ທິດາທີ່ຮັກຫອມ
ເປົ້າໝາຍຂອງອົງການຍິງໜຸ່ມ ຄືພວກເຮົາປາດຖະໜາທີ່ຈະຊ່ວຍເຫລືອພວກເຈົ້າໃຫ້ມີ ສັດທາທີ່ບໍ່ຫວັ່ນໄຫວ ໃນອົງພຣະເຢຊູຄຣິດເຈົ້າ.
ເອື້ອຍນ້ອງທີ່ຮັກແພງທັງຫລາຍຂອງຂ້າພະເຈົ້າ, ຊ່າງເປັນຄວາມຊົມຊື່ນຍິນດີແທ້ໆທີ່ໄດ້ມາຮ່ວມກັບທ່ານ! ພວກເຮົາໄດ້ເປັນພະຍານເຖິງການເປີດເຜີຍທີ່ຫລັ່ງໄຫລມາ ຊຶ່ງຕ້ອງໃຊ້ຄວາມພະຍາຍາມ ແລະ ທັງໜ້າຕື່ນເຕັ້ນ.
ໃນຕອນເລີ່ມຕົ້ນນີ້, ຂ້າພະເຈົ້າຢາກແນະນຳທ່ານໃຫ້ຮູ້ຈັກໝູ່ເພື່ອນບາງຄົນ; ເຂົາເຈົ້າເປັນຍິງໜຸ່ມທີ່ພິເສດໃນທາງພອນສະຫວັນ, ປະເພນີ, ແລະ ສະຖານະການສ່ວນຕົວ ແລະ ຄອບຄົວ. ແຕ່ລະຄົນ, ຄືກັນກັບພວກເຈົ້າ, ໄດ້ເຮັດໃຫ້ຂ້າພະເຈົ້າປະທັບໃຈຫລາຍ.
ທຳອິດ, ນີ້ແມ່ນນາງແບວລາ. ນາງຢືນຢູ່ຢ່າງໝັ້ນຄົງ ໂດຍທີ່ເປັນຍິງໜຸ່ມຄົນດຽວໃນສາຂາຂອງນາງ ຢູ່ປະເທດອາຍແລັນ.
ນີ້ແມ່ນນາງໂຈເຊັບຟີນ ທີ່ອຸທິດຕົນ ຈາກອາຟຣິກາ, ຜູ້ມຸ່ງໝັ້ນທີ່ຈະສຶກສາພຣະຄຳພີມໍມອນທຸກວັນ. ນາງໄດ້ຄົ້ນພົບພະລັງ ແລະ ພອນທີ່ມາຈາກການກະທຳທີ່ລຽບງ່າຍ ແລະ ຊື່ສັດນີ້.
ແລະ ຜູ້ນີ້ແມ່ນນາງອາສ໌ຕິນ, ເປັນຍິງໜຸ່ມທີ່ໜ້າອັດສະຈັນ ຜູ້ໄດ້ເສຍຊີວິດຫລັງຈາກໄດ້ຕໍ່ສູ້ກັບໂຣກມະເລັງເປັນເວລາຫົກປີ. ປະຈັກພະຍານທີ່ເຂັ້ມແຂງຂອງນາງເຖິງການຊົດໃຊ້ຂອງພຣະເຢຊູຄຣິດ ປະທັບໃຈຂ້າພະເຈົ້າຫລາຍ.
ພວກເຈົ້າ ທຸກຄົນ ເປັນຍິງໜຸ່ມທີ່ດີເລີດ. ພວກເຈົ້າແຕກຕ່າງກັນ, ແຕ່ຂອງປະທານ ແລະ ປະສົບການຂອງພວກເຈົ້າແຕ່ລະຄົນ ແມ່ນຄ້າຍຄືກັນໃນທາງທີ່ສຳຄັນ ແລະ ນິລັນດອນ.
ພວກເຈົ້າເປັນທິດາທາງວິນຍານຂອງພຣະບິດາມານດາເທິງສະຫວັນແທ້ໆ, ແລະ ບໍ່ມີສິ່ງໃດສາມາດແຍກພວກເຈົ້າອອກຈາກຄວາມຮັກຂອງພວກພຣະອົງ ແລະ ຄວາມຮັກຂອງພຣະຜູ້ຊ່ວຍໃຫ້ລອດຂອງພວກເຈົ້າ.1 ເມື່ອພວກເຈົ້າເຂົ້າໃກ້ພຣະອົງ, ເຖິງແມ່ນກ້າວເຂົ້າໄປເທື່ອລະເລັກເທື່ອລະນ້ອຍ, ແຕ່ພວກເຈົ້າຈະຄົ້ນພົບຄວາມສະຫງົບທີ່ຍາວນານ ຊຶ່ງເຂົ້າສູ່ຈິດວິນຍານຂອງພວກເຈົ້າ ໃນຖານະສານຸສິດທີ່ຊື່ສັດຂອງພຣະຜູ້ຊ່ວຍໃຫ້ລອດ, ພຣະເຢຊູຄຣິດ.
