Ngang Emon Noun Kot

Ach we nongonong mi aucheanap mi masoueni ach sinei pwe kich noun emon Kot mi manau. Ina pwata ew it mi pin minne sia eita ngeni ena Sam—Semach won Nang. A affat non afanafan ussun ei nongonong seni ekkewe soufous non fansoun meinisin:

1. Nupwen a sossot me ren Satan, Moses a peneueni ren an kapas eis ika i io? Me Moses a apasa pwe I emon noun Kot.”¹

2. Non an fos ngeni Israel, ewe Chon Makkei Kon a apasa: “Ami meinisin noun ewe Emon mi Unusan Tekia.”²

3. Paul A aiti ekkewe chon Athens won ewe chukuchukuta Mars pwe “kich noun Kot.”³

4. Joseph Smith me Sidney Rigdon ra kuna non ar nemesepwi ewe Sam me ewe Nau, me ew mongungun nang a apasa pwe ekkewe chon fonufan ir noun Kot at me nengin.⁴

5. Non 1995 [engorou tiwpuku tiwe me nimu] ekkewe15 [engon me nimen] aposel me soufos ra apungano pwe “Meinisin aramas…ra foruta non ununun Kot. Emon me emon achengicheng at me nengin non pekin ngun a wor semer me iner won nang.”⁵

6. Preseten Thomas S. Monson a pwarata: “Kich noun emon Kot mi manau. … sise fen tongeni kamoch ei nongonong me nukun chok a pwan tori kich napenon pochokun me manaman.”⁶

Ei nongonong mi chok mecheres, me sia kan apasa fan chommong, me ese weires ach sipwe weweiti, nge ennetin ei mettoch a ew mirit a wesen auchea nap seni meinisin. Ach weweochuti ununuch me nang a auchea ren ach sipwe angei manau ese much. Mi aucheanap ren ach weweiti ewe kokkotun manau ese much mi ning me pwan ren ach anapano ach nuku non ewe Noun Kot Anaemon, Jisese Kraist, me an we Achasefan mi uren umoumoch.⁷ Pwan soposoponon, a pwan awora pochokun ren ach sipwe aponeuta ach kewe pwon mi pin rese much.

Fiti ekkoch me nukun, kich meinisin chon fiti ei mwich iei sia tongeni konu ewe kon “Ngang emon Noun Kot.”⁸ ese pwan namot taropwen kapasan. Ei kon mi fel mi kan achengicheng a eche kon sia kan chok kunu fan chommong non ei Mwichefen. Nge kich mi ennetin sinei ei? Sia sinei ren ekiekich me netipach me non ngunuch? Inach me samach non nang ina akkomuen napanapen ununuch me nang?

Me won ei fonufan, sia awewei usuch non sokkopaten napanap, pachenong ach nenien uputiw, fonuach, me kapasen fonuach. Ekkoch ra pwan chok awewe usur ren met ra ani angang are met ra kan sani. Ekkei awewe usuch me won fonufan rese mwan, me nukun chok ika pwe rese fen u ngeni ununuch feinfeino—pwe kich noun Kot at me nengin.

Nupwen nouch we kukkun semirit a ier wonu, me a nom non mwichen ew non sukun, noun we sense a ngeni ekkewe semirit ar we assignment ar repwe mak non ar ewe sukun. A fansoun October, ewe maramen Halloween, ew ranin apwapwa non ekkoch neni won fonufan. Ina mwo ika use kan sani Halloween, fan ekkoch mi wor ochun me pwapwan Halloween.

Ewe sense a ineti eche taropwe ngeni ekkewe chon sukun meinisin. Asan a wor niosun emon witch, (usun ua fen ereni kemi, use fen sani ei ran) a uta ren ew nape mi kuku. A wor ewe kapas eis won ewe taropwe pwe epwe sotun ne testini ekiekin me miritin ekkewe semirit, mi makk, “Ka keran unumi chunun ei nape an ei witch are fin magic. Met epwe fis ngonuk?” Oupwe sinei pwe ai aporausa ngeni kemi usun ei mettoch esap pwe ami sense oupwe chok pwan fori.

“Ka keran chok unumi ew kap chunun ei nape an ei witch are sourong. Met epwe fis ngonuk?” Ren an chok achocho, emon kukkunun nengin a makkei, “Upwe mano me upwe nom nang. Upwe sani nang. Upwe fen sani pun a ew neni mi och seni meinisin pun sipwe nom ren Semach won Nang.” Ponuwan ei a amairu noun we sense ; nge, nupwen nóum we nengin a wato ewe taropwe neimw, am aua kuna pwe a angei efou fuu, ewe kinikin mi tekia.

Non manauach, sia kuna wesen weires, esap chok niosun. A wor metek—non inis, netip, me non ngun. Mi wor netipeta, nupwen mettoch mi kan weires nap seni ach fen ekieki me akkom. A wor mettoch ese pung, usun ita ra tori kich nge ese pung. A wor netipengau, nupwen emon a tipis ngeni kich. A wor weiresin samau me woungau mi tongeni osukosuka kich. Mi pwan wor fansoun sipwe ani kapas eis ika epwe fen tufich ach sipwe weweiti och nongonong are poraus.

