Utom Nwed Mormon ke Edikabare-esit

Ke Preach My Gospel, nnyin imokot: “Eti ete ke ifiok nnyin [kabanga Ete ye uduak inemesit Esie] eto mme prophet eyo emi—Joseph Smith ye mbon edade itie esie —emi ebode eriyarare nnen-nnen eto Abasi. Ndien, akpa mbume owo anade ono iboro edi mme Joseph Smith ekedi prophet,ndien eren mme nwan oro ekeme ndiboro mbume emi ke ndikot nyung mbong akam mbanga Nwed Mormon.”²

Iko ntiense mi kabanga edisana ikot Prophet Joseph Smith osong oto ke ndibong akam mkpep Nwed Mormon: iko-ntiense efen abangade Jesus Christ.” Mmankop ikot Moroni odohode ette“benge Abasi , nsisi Ete nnyin, ke enyin Jesus Christ,” man ediongo akpaniko edude ke Nwed Mormon.³ Mmono iko ntiense nte ke mmodiongo ke enye edi akpaniko. Ifiok oro edi ebine mi,nte ekemede ndidi mbine mbufo, “oto ke odudu Holy Ghost.”⁴

Ntongo etop enode ebanga Nwed Mormon odoho ete: “Mbon emi ebode edisana iko ntiense [otode Nwed Mormon] eto Edisana Spirit eyediongo ke ukem odudu oro nko ke Jesus Christ edi Andinyanga ofuri ererimbot, ke Joseph Smith edi andiyarare ye prophet ke mme akpatre usen emi, ndien nko ke ufok - Abasi Jesus Christ eke Ndisana Owo ke Ukperedem Usen edi ubong- Abasi efiakde esiak ke isong, ke mbenge-idem edifiak ndi Messiah.”⁵

Nte ekpri missionary akakade Chile, mma mkpeb akamba nkpo mbanga odudu erikabare esit ke Nwed Mormon. Mr. Gonzalez amakama itie ukpono ke ufok-Abasi esie ke ediwak isua. Enye ama obo ediwak ukpep abanga edu-ukpono Abasi,ye degree ke theology. Enye ama atang-idem abanga ifiok bible esiemmong. Nnyin ima idiongo ke enye edi owo ekpebde abanga edu ukpono-Abasi.

Enye ama enehede odiongo mme missionaries Ufok Abasi Jesus Christ eke Latter-day Saints nte esangade enam utom mmo ke obio emana esie Lima, Peru. Enye kpukpru ini ekesiyom ndisobo mmo man ada Bible asua-ono mmo.

Usen kiet, eketiede nte eno otode heaven, nte enye ekekerede, missionaries iba ema ekot enye enyung ebup mme mmo ekeme ndidi ufok esie man edibuana ke iko-Abasi ye enye. Emi edi se enye okoyomde oyom! Eno iboro ke ebenge esie. Ke akpatre, enye omong enehede mme etin-usung ndito-iren emi etem. Enye odoho mmo ke iyenem esit ndikut mmo nte edide ufok esie man edineme iko-Abasi.

Enye ikekemeke ndibet tutu usen ekenimde. Enye ama ekure ndutim ndida Bible nsua-nno mbuotidem mmo. Enye ama okop uko ke Bible eyeting anwanga ye ke okposong uyo idiok-mkpo mmo enamde. Okoneyo ekenimde ama edikem, ndien mme missionaries ema ekekong usung ufok esie. Enye ama enem esit. Ini esie ama edisim ke akpatre.

Enye ama eberede usung onyung ada mme missionaries oduk ufok esie. Kiet kotu missionaries ama ayak blue nwed kiet ono enye onyung ono ediye iko-ntiense ke imodiongo ke nwed emi esine iko otode Abasi. Udiana missionary ama adian okop-odudu iko-ntiense abanga nwed oro, odoho ke prophet Abasi eyo-mfin emi ekekerede Joseph Smith akakabare nwed oro, ndien ke enye ekpep abanga Christ. Mme missionaries ema ebenge eyung ekpong ufok esie.

