អ្វីដែលអ្នកកាន់បព្វជិតភាពគ្រប់រូបចាំបាច់ត្រូវយល់ដឹង
ការតែងតាំងបព្វជិតភាពអើរ៉ុនរបស់អ្នកគឺសំខាន់ដើម្បីជួយដល់បុត្រាបុត្រីរបស់ព្រះទទួលបានអំណាចដង្វាយធួនរបស់ព្រះគ្រីស្ទ ។
បងប្អូនប្រុស វាជាឯកសិទ្ធិមួយដើម្បីនៅជាមួយបងប្អូនក្នុងសន្និសីទជាប្រវត្តិសាស្ត្រនេះ ។ នៅពេលខ្ញុំជាប្រធានបេសកកម្មថ្មីមួយរូប ខ្ញុំរំភើបចិត្តដើម្បីទទួលក្រុមទីមួយនៃអ្នកផ្សព្វផ្សាយសាសនាថ្មីរបស់យើង ។ អ្នកផ្សព្វផ្សាយសាសនាដែលកាន់តែមានបទពិសោធន៍មួយចំនួនរបស់យើងត្រូវបានរៀបចំសម្រាប់ការប្រជុំខ្លីៗជាមួយពួកគេ ។ ខ្ញុំបានកត់សម្គាល់ឃើញថា ពួកគេបានរៀបចំកៅអីសម្រាប់កុមារជារាងពាក់កណ្តាលរង្វង់ ។
ខ្ញុំបានសួរ ។ « ហេតុអ្វីក៏ដាក់កៅអីកុមារដូច្នេះ ? »
ពួកអ្នកផ្សព្វផ្សាយសាសនានោះ បាននិយាយទាំងអៀនប្រៀនថា « សម្រាប់អ្នកផ្សព្វផ្សាយសាសនាថ្មី » ។
ខ្ញុំជឿលើរបៀបដែលយើងមើលទៅអ្នកដទៃថា សំខាន់ វាជះឥទ្ធិពលដល់គោលគំនិតរបស់ពួកគេថាជានរណា និងអ្វីដែលពួកគេអាចប្រែក្លាយ ។១ អ្នកផ្សព្វផ្សាយសាសនាថ្មីរបស់យើងបានអង្គុយលើកៅអីមនុស្សធំនៅថ្ងៃនោះ ។
ជាការប្រៀបធៀប ពេលខ្លះ ខ្ញុំខ្លាចថាយើងឲ្យកៅអីកុមារទៅដល់យុវជនបព្វជិតភាពអើរ៉ុនរបស់យើងអង្គុយ ជាជាងជួយពួកគេមើលឃើញថា ព្រះបានប្រទាននូវការទុកចិត្តដ៏ពិសិដ្ឋមួយទៅលើពួកគេ ហើយមានកិច្ចការសំខាន់មួយដើម្បីធ្វើ ។
ប្រធាន ថូម៉ាស អេស ម៉នសុន បានទូន្មានយើងថា យុវជនចាំបាច់ត្រូវយល់ដឹងថា « តើវាមានអត្ថន័យយ៉ាងណា…ដើម្បីធ្វើជាអ្នកកាន់បព្វជិតភាពរបស់ព្រះ ។ ពួកគេចាំបាច់ត្រូវបានដឹកនាំទៅរកការយល់ដឹងពេញលេញខាងវិញ្ញាណអំពីភាពពិសិដ្ឋនៃការហៅដែលបានតែងតាំងរបស់ពួកគេនោះ » ។២
