Uta ren ekkewe Souemwenin ewe Mwichefen
Sisap aneasonap are amungunau seni ewe tufichin etiwa me angei emwen seni ekkewe chon angang an ewe Samon.
Am kapwong epwe tori ekkewe Meinap Unusen minafo, ekkewe Area Fik, me ewe Presetensin Kinter Unusen minafo. Am kapasen kinisou epwe tori ekkewe ir ra tou seni wiser. Am aua tongei kemi, emon me emon neimi.
Pwi me fefinei mi achengicheng, sia keran wes ne fori ew angang mi efeioch nupwen ach eita poun mwanich ne etiwa itan ekkewe soufos, chon oesini, me chon pwarata me ekkewe ekkoch chon nemenem me ekkewe meinap unusen mi kefinita ren Kot non ach kei ran ikenai. Ese wor fansoun manauei pwe use ekiekin auchean ach tufichin etiwa itan ekkewe chon angang an ewe Samon me ach angei kapasen emwen seni ir. Ua angei wisei non ewe Mwichen Engon me Ruemon Aposel ekkoch maram a no, me oua atekisona netipei ren ami etiwa ei. Ua aucheani ami mochen ne uta rei pwan ren ekkei chon nemenem mi echipwer.
Ekkis fansoun mwirin ai etiwa non wisei fan ewe October a no, ua no Pakistan, ne fori wisei nge, nupwen ua nom ikenan, ua churi ekkoch souneng seni ena fonu mi amwarar me nukuchar. Ir mi choukukkun, nge ra kan watte non pekin ngun. Ekkis fansoun mwirin ua niwinno imwei, ua angei echo taropwe seni Pwich Shakeel Arshad, emon chon mwichefen ua churi non Pakistan: “Kinisou, Elter Rasband, ren omw ka eto ikkei. Ua mochen erenuk pwe ekkewe … chon Mwichefen … ikkei am aua etiwok non wisom me aua tongeok. [Aua] kan feioch pwe ka feito ikkei me am aua ausening ngonuk. A ew ran mi efeioch non manauem ne churi emon Aposel.” 1
Ai churi ekkewe Souneng usun Brother Arshad mi apwapwaiti o atekisona ei me, non an pwisin kapas, a “ew ran mi efeioch” ngeniei pwan.
Fan ewe January a no chon nemenem an ewe Mwichefen ra fori ew mwich won tifi itan Face to Face ren ekkewe serafo, ar kewe chon nemenem, me semer me iner kewe seni ekkis meinisin won fonufan. Ewe mwich won tifi a fich won ewe internet ngeni chommong nenni non 146 fonu won fonufan; ekkoch neni a wor chommong chon fiti mwich non ekkewe imwan fan, me ekkoch neni a chok wor emon serafo mi katon ei mwich won tifi. Kapach fengen ir a wor fite ngorou mi fiti ei mwich.
Non ei mwichen fos fengen, Fefinach Bonnie Oscarson, presetenin Fopun unusen; Pwich Stephen W. Owen, presetenin Anuon unusen; me ngang pwisin—kapach fengen ren ekkoch chon tupuni serafo, chon tiki music, me pwan ekkoch—ra ponueni ekkoch kapas eis seni nouch kewe serafo.
Am popun non ena mwich mi chok pwe aupwe pwari itenapen Serafo non ewe ier 2016, “Nikitu fiti Tipepos non Kraist” seni 2 Nifai o sia anneani: Ina minne, oupwe nikitu fiti tipepos non Kraist, epwe wor ami unusochun saramen apinukunuk, me ew tongen Kot me aramas meinisin. Ina minne, ika oupwe feino mwemi, kametip won ewe kapasen Kraist, me nikitu tori nesoponon, nengeni, iei anon ewe Sam: Oupwe weri ewe manau esemuch.”2
Ren am anneani kapas eis an nouch kewe serafo, met am aua kaeo? Aua kaeo pwe nouch kewe serafo ra tongei ewe Samon, ra tipew ngeni ar kewe chon nemenem, o ra mochen angei ponuen ar kewe kapas eis! Kapas eis mi wewe ngeni ar mochen kaeo, pwe repwe apacha ekkei ennet ngeni met mi fen nom non ar kewe kapasen pwarata, me repwe ammonata ne nikitu fiti tipepos non Kraist.”
Ewe Aniwinsefaniton ewe kapas allim a poputa ren emon anuon, Joseph Smith, fiti ew an kapas eis. Chommong osukunen ewe Chon Amanau fansoun an afanafan fetan mi poputa re new kapas eis. Chechemeni an kapas eis ngeni Peter: “ifa usun ami ekiek, ngang io?”3 Me Peter a ponueni: “En ewe Messiah, Noun ewe Kot mi manau.”4 Mi namwot sipwe aninnis fengen ne kuna ponu seni Semach won Nang me ren emwen seni ewe Ngun mi Fel.