Mr. Gonzalez ama ofuho. Edi ama okubore nwed emi, onyung otongo ndikubore ikpa-nwed oro nse. Enye ama okot akpa ikpa-nwed. Enye ama okot ikpa-nwed ke ikpa-nwed ke ikpa-nwed, ikinyung itreke tutu ata uwemeyo edem usen. Enye ama okot kpukpru nwed emi onyung odiongo ke enye edi akpaniko. Enye ama odiongo se enye edinamde. Enye ama okot missionaries oro, obo ukpep nkpo, onyung okpong uwem enye okodiongode edidi owo Ufok-Abasi Jesus Christ eke Ndisana Owo Ukperedem Usen.

Eti owo oro ekedi andikpep mi ke MTC ke Provo, Utah. Mbuk edikabare esit Brother Gonzalez ye odudu Nwed Mormon anam akwa ufon ono mi.

Ke ini nkesimde Chile, president mission mi, President Royden J. Glade, ama odoho nnyin ikot iko-ntiense Prophet Joseph Smith emi ewetde ke Joseph Smith—History, kpukpru urua. Enye ama ekpep nnyin ke iko-ntiense First Vision eyenyene nnen-nnen ebuana ye iko-ntiense gospel ye iko-ntiense Nwed Mormon.

Mma nda ikot esie ke akpan. Ami mmokot etop First Vision; mmokot Nwed Mormon. Mmebenge nte Moroni okodohode nnyung mbenge “Abasi, Ete Nsisi, ke enying Christ” ⁶ edieke Nwed Mormon edide akpaniko. Mmono iko-ntiense mfin nte ke mmodiongo Nwed Mormon, nte Prophet Joseph Smith odohode, edi “andinen nkan ke kpukpru nwed ke isong, ye ukpohode-itiat edu-ukpono nnyin, ndien owo [eye] asanga ekpere Abasi ke ndidu uwem ntiene mibet esie, akan nditiene nwed efen.”⁷ Prophet Joseph ama odoho nko ete: “Sio Nwed Mormon fep ye eriyarare, edu-ukpono nnyin odu mmong? Nnyin inyeneke ndomokiet.”⁸

Adangante nnyin itimde idiongo nsuto owo idide ye utom Nwed Mormon, edikabare esit nnyin eyetuhgo onyung osong ada. Imenyene odudu ke ibiong-utom nnyin ndinim ediomi inamde ye Abasi.

Akpan utom Nwed Mormon edi nditang Isreal ekesuande mbok.Editang mbok emi ono kpukpru ndito Abasi ukeme ndisanga ke usung ediomi,ndien ke ikponode mme ediomi oro,iyefiak ikodu ke ebiet Ete odude. Adangante nnyin ikpebde edikabare esit inyung iduok mbufa-owo mmong, nnyin itang Isreal ekesuande ibok.

Nwed Mormon eting abanga ufok Isreal utim 108. Ke ntongo Nwed Mormon, Nephi ama ekpep, “Koro oyoho uduak mi edi ndidnam mme owo etiene Abasi Abraham, ye Abasi Isaac, ye Abasi Jacob, man ebo eriyanga.”⁹ Abasi Abraham, Isaac,ye Jacob edi Jesus Christ, Abasi oro ke Akani Testament. Nnyin iyenyene erinyanga adangante nnyin ibinede Christ ke ndinam gospel Esie.

Ibighike, Nephi ama ewet:

“Ntre, ete mi nko ama eting ediwak iko abanga mbon Gentile, ye ufok Israel, ke eyeda mmo edomo eto olive, emi edisibede nkok esie ndien esuan mmo ke ofuri iso isong. …

“Ndien ema esuan ufok Isreal, eyefiak etang mmo ebok; midighe, ke akpaniko, koro mme Gentile ema ebo kpukpru Gospel,nkani nkok eto olive, mme nyoho-nsuho ufok Isreal, eyebop edian, midighe, eyenyene ifiok ebanga ata Messiah, Obong mmo ye Andifak mmo.”¹⁰

Ntre nko, ke utit Nwed Mormon, prophet Moroni eti nnyin abanga ediomo nnyin, ke ndidoho, “Man mbufo edikut nditimere, man ediomi Ete akanamde ono mbufo ufok Israel,okposu ke nsisi.”¹¹

Efe idi “ediomi Ete” Moroni etingde abanga? Nnyin ima-ikot ke nwed Abraham:

“Enying Mi edi Jehovah, mmondiongo utit nto ntongo; ndien ubok Mi eyefuk Mbufo.

