Ministrá manera e Salbador ta Hasi

Ki bendishon maravioso ku nos ta biba den un temporada di revelashon kontinuó for di Dios! Ora nos ta wak pa dilanti na i brasa e restitushon di tur kos,¹ kua a bini i lo bai bini dor di eventonan profetisá di nos tempu, nos ta wòrdu prepará pa Señor Su Di Dos Benida.²

I ki manera mas miho pa prepará pa topa ku n’E ku pa trata di bira manera E dor di amorosamente ministrando un nan otro! Manera Jesu Cristo a siña Su siguidónan na e komienso di e dispensashon aki, si nos ta stim’E nos lo sirbi’E.³ Nos sirbishi na otronan ta un demonstrashon di ta un disipel i nos gratitut i amor pa Dios i Su Yu, Jesu Cristo.

Tin biaha nos ta pensa ku nos tin pa hasi algo grandi i heroíko pa “konta” manera sirbi nos bisiña. Tòg aktonan chikitu di sirbishi por tin un profundo efektu riba otronan—i tambe riba nos mes. Kiko e Salbador a hasi? Dor di Su donnan supernatural di e Ekspiashon i Resurekshon—kuanan nos ta selebrá riba e bunita Djadomingu di Pasku Grandi aki—niun otro tabatin un influensia asina profundo riba tur ku a biba i ku lo ainda biba riba e tera.⁴ Pero E tambe a sonrie na, papia ku, kana ku, skucha na, hasi tempu pa, enkurasha, siña, duna kuminda, i pordoná. E la sirbi famia i amigunan, meskos bisiña i strañero, i a invita asosionan i sernan kerí pa disfruta bendishonnan riku di Su evangelio. E “simpel” aktunan di sirbishi i amor ei ta proveé un ehempel pa nos ministerio awe.

Ora bo tin e privilegio pa representá e Salbador den bo esfuersonan ministradó, puntra bo mes, “Kon mi por kompartí e lus di e evangelio ku e persona òf famia aki? Kiko e Spiritu ta inspirá mi pa hasi?”

Ministrá por wòrdu hasi den un gran variedat di maneranan individual. Asina kiko e ta mustra manera?

Ministrá ta mustra manera presidensianan di e quorum di eldernan i Sosiedat di Sokoro konsehá huntu den orashon tokante asignashonnan. En bes di lídernan djis duna pidanan di papel, e ta mustra manera konsehá tokante personanan individual i famianan den persona ora asignashonnan ta wòrdu duná pa rumannan ku ta ministrá. E ta mustra manera bai riba un kaminata, bini huntu pa un anochi di wega, ofresé sirbishi, òf asta sirbi huntu. E ta mustra manera bishita den persona òf papia na telefon òf papia riba internet òf manda un tèkst. E ta mustra manera entregá un karchi di hasi aña i animá na un wega di futból. E ta mustra manera komparti un skritura òf un sita di un diskurso di konferensia ku lo por tin nifikashon pa e persona ei. E ta mustra manera palabrá un pregunta di evangelio i kompartí testimonio pa trese klaridat i pas. E ta mustra manera bira parti di un hende su bida i wak pa nan. E tambe ta mustra manera un entrevista ministradó den kua nesesidatnan i forsanan ta wòrdu diskuti delikadamente i apropiadamente. E ta mustra manera e konsilio di bario ta organisá pa yuda ku un nesesidat mas grandi.

E manera di ministerio aki a fortalese un ruman kende a muda leu for di su hogar ora su kasa a kuminsa universidat. Ku niun telefon ku tabata traha i un baby chikitu pa kuida, e la sinti desorientá den un lugar nobo, totalmente perdi i su so. Sin notifikashon di antemano, un ruman di Sosiedat di Sokoro a bini na e porta pa trese un par di sapatu chikitu pa e baby, pone e dos di nan den auto, i a tuma nan pa buska un supermerkado. E ruman gradisido a konta, “E tabata mi linea di bida!”

Berdadero ministerio ta wòrdu illustrá pa un ruman mayor na Afrika kende a wòrdu asigná pa buska un otro ruman ku no a bini reunionnan di iglesia pa un tempu largu. Ora e la bai na e kas di e ruman, e la haña e muhé a wòrdu batí i robá, no tabatin mucho pa komé, i no tabatin paña ku e la sinti apropiá pa reunionnan di Iglesia riba Djiadomingu. E muhé asigná pa ministra na dj’e a trese un orea skuchadó, berdura di su hardin, skirturanan pa lesa, i amistat. E ruman “ousente” a bolbe na iglesia pronto i awor tin un yamamentu pasobra e sa e ta wòrdu stimá i valorá.