ປະທານຣະໂຊ ເອັມ ແນວສັນ, ສາດສະດາທີ່ຮັກແພງຂອງເຮົາ, ໄດ້ຂໍໃຫ້ຂ້າພະເຈົ້າແຈ້ງການປ່ຽນແປງທີ່ດົນໃຈບາງຢ່າງ ທີ່ຈະຊ່ວຍພວກເຈົ້າ “ພັດທະນາສັກກະຍະພາບສ່ວນຕົວທີ່ສັກສິດ [ຂອງພວກເຈົ້າ]”2 ແລະ ເພີ່ມອິດທິພົນທີ່ຊອບທຳຂອງພວກເຈົ້າ. ຂ້າພະເຈົ້າຈະກ່າວເຖິງການປ່ຽນແປງສີ່ຢ່າງໃນຄ່ຳຄືນນີ້.
ຄຳຂວັນຂອງກຸ່ມຍິງໜຸ່ມ
ກ່ອນອື່ນໝົດ, ເປົ້າໝາຍຂອງອົງການຍິງໜຸ່ມ ຄືພວກເຮົາປາດຖະໜາທີ່ຈະຊ່ວຍເຫລືອພວກເຈົ້າໃຫ້ມີ ສັດທາທີ່ບໍ່ຫວັ່ນໄຫວ ໃນອົງພຣະເຢຊູຄຣິດເຈົ້າ3 ແລະ ມີຄວາມຮູ້ແຈ້ງເຖິງເອກະລັກແຫ່ງສະຫວັນຂອງພວກເຈົ້າ ໃນຖານະທິດາຂອງພຣະເຈົ້າ.
ຄ່ຳຄືນນີ້, ຂ້າພະເຈົ້າຈະປະກາດ ຄຳຂວັນຂອງກຸ່ມຍິງໜຸ່ມທີ່ຖືກດັດແປງໃໝ່. ຂ້າພະເຈົ້າອະທິຖານວ່າ ພວກເຈົ້າຈະຮູ້ສຶກເຖິງພຣະວິນຍານບໍລິສຸດ ເປັນພະຍານເຖິງຄວາມຈິງຕໍ່ຖ້ອຍຄຳເຫລົ່ານີ້ ຂະນະທີ່ຂ້າພະເຈົ້າກ່າວຄຳຂວັນ:
ເຮົາເປັນທິດາທີ່ຮັກຫອມຂອງພຣະບິດາມານດາເທິງສະຫວັນ,4 ພ້ອມດ້ວຍທຳມະຊາດແຫ່ງສະຫວັນ ແລະ ມີຈຸດໝາຍປາຍທາງນິລັນດອນ.5
ໃນຖານະສານຸສິດຂອງພຣະເຢຊູຄຣິດ,6 ເຮົາພະຍາຍາມກາຍເປັນເໝືອນດັ່ງພຣະອົງ.7 ເຮົາສະແຫວງຫາ ແລະ ກະທຳຕາມການເປີດເຜີຍສ່ວນຕົວ8 ແລະ ປະຕິບັດສາດສະໜາກິດຕໍ່ຄົນອື່ນ ໃນພຣະນາມອັນສັກສິດຂອງພຣະອົງ.9
ເຮົາຈະຢືນເປັນພະຍານຂອງພຣະເຈົ້າ ໃນທຸກເວລາ ແລະ ໃນທຸກສິ່ງ, ແລະ ໃນທຸກບ່ອນ.10
ຂະນະທີ່ເຮົາພະຍາຍາມໃຫ້ເໝາະສົມຕໍ່ຄວາມສູງສົ່ງ,11 ເຮົາຈະທະນຸຖະໜອມຂອງປະທານແຫ່ງການກັບໃຈ12 ແລະ ສະແຫວງຫາທີ່ຈະພັດທະນາຕົວເອງໃນແຕ່ລະວັນ.13 ດ້ວຍສັດທາ,14 ເຮົາຈະເພີ່ມຄວາມເຂັ້ມແຂງໃຫ້ແກ່ບ້ານເຮືອນ ແລະ ຄອບຄົວຂອງເຮົາ,15 ເຮັດ ແລະ ຮັກສາພັນທະສັນຍາທີ່ສັກສິດ,16 ແລະ ຮັບເອົາພິທີການ17 ແລະ ພອນຂອງພຣະວິຫານທີ່ສັກສິດ.18