ថ្ងៃនេះ ខ្ញុំអធិស្ឋានសូមឲ្យព្រះវិញ្ញាណបរិសុទ្ធនឹងដឹកនាំយើងឲ្យមានការយល់ដឹងកាន់តែទូលំទូលាយអំពីអំណាច និងភាពពិសិដ្ឋនៃបព្វជិតភាពអើរ៉ុន ហើយបំផុសគំនិតពួកយើងឲ្យផ្ដោតកាន់តែឧស្សាហ៍ព្យាយាមទៅលើកាតព្វកិច្ចបព្វជិតភាពរបស់យើង ។ សារលិខិតរបស់ខ្ញុំគឺសម្រាប់អ្នកកាន់បព្វជិតភាពអើរ៉ុនទាំងអស់ រួមទាំងអ្នកដែលកាន់បព្វជិតភាពមិលគីស្សាដែកផងដែរ ។
អែលឌើរ ឌេល ជី រេនឡាន់ បានបង្រៀនថា គោលបំណងនៃបព្វជិតភាព គឺត្រូវផ្ដល់លទ្ធភាពដល់បុត្រាបុត្រីរបស់ព្រះទទួលបានអំណាចដង្វាយធួនរបស់ព្រះយេស៊ូវគ្រីស្ទ ។៣ ដើម្បីទទួលបានអំណាចដង្វាយធួនរបស់ព្រះគ្រីស្ទនៅក្នុងជីវិតរបស់យើង យើងត្រូវជឿទៅលើទ្រង់ ប្រែចិត្តពីអំពើបាបរបស់យើង ចុះ ហើយរក្សាសេចក្ដីសញ្ញាតាមរយៈពិធីបរិសុទ្ធទាំងឡាយ ហើយទទួលបានព្រះវិញ្ញាណបរិសុទ្ធ ។៤ ទាំងនេះពុំមែនជាគោលការណ៍ដែលយើងចូលរួមតែម្ដងនោះទេ ប៉ុន្តែវាដំណើរការរួមគ្នា ពង្រឹង ហើយស្ថាបនាលើគ្នាទៅវិញទៅមកនៅក្នុងដំណើរការជាបន្ដបន្ទាប់នៃការរីកចម្រើនឆ្ពោះទៅ « រកព្រះគ្រីស្ទ ហើយឲ្យល្អឥតខ្ចោះក្នុងទ្រង់ចុះ » ។៥
ដូច្នេះ តើតួនាទីបព្វជិតភាពអើរ៉ុននៅក្នុងកិច្ចការនេះជាអ្វី ? តើវាជួយយើងទទួលបានលទ្ធភាពដើម្បីទទួលបានអំណាចដង្វាយធួនរបស់ព្រះគ្រីស្ទយ៉ាងដូចម្ដេច ? ខ្ញុំជឿថា ចម្លើយគឺមាននៅក្នុងកូនសោទាំងឡាយនៃបព្វជិតភាពអើរ៉ុន—ជាកូនសោនៃការបម្រើរបស់ពួកទេវតា និងនៃដំណឹងល្អនៃការរៀបចំខ្លួន ។៦
ការបម្រើនៃពួកទេវតា
សូមចាប់ផ្ដើមជាមួយនឹងទិដ្ឋភាពមួយនៃការបម្រើនៃពួកទេវតា ។ ពីមុនបុត្រាបុត្រីរបស់ព្រះអាចមានសេចក្ដីជំនឿលើព្រះយេស៊ូវគ្រីស្ទ ពួកគេចាំបាច់ត្រូវស្គាល់ទ្រង់ និងបង្រៀនពីដំណឹងល្អរបស់ទ្រង់ ។ ដូចសាវកប៉ុលបានមានប្រសាសន៍ថា ៖
« ដូច្នេះ បើគេមិនជឿ ធ្វើដូចម្តេចឲ្យគេអំពាវនាវដល់ព្រះបាន ហើយបើគេមិនបានឮនិយាយ នោះធ្វើដូចម្តេចឲ្យគេជឿដល់ព្រះបាន ហើយធ្វើដូចម្តេចឲ្យគេឮនិយាយបាន បើគ្មានអ្នកណាប្រាប់សោះ ?
