Inemesit Unwam eke Nwaidem
Nnyin imenwongo ino Ete ke Heaven it eke iyenam nkpoino Enye ye mbon efen inyung inam udong Esiee ke kpukpru nkpo.
Ke akpatre akwa mbono eken okurede, ediwak owo ebup mi ukem-ukem mbume oro: “Mkpoitie oro enem?” Iboro mi ekedi ukem-ukem kpukpru ini: “Mkpoitie oro enem ke mbufo mitingke iko.” Edi akpaniko, nnen-nnen? Mkpoitie miikenemke ke mbono emi, edi ami mmenno ekom ke edidiong ye ukpono ke nditing iko nno mbufo mbubreyo emi
Usukini nte nnyin inwamde, nnyin inwam ke nsio-nsio ikpehe. Usuk enem, usuk inemke, edi nnyin iam inwongo ino Ete nnyin ke Heaven ite ke iyenam nkpo ino Enye ye mbon efen keima inyung inam uduak Esie ke kpukpru nkpo.
Esisit isua emi ekebede, mme iwaad ke Ufok Abasi ekekpeb ete “kini mbufo ‘enamde utom Abasi’ [Doctrine ye Covenants 4:2], mbufo ebuana ke akwa utom emi mitibeke akpa. Mbufo emenwam Abasi ndisop nnam utom Esie, ndien edi akamba, idaresit, ye ata ukpeb.”1 Edi nkpo emi odude ono ofuri owo—ke ndaha isua ekededi—ndien nko edi utom emi adade nnyin aka se edima prophet nnyin etingde abanga nte “usung ediomo.”2
Ke ndiokiso, nte ededi, nnyin idu ke ererimbot mmaidem emi mme owo ewakde ndibup ete, “Nso idi udori mi?” ke nde emi ekpebupde ete, “Anie ke mkpenwam mfin emi?” mme “Nkeme didie ke ndinam nkpo nno Abasi ke ikoot mi?” mme “Ndi ami mmeno Abasi ofuri se nnyene?”
Akamba uwutnkpo unwam utom nwaidem edi Sister Victoria Antonietti. Victoria ekedi kiet kotu andikpeb eke Primary ke branch mi kin ami nkekponde ke Argentina. Kwa uwemeyo Tuesday, kini nnyin idude ke Primary, enye eyemen cake chocolate osok nnyin. Kpukpru owo ema cake emi—eti-eti, ibohoke ami. Ami mmesua cake chocolate! Okposuk edi nte enye okoyomde usung ndibuana cake oro ye ami, kpukpru ini ami nkesisin eno esie.
Usen kiet, ke enyen ama ekedeme cake chocolate ono mme ndito eken, mma mbup enye nte, “Ntak emi afo mudaha oruk efen udi--e—nte uto-uto mme vanilla?”
Ke enye asakde esisit, enye obup mi ete, “Ntak emiafo mutabike ekpri mbekhe? Eda asanga-sanga inem nkpo enam cake emi, ami nnwongo nte ke ama atabi, eyema enye!”
Ami nnwongore nse, ke mkpaidem, ebiet nte kpukpru owo ke ekop inem cake emi. Nnyime nditabi nse. Emekeme ndikere se iketibede? Ami mma enye! Oro ekedi ata akpa ini nkemade cake chocolate.
Ikedaha ediwak isua mbemiso ndiongo mme ndibe asanga-sanga nkpo ekedude ke cake chocolate Sister Antonietti. Ami ye ndito mi isikise eka mi kwa udua. Ke kiet kotu edkise emi, Eka mi ye ami ima ikop inem ndita mbak cake chocolate, ndien ami nneme nno enye danga ami nkedima cake chocolate ke akpa ini. Ndien enye edi-nam ofuri mbuk oro anwanga mi.
Eka mi ete, “Cris, sese mi,” “Victoria ye ufokemana esie inyeneke ediwak okuk, ndien kwa udua ana enye emek kotu ndikpe bus man ada enye ye ndito esie inang edi Primary mme ndidep nkpo man anam cake chocolate ono class Primary esie. Kpukpru ini enye emek cake chocolate ke nde bus, ndien enye ye ndito esie esanga ke akande two miles [3 km], ke usung, ke nte usen ekpetiede.”
Usen oro ke nkenehede mma cake chocolate esie. Akpan-akpan, ami ndifiok ke ndibe asanga-sanga nkpo ke cake Victoria ekedi ima emi enye ekenyeneke ono mbon eke enye anwamde ye nwaidem unwam ke ntak ufon nnyin.
Ndifiak nkere mbanga cake Victoria anwam mi nditi unwam nwaidem ke ediwak ukpebnkpo emi Obong ekpebde ono mbet Esie kini Enye asangade aka itie-unim-okuk ke temple. Mbufo emediongo mbuk oro. Elder James E. Talmage ekpeb ete ekedi ekebe Duopeta, “ndien ke ekeme emi ke mme owo ekesisin eno mmo eno mme [nsio-nsio] ntak nte ewetde ke enyong ekebe emi.” Jesus ese udim owo nte enode, emi eyohode ye nsio-nsio oruk owo. Ubak eno mme eno mmo ke “ofuri esit” kini mbon efen esinde “ediwak okuk silver ye gold,” man owo ekut, enyung etoro mmo ke eno mmo.
