Dak li Jeħtieġ li Jifhem Kull Raġel li Jħaddan is-Saċerdozju Aroniku
L-ordinazzjoni tagħkom fis-Saċerdozju Aroniku hija fil-qofol tal-ħidma tagħna li ngħinu lil ulied Alla jirċievu l-qawwa tal-att tal-fidwa ta’ Kristu.
L-Aħwa, huwa privileġġ għalija li ninsab hawn magħkom f’ din il-konferenza storika. Meta jiena kont għadni kif sirt president tal-missjoni, jien kelli entużjażmu kbir biex nilqa’ l-ewwel grupp ta’ missjunarji ġodda. Ftit mill-missjunarji tagħna b’ aktar esperjenza kienu qed jippreparaw għal laqgħa qasira magħhom. Jiena nnotajt li huma kienu qabdu s-siġġijiet tat-tfal u qegħduhom nofs ċirku.
“Għalfejn poġġejtu s-siġġijiet iż-żgħar?” staqsejthom jiena.
Il-missjunarji, b’ leħen timidu, wieġbu, “Għall-missjunarji l-ġodda.”
Jiena nemmen li l-mod kif aħna nħarsu lejn ħaddieħor iħalli impatt mill-aktar sinifikattiv fuq il-perċezzjoni tagħhom ta’ min huma verament u ta’ x’ kapaċi jsiru.1 Dak inhar il-missjunarji l-ġodda tagħna poġġew bilqiegħda fuq siġġijiet li jpoġġu fuqhom l-adulti.
Xi kultant, nibża’ li lill-ġuvintur tagħna tas-Saċerdozju Aroniku, aħna, b’ mod figurattiv, nagħtuhom siġġijiet tat-tfal biex ipoġġu fuqhom minflok ma nippruvaw ngħinuhom jaraw li Alla lilhom tahom responsabbiltà sagra u ħidma importanti ħafna xi jwettqu.
Il-President Thomas S. Monson qalilna li l-ġuvintur jeħtieġ li jifhmu “xi tfisser … li tkun tħaddan is-saċerdozju ta’ Alla. Jeħtieġ li huma jiġu ggwidati biex ikunu spiritwalment konxji tal-qdusija tas-sejħa li ġew ordnati fiha.”2
Illum jiena nitlob li l-Ispirtu s-Santu jiggwidana lejn għarfien akbar tal-qawwa u l-qdusija tas-Saċerdozju Aroniku u jispirana biex niffokaw b’ aktar diliġenza fuq id-drawwiet tagħna tas-saċerdozju. Il-messaġġ tiegħi hu indirizzat għal dawk kollha li jħaddnu s-saċerdozju Aroniku, inkluż dawk li jħaddnu s-Saċerdozju Melkisedeku.
Il-Presbiteru Dale G. Renlund għallem li l-għan tas-saċerdozju hu li jipprovdi lil ulied Alla aċċess għal-qawwa tal-att tal-fidwa ta’ Ġesù Kristu.3 Biex aħna nirċievu l-qawwa tal-att tal-fidwa ta’ Kristu f’ ħajjitna, jeħtieġ li aħna nemmnu fih, nindmu minn dnubietna, nagħmlu u nżommu ċerti patti sagri permezz ta’ ordinanzi u nirċievu l-Ispirtu s-Santu.4 Dawn mhumiex prinċipji li napplikaw biss darba f’ ħajjitna; pjuttost, huma jaħdmu flimkien, isaħħu lil xulxin u jibnu wieħed fuq l-ieħor fi proċess kontinwu ta’ progressjoni divina biex “nersqu lejn Kristu u nipperfezzjonaw ruħna fih.”5
Għalhekk, x’inhu l-irwol tas-Saċerdozju Aroniku f’ dan kollu? Kif jgħinna niksbu aċċess għall-qawwa tal-att tal-fidwa ta’ Kristu? Jien nemmen li t-tweġiba nsibuha fl-imfietaħ tas-Saċerdozju Aroniku—l-imfietaħ tal-ministeru tal-anġli u tal-evanġelju preparatorju.6
Il-Ministeru tal-Anġli
Ejjew nibdew b’ aspett wieħed tal-ministeru tal-anġli. Qabel ma’ wlied Alla jista’ jkollhom il-fidi f’ Ġesù Kristu, jeħtieġ li l-ewwel huma jkunu jafu dwaru u jiġi mgħallmin l-evanġelju Tiegħu. Kif qal l-Appostlu Pawlu:
“Kif jistgħu jemmnu f’dak li ma semgħux bih? Kif jistgħu jisimgħu jekk ma jxandrulhomx?