ធ្វើដូចម្តេចឲ្យមានអ្នកណាប្រាប់បាន លើកតែមានអ្នកណាចាត់ឲ្យគេទៅ ?…
ដូច្នេះ សេចក្តីជំនឿកើតឡើងដោយឮ ហើយដែលឮនោះ គឺដោយសារព្រះបន្ទូលនៃព្រះ » ។៧
ចាប់តាំងពីដើមដំបូងមក ព្រះ « បានចាត់ឲ្យពួកទេវតា មកធ្វើការងារបម្រើដល់កូនចៅមនុស្ស គឺដើម្បីមកសម្ដែងឲ្យដឹងអំពីការយាងមកនៃព្រះគ្រីស្ទ… » ។៨ ពួកទេវតាគឺជាតួអង្គសួគ៌ាដែលថែ្លងពីសារលិខិតរបស់ព្រះ ។៩ ទាំងនៅក្នុងភាសាហេព្រើរ និងភាសាក្រិក ពាក្យឬសនៃ ទេវតា គឺជា « អ្នកបញ្ជូនសារ » ។១០
វាស្រដៀងគ្នានឹងពួកទេវតាគឺជាសារទូតដែលមានសិទ្ធិអនុញ្ញាតដែលបានបញ្ជូនដោយព្រះមកប្រកាសពីព្រះបន្ទូលរបស់ទ្រង់ ហើយស្ថាបនាសេចក្ដីជំនឿ ពួកយើងដែលកាន់កូនសោបព្វជិតភាព ត្រូវបានតែងតាំងឲ្យ « បង្រៀន និងអញ្ជើញមនុស្សទាំងអស់ឲ្យមកកាន់ព្រះគ្រីស្ទ » ។១១ ដើម្បីផ្សាយដំណឹងល្អគឺជាកាតព្វកិច្ចបព្វជិតភាព ។ ហើយអំណាចដែលមានទាក់ទងនឹងកាតព្វកិច្ចនេះ គឺពុំមែនគ្រាន់តែសម្រាប់ព្យាការី ឬសម្រាប់តែអ្នកផ្សព្វផ្សាយសាសនានោះទេ ។ វាគឺសម្រាប់អ្នក !១២
ដូច្នេះតើយើងទទួលបានអំណាចនេះយ៉ាងដូចម្ដេច ? តើឌីកុនអាយុ ១២ ឆ្នាំ—ឬយើងណាម្នាក់—នាំសេចក្ដីជំនឿទៅលើព្រះគ្រីស្ទចូលទៅក្នុងដួងចិត្តនៃបុត្រាបុត្រីរបស់ព្រះយ៉ាងដូចម្ដេច ? យើងចាប់ផ្ដើមដោយការរក្សាទុកព្រះបន្ទូលរបស់ទ្រង់ ដូច្នេះអំណាចនៃព្រះបន្ទូលនឹងមានក្នុងខ្លួនយើង ។១៣ ទ្រង់បានសន្យាថា បើយើងធ្វើដូច្នោះ នោះយើងនឹងមាន « ព្រះចេស្តានៃព្រះដើម្បីបញ្ចុះបញ្ចូលមនុស្សលោក » ។១៤ វាអាចជាឱកាសដើម្បីបង្រៀននៅក្នុងការប្រជុំកូរ៉ុម ឬចុះសួរសុខទុក្ខផ្ទះរបស់សមាជិកម្នាក់ ។ វាអាចជាអ្វីដែលពុំសូវជាផ្លូវការ ដូចជាការសន្ទនាជាមួយនឹងមិត្ត ឬសមាជិកគ្រួសារ ។ នៅក្នុងស្ថានភាពទាំងនេះណាក៏ដោយ បើយើងបានត្រៀមខ្លួន នោះយើងអាចបង្រៀនដំណឹងល្អតាមរបៀបដែលពួកទេវតាធ្វើ ៖ ដោយព្រះចេស្ដានៃព្រះវិញ្ញាណបរិសុទ្ធ ។១៥
