Sapwelimen Koht mehn Kadehdeh Kehlail: Iei Pwuken Mormon

Pwuken Mormon sohte wiahte takai pwukokeimw en atail mwomwohdisoht, ahpw e pil kak wiahla takai pwukokeimw en atail kadehdeh kan pwe ni ansou me songosong kan de peidek sohte kak pasapengla kan pahn kodohng kitail, e kak katengehdi atail kadehde kan mwahu. Pwuhk wet toutousang pwung en irail akan me kin uhongada. Pwehda? Pwehki ma e mehlel, eri Joseph Smith wia soukohp mehlel men oh mwomwohdisoht wia Sapwelimen Sises Krais, mendahte dahme wiawihier kan de soahng kan me kin kasapwunge. Pwehki met, aramas kin song en kasapwunge Pwuken Mormon, ahpw kahpwal me irail kin lelohng kan kin inenen laud, pwehki pwuhk wet mehlel.

Keieu, irail pahn anahne en kawehwehda ia mwomwen Joseph Smith, kisin pwutak en nan mwetuel me sounpar-23[rieisek siluh] oh sohte sukuhl laud, ah kak wiahda pwuhk ieu me kolokol ahd oh wasa kesemwpwal kei, oh pil iangahki soai oh kemwekid kei me wehwe mwahu. Pwehn kawehwehda wet, ekei sounkapwung kan kin kosoia me e wia kisin pwutak main medewehda oh loalokong men me kin doadoahngki pwuhk tohto oh ekei mehkot pwehn kak wiahda soai en nanPwuken Mormon. Ahpw dahme kasapwungehlahu, sohte emente sounkadehdeh ko me nda me re kilang Joseph ah kolokol soahng pwukat koaros mwohn ah tepda kawehweh.

Menda ma soahng pwukat mehlel, udahn e apwal en kawehwehda iawasa Pwuken Mormon tepsang ie. Emen pahn anahne pil sapeng peidek me nda: Ia mwomwen Joseph ah wadek pwuhk tohto, kihsang ire kei, oh koasoanehdi ni pwung isme mih iawasa oh iahd, oh ahpw nda oh tamataman ni pwung? Pwe ansou me Joseph Smith kawehwehu, sohte nah pwuhk douluhl. Ni mehlel, Emma ah pwoudo nda: “E sohte kolokol doaropwe de pwuhken wadawad. … Ma mie soahng pwukat reh E sohte pahn kak ekihsangie.”¹

Eri ia mwomwen Joseph eh kak ahneki soangen koahiek en wiahda pwuhk ieu me teh-tohtohsang-500-[limepwiki] ahpw sohte koapihsang nan ehu pwuhk? Pwehn kak wia soahnge, udahn e pahn anahne en wia aramas koaiok en madamadau oh loaloapwoat mehlel me ah mehn ketemen unsek. Ahpw ma soahng wet mehlel, ah dahme kahrehda irail me kin uhong kan sohte kasalehkihda soangen koahiek wet.?

Ahpw mie ekei. Akamai pwukat kin pidadahte mwomwen poadoapoad kan nan pwuhk wet. Ahpw dahme kesemwpwal o mihmihte: Ia mwomwen Joseph ah kak wiahda pwuhk ieu me kin kihong aramas en kak kehnda Ngehno, oh iawasa me e kihsangie soangen padahk pwung pwukat, me pali laud kawehwehda de weksang dahme mehteikan kin kamehlele nan ah ansou ko?

Karasepe, Pwuken Mormon padahngki, me weksang dahme tohn lamalam teikan kamehlele, me pwupwilahn Adam wia irair en kasukuhl ieu. E kasalehda inou kan me kin wiawi ansoun pepdais, me sohte sansal nan Pwuhk Sarawi.

Ien kapatahieng, emen kak idek, iasawas Joseph kihsangie soangen padahk manaman me kosoia pwehki Sapwelimen Krais Tomwo, E sohte pahn kamwakelei kitaildahte ahpw E pil pahn wiada kitail en unsekla? Iawasa e kihsangie padahk kaselel me pid pwoson nan Alma 32? De pil en Nahnmwarki Benjamin ah padahk me pid Tomwo, me mweinte pil wia padahk keieu kaselel me pid ire wet nan pwuhk sarawi koaros. De pil soai paod en tuhkehn olive me sohte nohk wehweh oh diren padahkpe? Ansou mei wadek soai wet,I anahne mahleniada pwehn idawehn mwomwen soaio. Met kitail kak kamehlele me Joseph Smith kawehwedihte pwuhk wet sang ni pein ah madamadau oh sohte kihsang nan ehu pwuhk?

