Faapotopoto Faatasi Mea Uma ia Tasi ia Keriso
O le mana o le talalelei a le Faaola e suia ma faamanuia ai i tatou e tafe mai i le iloatino ma le faaaogaina o fesootaiga o ana aoaoga faavae, mataupu faavae, ma faiga masani.
O le maea o se meafaigaluega taua lea ua masani ai i tatou uma. O maea e fai mai fasi manoa o filo, laau, uaea, po o isi mea e milo taitasi pe fili faatasi. O le mea e mata’ina ai, o elemene atonu e le tulagaese e mafai ona lalaga faatasi ma oo ai ina tulagaese le malolosi. O lea, o le faafesootaiina ma le fusia mataalia o ni mea masani e mafai ona gaosi mai ai se meafaigaluega tulagaese.
E pei lava o se maea e maua mai lona malosiaga mai le tele o fasi manoa taitasi e milo faatasi, e faapena foi ona tuuina atu e le talalelei a Iesu Keriso le vaaiga silisili o le upumoni ma ofo atu ai faamanuiaga silisili a’o tatou faalogo atu i le apoapoaiga a Paulo “ina ia [faapotopoto faatasi mea uma ia tasi] ia Keriso, o i latou uma lava o i le lagi, atoa ma i latou o i le lalolagi; [e oo ia te ia lava].”1 O le mea taua, o lenei faapotopotoina taua o le upumoni e totonugalemu ma taulai atu i le Alii o Iesu Keriso ona o Ia “o le ala, o le upumoni, ma le ola.”2
Ou te tatalo ia faamalamalamaina e le Agaga Paia i tatou taitoatasi a o tatou iloiloina le auala e faaaoga ai le mataupu faavae o le [faapotopoto faatasi mea uma ia tasi] ia Keriso i ni auala moni e aoao ma ola ai i Lana talalelei toefuataiina i o tatou olaga i aso taitasi.
O Se Vaitau o Faaaliga
Ua tatou ola i se vaitau ofoofogia o faaaliga o le Ekalesia toefuataiina a Iesu Keriso. O le fetuunaiga faasolopito na faasilasilaina i le asō e na o le tasi lava le faamoemoega autu: ia faamalosia le faatuatua i le Tama Faalelagi ma Lana fuafuaga ma i Lona Alo o Iesu Keriso ma Lana Togiola. O le faatulagaga o sauniga i Aso Sa sa le na o le faapuupuuina. Ae, ua tatou maua nei ni avanoa ma tiutetauave faateleina o ni tagata taitoatasi ma aiga e faaaoga ai o tatou taimi mo le faaleleia o le Sapati o se aso fiafia i le aiga ma i le ekalesia.
Ia Aperila talu ai, o le faatulagaga faalefaalapotopotoga o korama o le perisitua sa le’i suia moni. Ae, o le faamamafa ma le malosiaga na tuu atu i se ala maualuga atu ma paia atu o le auaunaga i o tatou uso ma tuafafine.
E pei lava o fasi manoa ua fili faatasi o se maea e maua ai se meafaigaluega malosi ma anagatā, o nei faatinoga fesootai uma o se vaega o se taumafaiga tuufaatasi ia faaogatusa atili ai le taulaiga, punaoa, ma le galuega a le Ekalesia toefuataiina a le Faaola faatasi ma lana misiona autu: ia fesoasoani i le Atua i Lana galuega e faataunuu le faaolataga ma le faaeaga o Lana fanau. Faamolemole aua ne’i taulai autu atu i vaaiga o le faatulagaga o mea ua faasilasila atu. E le tatau ona tatou faatagaina auiliiliga o faiga faatulagaina e faalavelave ai i mafuaaga autu faaleagaga ua faia e nei suiga i le taimi nei.
O lo matou manao ia faateleina le faatuatua i le fuafuaga a le Tama ma i le misiona togiola a le Faaola i le lalolagi ma ia faamautuina le feagaiga e faavavau a le Atua.3 E na o le pau lava o tatou faamoemoega ia faafaigofieina le liua faifai pea i le Alii ma ia alolofa atili ma le atoatoa ma auauna atu ma le mataalia atili i o tatou uso ma tuafafine.