Non ena mwich mi fich won tifi, ua apasa ngeni ekkewe serafo:
“Ekkewe chon nemenem an ei Mwichefen ir mi sinei usun met mi osukosuka kemi, ami kapas eis, pwan usun met mi aweiresi kemi.
“A wor neum kewe. A wor noun neum kewe. Iteiten am aua kan chuchufengen ren serafo seni ekkis meinisin won fonufan. Me am aua kan iotek fan itemi, aua fos usumi non ekkewe neni mi pin, me aua kan tongei kemi.”5
Ua mochen poraus usun ew me nein ekkewe chommong ponu aua angei seni ena mwich.
Lisa seni Grand Prairie, Alberta, Canada mi makk: “Ei mwichen Face to Face mi kan amwarar. Ei mi apochokuna ai kapasen pwarata me ai sineifichi usun ewe kapas allim. Sia kan feioch pwe a wor ach chon nemenem mi tufichin angei pwarata ir mi finata ne angang non sokkopaten wis.”6
Liz, seni Pleasant Grove, Utah, a makkei: “Ua kan kinisou ren ai pwisin nuku pwan ewe tufichin etiwa emon soufosun Kot me ekkewe mwan me fefin mi angang ren i.”7
Sia etiwa ekkoch chon nemenem ikenai, mi finata me ren Kot, pwe repwe aiti o emweni kich o ra pwan aurukich ne tumunuoch pokiten ekkewe feiengau sia kuna iteiten ran—usun an aramas pinnini Raninifen, ekkewe feiengau mi osukosuka chon ach famini, ekkewe ir ra maun ngeni mwichefen, pwan ekkewe ir mi u ngeni ach angei pwarata ikenai. Pwi me fefinei, kich mi ausening ngeni ar kapasen aurur?
Fan chommong non ekkewe mwichenap, mwichen sakramen, me non Kinter, sia konu ekkewe kapas pwetete, “Emweniei, ewinaiei, o fitiei.”8 Met ekkei kapas mi wewen ngeni ami? Ion oua ekieki usun nupwen oua rongorong ekkei kapas? Oua mefi pochokunen ekkewe chon nemenem, ekkana chon kunon Jises Kraist ekkewe ir seni fansoun nom tori ikenai ra sopweno ne amwokutu netipemi, ekkewe ir mi fetan remi won aanen ewe Samon? Ekkoch mi kanengeni kemi non imwemi, non ami kewe mwichen mwichefen, are ra fos won ewe rong non ewe mwichenapen mwichefen. Ekkei chon kuno ra pwar ngeni kich feiochun a wor ach kapasen pwarata usun ewe Samon Jises Kraist, ewe chon nemenem an ei Mwichefen, ewe chon nemenem an ngunuch kewe, ewe a pwon ngeni kich, pwe sisap nuokus, pwe ewe Samon mi nom rech, me epwe uta rech.9
Ua chechemeni Preseten Thomas S. Monson a poraus usun fansoun a feino imwan an we presetenin steik Paul C. Child an epwe ammonata ne angei ewe Pristut seni Melkisetek. Mi ew feioch watte fan iten Preseten Child, pun i ese sinei non ena fansoun pwe a aiti emon anuon mi angei ewe Pristut seni Aaron epwe winiti emon soufosun Kot.10
A wor chommong ai fansounen kaeo seni ach soufos mi achengicheng, Preseten Monson. Ese wor ai amam non tupuwei me non netipei pwe i an ewe Samon soufos won fonufan; Ukan tipetekison fansoun ua kuna an angei pwarata o fori met a angei pwarata usun. A aiti kich ach sipwe tumunu me anisi emon me emon kich. Ekkei a pwan ait ngeni ekkewe aramas non ekkewe Konikin Mormon. Ekkewe ir mi mochen pwe repwe “iteni noun aramas” ra mochen “mwarei fengeni an emon me emon chou,” “mwarei fengeni an emon me emon chou,” o repwe “chon pwarata usun Kot.”11
Ikenai ua uta pwe ngang emon chon pwaratan Kot ewe Sam ese Much me Noun we, Jises Kraist. Ua sinei ach Chon Amanau mi manau o tongei kich me a emweni Noun kewe chon angang, en me ngang, ne apwonueta An kewe popun won ei fonufan.12
Non ach nikitu, ach finata ne tapwen mwirin ekkewe annuk me kapasen aurour an ach kewe chon nemenem, sia finata pwe sipwe tapweno mwirin ewe Samon non fansoun chon fonufan ra fini ne fetan won ewe aan mi mwan. Sia finata ach sipwe kamwochunuk ngeni ewe wokun mecha, ach sipwe winiti Aramas mi pin non Fansoun Soponon, ach sipwe fori angangen ewe Samon, me ach sipwe aurano “ren pwapwa chapur.”13
Ei kapas eis mi kan fat ikenai: oua kan uta ren ekkewe chon nemenem an ewe Mwichefen non fansoun ewe fonufan mi angaueno pwe oua tongeni achoufetanei ewe Saramen ewe Kraist?