Me wekisang soangen madamadau wet, sawasepen Kauno kak dierek wasa koaros nan Pwuken Mormon, me sansal sang ni padahk kesempwal kan oh mehlel, ahpw mehlel padahk pen Tomw pen Sises Krais.

Ma Joseph sohte wia soukohp men, eri pwehn kak ntingiedi padahk mehlel pwukat oh iangahki me tohto, irail me kin uhong kan pahn anahne akamaiki me e pil wia aramas loalokong men nan kasukuhl en pwuhk sarawi. Ahpw ma ih mwomwehn mwo, emen kak idek, Dahme kahrehda Joseph kelehpw nan pahr 1,800[kid welupwiki] mwurin Krais me wiahda soangen tohtohn padahk kesempwal oh sansal pwukat? Pwehki sang ni kaudiahl, ahpw kaidehn loalokong, me pwuhk wet wiawihdahsang ie.

Ahpw mendahte ma kitail medewe me Joseph wia aramas koaiok en madamadau men oh loalokong en nan pwuhk sarawi, oh ahneki mehn ketemen mwahu—koahiek pwukat sohte kak kahrehiong en wia aramas koahiek en ntingiada soai. Pwehn kawehwehda poadoapoaden Pwuken Mormon, irail me kin uhong kan pahn pil anahne en uhki me Joseph wiahte aramas koahiek en nting men ni ah sounpar 23[rieisek siluh]. Pwe ma soh, ah ia mwomwen Joseph ah kak kihpene ahd, wasa, oh kemwekid kei me pahrek pene? Ia mwomwen ah kak ntingiada wiepen mahwen kei, me iangahki padahk unsek, wiahda lepin lokaia kei, me aramas rar kin wadlikihala, kin kosoia, oh pil kihong pohn neirail mehn kolomwur kan, (refrigerator), me rasehng , “Ni ansou me kumwail kin mihla nan amwail papah mehteikan kumwail kin mihte nan amwail papah Koht” (Mosiah 2:17) de “Aramas mie, pwe irail en kak ahneki popohl” (2 Nephi 2:25). Ire pwukat wia padahk kei me mie mene—kaweid kei me kin kamarainih kitail. Pwehn kosoia me Joseph ni ah sounpar 23[rieisek siluh] ahneki soangen koahiek en ntingiada soangen doadoahk kopwuriamwei wet pak ehute erein rahn 65[weneisek limau] udahn apwal douluhl.

Presiden Russel M. Nelson, emen soun nting kaidehn mwamwahl, kosoia me e ntingiada ah padahk en nan kapokon lap me ahpwte wiawi pak 40[pahisek] Eri met kitail kak kamehlele me Joseph Smith, pein, kawehwehdi Pwuken Mormon pak ehute oh kisin mesen nting kei me kopwungpwungla mwurin me e tepin wiahdahu?

En Joseph ah pwoudo Emma kawehwehda wen apwal en dahme e wiahu: “Joseph Smith [ni ah pwulopwul] kak ntingiada de wiahda kisin likou me sansal oh koasoai kaselel; ahpw sohte kak pein wiahda pwuhk ehu me duwehte Pwuken Mormon.”²

Oh keimwsekla, menda ma emen men uhong pwuhk wet, menda ma re kakete mehlel, miehte kahpwal laud ehu me irail me kin uhong kan sohsohpai. Joseph kosoia me Pwuken Mormon ntingdi pohn pleit kohl kei. Aramas kan nan ah mwehi kin kalapw uhong ire wet—pwe koaros ese me soai en mahs akan kin ntingdi pohn mehn nting me kin wiawihdahsang Papyrus de kilin mahn, lau lel mwurin sounpar kei, ansou me mehn nting mete kan me mie nting en mahs powe dierek. Irail me kin uhong kan kosoia me doadoahk en siment, me kawehwedahr nan Pwuken Mormon, udahn laudsang koahiek en irail mehn ansouo nan America—lau wiepen siment pwukat dierek nan America mahso. Ia mwomwen irail me kin uhong kan arail pahn kawehweh soahng pwukat oh pil soahng teikan me pil dierek? Kilang, Joseph, mwein pil udahn kin kasarkihte oh pwungila. Ahpw mendahte irail akan me uhong, oh pil soangen loalokong teikan, ihme pwung ah irail koaros sapwung.