“Kif jistgħu jxandrulhom jekk ma jkunux mibgħuta? …
“Il-fidi, mela, tiġi mis-smigħ, u s-smigħ mix-xandir tal-kelma ta’ Kristu.”7
Mill-bidu taż-żminijiet, Alla “bagħat anġli biex jimministraw lil ulied il-bnedmin, biex iħabbru … il-miġja ta’ Kristu.”8 L-anġli huma esseri divini li jwasslu l-messaġġ ta’ Alla.9 Kemm fl-Ebrajk kif ukoll fil-Grieg, il-kelma anġlu tfisser “messaġġier.”10
Bl-istess mod kif l-anġli huma messaġġiera awtorizzati mibgħuta minn Alla biex jiddikjaraw il-kelma Tiegħu u għalhekk jibnu l-fidi, aħna li nħaddnu s-Saċerdozju Aroniku ġejna ordnati biex “ngħallmu u nistiednu lil kulħadd biex jersaq lejn Kristu.”11 Huwa dmir tas-saċerdozju li aħna nxandru l-evanġelju. U l-qawwa marbuta ma’ dan id-dmir mhijiex biss għall-profeti jew saħansitra għall-missjunarji. Hija wkoll għalikom!12
Għalhekk aħna kif nistgħu niksbu din il-qawwa? Kif jista’ djaknu ta’ 12-il sena—jew xi wieħed minna—jwassal il-fidi fi Kristu fil-qlub ta’ wlied Alla? Nibdew billi ngħożżu l-kelma Tiegħu ħalli aħna jkollna fina l-qawwa tagħha.13 Huwa wiegħed li jekk aħna nagħmlu dan, aħna jkollna magħna “il-qawwa ta’ Alla li nikkonvinċu l-bnedmin.”14 Din taf tkun opportunità li aħna ngħallmu f’ xi laqgħa tal-kworum jew waqt żjara f’ xi dar ta’ membru. Taf tkun f’ xi okkażjoni anqas formali, bħal waqt xi konverżazzjoni ma’ xi ħabib jew ma’ xi membru tal-familja. Tkun xi tkun l-okkażjoni, jekk aħna nkunu mħejjijin tajjeb, aħna nkunu nistgħu ngħallmu l-evanġelju kif jgħallmuh l-anġli: bil-qawwa tal-Ispirtu s-Santu.15
M’ilux jiena smajt lil Jacob, wieħed li jħaddan is-Saċerdozju Aroniku ġewwa Papua New Guinea, jixhed dwar il-qawwa tal-Ktieb ta’ Mormon u kif din għenitu jirreżisti l-ħażen u jimxi wara l-Ispirtu. Kliemu kabbar il-fidi tiegħi u l-fidi ta’ ħaddieħor. Il-fidi tiegħi kibret ukoll hekk kif jiena smajt ġuvintur li jħaddnu s-Saċerdozju Aroniku jgħallmu u jixhdu waqt il-laqgħat tal-kworum tagħhom.