Nefinach ren ekkewe chon nemenem mi auchea. Ese nifinifin ierir are ifan aukukun ar kaneto are towaw, are inet ra pwan siwini manauach, ar pesepes mi achemato kapasen ewe chon makk re Merika itan Edwin Markham, a apasa:
A wor popun kich pwipwi:
[Ese wor emon] epwe sai akaemon:
Mettoch meinisin sia tinau non manauen pwan emon
A pwan niwinto non ach.14
Shakeel Archad, chienei seni Pakistan, a tinati an aninis rei, pwin we o chienan we. Mi usun chommong ami. Nupwen sia achocho ne apochokuna emon me emon neich, sia pwarata pungun ekkei kapas: “[Ese wor emon] epwe sai akaemon.”
Chommong neich, sia anongonong won ach Chon Amanau, ach Samon, Jises Kraist. Ew poraus seni ekkewe pukfel mi amwokutu netipei mi chok nupwen Jises Kraist a fetan won ewe konik ne churi Noun kewe chon kuno atun ra sai won efoch wa won ewe Noom Galilee. Ekkei chon nemenem, ra keran angei wiser usun chommong neich mi nom won ei rong ikenai. Ei poraus mi makk non ewe puken Matthew:
“Nge non ei atun ewe wa a towaweu non ewe noom, nge a nuponup ren ekkewe no pun ewe asepwan a kan pochokun.
“Nefinen kunok unungat me kunok wonu nesossor, Jises a fetato won ewe sat ren noun kewe chon kaeo.
“Iwe nupwen ra kuna pwe a fetato rer won ewe sat,… ra puchoruta ren ar nuokus.
“Jises a muttir kapas ngenir, ʻOupwe apinukunuk, ousap nuokus, pwe ngang ei.”15
Peter a rong ena ponuen apinukunuk mi amwarar seni ewe Samon.
“Iwe Peter a kapas, ʻSamon ika pwe ennetin en ena, kopwe ereni ei pwe upwe fetano reom won ena sat.
“Iwe [Jises] a ponueni, Kopwe feito.”16
A kan pochokun. Peter a emon sou atau, o a sinei efeingauen ewe sat. Nge, a kan nukuchar ne tapweno mwirin Jises—neran are nepwin, won efoch wa are won fonu mi pwas.
Ua tongeni ekieki pwe Peter a mwetetiw seni nepekin ewe wa, esap witi ren ewe oruan pesepes, o a poputa ne fetan won ewe sat. Ennet, ekkewe pukfel ra apasa, “A poputa ne fetano won ewe sat ren Jises.”17 Ewe asepwan me ekkewe no ra apochokununo, me Peter a poputa ne nuokus “iwe a poputa ne kokotiw non ewe sat. A puchoruta, ʻSamon kopwe anisi ei.
“Iwe muttir chok Jises a eitieno poun o a amwochata i.”18
Ei mi ew nesen mi pochokun. Ewe Samon a nom an epwe anisi i, usun chok A nom ne anisuk are anisiei. A eitieno Poun o a amwochata Peter ngeni I, pwe epwe epet seni feiengau.
Ua mochen aninnis seni ewe Chon Amanau fan chommong non manauei. Ua mochen An aninnis iei nap seni nom, usun chok emon me emon neimi. Ua mefi pochokun non ekkoch fansoun ua ekieki pwe u tongeni mwetetiw me won ewe wa, non kapasen awewe, ngeni ekkoch neni use mwo oreni, nge ua esinna pwe use tongeni fori ei angang non akkanaemon chok.
Usun sia poraus non ewe Face to Face, ewe Samon a eitieno poun ngeni kich me ren chon ach kewe famini me ekkewe chon nemenem, non ar pesei kich ne feito ren I—usun chok a eitieno poun ne tumunu Peter seni feiengau.
Epwe wor chommong fansoun non manauemi ne ponueni ekkewe pesepes ne “feito ren Kraist.”19 Esap ei popunen manauach won fonufan? Ewe kokko epwe ne ach feito ne anisi emon chon ach famini; feito ne fori angangen misineri; niwinsefan ngeni ewe mwichefen; feito negni ewe tempel mi pin; me, usun sia keran rong seni nouch kewe serafo mi amwarar non ewe mwichen Face to Face, feito, me anisi ei ne ponueni ai kapas eis. Non ekkis fansoun, emon me emon kich sipwe rong ekkewe kapas “Niwinsefan ngeni neimw.”
Ua iotek pwe sipwe achocho ne amwochata poun ewe Chon Amanau a kan eitieno ngeni kich, fan chommong epwe me ren Noun kewe chon emwen mi pwisin finata me chon ach kewe famini, me ausening fan itan An kokkori kich ne feito.
Ua sinei pwe Jises Kraist mi manau; Ua tongei I, me ua sinei ren unusen netipei pwe A tongei emon me emon kich. A chok ach Nenien Appiru mi echipwer me ewe chon nemenemen meinisin noun Semach kewe mi unusoch. Ua pwarata ai pwisin kapasen pwarata non itan Jises Kraist, Amen.