Nupwen weires a fis non manauach, epwe ifan ekiekich akkom? Epwe osukosuk are tipemwaramwar are nikitinon ngunuch? Epwe apwangapwaneno ach nuku? Sia tipingeni Kot are pwan emon ren napanapen nonnomuch? Are sia akkom ekieki ika kich io—pwe kich noun emon Kot mi uren tong? Mi pwan fiti ekiekin nukuchar pwe mi mut ngeni kich och weires pokiten a sinei epwe efeiochu kich, usun ekei an emon chon nimet, pwe sipwe winiti usun I me angei niffangach ese much?⁹

Iwe chok ekisano, ua fiti ew miwch fengen me Elter Jeffrey R. Holland. Non an afanafana usun ewe nongonong pwe manauach won fonufan epwe uren riaffou, mi wor popun ach kewe weires non manau ese much—ina mwo ika sise weweiti popun fan ekkoch—Elter Holland a apasa, “Ka tongeni angei met minne ka mochen, are ka tongeni angei och mettoch mi fen murinno seni.”

Nimu maram a no, am me punuei we, itan Diane, am aua no ngeni Africa ren Elter me Sister David A. Bednar. Ewe awonuen me amuchunon fonu am aua churri mi Liberia. Liberia a ew fonu mi nap ren aramas mi fokkun tuppwen ren ew poraus mi fokkun uren mottoch mi murrino, nge ese mecheres manau non ei fonu. Chommongun ierin osukosuken muu me maun me chok angaueno weirisin osupwang. Pwan pacheta, ewe semwenin Ebola a nieno 5,000 [nimu ngrou] aramas fansoun a chou fetan. Am ewe aewin michen ekkewe souemwenin Mwichenfen seni ekis a akkom churi ewe fonu Monrovia, ewe capitol, mwirin ewe World Health Organization ra aporausa pwe mi och aramas repwe tonong mwirin ewe semwenin Ebola a wes.

Non ew nesesorun Raninfel mi wesen pwichikar, am aua sai ngeni ew imwen miwch am aua moni am aupwe miwch non mi non ewe sopw. Ra minata meinisin ekkewe seia am aua tufichin angei mi tori 3,500 [unugnat ngorou nimupuku]. Ukukkun chon fiti a tori 4,100 [ruanu ngorou ipuku] aramas. Napengenir ra chok fetan ngeni ewe mwich are ra fiti och sokkun waa mi aweires—ese mecheres pwe ekkei sounang repwe chufengen. Nge ra war. Napengenir ra war epwe fen ruu awa mwen a poputa ewe mwich. Nupwen am aua tonong non ewe imw, ewe manamanen ngun a usun fifi! Ekkewe sounang ra monota ne kaeo.

Nupwen emon chon afanafan a anneani ew uwokisin, ekkewe chon mwichefen ra pwan apasau. Ese nifinifin—ika mi moch are mi tam; ewe mwich ra chok apasa fengenieu. Nge esap wewen pwe oupwe chok foffori ei, nge mi chok ameseik pwe ra tufichin fori ena. Me ewe mwichen chon kon—ra fokkun manaman. Ren emon chon emwen mi uren pochokun me emon chon etik oroken a 14 [engon me ruanu] ierin, ekkewe chon mwichefen ra kon fiti manaman me pochokun.

Iwe, Elter Bednar a afanafan. Iwe iei ewe popunapen ewe mwich—pwe am aupwe ausening ngeni emon aposel a afanafa me pwarata. Mi fat pwe fan emwenien ewe Ngun mi Fel, nukunapen an we poraus Elter Bednar a kouno me a apasa, “Ami mi sinei ‘Mi Pochokkun ewe Nongonong’?”

A usun 4,100 [ruanu ngorou ipuku] mongungu ra penueni, “EWER!”

A kapas eis, “Oua sinei uwokisin fisu?”

Unusan ewe mwich ra pwan penueni, “EWER!”

Ewe tetenin ewe kon mi fel mi nap “Mi Pochokkun ewe Nongonong” nupwen ewe Mormon Tabernacle ra konu ra pwan konu uwokisin fisu, non ekkei 10 [engon] ier, minne rese pwan konu fan chommong me noom. Elter Bednar a apasa, “sipwe konu uwokisin ew, ruu, unungat, me fisu.”

Ese fokkun pwan mang, ewe chon emweni kon a pwata, me ekkewe chon Prisut seni Aaron-me ewe chon etik oroken a poputa ne etiki nepoputan ewe kon. Ren ukukkun pochokun use mo fen kuna non ew kon mi fel, am aua konu uwokisin ew, ru, me unungat. Iwe ewe pochokun me manaman non pekin ngun a napeno ren 4,100 [ruanu ngorou ipuku] mongungu ra konu uwokisin fisu:

Non ew porausen pekin ngun mi unusan amwarar non manauei, ua kaeo ew mettoch non ena ran. Sia nom non ew fonufan mi tongeni efisata ach sipwe menukano ika kich io. Ren chommongun ekkewe sossot ra pwenikich, a pwan mecheresino ach sipwe chippwang, me amunungau, me menuki ach ririfengen ren Kot. Ekkewe sounang non Liberia ese pwan chommong pisekir, nge ra fokkun pisekisek non pekin ngun. Met am aua kuna non Monrovia non ena ran, ew mwichen noun Kot at me nengin ra wesen sinei ena!

Non fonufan ikenai, ese nifinifin ia sia nonnom ia are ifa sokkun nonnomuch, mi chok aucheanap pwe ununuch akkom epwe pwano pwe kich noun Kot. Ach sinei ena epwe mut ngeni ach nuku epwe mar, epwe pesei kich ne sopweno ne aier, me epwe apochokuna kich pwe “sipwe tipepos me nukuchar” non ach ei sai won fonufan.¹¹ Non itan Jises Kraist, amen.