Tuuvaegaina ma Tuueseeseina
O nisi taimi i le avea ai ma tagata o le Ekalesia tatou te tuuvaega, tuueseese, ma faaaoga le talalelei i o tatou olaga e ala i le fatuina o ni lisi uumi o autu taitasi e suesue ma galuega e faataunuu. Ae o se auala faapena e ono mafai ona tapulaa ai lo tatou malamalama ma le vaaiga mamao. E tatau ona tatou faaeteete ona o le taulaiga faafaresaio i lisi o mea e fai e mafai ona tatou se ese ai mai le faalatalatala atili atu i le Alii.
O le faamoemoega ma le faamamāāga, o le fiafia ma le olioli, ma le liua faifai pea ma le puipuiga e sau mai le “tuu atu o o [tatou] loto i le Atua”4 ma o le “[mauaina] o ona foliga i o [tatou] mata”5 e le mafai ona maua i le na ona faatinoina ma le kolosi ese o mea uma faaleagaga sa tatau ona tatou faia. Ae, o le mana o le talalelei a le Faaola e suia ma faamanuia ai tatou e tafe mai le iloatino ma le faaaogaina o fesootaiga o ana aoaoga faavae, mataupu faavae, ma faiga masani. Ua na o lo tatou faapotopoto faatasi o mea uma ia tasi ia Keriso, faatasi ma se taulaiga mausali ia te Ia, e mafai ai e upumoni o le talalelei ona galulue faatasi e faamalosia i tatou ia avea ma tagata e finagalo le Atua e avea ai i tatou6 ma tumau ai ma le lototoa e oo i le iuga.7
Aoaoina ma le Faafesootaiina o Upumoni o le Talalelei
O le talalelei a Iesu Keriso o se ie lalaga o ata felanulanuai o le upumoni “ua faavaaina lelei”8 ma lalaga faatasi. A o tatou aoao ma faafesootai faatasi ia upumoni faaalia o le talalelei, e faamanuiaina i tatou e maua vaaiga taua ma le malosiaga faateleina faaleagaga e ala i mata e mafai ona vaai i faatosinaga a le Alii i o tatou olaga ma taliga e mafai ona lagonaina Lona siufofoga.9 Ma o le mataupu faavae o le faapotopoto faatasi ia tasi—ia te Ia e mafai ona fesoasoani ia i tatou i le suiga o lisi masani o mea e fai i se vaega atoa tuufaatasi, ma fusia faatasi atoatoa. Se’i o’u tuu atua se faataitaiga faaleaoaoga faavae ma faale-Ekalesia o le mea ua ou fautuaina atu.
Faataitaiga 1. O le mataupu faavae o le faatuatua lona fa o se tasi o faataitaiga silisili o le faapotopotoina faatasi o mea uma ia tasi ia Keriso: “Matou te talitonu o uluai mataupu autu ma sauniga nei o le Talalelei: muamua, Faatuatua i le Alii o Iesu Keriso; o lona lua, Salamo; o lona tolu, Papatisoga e ala i le faatofuina mo le faamagaloga o agasala; o lona fa, Faaeega o lima mo le meaalofa o le Agaga Paia.”10
O le faatuatua moni e taulai atu i le Alii o Iesu Keriso—ia te Ia o le Alo paia ma le Toatasi na Fanaua e le Tama ma ia te Ia ma le misiona togiola na Ia faataunuuina. “Ona ua uma ona tali e ia iuga o le tulafono, ma ua ia i latou uma o e ua faatuatua ia te ia; ma o i latou o e ua faatuatua ia te ia o le a latou piimau i mea lelei uma; o le mea lea ua fautuaina ai e ia le faamoemoe o le fanauga a tagata.”11 O le faatinoina o le faatuaua ia Keriso o le faatuatuaina ma le tuu lea o lo tatou talitonuga maumaututu ia te Ia o lo tatou Faaola, i Lona suafa, ma i Ana folafolaga.