“Ndien nyenam fi akabade edi akamba idut, nyenyung ndiong fi nkan kpukpru,nyung nnam enyin fo okpon ke otu mme idut, eyenyung edi edidiong ono ubon editienede fi, ndien mmo eyekama utom emi ye idaha-oku ke ubok mmo eno kpukpru idut.”¹²

President Russell M. Nelson amakpep mmi-mmi ke usuanetop ofuri ekondo ette “emi ke akpaniko edi ukperedem usen, ndien Abasi eyedemere utom Esie nditang Israel mbok. Editang mbok oro edi ata akpan nkpo adade itie ke ererimbot mfin. Mkpo ndomokiet efen idomoke ke ndaha, mkpo efen idomoke ke ufon, mkpo efen idomoke ke ukpono. Ndien edieke emekde, edieke eyomde, eyedi akamba ubak esie. Mbufo eyedi akamba ubak ke mkpo okponde, mkpo eyede, mkpo odotde ukpono!

“Ke ini itingde ibanga editang mbok, nnyin idoho ntotungo akpaniko emi: kpukpru ndito Ete nnyin, ke ikpehe nkang mbiba, edot ndikop etop mfiak-ntongo gospel Jesus Christ. Mmo edibiere ino idemmo edieke eyomde.”¹³

Se nnyin inamde nte ikot Ufok-Abasi Jesus Christ eke Ukperedem Ndisana Owoedi oro: nnyin iyom ndinam ererimbot ediongo ebanga —enyung ekabare esit mbine— gospel Jesus Christ. Nnyin idi “mme anditang ukpere- edem usen.”¹⁴ Utom nnyin edi anwa-anwa. Ndito eka iren ye iban, yak ediongo nnyin nte mmo oro edade enwongo Moroni esin ke esit, ibenge inyung ibo iboro ida idiongo ke Nwed Mormon edi akpaniko, inyung ibuana ifiok oro ye mbon efen ke iko ye, ata akpan-akpan, ke edinam.

Nwed Mormon esine oyoho iko Abasi Jesus Christ.¹⁵ Enye ada nnyin ekesim ediomi Ete, emi edieke inimde eyesongo idorenyin nnyin kabanga mkpon-nkan eno Esie—nsinsi uwem.¹⁶ Nwed Mormon edi ukpohode-itiat ono nkabare esit kpukpru ndito iren ye iban eke Ete ke Heaven.

Ke ntide iko efen President Nelson eketingde: “Nte mbufo … ekotde Nwed Mormon kpukpru usen, mbufo eyekpep ido editang-mbok, akpaniko abangade Jesus Christ, Atonement Esie, ye kpukpru gospel Esie emi miduhe ke Bible.Nwed Mormon edi akpan eno editang Isreal mbok. Ke akpaniko, edieke Nwed Mormon mikpiduhe, ewongo nditang Isreal mbok ikpiduhe.” ¹⁷

Nyetre ye iko Andiyanga nte Enye ekekpebde ndito Nephi abanga edidiong ekewongode enim: “Mbufo edi ndito mme prophet; mbufo eto ufok Israel; ndien mbufo edi eke ediomi emi Ete akanamde ye ete mbufo Abraham, ete: Ndien edito ke ndito fo kpukpru ubon ke isong ebo edidiong.”¹⁸

Mmono iko-ntiense nte ke idi ndito iren ye iban eke Ete, ndito Abraham, ufok Israel. Nnyin ikaiso nditang Isreal mbok nte akpatre utom, ndien ikama Nwed Mormon—nwed emi, adianade ye Spirit Abasi, edi nkpo-utom okponde akan ke edikabare esit. Nnyin isanga itiene prophet Abasi, President Russell M. Nelson, emi adade usung ke nditang Israel mbok ke ini nnyin. Nwed Mormon edi akpaniko. Enye okpuhore uwem mi. Mmonwongo nno mbufo, nte Moroni ye ediwak prophet ke mme isua ebede, ke enye ekeme ndikpuhore okwo.¹⁹ Ke enying Jesus Christ, amen.