O Le Tamā

I le muai olaga, na tatou fananau ai o ni agaga i ni Matua Faalelagi ma ola faatasi ma i La’ua o se aiga.³ Sa la’ua silafiaina i tatou, aoao i tatou, ma alolofa ia i tatou.⁴ Sa tatou matua mananao lava ia avea e pei o lo tatou Tama Faalelagi. Peitai, o le faia o lea mea, na tatou iloa ai e ao ia i tatou ona:

1. Maua ni tino faitino faamamaluina ma ola pea;⁵

2. Ia faaipoipo ma fai ni aiga e ala i le mana faamau o le perisitua;⁶ ma

3. Maua le poto uma, mana, ma uiga paia.⁷

O le mea lea, na foafoa ai e le Tama se fuafuaga lea o le a faataga ai i tatou i ni tuutuuga patino,⁸ ia maua ni tino faitino ia o le a ola pea ma faamamaluina i le Toetutu; faaipoipo ma fai ni aiga i le olaga faaletino pe, mo ē faamaoni sa le’i maua le avanoa, pe a mavae le olaga faaletino;⁹ alualu i luma agai atu i le atoatoa; ma mulimuli ane toe foi atu i o tatou Matua Faalelagi ma ola faatasi ma i La’ua ma o tatou aiga i se setete o le faaeaga ma le fiafia e faavavau.¹⁰

Ua ta’ua e tusitusiga paia lenei mea o le ata o le faaolataga.¹¹ Sa tatou faafetai tele mo lenei fuafuaga lea, ina ua tuuina mai ia i tatou, sa tatou alalaga ma le olioli.¹² Sa tatou taliaina uma tuutuuga o le fuafuaga, e aofia ai aafiaga ma luitau o le olaga faaletino ia o le a fesoasoani ia i tatou e atiae ia uiga paia.¹³

I le olaga faaletino, ua tuuina mai ai e le Tama Faalelagi ia i tatou ni tuutuuga tatou te manaomia e alualu ai i luma i totonu o Lana fuafuaga. Na fanauina e le Tama ia Iesu Keriso i la le tino¹⁴ ma tuuina mai ia te Ia le fesoasoaniga faalelagi e faataunuu ai Lana misiona i la le tino. O le a faapena foi ona fesoasoani mai le Tama Faalelagi ia i tatou taitoatasi pe afai o le a tatou taumafai e tausi Ana poloaiga.¹⁵ Ua foai mai e le Tama ia i tatou le faitalia.¹⁶ O o tatou ola ua i ai i Ona aao, ma ua “iloa [o tatou] aso” ma “o le a le faitauina itiiti.”¹⁷ Ma ua Ia faamautinoa mai o le a i’u lava ina galulue mea uma mo le lelei o i latou e alolofa ia te Ia.¹⁸

O le Tama Faalelagi lea e foai maia la tatou areto o le aso,¹⁹ lea e aofia ai uma meaai tatou te aia ma le malosi tatou te manaomia e tausi ai Ana poloaiga.²⁰ E foai mai e le Tama meaalofa lelei.²¹ E faafofoga mai o Ia ma tali mai i a tatou tatalo.²² E laveai e le Tama Faalelagi i tatou mai le leaga pe a tatou faatagaina o Ia.²³ E tutulu o Ia mo i tatou pe a tatou puapugatia.²⁴ O le tumutumuga lava, o o tatou faamanuiaga uma e sau mai le Tama.²⁵

E taialaina ma tuu mai e le Tama Faalelagi ia i tatou aafiaga tatou te manaomia e fua i lo tatou malosi, vaivaiga, ma filifiliga ina ia mafai ona tatou fua maia ni fua lelei.²⁶ E aoa’i e le Tama i tatou pe a tatau ai ona e alofa o Ia ia i tatou.²⁷ O Ia o se “Tagata Fautua,”²⁸ o le a fautua mai ia i tatou pe a tatou ōle atu.²⁹

O le Tama Faalelagi lea na te auina mai uma faatosinaga ma meaalofa a le Agaga Paia i o tatou olaga.³⁰ E ala mai i le meaalofa o le Agaga Paia, o le mamalu—po o le atamai, malamalama, ma le mana—o le Tama e mafai ona mau ia i tatou.³¹ Afai o le a tatou taumafai e faateleina le malamalama ma le upumoni seia oo ina tatou manatu tasi i le mamalu o le Atua, o le a auina mai e le Tama Faalelagi le Agaga Paia o le Folafolaga e faamaufaailogaina i tatou i le ola e faavavau ma faaali mai Ona fofoga ia i tatou—a le o le olaga nei po le olaga a sau.³²

I le lalolagi o agaga pe a mavae le olaga nei, e faaauau ai ona auina mai e le Tama Faalelagi le Agaga Paia ma auina mai faifeautalai ia i latou e manaomiaina le talalelei. E tali mai o Ia i tatalo ma fesoasoani ia i latou e le’i mauaina sauniga ia maua sauniga faaola mo i latou.³³

Na faatu a’e e le Tama Faalelagi Iesu Keriso ma tuu atu ia te Ia le mana e aumai ai le Toetu,³⁴ aua o le auala lea tatou te maua ai ni tino ola pea. O le Togiola ma le Toetu o le Faaola tatou te toe foi atu ai i le afioaga o le Tama, lea o le a faamasinoina ai tatou e Iesu Keriso.³⁵

O i latou e faalagolago “i galuega, ma le alofa mutimutivale, ma le alofa tunoa o le Mesia Paia”³⁶ o le a mauaina ni tino faamamaluina e pei o le Tama³⁷ ma mau faatasi ma Ia “i se tulaga o le fiafia e lē gata.”³⁸ O iina, o le a soloia ai e le Tama o tatou loimata uma³⁹ ma fesoasoani ia i tatou ia faaauau pea i la tatou malaga e avea e faapei o Ia.