Intom il-ġuvintur, intom messaġġiera awtorizzati. Permezz ta’ kliemkom u għemilkom, intom tistgħu twasslu l-fidi fi Kristu fi qlub ulied Alla.16 Kif qal il-President Russell M. Nelson, “Intom tkunu għalihom anġli li jimministrawlhom.”17
L-Evanġelju Preparatorju
Fidi akbar fi Kristu dejjem twassal għal xewqa biex aħna ninbidlu jew nindmu.18 Għalhekk hija ħaġa loġika li l-muftieħ tal-ministeru tal-anġli jkun akkumpanjat mill-muftieħ tal-evanġelju preparatorju, “l-evanġelju tal-indiema u tal-magħmudija u tal-maħfra tad-dnubiet.”19
Hekk kif intom tistudjaw id-dmirijiet tagħkom tas-Saċerdozju Aroniku, intom taraw kmand ċar li għandkom tistiednu lill-oħrajn biex jindmu u jibdew mexjin ‘il quddiem.20 Dan ma jfissirx li aħna nieqfu f’ xi kantuniera fit-triq u nibdew ngħajtu, “Indmu!” Ħafna drabi, ikun ifisser li nkunu aħna stess li nindmu, aħna li stess naħfru u hekk kif aħna nimministraw lil ħaddieħor, aħna noffru t-tama u l-paċi li ġġib magħha l-indiema—u dan għaliex inkunu esperjenzajnieha aħna stess.
Jiena qattajt ħafna ħin ma’ ġuvintur li jħaddnu s-Saċerdozju Aroniku waqt xi żjara tagħhom għand xi membri sħabhom tal-kworum. Jiena stajt nara li b’ għemilhom huma rattbu l-qlub u għenu lil ħuthom iħossu fihom l-imħabba ta’ Alla. Jiena smajt wieħed żagħżugħ jaqsam it-testimonjanza tiegħu ma’ sħabu dwar il-qawwa tal-indiema. Hekk kif huwa għamel dan, sħabu ħassew qalbhom tirtab, bdew juru ċertu impenn u ħassew fihom il-qawwa tal-fejqan ta’ Kristu.
Il-President Gordon B. Hinckley għallem: “Li tindem hija ħaġa. Li niġu meħlusin u maħfura minn dnubietna hija ħaġa oħra.Il-qawwa li twassal għal dan tinsab fis-Saċerdozju Aroniku.”21 L-ordinanzi tas-Saċerdozju Aroniku tal-magħmudija u tas-sagrament iwasslu għall-indiema tagħna għall-maħfra tad-dnubiet kif ukoll jagħtu xhieda tagħha.22 Il-President Dallin H. Oaks spjega dan b’ dan il-mod: “Aħna mitlubin nindmu minn dnubietna u nersqu lejn il-Mulej b’ qalb maqsuma u spirtu sogħbien u nieħdu sehem fis-sagrament. … Meta aħna nġeddu l-patt tagħna tal-magħmudija b’ dan l-mod, il-Mulej iġedded fina l-effett tal-magħmudija li jnaddafna.”23
L-Aħwa, huwa privileġġ sagru li aħna nistgħu namministraw ordinanzi li jwasslu l-maħfra tad-dnubiet lil qlub li jindmu permezz tal-qawwa tal-att tal-fidwa tas-Salvatur.24
M’ilux jiena sirt naf dwar wieħed qassis, li kien isibha xi ftit bi tqila biex jesprimi ruħu, li għall-ewwel darba kien se jbierek is-sagrament. Hekk kif huwa għamel dan, kemm hu kif ukoll il-kongregazzjoni ġew maħkumin minn spirtu mill-aktar qawwi.Aktar tard fil-laqgħa, huwa qasam testimonjanza mill-aktar sempliċi iżda ċara tiegħu dwar il-qawwa ta’ Alla li hu ħass waqt dik l-ordinanza.
Ġewwa Sydney, l-Awstralja, erba’ membri tal-kworum tal-qassisin għammdu lil uħud mill-membri tal-familja Mbuelongo. Omm wieħed minn dawn il-qassisin qaltli dwar l-impatt kbir li din l-esperjenza ħalliet fuq binha.Dawn il-qassisin waslu biex bdew jifhmu xi tfisser li tkun “ikkummissjonat minn Ġesù Kristu.”25
Kif tafu, illum qassis jista’ jkun huwa stess li jgħammed bi prokura ġewwa t-tempju. Ibni ta’ 17-il sena m’ilux għammed lili f’ isem uħud mill-antenati tagħna. It-tnejn li aħna ħassejna fina gratitudni mill-aktar profondi għas-Saċerdozju Aroniku u għall-privileġġ li aħna għandna li nistgħu nagħmlu dan għas-salvazzjoni ta’ wlied Alla.