Mwurin soahng pwukat koaros, emen kak medewe ia mwomwen aramas emen ah pahn kak kamehlele madamadau kan oh idihd, me kohsang irail me kin uhong kan, en song en wiahda Joseph en ntingiada Pwuken Mormon oh wiahda doadoahk en tepelo. Ahpw ia mwomwen mwekid wet ah pwung? Mendahte iren uhwong kan koaros, pwuhk wet kaweidkihier aramas tohto en pohnsehsehla sehdan, oh momouriki mour en Krais.

Ma emen pahn pilada en kamehlele irail akan me kin uhong, ong ngehi, e wia, mehlahn pali ngehn. Ma I pahn kamehlele irail, I pahn kamehlele iren madamadau kei me sohte mehlel. Pwehn kapatahieng, I pahn anahne en pohnsehse 11 kadehdehpen,³ irail soun kadehdeh meh ehk emeno, mendahte emen emen irail arail mehleliong arail kadehdeh lau lel imwio; I pahn pil anahne soikala padahk mehlel koaros nan tehn pwuhk sarawi wet koaros me pwung oh mehlel; I pil pahn anahne en soikala me tohtohn aramas, iangahki pein ngehi, karanialahr Koht sang ni aht wadek pwuhk wet sang pwuhk teikan, oh me keieu, I pahn anahne soikala mwenginingin en Ngehn Sarawio ohng ngehi. Soahng pwukat koaros pahn udahn weksang soahng koaros mei ese me mehlel.

Emen kempoakepahi men me mwahu oh loalokong sohla iang mwomwohdishot uwen ansou ieu. E ahpwte ndahdo duwen ah pwurodo nan mwomwohdisoht. E kosoia, “Udahno, I kin men Pwuken Mormon en kahmehleliong ie ni paodoapoad, mwomwe, mahsen, oh tiahk. Ahpw ansou mei wekidehng ahi madamadau ongete dahme e padahk ki me pid duwen rongamwahu en Krais oh Sapwelime doadoahk en komouralahu, I tepida alehdi kadehdehpen mehlelpe. Ehu rahno ansou mei wadwadek Pwuken Mormon nan ei perehu, I udhi, ngehi kelepwidi, oh kapakap ni ngidingid oh I kehn ansouo ni sansal me Sahm Nanleng mwenginingin kihong nan salengei ka me Mwomwohdisoht oh Pwuken Mormon udahn mehlel. Erein sounpar siluh-elep- mei pwurehng onopiki Mwomwohdisoht kahreiong ahi kak pwurodo ni mehlel oh mehlel pwehki pwung en Mwomwohdisoht.

Ma emen pahn ahneki ansou mwahu en wadek Pwuken Mormon ni karakarahk oh medewe mwahu, me duwehte kempoakepahio, oh rong kaweid kaselel en Ngehno, E pahn udahn alehdi kadehdeh mehelel me e anahne.

Pwuken Mormon wia ehu Sapwelime kisakis lap ong kitail. E wiahte kedlahs oh mehn perehre—E kin kadarala Mahsen en Koht nan wasahn mahwen pwehn peiki mohngiong en me pwung kan oh wia mehn perepen mehlelo. Nin duwehn Tohn mwomwohdisoht kei, kitail sohte ahnekihte ansou mwahu en doare Pwuken Mowrmon ahpw en pil doadoahngki—pwehn padahngki ni manaman duwen padahk pwung kan oh kadehdehki duwehn mehelel pen Sises Krais.

I wia ahi kadehdeh kehlail me Pwuken Mormon kawehwehdier sang ni manaman oh kisakis en Koht. E wia Sapwelimen Koht mehn kadehdeh pen mehlel en Sises Krais, pwukoahn soukohp en Joseph Smith, oh udahn mehlel pen Mwomwohdisoht. I kasik me e pahn wiahla takai pwukokeimw en atail kadehdeh, pwe kitail en pil kak iang duehte kosoiepen mehn Lamanite kan, Irail “Sothe pwurehng pwupwila” (Alma 23:6). Ni mwaren Sises Krais, amen.