ថ្មីៗនេះ ខ្ញុំបានស្ដាប់ឮយ៉ាកុប ជាអ្នកកាន់បព្វជិតភាពអើរ៉ុននៅ ប៉ាប៉ោ នូវ ហ្គីណេ ថ្លែងទីបន្ទាល់អំពីអំណាចនៃព្រះគម្ពីរមរមន និងរបៀបដែលព្រះគម្ពីរបានជួយគាត់ទប់ទល់នឹងការអាក្រក់ ហើយធ្វើតាមព្រះវិញ្ញាណ ។ ពាក្យសម្ដីរបស់គាត់បានចម្រើនសេចក្ដីជំនឿរបស់ខ្ញុំ និងសេចក្ដីជំនឿរបស់អ្នកដទៃ ។ សេចក្តីជំនឿរបស់ខ្ញុំក៏បានរីកចម្រើនផងដែរ នៅពេលខ្ញុំបានស្ដាប់ឮអ្នកកាន់បព្វជិតភាពអើរ៉ុនបង្រៀន ហើយថ្លែងទីបន្ទាល់នៅក្នុងការប្រជុំក្រុមរបស់ពួកគេ ។
យុវជន បងប្អូនគឺជាសារទូតដែលមានសិទ្ធិអនុញ្ញាត ។ តាមរយៈពាក្យសម្ដី និងសកម្មភាពរបស់បងប្អូន បងប្អូនអាចនាំសេចក្ដីជំនឿទៅលើព្រះគ្រីស្ទចាក់ចូលក្នុងដួងចិត្តបុត្រាបុត្រីរបស់ព្រះ ។១៦ ដូចប្រធាន រ័សុល អិម ណិលសុន បានមានប្រសាសន៍ « អ្នកចាត់ទុកដូចជាទេវតានៃការបម្រើចំពោះពួកគេ » ។១៧
ដំណឹងល្អនៃការរៀបចំខ្លួន
សេចក្តីជំនឿដែលរីកចម្រើនទៅលើព្រះគ្រីស្ទតែងតែដឹកនាំទៅរកបំណងប្រាថ្នាដើម្បីផ្លាស់ប្ដូរ ឬប្រែចិត្ត ។១៨ ដូច្នេះវាច្បាស់ណាស់ថា កូនសោនៃការបម្រើនៃពួកទេវតានឹងមានមកជាមួយនូវកូនសោនៃដំណឹងល្អនៃការរៀបចំខ្លួន « ដំណឹងល្អពីការប្រែចិត្ត និងពីបុណ្យជ្រមុជទឹក និងពីការផ្ដាច់បាប » ។១៩
នៅពេលអ្នកសិក្សាអំពីកាតព្វកិច្ចបព្វជិតភាពអើរ៉ុន អ្នកនឹងឃើញពីការទទួលខុសត្រូវយ៉ាងច្បាស់ដើម្បីអញ្ជើញអ្នកដទៃឲ្យប្រែចិត្ត ហើយកែលម្អឡើង ។២០ នោះពុំមានន័យថា យើងឈរនៅកាច់ជ្រុងផ្លូវស្រែក « ចូរអ្នកប្រែចិត្តឡើង ! » នោះទេ ។ ជាញឹកញាប់ វាមានន័យថា យើងប្រែចិត្ត យើងអភ័យទោស ហើយនៅពេលយើងបម្រើអ្នកដទៃ យើងផ្ដល់សេចក្ដីសង្ឃឹម និងភាពសុខសាន្ដដែលការប្រែចិត្តផ្ដល់មកឲ្យ—ដោយសារយើងមានបទពិសោធន៍ផ្ទាល់ខ្លួន ។
ខ្ញុំបាននៅជាមួយអ្នកកាន់បព្វជិតភាពអើរ៉ុន នៅពេលពួកគេទៅសួរសុខទុក្ខបងប្អូនសមាជិកកូរ៉ុម ។ ខ្ញុំបានឃើញពីដួងចិត្តយកចិត្តទុកដាក់ដោយទន់ភ្លន់របស់ពួកគេ ហើយជួយដល់បងប្អូនប្រុសរបស់ពួកគេឲ្យដឹងពីសេចក្ដីស្រឡាញ់របស់ព្រះ ។ ខ្ញុំស្ដាប់យុវជនម្នាក់ថ្លែងទីបន្ទាល់ទៅកាន់មិត្តគាត់អំពីអំណាចនៃការប្រែចិត្ត ។ នៅពេលគាត់បានធ្វើដូច្នោះ ដួងចិត្តត្រូវបានបន្ទន់ ការតាំងចិត្តត្រូវបានធ្វើឡើង ហើយអំណាចនៃការព្យាបាលរបស់ព្រះគ្រីស្ទបានទទួលដឹង ។