“Ama odu ubuene ebekkpa kiet kotu ediwak owo emi, emi … ekesinde mkpri bronze iba emi efiokde nte mite ke ekebe kiet; eno esie ke ibat okuk America ekpri akan ubak cent. Obong okot mme mbet Esie ete esanga ekpere Enye, owut mmo ubuene ebekpa emi ye edinam esie, onyung odoho ete: ‘Ke akpaniko ke ndoho mbufo nte, ubuene ebekpa emi esin akan se ekebe: Koro mmo ekesiode nkpo ke nyoho-nsuho mmo esin, edi enye ama osio kpukpru se enye enyenede ke unana esie ono, kpa ofuri se enye akpadade odu uwem [Mark 12:43–44].”3
Ebekpa emi ikenyeneke akamba itie ke ebiet emi enye otode. Enye ama enyene ata akpan nkpo: enye ekenyene eti udong, ndien enye ono ofuri se enye ekeneyenede ndino. Ndusuk enye ono se ikpride ikan eke mbon efen, ke ata nsuhore-idem akan mbon efen, okpuho akan eke mbon efen. Nte mbon efen esede, se enye okonode iworoke nkpo, edi ke enyin Andinyanga, “andifiok ekikere ye udong esit,”4 enye okono kpukpru se enye ekenyenede.
Ndito-eka iban, ndi nnyin imeno Abasi ofuri se nnyin inyenede ke misuhoke nkpo efen? Nte nnyin imeyak ini ye eno nnyin ino man otodo mme obufa eman ekpeb ndima Abasi enyung enim mbet Esie? Nte nnyin imenwam mbohidung nnyin ye mbon eke enodennyin ubiong ete ika ke ukpeme ye nting-enyin—ino ini ye osongo emi ekemede ndida keusung efen nnam nkpo? Nte nnyin imenam akamba mbet iba oro—ndima Abasi ye ndima ndito?5 Nte awakde ndidi ima oro owut idem ke unwam.
President Dallin H. Oaks ekpeb ete: “Andinyanga nnyin akayak Idemesie nte unwam nwaidem. Enye ekpeb nnyin kiet-kiet ete ikpebe Enye ke ndiyak mmaidem nnyin nnim man ikpenwam mbon efen.”
Enye akaiso eting ete:
“Ukem uwutnkpo ke ndisop ke ndinwam mbon efen … edi nwaidem mme ete ye eka enamde eno ndito mmo. Mme eka ekopubiak ye unana ke akpan nkpo uwem ye inemsitt man aman onyung akama eyen kiet-kiet. Mme ete etre ndikop inem uwem ye akpan nkpo man enwam ke ufok. …
“… Nko nnyin imedara ye mbon emi ke ekpemede mbon nkpo-nam ye nkani owo ke ufokemana. Baba unwam kiet kotu emi obupde ete nso idu ke esit ino mi? Kpukpru se oyomde edi ndiyak edindiduokuwem nnyin ke ntak utom nwaidem. …
“[Ndien] kpukpru emi owut nsinsi ubono-nkpo ete ke nnyin imetiminem esit inyung iyuho kini nnyin inamde nkpo inyung inwam ke unwam emi nnyin inode, idige ke se nnyin ibode.
“Andinyanga nnyin ekpeb nnyin ete ikpebe Enye ke ndinam mme unwam emi odotde ke nwaidem unwam nno mbon efen.”6
Nko President Thomas S. Monson ekpeb ete “ndusuk kini nnyin idisobode iso-ye-iso ye Andibot nnyin, owo idibupke nnyin ete, ‘Ikoot Ufok Abasi ifang ke ekenyene?’ edi edibup, ‘Owo ifang ke mbufo ekenwam?’ Ke akpaniko, mbufo idikemeke ndima Abasi ibohoke mbufo enwam Enye ke ndinwam ikot Esie.”7
Oro oworo ete, ndito-eka iban, ifinake mme itie ke itie inemesit, mme itie ke itie emi minemke, mme itie ke nwiwine-mkpoitie nkarafang ke edem. Ifinake edieke, nte ededi, mme nnyin iworo iduk udim mkpoitie efen man ikewen nsekeyen emi atuade. Se ifinade edi ke nnyin ikedi ye udong ndinwam, emi anamde nnyin ikut mbon emi nnyin inwamde inyung idra ikom mmo, ndien nnyin iyarede idem nnyin ino mbon emi etiede ke nwiwine-mkpoitie edem ye nnyin—inam ufan okposuk nteowo midongke nnyin ete ikenwam mmo. Ndien eyefon koro nnyin imenam ofuri se nnyin inamde ye ata eti inem unwam emi abuahade ke ima ye nwaidem.
Ami mmedifiok ke inaha nte nnyin inam cake chocolate man edi eti mme esin-ifik teacher Primary kiet, edi oro ikedige ibanga cake. Ima ekedi ntak utom oro.
Ami ndi ntiense nte ke enam ima oto ke nwaidem—nwaidem eke andikpeb kpa ye eke akande oro oto ke akpatre ye nsinsi nwaidem eke Eyen Abasi. Ami nno iko ntiense nte ke Enye odu uwem! Ami mmema Enye nnyung nyom ndikpong udong idem mi nyak man otodo ma nnyung nnwam nte anamde. Ke enying Jesus Christ, amen.