ໃຫ້ສັງເກດຄຳທີ່ປ່ຽນຈາກ “ພວກເຮົາ” ເປັນ “ເຮົາ.” ຄວາມຈິງເຫລົ່ານີ້ກ່ຽວຂ້ອງກັບພວກເຈົ້າເປັນສ່ວນຕົວ. ພວກເຈົ້າ ເປັນ ທິດາທີ່ຮັກຫອມຂອງພຣະບິດາມານດາເທິງສະຫວັນ. ພວກເຈົ້າ ເປັນ ສານຸສິດແຫ່ງພັນທະສັນຍາຂອງພຣະຜູ້ຊ່ວຍໃຫ້ລອດ, ພຣະເຢຊູຄຣິດ. ຂ້າພະເຈົ້າເຊື້ອເຊີນພວກເຈົ້າໃຫ້ສຶກສາ ແລະ ໄຕ່ຕອງຖ້ອຍຄຳເຫລົ່ານີ້. ຂ້າພະເຈົ້າຮູ້ຈັກ ດັ່ງທີ່ພວກເຈົ້າຮູ້ຈັກ, ພວກເຈົ້າຈະໄດ້ຮັບປະຈັກພະຍານເຖິງຄວາມຈິງຈາກຖ້ອຍຄຳເຫລົ່ານີ້. ການເຂົ້າໃຈຄວາມຈິງເຫລົ່ານີ້ຈະປ່ຽນວິທີທີ່ພວກເຈົ້າປະເຊີນກັບການທ້າທາຍ. ການຮູ້ຈັກເອກະລັກ ແລະ ຈຸດປະສົງຂອງພວກເຈົ້າເອງ ຈະຊ່ວຍພວກເຈົ້າເຮັດໃຫ້ຄວາມປະສົງຂອງພວກເຈົ້າ ສອດຄ່ອງກັບພຣະປະສົງຂອງພຣະຜູ້ຊ່ວຍໃຫ້ລອດ.
ພວກເຈົ້າຈະມີຄວາມສະຫງົບ ແລະ ໄດ້ຮັບການນຳພາ ຂະນະທີ່ພວກເຈົ້າຕິດຕາມພຣະເຢຊູຄຣິດ.
ຫ້ອງຮຽນກຸ່ມຍິງໜຸ່ມ
ການປ່ຽນແປງຢ່າງທີສອງ ແມ່ນກ່ຽວກັບຫ້ອງຮຽນກຸ່ມຍິງໜຸ່ມ. ແອວເດີ ນຽວ ເອ ແມ໊ກສະແວວ ໄດ້ກ່າວວ່າ, “ສ່ວນຫລາຍແລ້ວ ສິ່ງທີ່ຜູ້ຄົນຕ້ອງການຫລາຍທີ່ສຸດ ຄືການຖືກປົກປ້ອງຈາກມໍລະສຸມຊີວິດ ໃນບ່ອນຫລົບໄພທີ່ເຂົາເຈົ້າຮູ້ສຶກອົບອຸ່ນ.”19 ຫ້ອງຮຽນຂອງພວກເຮົາຈະຕ້ອງເປັນບ່ອນຫລົບໄພຈາກມໍລະສຸມ, ເປັນສະຖານທີ່ແຫ່ງຄວາມຮັກ ແລະ ຄວາມອົບອຸ່ນ ທີ່ປອດໄພ. ໃນຄວາມພະຍາຍາມທີ່ຈະສ້າງຄວາມເປັນນ້ຳໜຶ່ງໃຈດຽວກັນທີ່ດີກວ່າເກົ່າ, ເພີ່ມຄວາມເຂັ້ມແຂງໃຫ້ແກ່ການເປັນເພື່ອນ, ແລະ ເພີ່ມຄວາມຮູ້ສຶກທີ່ອົບອຸ່ນຢູ່ໃນອົງການຍິງໜຸ່ມ, ພວກເຮົາຈຶ່ງໄດ້ທຳການປ່ຽນແປງບາງຢ່າງ ໃນໂຄງສ້າງຂອງຫ້ອງຮຽນ.