ប្រធាន ហ្គរដុន ប៊ី ហ៊ិងគ្លី បានបង្រៀនថា ៖ « វាគឺជារឿងមួយត្រូវប្រែចិត្ត ។ រឿងមួយទៀតគឺឲ្យអំពើបាបរបស់យើងត្រូវបានផ្ដាច់ចេញ ឬអភ័យទោស ។ អំណាចដើម្បីធ្វើឲ្យរឿងនេះកើតឡើងបាន គឺមាននៅក្នុងបព្វជិតភាពអើរ៉ុន » ។២១ ពិធីបរិសុទ្ធបព្វជិតភាពអើរ៉ុននៃបុណ្យជ្រមុជទឹក និងពិធីសាក្រាម៉ង់ ធ្វើជាសាក្សី និងបំពេញការប្រែចិត្តរបស់យើងសម្រាប់ការផ្តាច់បាប ។២២ ប្រធាន ដាល្លិន អេក អូក បានពន្យល់វាតាមរបៀបនេះថា ៖ « យើងត្រូវបានបញ្ជាឲ្យប្រែចិត្តពីអំពើបាបរបស់យើង ហើយមករកព្រះអម្ចាស់ដោយដួងចិត្តសង្រេង និងវិញ្ញាណទន់ទាប ហើយទទួលទានសាក្រាម៉ង់ ។… នៅពេលយើងរំឭកពីសេចក្ដីសញ្ញានៃពិធីបុណ្យជ្រមុជទឹករបស់យើងតាមវិធីនេះ នោះព្រះអម្ចាស់នឹងរំឭកឥទ្ធិពលនៃការលាងសម្អាតនៃពិធីបុណ្យជ្រមុជទឹករបស់យើង » ។២៣
បងប្អូនប្រុស វាគឺជាឯកសិទ្ធិដ៏ពិសិដ្ឋមួយដើម្បីបម្រើពិធីបរិសុទ្ធទាំងឡាយដែលនាំមកនូវការផ្ដាច់បាបដល់ដួងចិត្តដែលប្រែចិត្តតាមរយៈអំណាចដង្វាយធួនរបស់ព្រះអង្គសង្គ្រោះ ។២៤
ថ្មីៗនេះ គេប្រាប់ខ្ញុំអំពីសង្ឃម្នាក់ដែលមានបញ្ហាក្នុងការប្រសិទ្ធពរសាក្រាម៉ង់ជាលើកទីមួយ ។ នៅពេលគាត់ប្រសិទ្ធពរ ព្រះវិញ្ញាណដ៏មានអានុភាពបានគ្របដណ្ដប់មកលើគាត់ និងក្រុមជំនុំ ។ ក្រោយមកនៅក្នុងការប្រជុំ គាត់បានថ្លែងទីបន្ទាល់ដោយសាមញ្ញ និងច្បាស់លាស់អំពីអំណាចរបស់ព្រះ ដែលគាត់បានទទួលអំឡុងនៃពិធីបរិសុទ្ធនោះ ។
នៅទីក្រុង ស៊ីឌនី អូស្ត្រាលី មានសមាជិកកូរ៉ុមសង្ឃបួននាក់បានជ្រមុជទឹកដល់សមាជិកគ្រួសារ ប៊ូឡុងហ្គោ ។ ម្ដាយរបស់សង្ឃម្នាក់បានរៀបរាប់ប្រាប់ខ្ញុំអំពីរបៀបដែលបទពិសោធន៍នេះមានឥទ្ធិពលប្រកបដោយអំណាចដល់កូនប្រុសនាង ។ ពួកសង្ឃទាំងនេះបានយល់ពីអត្ថន័យ « អ្នកតំណាងរបស់ព្រះយេស៊ូវគ្រីស្ទ » ។២៥