Kombiná esfuersonan di Sosiedat di Sokoro asina ku e awor nobo strukturá quorum di eldernan lo trese un unidat ku por resultá den resultadonan asombroso. Ministerio ta bira un esfuerso kordiná pa kumpli e deber di saserdosio pa “bishita e kas di kada miembro” i pa “wak over di e iglesia semper, i ta ku nan i fortalese nan,”⁵ i tambe pa logra e proposito di e Sosiedat di Sokoro pa yuda otronan prepara pa e bendishonnan di bida eterno.⁶ Trahando huntu bao di direkshon di e obispo, e presidensianan di quorum di eldernan i Sosiedat di Sokoro por wòrdu inspirá ora nan ta buska e miho maneranan pa wak over i pa kuida kada individuo i famia.

Laga mi duna boso un ehempel. Un mama a wòrdu diagnostika ku kanser. E la kuminsa tratamentu di biaha, i imediatamente e rumannan di Sosiedat di Sokoro a kuminsa traha, planifikando kon pa miho yuda ku kumindanan, transportashon pa sitanan medikal, i otro apoyo. Nan a bishit’e regularmente, proveéndo kompañerismo animá. Na e mes un tempu, e quorum di Saserdosio Melkisedek a bula den akshon. Nan a proveé labor pa pone un kamber i baño remodelá aserka pa hasi’e mas fasil pa kuida e ruman malu. E hòmbernan yòn a duna nan man i lombanan pa partisipa den e esfuerso nifikante ei. I e muhénan yòn a bira envolvi: nan a organisa ku animo pa kana e kacho kada dia fielmente. Ku tempu, e bario a kontinua nan sirbishi, poniendo aserka i adaptando unda tabatin mester. E tabata klaramente un obra di amor, kada miembro a duna di su mes, unifikadamente mustrando kuida den maneranan individual ku a bendishona no solamente e ruman sufriendo pero kada miembro di su famia.

Despues di un esfuerso valioso, e ruman a finalmente sukumbí na e kanser i a wòrdu poní pa sosega na pas. E bario a hala un rosea di alivio i a konsiderá e trabao bon hasí i kompletu? No, e muhénan yòn ta kontinuá kana e kacho kada dia, e quorumnan di saserdosio ta kontinuá pa ministrá na e tata i e famia, i e rumannan di e Sosiedat di Sokoro ta kontinuá pa ekstende man den amor pa konstatá forsanan i nesesidatnan. Rumannan, esaki ta kiko nifiká ministrá—esaki ta stimá manera e Salbador ta hasi!

Un otro bendishon di e anunsionan inspirá aki ta e oportunidat pa muhénan yòn di edat 14 pa 18 pa partisipá den e ministerio manera kompañeronan na rumannan di Sosiedat di Sokoro, meskos ku hòmbernan yòn ta sirbi manera kompañeronan ministradó na rumannan di Saserdosio Melkisidek. Hobennan por komparti nan donnan uniko i krese spiritualmente ora nan ta sirbi banda di hende adulto den e obra di salbashon. Envolviendo hobennan den asignashonnan ministradó tambe por aumenta e alkanse di Sosiedat di Sokoro i quorumnan di eldernan nan kuido di otronan dor di aumenta e number di miembronan ku ta partisipá.

Ora mi ta pensa riba e muhénan yòn estelar mi konose, mi ta bira eksitá pa e rumannan di Sosiedat di Sokoro kendenan lo tin e privilegio pa wòrdu bendishoná pa un muhé yòn su entusiasmo, talento, i sensibilidat spiritual ora nan ta sirbi banda di otro òf ta wòrdu ministrá na nan dor di dj’e. I mi ta igualmente deleitá pa e chèns muhénan yòn lo tin pa wòrdu siñá i fortalesé di nan rumannan den Sosiedat di Sokoro. E oportunidat aki pa partisipá den e edifikashon di e reino di Dios lo ta un tremendo benefisio pa muhénan yòn, yudando nan pa prepara miho pa kumpli nan rolnan manera lídernan den e Iglesia i den e komunidat i manera kompañeronan kontributiendo den nan famianan. Manera Ruman Bonnie L. Oscarson a komparti ayera, muhénan yòn “kier ta di sirbishi. Nan mester sa ku nan ta wòrdu valorá i ta esenshal den e obra di salbashon.”⁷

Di echo, muhénan yòn ta ministrándo na otronan kaba, sin asignashon òf fanfaria. Un famia mi konose a muda shennan di mianan na un lugar nobo unda nan no tabata konose niun hende. Den e prome siman, un mucha muhé di 14 aña di nan bario nobo a bini na nan porta ku un tayo di kuki, dunando nan un bon bini den e area. Su mama a para sonriendo tras di dj’e manera un chofeur dispuesto, apoyando su yu muhé su deseo pa ministrá.

