Nagabukas nga Pamulongpulong

Akon pinalangga nga mga kauturan, ginpaabot namon ang pagtipon upod sa inyo liwat sa sini nga Oktubre nga pangkabilugan nga komperensya sang Simbahan. Ginapabutyag namon ang amon sinsero nga pag-abi-abi sa kada isa sa inyo. Nagapasalamat gid kami para sa inyo nagasakdag nga mga pangamuyo. Mabatyagan namon ang mga epekto sini. Salamat!

Nagapasalamat kami para sa inyo tuman nga mga pagpaninguha sa pagsunod sa laygay nga ginhatag sa pangkabilugan nga komperensya sang anum ka bulan sadto. Nagtinguha sa pag-angkon ang mga pangulohan sang mga stake sa bilog nga kalibutan sang rebelasyon nga kinahanglanon sa pag-organisar liwat sang mga korum sang mga elder. Ang mga kalalakihan sadtong mga korum upod sa matutom nga mga kababayin-an sang Relief Society nagatinguha gid sa pag-alagad sa aton mga kauturan sa mas mataas, mas balaan nga paagi. Nainspirar kami sa inyo kaayo kag pinasahi nga mga pagpaninguha sa pagdala sang pagpalangga sang Manluluwas sa inyo mga pamilya, mga kasilingan, kag mga abyan kag sa pag-alagad sa ila pareho sang Iya pag-alagad.

Halin sang komperensya sang Abril, nakabisita kami ni Sister Nelson sa mga miyembro sa apat ka kontinente kag sa mga isla sang kadagatan. Halin sa Jerusalam pakadto sa Harare, halin sa Winnipeg pakadto sa Bangkok, naeksperiyensyahan namon ang inyo dako nga pagtuo kag ang kabakod sang inyo mga testimonya.

Tuman gid kami nga nalipay sa kadamuon sang aton mga lamharon nga nag-entra na sa kasoldadohan sang mga lamharon sang Ginuo sa pagbulig sa pagtipon sang nagalinapta nga Israel.¹ Salamat sa inyo! Kag samtang nagapadayon kamo sa pagsunod sang akon mga imbitasyon nga ginahatag sa aton bug-os kalibutan nga youth devotional, ginapakita ninyo ang isa ka pagsulundan para sa amon tanan nga sundon. Kag kadako gid sang kinalain nga ginahimo ninyo nga mga lamharon!

Sang nagligad nga mga tinuig, kami sa nagapangulo nga mga konseho sang Simbahan nabudlayan sa isa ka simple nga pamangkot: paano kami makapalapnag sang ebanghelyo sa iya sini simple nga kaputli kag sang mga ordinansa sa ila sini sining wala’y katapusan nga epekto sa tanan nga mga anak sang Dios?

Bilang mga Santos sa Ulihing mga Adlaw, naanad kita sa ideya nga ang “simbahan” butang nga nagakatabo sa aton mga meetinghouse, nga ginasuportahan sang mga nagakatabo sa balay. Kinahanglan naton nga bag-uhon ini nga pagsulundan. Panahon na nga ang Simbahan nakasentro sa puluy-an, nga ginasuportahan sang mga nagakatabo sa sulod sang mga bilding sa aton branch, ward, kag stake.

Samtang padayon nga nagasangkad ang Simbahan sa bilog nga kalibutan, may madamo nga mga miyembro nga nagaistar sa mga lugar nga wala mga kapilya—kag basi madugayan pa nga mabutangan sini. Nadumduman ko ang isa ka pamilya, nga tungod sa amo sini nga mga sirkumstansya, kinahanglan nga magsimba sa ila balay. Ginpamangkot ko ang iloy kon kamusta ang pagsimba sa iya mismo nga balay. Nagsabat sia, “Nanamian ako sini! Ang akon bana nagagamit sang mas maayo nga lengguahe sa balay subong, tungod kabalo siya nga bendisyonan niya diri ang sakramento kada Domingo.”

Ang malawig na nga katuyoan sang Simbahan amo nga buligan ang tanan nga miyembro sini nga mag-uswag sa ila pagtuo sa aton Ginuong Jesucristo kag sa Iya Pagbayad-sala, nga buligan sila sa paghimo kag pagtuman sang ila mga kasugtanan sa Dios, kag nga pabakuron kag hugpongon ang ila mga pamilya. Sa sini nga komplikado nga kalibutan subong nga panahon, indi ini mahapos. Nagawaswas ang kaaway sa iya pag-atake sa pagtuo kag sa aton kag sa mga pamilya naton sing tuman kadasig. Agud mabuhi kita sing espirituhanon, kinahanglan naton sang mga plano sa pagbato sini sing matutum. Suno sa sini, gusto namon nga magtukod sang mga pagbag-o sa organisasyon nga magapabakod pa gid sang aton mga miyembro kag sang ila mga pamilya.

Sa pila na ka tuig, ang mga lider sang Simbahan nagabuhat sang isa ka gintingob nga kurikulum agud pabakuron ang mga pamilya kag ang mga indibidwal paagi sa isa ka plano nga nakasentro sa puluy-an kag ginasuportahan sang Simbahan sa pagtuon sang doktrina, pagpabakod sang pagtuo, kag pagpalambo sang mas maayo nga pagsimba. Ang pagpaninguha namon sa sining nagligad nga mga tinuig sa pagpakabalaan sang Adlaw nga inugpahuway—nga mahimo ini nga isa ka kinalipay kag kaugalingon nga pagpakita sa Dios sang aton pagpalangga para sa Iya—dugangan pa gid sining mga pagbag-o nga ipahibalo namon subong.

Sa sini nga aga lawagon namon ang isa ka bag-o nga pagbalanse kag koneksyon sa pagtudlo sang ebanghelyo sa puluy-an kag sa Simbahan. Responsable kita tanan para sa aton kaugalingon nga espirituhanon nga pag-uswag. Kag klaro ini sa balaan nga mga kasulatan nga ara sa mga ginikanan ang tig-una nga responsibilidad sa pagtudlo sang doktrina sa ila mga kabataan.² Ang responsibilidad sang Simbahan amo nga magbulig sa kada miyembro sa ila diosnon nga handum sa pag-uswag sang iya ihibalo sang ebanghelyo.

Subong ipaathag ni Elder Quentin L. Cook ining importante nga mga pagbag-o. Isa ang tanan nga mga miyembro sang Konseho sang Unang Pangulohan kag Korum sang Dose ka Apostoles sa pagsuporta sining mensahe. Ginakilala namon sing may pagpasalamat ang inspirasyon sang Ginuo nga nag-impluwensya sa paghimo sang mga plano kag mga proseso nga ipresentar ni Elder Cook.

Akon pinalangga nga mga kauturan, kahibalo ako nga buhi ang Dios! Si Jesus ang Cristo! Ini ang Iya Simbahan nga ginadirekta Niya paagi sa propesiya kag rebelasyon sa Iya mapainubuson nga mga alagad. Ginapamatud-an ko ini sa ngalan ni Jesucristo, amen.