O le taunuuga masani lava ma le muamua o le faatuatuaina o le Faaola o le salamo ma le liliu ese lea mai le leaga. A tatou faatinoina le faatuatua i le Alii, e otometi lava lo tatou liliu mai, o mai, ma faalagolago ia te Ia. O lea, o le salamo o le faatuatuaina ma le faalagolago atu lea i le Togiola e faia mo i tatou mea e le mafai ona tatou faia mo i tatou lava ia. O tatou taitoatasi e tatau ona “[faalagolago] atoa i galuega a ia o lē ua malosi aoao e laveai”12 auā ua na o le “ala atu i galuega, ma le alofa mutimutivale, ma le alofa tunoa o le Mesia Paia”13 e mafai ai ona avea i tatou ma tagata fou ia Keriso14 ma mulimuli ane toefoi atu ai ma nonofo i le afioaga o le Atua.
O le sauniga o le papatisoga e ala i le faatofu mo le faamagaloga o agasala e manaomia ai ona tatou faatuatuaina o Ia, faalagolago ia te Ia, ma mulimuli ia te Ia. Na folafola mai e Nifae, “Ua Ou iloa afai tou te mulimuli i le Alo ma le faamoemoe atoa o le loto, ma lē faia se pepelo ma se faaʼoleʼole i luma o le Atua, ae ma le manatu tonu i ai, ma salamo ia outou agasala, ma molimau atu i le Tamā ua outou loto e ave i o outou luga le suafa o Keriso, i le papatisoga—ioe, i le mulimuli atu lea i lo outou Alii ma lo outou Faaola i lalo i totonu o le vai, e tusa ma lana afioga, faauta, ona outou maua lea o le Agaga Paia; ioe, ona oo mai ai lea o le papatisoga i le afi ma le Agaga Paia.”15
O le sauniga o le faaee atu o lima mo le meaalofa o le Agaga Paia e manaomia ai i tatou ona faatuatuaina o Ia, faalagolago ia te Ia, mulimuli ia te Ia, ma fetaomi atu i luma ia te Ia faatasi ai ma le fesoasoaniga a Lona Agaga Paia. Ma sa tautino mai Nifae, “Ma o lenei … ua ou iloa i lenei mea vagana ai ua tumau le tagata sei oo i le iuga, i le mulimuli lea i le faataitaiga a le Alo o le Atua soifua, e lē mafai ona faaolaina o ia.”16
Ua le na ona faailoaina mai e le mataupu faavae o le faatuatua lona fa o mataupu faavae autu ma sauniga o le talalelei toefuataiina. Ae, o lenei faamatalaga musuia o talitonuga ua faapotopoto faatasi ai mea uma ia tasi ia Keriso: faatuatuaina o Ia, faalagolago ia te Ia, mulimuli ia te Ia, ma le fetaomi atu i luma faatasi ma Ia—ia te Ia.
Faataitaiga 2. Ou te fia faamatala atu nei pe faapefea ona faapotopoto faatasi polokalama uma ma galuega ta’imua a le Ekalesia ia tasi ia Keriso. E tele mau faataitaiga e mafai ona tuu atu; ae o le a ou faaaogaina na o ni nai mea ua filifilia.
I le 1978, sa faatonuina ai e Peresitene Spencer W. Kimball tagata o le Ekalesia ia atiae le malosiaga o Siona i le lalolagi atoa. Sa ia fautuaina le Au Paia ia nonofo pea i o latou lava atunuu moni ma atiae ai ni siteki malolosi e ala i le faapotopotoina o le aiga o le Atua ma aoao i latou i ala o le Alii. Sa ia toe faailoa mai foi o le a fausiaina nisi malumalu ma folafola mai faamanuiaga mo le Au Paia po o fea lava o nonofo ai i le lalolagi.17
A o faateleina ai le aofai o siteki, sa faateteleina le manaoga mo aiga o le au paia ia “avea ma [nofoaga] e [fiafia] tagata o le aiga e mafuta ai, lea e [mafai] ona latou faamauoaina ai o latou olaga ma maua ai le alofa, lagolago, talisapaia ma le faamalosiauga e tasi.”18 I se taunuuga, i le 1980, sa tuufaatasia ai sauniga o le Aso Sa i se poloka tolu-itula e “faamamafaina ai tiutetauave o le tagata lava ia ma le aiga mo le aoaoina, ola ai, ma le aoaoina atu o le talalelei.”19 O lenei faamamafa i le aiga ma le auaiga sa toe faamautuina i le “O Le Aiga: O Se Folafolaga i le Lalolagi,” lea na faalauiloa mai e Peresitene Gordon B. Hinckley i le 1995.20
Ia Aperila o le 1998, sa faasilasila mai ai e Peresitene Hinckley le fausiaina o le tele o malumalu laiti, lea e aumaia sauniga paia o le maota o le Alii faalatalata i tagata taitoatasi ma aiga o le Au Paia o Aso e Gata Ai i le lalolagi atoa.21 Ma o nei avanoa ua faaleleia mo le tuputupu ae ma le atinaega faaleagaga sa matua faaleleia e le faatelega o polokalama e fesootai ma le ola-tutoatasi faaletino e ala i le faalauiloaga o le Tupe Faaagaga mo A’oga i le 2001.22
I le taimi o lana pulega, sa fautua mai pea Peresitene Thomas S. Monson i le Au Paia ia o atu “i le laveai” ma faamamafa mai le tausiga o ē matitiva ma lē tagolima o se tasi o tiutetauave a le Ekalesia na tofia mai le lagi. I le faaauau ai o le faamamafa i sauniuniga faaletino, sa faatinoina ai le ta’imua o Auaunaga o le Ola-Tutoatasi i le 2012.