Un otro mama tabata preokupà un dia ku su yu muhé di 16 aña no tabata na kas na e ora usual. Ora e mucha muhé finalmente a yega kas, su mama a puntr’e ku algun frustrashon tokante unda e tabata ta. E mucha muhé kasi sintiendo bergwensa a kontesta ku e la tuma un flor na e biuda ku tabata biba serka. E la ripará ku e ruman mayor a parse su so i a sinti inspirá pa bishit’e. Ku su mama su aprobashon, e muhé yòn a kontinuá pa bishitá e muhé di edat. Nan a bira bon amiganan, i nan amistat dushi a kontinuá pa añanan.

Kada un di e muhénan yòn aki, i hopi mas manera nan, ta ripará un hende su nesesidat i ta traha pa kumpli’e. Muhénan yòn tin un deseo natural pa kuida i komparti ku por wòrdu bon dirigí dor di ministrá den kompañerismo ku un ruman adulto.

No importa nos edat, ora nos ta konsidera kon pa ministrá mas efektivamente, nos ta puntra, “Kiko e mester?” Konektando e pregunta ei ku un sinsero deseo pa sirbi, nos e ora ta wòrdu guiá pa e Spiritu pa hasi loke lo lanta i fortalese e individuo. Mi a tende storianan sin konta di rumannan ku a wòrdu bendishona pa un simpel aktu di inklushon i bon bini na iglesia, un email òf tekst atentivo, un kontaktu personal na un temporada difisil, un invitashon pa partisipa den un aktividat di grupo, òf un oferta di yuda ku un situashon duru. Mayornan soltero, kombersonan nobo, miembronan menos aktivo, biudanan i biudonan, òf hobennan luchando por mester atenshon ekstra i yudansa ku prioridat di rumannan ministradó. Kordinashon entre e quorum di eldernan i e presidensianan di Sosiedat di Sokoro ta permiti pa djis e korekto asignashon por wòrdu hasi.

Despues di ku tur kos a wòrdu bisá, ministerio berdadero ta wòrdu kumpli un pa un ku amor manera motivashon. E valor i mérito i maravia di sinsero ministerio ta ku e ta berdaderamente kambia bidanan! Ora nos kurasonnan ta habrí i dispuesto pa stima i inkluí, enkurashá i konsolá, e poder di nos ministerio lo ta iresistibel. Ku amor manera e motivashon, milagernan lo pasa, i nos lo haña maneranan pa trese nos rumannan “ousente” dentro e brasa tur-inklusivo di e evangelio di Jesu Cristo.

E Salbador ta nos ehempel den tur kos—no solamente den kiko nos mester hasi pero dikon nos mester hasi’e. ⁸Su bida riba tera tabata un invitashon pa nos—pa lanta nos vista un tiki mas halto, pa lubida nos mes problemanan i pa ekstende man na otronan.⁹Manera nos ta aksepta e oportunidat pa ministrá ku henter kurason pa nos rumannan, nos ta wòrdu bendishoná pa bira mas spiritualmente refiná, mas den tono ku e voluntat di Dios, i mas kapas di komprende Su plan pa yuda kada uno bolbe bèk serka dj’E. Nos lo mas dispuestamente rekonose Su bendishonnan i ta anheloso pa ekstende e bendishonnan ei na otronan. Nos kurasonnan lo kanta den un solo stem:

Laga nos mustrá nos gratitut i amor pa Dios dor di ministrá ku amor na nos eterno rumannan.¹¹ E resultado lo ta un unidat di sintimentu asina manera e hende na Merka ansiano a gosá 100 aña despues e Salbador su aparensia den nan pais.

“Awor a sosodé ku no tabatin kontenshon … pa motibu di e amor di Dios ku tabata biba den e kurason di e pueblo.

“… no tabatin envidianan, ni pleitamentu, … i sigur no por tin un pueblo mas felis entre tur e pueblonan ku a wòrdu kreá pa e man di Dios.”¹²

Mi ta gustosamente duna mi testigu personal ku e kambionan reveladó aki ta inspirá di Dios i ku, ora nos ta brasa nan ku un kurason dispuesto, nos lo bira miho prepara pa topa Su Yu, Jesu Cristo, na Su benida. Nos lo ta mas serka di bira un pueblo di Sion i lo sinti inmenso goso ku esnan kende nos a yuda riba e kaminda di ta un disipel. Ku nos ta hasi esei ta mi orashon ferviente i humilde den e nòmber di Jesu Cristo, amen.