ដូចអ្នកបានដឹងហើយ ឥឡូវពួកសង្ឃអាចធ្វើពិធីបុណ្យជ្រមុជទឹកជំនួសនៅក្នុងព្រះវិហារបរិសុទ្ធ ។ កូនប្រុសអាយុ ១៧ ឆ្នាំរបស់ខ្ញុំ ថ្មីៗនេះបានជ្រមុជទឹកខ្ញុំជំនួសឲ្យជីតាមួយចំនួនរបស់យើង ។ ពួកយើងទាំងពីរនាក់មានអារម្មណ៍ដឹងគុណដ៏ជ្រាលជ្រៅចំពោះបព្វជិតភាពអើរ៉ុន និងឯកសិទ្ធិដើម្បីធ្វើកិច្ចការសម្រាប់សេចក្ដីសង្គ្រោះនៃបុត្រាបុត្រីរបស់ព្រះ ។
យុវជនទាំងឡាយអើយ នៅពេលអ្នកចូលរួមយ៉ាងឧស្សាហ៍ព្យាយាមនៅក្នុងកាតព្វកិច្ចបព្វជិតភាព នោះអ្នកចូលរួមជាមួយនឹងព្រះនៅក្នុងកិច្ចការរបស់ទ្រង់ « ដើម្បីនាំឲ្យមានអមតភាព និងជីវិតដ៏នៅអស់កល្បជានិច្ចដល់មនុស្ស » ។២៦ បទពិសោធន៍ដូចជាបទពិសោធន៍ទាំងនេះបង្កើនបំណងប្រាថ្នារបស់អ្នក ហើយរៀបចំអ្នកទៅបង្រៀនការប្រែចិត្ត និងជ្រមុជទឹកអ្នកប្រែចិត្តជឿក្នុងនាមជាអ្នកផ្សព្វផ្សាយសាសនា ។ វាក៏រៀបចំអ្នកសម្រាប់ការបម្រើពេញមួយជីវិតនៅក្នុងបព្វជិតភាពមិលគីស្សាដែកផងដែរ ។
យ៉ូហាន បាទីស្ទ ជាគំរូរបស់យើង
អ្នកកាន់បព្វជិតភាពអើរ៉ុន យើងមានឯកសិទ្ធិ និងកាតព្វកិច្ចដើម្បីធ្វើជាអ្នកបម្រើជាមួយនឹងយ៉ូហានបាទីស្ទ ។ យ៉ូហានត្ឬូវបានបញ្ជូនមកជាសារទូតដែលមានសិទ្ធិអនុញ្ញាតដើម្បីថ្លែងជាសាក្សីអំពីព្រះគ្រីស្ទ ហើយអញ្ជើញមនុស្សទាំងអស់ឲ្យប្រែចិត្ត ហើយទទួលបុណ្យជ្រមុជទឹក—នោះគឺថាគាត់បានអនុវត្តកូនសោបព្វជិតភាពអើរ៉ុនដែលពួកយើងបានពិភាក្សា ។ យ៉ូហានបានប្រកាសថា « ឯខ្ញុំពិតមែនជាធ្វើបុណ្យជ្រមុជឲ្យអ្នករាល់គ្នាដោយទឹក ពីព្រោះមានសេចក្តីប្រែចិត្ត តែព្រះអង្គដែលយាងមកក្រោយខ្ញុំ ទ្រង់មានអំណាចលើសជាងខ្ញុំទៅទៀត…ព្រះអង្គនោះនឹងធ្វើបុណ្យជ្រមុជឲ្យអ្នករាល់គ្នា ដោយព្រះវិញ្ញាណបរិសុទ្ធ ហើយនិងភ្លើងវិញ » ។២៧
ហេតុដូច្នោះហើយ បព្វជិតភាពអើរ៉ុន ព្រមជាមួយនឹងកូនសោនៃការបម្រើនៃពួកទេវតា និងដំណឹងល្អនៃការរៀបចំខ្លួន បានរៀបចំផ្លូវសម្រាប់បុត្រាបុត្រីរបស់ព្រះទទួលអំណោយទាននៃព្រះវិញ្ញាណបរិសុទ្ធ ជាអំណោយទានដ៏មហិមាបំផុតដែលយើងអាចទទួលបាននៅក្នុងជីវិតនេះ តាមរយៈបព្វជិតភាពមិលគីស្សាដែក ។២៨
ឱជាការអស្ចារ្យណាស់ការទទួលខុសត្រូវដែលព្រះបានប្រទានដល់អ្នកកាន់បព្វជិតភាពអើរ៉ុន !
