yɛasanmu eyi dɛ yɛbɛkyekyer gyedzi a ɔyɛ ndam a tum wɔ mu a ɔbɛyɛ bambɔ yie etsĩa ɔsɛɛfo ne nhyehyɛɛ no—nokwar gyedzi, gyedzi no a ɔbɛgye hɛn abamba na obekenyan hɛn pɛ dɛ yɛbɛsanmu eyi dza oye. Yennya dɛm gyedzi yi bi a, yɛronnkɔ beebiara. Yenya a, yebotum hɛn nsa akã hɛn botae horow no.

Ohia tsitsir dɛ yɛsanmu yi nyansa mu dze, naaso mber binom wɔ hɔ a yɛyɛ nsanmuyi horow a omuo. Nnuho akyɛdze a Agyenkwa no dze ama no, ma hɛn kwan ma yɛsesã kwan a yɛnam do no, ama yeetum asan aba anamɔn kwan no a obegya hɛn akɔ celestial enyimnyam no a yerohwehwɛ no.

Mowɔ enyidado dɛ yebesie akokodur no a wɔdze gyina pintsinn a yenndzi dɔm ekyir. Mowɔ enyidado dɛ yɛbɛsan mu eyi dza oye a ne yɛ yɛ dzen no, akyɛn dza omuo a ɔyɛ mberɛw no.

Ber a yɛdwendwen nsanmuyi horow a yɛyɛ wɔ hɛn abrabɔ mu daa daa no—dɛ yɛyɛ nsanmuyi iyi anaa ɔno o—sɛ yɛsanmu yi Christ a, nna yɛayɛ nsanmuyi a oye.

M’akoma mu ahobrɛadze mpaabɔ nye dɛ iyi bɛyɛ hɔ wɔ Jesus Christ, hɛn Ewuradze na Agyenkwa ne dzin mu, amen.