E pei ona e iloaina, o loo i ai e le aunoa le Tama Faalelagi iina mo i tatou.⁴⁰

Ina ia avea e pei o le Tama, e tatau ona tatou atiae Ona uiga faaletagata. O uiga atoatoa ma uiga paia o le Tama Faalelagi e aofia ai mea nei:

• O le Tama e “Lē Gata ma Faavavau.”⁴¹

• O Ia e amiotonu atoatoa, alofa mutimutivale, agalelei, loa-ona-talitiga, ma e finagalo mo le mea silisili mo i tatou.⁴²

• O le Tama Faalelagi o le alofa lava Ia.⁴³

• E tausi e Ia Ana feagaiga.⁴⁴

• E le sui o Ia.⁴⁵

• E le mafai ona pepelo o Ia.⁴⁶

• E le faailoga tagata le Tama.⁴⁷

• E silafia e Ia mea uma—tuanai, taimi nei, ma le lumanai—mai le amataga.⁴⁸

• E sili atu le atamai o le Tama Faalelagi⁴⁹ nai lo tatou uma.⁵⁰

• Ua i ai i le Tama le mana uma⁵¹ ma faia mea uma e finagalo o Ia e fai.⁵²

Uso e ma tuafafine, e mafai ona tatou faatuatuaina ma faalagolago atu i le Tama. Ona e i ai se vaaiga e faavavau ia te Ia, ua mafai ai e le Tama Faalelagi ona silafia mea e le mafai ona tatou iloa. O Lona olioli, galuega ma le mamalu o le aumaia lea o lo tatou tino ola pea ma le faaeaga.⁵³ O mea uma e faia e Ia e mo lo tatou manuia. E “finagalo [o Ia mo lo tatou] fiafia e faavavau e sili atu nai lo le [tatou] manao.”⁵⁴ Ma Na te “le manaomia [i tatou] ona oo i se taimi e faigata atu i lo le mea tonu e manaomia mo [lo tatou] manuia pe mo le manuia o i latou [tatou te] alolofa i ai.”⁵⁵ I se taunuuga, e taulai o Ia e fesoasoani mai ia i tatou ia alualu i luma, e le o le faamasinoina ma le ta’usalaina o i tatou.⁵⁶

I le avea ai ma atalii ma afafine agaga o le Atua, ua tofu i tatou taitoatasi ma le gafatia e avea ai e pei o le Tama. Ina ia faia lea mea, e tatau ona tatou tapuai atu i le Tama i le suafa o le Alo.⁵⁷ Tatou te faia lenei mea e ala i le taumafai e usiusitai i le finagalo o le Tama, e pei ona sa faia e le Faaola,⁵⁸ ma e ala i le salamo faifai pea.⁵⁹ A tatou faia nei mea, tatou te “maua le alofa tunoa mo le alofa tunoa” seia oo ina tatou maua le atoatoa o le Tama⁶⁰ ma faaee mai ai “ona uiga faaletagata, uiga atoatoa, ma uiga paia.”⁶¹

I le malamalama ai i le eseesega i le va o tagata faitino ua tatou i ai ma le tagata ua avea ai le Tama Faalelagi, e le o se mea e faate’ia ai le lagonaina e nisi o le avea e pei o le Tama e le mafai ona ausia. E ui i lea, o loo manino lava tusitusiga paia. Afai o le a tatou pipii atu i le faatuatua ia Keriso, salamo, ma saili atu i le alofa tunoa o le Atua e ala i le usiusitai, o le a avea lava i tatou e pei o le Tama i se taimi mulimuli. Ou te mafanafana lava i le mea moni e faapea o i latou o e taumafai ia usiusitai o le a “maua le alofa tunoa mo le alofa tunoa” ma e mulimuli ane “maua lona atoatoaga.”⁶² I nisi upu, o le a tatou le mafaia na o i tatou ona avea e pei o le Tama.⁶³ Ae, o le a oo mai e ala i meaalofa o le alofa tunoa, o nisi e tetelē ae o le tele lava e laiti, ia e atiae i luga o le tasi ma le isi seia oo ina maua se atoatoaga. Ae, uso e ma tuafafine, o le a oo mai!

Ou te valaaulia outou ia faatuatuaina o loo silafia e le Tama Faalelagi le auala e faaeaina ai outou; saili atu i lana fesoasoani tumau i aso uma, ma fetaomi atu i luma ma le faatuatua ia Keriso e tusa lava pe e te le lagonaina le alofa o le Atua.

E tele mea tatou te le malamalama i ai e uiga i le avea e pei o le Tama.⁶⁴ Ae e mafai ona ou molimau atu ma le mautinoa o le taumafai ia avea e pei o le Tama e tauia ai osigataulaga uma.⁶⁵ O osigataulaga ia tatou te faia iinei i le olaga faaletino, po o le a lava le tele, e matua le mafaatusalia lava i le olioli, fiafia, ma le alofa lemafuatiaina o le a tatou lagonaina i le afioaga o le Atua.⁶⁶ Afai o loo e tauivi e talitonu e tauia ai osigataulaga o loo talosagaina oe e fai, o loo valaau mai le Faaola ia te oe, e faapea, “Tou te lei malamalama lava i le tetele o faamanuiaga o i ai i le Tamā … ua saunia mo outou; … e lē mafai ona outou gafatia mea uma i le taimi nei; e ui i lea, ia fiafia, ona o le a Ou taitaia outou i le ala.”⁶⁷

Ou te molimau atu e alofa lo outou Tama Faalelagi ia te outou ma e finagalo ia outou toe mau faatasi ma Ia. I le suafa, o Iesu Keriso, amene.