Tį’ T’áá ániit’é Náás Yiikáh
Shí díí ntsáo áłah áleehgi bee ha’íisdzi’ii áłahjį’ naníłkááh—azhą́ dikwíidi shį́į́—nléí hastąą nídeezidjį’.
Ayóó ánhiinish’ní shik’is dóó shilá, nihí díí áłah áleeh kónzahdi ałhínaanéiikaihígíí alch’į’ ándeilnééh, shí nihíisháahgo Bóhólníihii kojóó dóó nihi diisná’ii baa áhééh nísin. Sin danizhóní dóó bee ha’óní. Doo bee ha’íisdzi’ii t’óó bee ak’idadíitąą da, ndi iiná łáhgo-ádayiilaa!
Baa hóniidzą́ągo ałhíikaigo ánii Áłtsé Dah Naheeztą́nii bee lą́ naada’siidlíí’. Naaki hastói ayóó át’ée Naakits’áadah Bá Naazį́įjį’ yidii’áázh. Dóó ánii tseebíigo Ntsáo Tsosts’ídiin Bidáhólníihgo ádabi’diilyaa.
K’ad sin nihił danlį́į bii’ baa halne’go binináadeilnish, nihí dantáhii, dóó nihaa deet’ą́nii bee náás yiikáh:
Tį’ t’áá ániit’é Bóhólníihii bínaanish bindéilnish,
Áko iiná niníti’di dah niha’doolyééł;
T’áá ákot’éii bidááh bééshhał neitín,
T’áá ákot’éii bibééshhał.
Doo ił yee’góó, ana’á aayidlóh ndi;
Ádołtł’is, Bóhólníihii ga’ nihich’íjí.
Nihí doo tsi’ naakáii deiyí silts’ą́ą’ da,
Ndi Bóhólníihii t’éí bik’eh hwiil’į́.1
Shí díí ntsáo áłah áleehgi bee ha’íisdzi’ii áłahjį’ naníłkááh—azhą́ dikwíidi shį́į́—nléí hastąą nídeezidjį’. Díí bee ha’íisdzi’ii hazhó’ó nół’į́įgo nihighan góne’ tł’ée’go ałhinóohkahgi, yá’at’ééh hane’íi bee bił dahółne’, bił danhighan dóó danhik’is bił baa yádaałti’, dóó azhą́ nááná łáhjí da’oodlánii bił, dine t’áá ahayói ya’átéehgo deiyíkahígíí díí áłah áleehgi bee na’neestą́’ii ayóó íínóh’níigo yee dah didookáh. Dóó hazhó’ó ak’eh honíł’į́ diilééł díí bee nilníihgo dóó díidi naaki yiską́ąjį’ nidiyíis’na’ii baa tsínáhidikéés.
Díí Ntsáo Áłah Áleeh yee’ ánii íł na’ánish bił hahóóyá. Bóhólníihii hait’áo ahił néiinishgo bee ałhaa’áhwiilyą́nii hasht’éyiiláá. Shiláhkéí dóó shik’iské—sąní dóó noosélí—lá ániidíí yee áłká anájah doo, Diyinii yee. Eldir dah yikáhii dabitse’go hastói, sáanii, dóó áłchíní nihokáá’góó be’íina’ bik’idáhozhdoodlííł. Sáanii Dah yikáhii shiláh lá t’áá íł nidáalnish dóó ayóó’áda’ó’nóo, ch’ikéii yił dahooghangóó yił áłnáá daakáh doo.
Nihokáá’ dine’é hane’ doo nantł’áh dóó aanínii bee bił dahwíilne’: nihí Diyin God ba’áłchíní t’áa ałtso na’níbaal ałch’idę́ę́’ Yisda’iiníiłii baa nánohkááh dabidíi’ní, Bóhólníihii Bighandóó bee nihik’idáhozhdoodlííł, nee’níjį’ iłhóshǫ, dóó hool’áágóó iiná ałtso biká hasht’edidii’nííł.2
Náasdi bee hadiníilt’é diidleełíí t’áá áłtsojį’ k’ad bee aha’da’díist’ąníí dóó bee áda’al’į́į nléí Bóhólníihii bíghan biyi’ nihaa daheesyá. Díí hoolzhíshdi, nihí 159 Diyin Bighan chodáo’į́, dóó łą́ągo éiyá ánaadaalnééh. Nihí dine sodizin bighanjí yihidíikaii t’áá ahángóó Diyin Bighan bá nidei’nil. Áko nihí tsosts’íd Diyin Bighan nináá danii’nííł. Éiidi Diyin Bighan lá: Salta, Argentina; Bengaluru, India; Managua, Nicaragua; Cagayan de Oro, Philippines; Layton, Utah; Richmond, Virginia; dóó ła’ kin dah shijáa’ii t’ahdoo bééhoozį́įh da, nléí Russia biyi’di.
Shik’is dóó shiláh shił danóhłį́į, díidi Diyin bighan ádaalnéhii dah doo she’íina’ łáhgo íidoodíił da, ndi ákone’ naanish ół’įnígíí ákon hidoolííł. Eíí óohdzaago, bee nihik’íjishdlííh t’áa doole’é ats’ádidooht’áałgo bíghangóó áłahjį’ ałnánáhdáah doo. Bee nihik’íjisdlííh nihighan góne’ ayóó ałhił adáałnish dóó ayóó ada’ahíínóh’ní dóó hool’áágóó ahił danhighan dooígíí bąą ałháádasohti’. Bee nihik’íjishdlííh Bóhólníihii Jesus Christ deinóhdlanígíí ąą dínoot’į́į́ł dóó t’áá aaníí bee hazhó’ó bikéé’ wóhkah dooleeł.
Bee nihik’íjishdlííh nihinéé’ bee aanínii bee yáłti’, dishníngi át’áo, nihí eíí Diyin God Ayóó’át’éi bá náanish íilnííł! Jesus lá Christ nilį́. Díí lá BiSodízin Bá Hooghan níh, jó dayiisį́’ígíí yinahjį’ yiyóółwoł. Ts’ídá akot’é dishní, t’ááła’í noozíngo ayóó ánhiinish’ní, bízhi’ baa hasti’ígíí bee Jesus Christ, áámen.