Intom il-ġuvintur, hekk kif b’ diliġenza intom tingaġġaw ruħkom fid-dmirijiet tagħkom tas-saċerdozju, intom tkunu qed tipparteċipaw flimkien ma’ Alla fil-ħidma Tiegħu “li jġib fis-seħħ l-immortalità u l-ħajja eterna tal-bniedem.”26 Esperjenzi bħal dawn ikabbru x-xewqa tagħkom u jħejjukom biex bħala missjunarji intom tgħallmu l-indiema u tgħammdu lil dawk li jikkonvertu. Huma jħejjukom ukoll għal ħajja ta’ servizz fis-Saċerdozju Melkisedeku.
Ġwanni l-Battista, l-Eżempju Tagħna
Aħna, li nħaddnu s-Saċerdozju Aroniku, għandna l-privileġġ u d-dmir li nkunu qaddejja flimkien ma’ Ġwanni l-Battista. Ġwanni ntbagħat bħala messaġġier awtorizzat biex jagħti xhieda ta’ Kristu u biex jistieden lil kulħadd biex jindem u jitgħammed—jiġifieri, huwa eżerċita l-imfietaħ tas-Saċerdozju Aroniku li aħna ddiskutejna. Imbagħad Ġwanni ddikjara, “Jien, ngħid għalija, ngħammidkom bl-ilma għall-indiema; imma min ġej warajja hu aqwa minni … : hu jgħammidkom bl-Ispirtu s-Santu u n-nar.”27
Għalhekk, is-Saċerdozju Aroniku, bl-imfietaħ tal-ministeru tal-anġli u l-evanġelju preparatorju, iħejji t-triq biex ulied Alla jirċievu, permezz tas-Saċerdozju Melkisedeku, id-don tal-Ispirtu s-Santu, l-akbar don li aħna nistgħu nirċievu f’ din il-ħajja.28
X’ responsabbiltà mill-aktar profonda li Alla ta lil dawk li jħaddnu s-Saċerdozju Aroniku!
Stedina u Wegħda
Intom, il-ġenituri u l-mexxejja tas-saċerdozju, intom tagħrfu veramentl-importanza tal-kunsill tal-President Monson li jgħin lill-ġuvintur jifhmu “xi tfisser … li tħaddan is-saċerdozju ta’ Alla”?29 Li huma jifhmu u jkabbru s-Saċerdozju Aroniku iħejjihom biex huma jkunu rġiel li jħaddnu s-Saċerdozju Melkisedeku b’ mod fidil, missjunarji mimlijin qawwa u rġiel miżżewġin u missirijiet twajba.Permezz tas-servizz tagħhom, huma jkunu jistgħu jifhmu u jħossu r-realtà tal-qawwa tas-saċerdozju, il-qawwa li wieħed jaġixxi f’ isem Kristu għas-salvazzjoni ta’ wlied Alla.
Intom il-ġuvintur, Alla għandu ħidma għalikom xi twettqu.30 L-ordinazzjoni tagħkom fis-Saċerdozju Aroniku hija fil-qofol tal-ħidma tagħna biex ngħinu lil ulied Alla jirċievu l-qawwa tal-att tal-fidwa ta’ Kristu. Jiena nwegħidkom li hekk kif intom tpoġġu dawn id-dmirijiet sagri fiċ-ċentru ta’ ħajjitkom, intom tħossu l-qawwa ta’ Alla aktar minn qatt qabel. Intom tibdew tifhmu l-identità tagħkom bħala wlied Alla, imsejħin b’ sejħa qaddisa biex twettqu l-ħidma Tiegħu. U, bħal Ġwanni l-Battista, intom tgħinu tħejju t-triq għall-miġja ta’ Ibnu. Dwar dawn il-veritajiet jiena nixhed f’ isem Ġesu Kristu, amen.