I le aluga o nai tausaga ua mavae, o mataupu faavae taua e uiga i le faia o le aso Sapati o se aso fiafia i le aiga ma le ekalesia ua toe faamamafaina ma toe faamalosia,23 o lea ua saunia ai tatou mo faasologa o sauniga o le Aso Sa ua faasilasilaina i lenei sauniga o le konafesi aoao.
Ae i le ono masina talu ai, sa faamalosia ai ma faaogatusa atili ma le mataalia korama o le Perisitua Mekisateko ma ausilali ia faataunuu se auala maualuga atu ma paia atu i le auaunaga.
Ou te talitonu o le faasologa ma le taimi o nei faatinoga i le tele o tausaga e mafai ona fesoasoani ia i tatou e iloa ai le galuega tuufaatasi ma le atoatoa ae le na o se soloā’iga o galuega ta’imua tuma’oti ma tuumavaevae. “Ua faaalia mai e le Atua se mamanu o le alualu i luma faaleagaga mo tagata taitoatasi ma aiga e ala i sauniga, aoaoga, polokalama, ma gaoioiga ia e faaogatotonuina i le aiga ma lagolagoina e le Ekalesia. Ua i ai faalapotopotoga ma polokalama a le Ekalesia ina ia faamanuiaina ai tagata taitoatasi ma aiga ae ua le na ona faia ma muta ai ia i latou lava.”24
Ou te tatalo ina ia tatou iloaina le galuega a le Alii o le galuega sili e tasi i le lalolagi atoa ua atili taulai atu pea i le aiga ma lagolagoina e le Ekalesia. Ou te iloa ma molimau atu o loo faaali mai e le Alii ma o le a faaali mai pea le tele o mea silisili ma le taua tau i le Malo o le Atua.”25
Folafolaga ma le Molimau
Sa amata atu la’u savali i le faamamafaina o le malosiaga lea e fatuina e fasi manoa o anomea ia e milo faatasi pe fili faatasi i se maea. I se ala talitutusa, ou te folafola atu o le a manino le faateleina o le vaaiga, faamoemoega, ma le mana i la tatou aoaoga ma le ola ai i le talalelei toefuataiina a Iesu Keriso a o tatou tauivi ai e faapotopoto faatasi mea uma ia tasi ia Keriso.
O avanoa ma faamanuiaga uma o taunuuga e faavavau e pogai mai, ma e mafai ma i ai le faamoemoega ona o le [Alii], ma tumau ai e ala i le Alii o Iesu Keriso. E pei ona molimatu mai Alema: “Ua leai se isi ala po o ni auala e mafai ona faaolaina ai le tagata, ua nao Keriso. Faauta, o ia o le ola ma le malamalama o le lalolagi.”26
Ou te tautino atu ma le olioli la’u molimau e uiga i le paia ma le moni a’ia’i o le Tama Faavavau ma Lona Alo pele, o Iesu Keriso. I lo tatou Faaola, tatou te maua ai le olioli. Ma ia te Ia tatou te maua ai le faamautinoaga o le “filemu i le lalolagi lenei, ma le ola e faavavau i le lalolagi a sau.”27 Ou te molimau atu ai i le suafa paia o le Alii o Iesu Keriso, amene.