Tufa’a 13
E tuha’a nō roto mai i te ’ā’amu nō Iosepha Semita e fa’ati’a ra i te fa’atōro’ara’ahia o Iosepha Semita ’e Oliver Cowdery i te Autahu’ara’a a Aarona i te hiti pape nō te ’ānāvai Susquehanna, tāpiri i Harmony, i Pennsylvania, i te 15 nō Mē 1829. ’Ua ravehia te fa’atōro’ara’a i raro a’e i te pu’e rima o te hō’ē melahi, ’o tei parau mai ē ’o Ioane ’oia, ’o ’oia ’o tei parauhia ’o Ioane Bāpetizo i roto i te Faufa’a ’Āpī. ’Ua ha’amāramarama mai te melahi ē tē rave ra ’oia i taua ’ohipa ra i raro a’e i te fa’aterera’a a Petero, Iakobo, ’e Ioane, te mau ’āpōsetolo tahito ’o tei mau i te mau tāviri nō te autahu’ara’a teitei i parauhia te autahu’ara’a a Melehizedeka. ’Ua hōro’ahia mai te hō’ē fafaura’a ia Iosepha rāua ’o Oliver ē ’ia tae i te tau e ti’a ’ia nā-reira-hia, e hōro’ahia mai ïa teie autahu’ara’a teitei ia rāua. (Hi’o i te tufa’a 27:7– 8, 12.)
’Ua hōro’ahia mai te mau tāviri ’e te mau mana nō te Autahu’ara’a a Aarona.
1 I ni’a iho ia ’ōrua, e tō’u nei nā tāvini taea’e, i te i’oa o te Mesia, tē hōro’a atu nei au i te Autahu’ara’a a Aarona, ’o tei mau i te mau tāviri nō te utuutura’a a te mau melahi, ’e nō te ’evanelia nō te tātarahapa, ’e nō te bāpetizo nā roto i te utuhira’a, ’ia matara te hara ; ’e e ’ore roa te reira e ’īriti-fa’ahou-hia atu mai ni’a atu i te ao nei, ē tae noa atu i te taime e pūpū fa’ahou atu ai te mau tamari’i tamāroa a Levi i te hō’ē ō i te Fatu nā roto i te parauti’a.