ការអញ្ជើញ និងការសន្យា
ឪពុកម្ដាយ និងថ្នាក់ដឹកនាំបព្វជិតភាព តើបងប្អូនអាចដឹងពីសារៈសំខាន់នៃការប្រឹក្សារបស់ប្រធាន ម៉នសុនដើម្បីជួយដល់យុវជនឲ្យយល់ថា « តើវាមានអត្ថន័យយ៉ាងណា…ដើម្បីធ្វើជាអ្នកកាន់បព្វជិតភាពរបស់ព្រះ » ? ២៩ ការយល់ដឹង និងការតម្កើងបព្វជិតភាពអើរ៉ុន នឹងរៀបចំពួកគេឲ្យធ្វើជាអ្នកកាន់បព្វជិតភាពអើរ៉ុនស្មោះត្រង់ ជាអ្នកផ្សព្វផ្សាយសាសនាពេញដោយអំណាច និងជាស្វាមី និងឪពុកសុចរិត ។ តាមរយៈការបម្រើរបស់ពួកគេ ពួកគេនឹងយល់ និងដឹងពីភាពពិតនៃអំណាចបព្វជិតភាព ជាអំណាចដើម្បីធ្វើកិច្ចការនៅក្នុងព្រះនាមនៃព្រះគ្រីស្ទសម្រាប់សេចក្ដីសង្គ្រោះនៃបុត្រាបុត្រីរបស់ព្រះ ។
យុវជនទាំងឡាយ ព្រះមានកិច្ចការមួយសម្រាប់អ្នកធ្វើ ។៣០ ការតែងតាំងបព្វជិតភាពអើរ៉ុនរបស់អ្នកគឺសំខាន់ដើម្បីជួយដល់បុត្រាបុត្រីរបស់ទ្រង់ទទួលបានអំណាចដង្វាយធួនរបស់ព្រះគ្រីស្ទ ។ ខ្ញុំសន្យាថា នៅពេលអ្នកដាក់កិច្ចការពិសិដ្ឋទាំងនេះសំខាន់នៅក្នុងជីវិតរបស់អ្នក នោះអ្នកនឹងដឹងពីព្រះចេស្ដានៃព្រះដែលពុំធ្លាប់ដឹងពីមុនមកនោះ ។ អ្នកនឹងយល់ដឹងអំពីអត្តសញ្ញារបស់អ្នកក្នុងនាមជាបុត្រារបស់ព្រះ ដែលបានហៅដោយការហៅដ៏បរិសុទ្ធឲ្យធ្វើកិច្ចការរបស់ទ្រង់ ។ ដូចជាយ៉ូហាន បាទីស្ទ ហើយអ្នកនឹងជួយរៀបចំផ្លូវសម្រាប់ការយាងត្រឡប់មកវិញនៃព្រះរាជបុត្រារបស់ទ្រង់ ។ ខ្ញុំសូមថ្លែងសេចក្ដីពិតទាំងនេះនៅក្នុងព្រះនាមនៃព្រះយេស៊ូវគ្រីស្ទ អាម៉ែន ។