ເປັນເວລາຫລາຍກວ່າ 100 ປີມາແລ້ວ, ທີ່ກຸ່ມຍິງໜຸ່ມໄດ້ຖືກແຍກອອກເປັນສາມຫ້ອງ. ເລີ່ມຕົ້ນທັນທີ, ພວກເຮົາຂໍເຊື້ອເຊີນຜູ້ນຳກຸ່ມຍິງໜຸ່ມ ແລະ ອະທິການໃຫ້ພິຈາລະນາດ້ວຍການອະທິຖານ ເຖິງຄວາມຕ້ອງການຂອງຍິງໜຸ່ມແຕ່ລະຄົນ ແລະ ຈັດເຂົາເຈົ້າ ອີງຕາມສະຖານະການໂດຍສະເພາະຂອງຫວອດ. ຕໍ່ໄປນີ້ແມ່ນຕົວຢ່າງຂອງຫ້ອງຮຽນ.
-
ຖ້າຫາກທ່ານມີຍິງໜຸ່ມຈຳນວນໜ້ອຍ, ທ່ານສາມາດໃຫ້ຍິງໜຸ່ມທຸກຄົນຮຽນຢູ່ໃນຫ້ອງດຽວກັນ.
-
ບາງທີຈຳນວນຂອງກຸ່ມຍິງໜຸ່ມອາຍຸ 12 ປີ ມີຫລາຍກວ່າ ຈຳນວນກຸ່ມຍິງໜຸ່ມທີ່ມີອາຍຸສູງກວ່າ. ທ່ານສາມາດຈັດສອງຫ້ອງ: ຫ້ອງໜຶ່ງແມ່ນສຳລັບ ກຸ່ມຍິງໜຸ່ມອາຍຸ 12 ປີ ແລະ ອີກຫ້ອງໜຶ່ງແມ່ນສຳລັບກຸ່ມຍິງໜຸ່ມອາຍຸ 13–18 ປີ.
-
ຫລື ທ່ານມີຫວອດໃຫຍ່ ທີ່ມີຈຳນວນຍິງໜຸ່ມເຖິງ 60 ຄົນທີ່ມາໂບດ, ທ່ານສາມາດຈັດຫົກຫ້ອງ, ແຕ່ລະຫ້ອງໃຫ້ຈັດຕາມອາຍຸ.
ບໍ່ວ່າຫ້ອງຮຽນຂອງພວກເຈົ້າຈະເປັນແບບໃດກໍຕາມ, ແຕ່ພວກເຈົ້າຜູ້ເປັນຍິງໜຸ່ມ ມີຄວາມສຳຄັນຫລາຍໃນການສ້າງຄວາມເປັນນ້ຳໜຶ່ງໃຈດຽວກັນ. ຈົ່ງເປັນແສງສະຫວ່າງໃຫ້ຜູ້ທີ່ຢູ່ອ້ອມຮອບພວກເຈົ້າ. ຈົ່ງເປັນແຫລ່ງແຫ່ງຄວາມຮັກ ແລະ ຄວາມຫ່ວງໃຍ ດັ່ງທີ່ພວກເຈົ້າຢາກໄດ້ຮັບຈາກຄົນອື່ນ. ດ້ວຍຄຳອະທິຖານຢູ່ໃນໃຈ, ຈົ່ງເອື້ອມອອກໄປ ແລະ ເປັນພະລັງໃນທາງດີ. ເມື່ອພວກເຈົ້າເຮັດແນວນັ້ນ, ຊີວິດຂອງພວກເຈົ້າຈະເຕັມໄປດ້ວຍຄວາມເມດຕາປານີ. ພວກເຈົ້າຈະຮູ້ສຶກດີຕໍ່ຄົນອື່ນ ແລະ ຈະເລີ່ມຕົ້ນເຫັນຄວາມດີຂອງເຂົາເຈົ້າໃນການຕອບແທນ.
ຊື່ຫ້ອງຮຽນກຸ່ມຍິງໜຸ່ມ
ສາມ, ດ້ວຍການຈັດຕັ້ງຫ້ອງຮຽນໃໝ່ນີ້, ທຸກຫ້ອງຈະຖືກເອີ້ນໃນຊື່ດຽວກັນຄື “ກຸ່ມຍິງໜຸ່ມ.”20 ພວກເຮົາຈະເຊົາໃຊ້ຄຳວ່າ “ດາລຸນີ,” “ໄມເມດ,” ແລະ “ກຸນລະສະຕີ.”
ໃຫ້ຄວາມເຂັ້ມແຂງແກ່ຝ່າຍປະທານຫ້ອງ
ການປ່ຽນແປງຢ່າງສຸດທ້າຍ ທີ່ຂ້າພະເຈົ້າຈະກ່າວເຖິງ ແມ່ນຄວາມສຳຄັນຂອງຝ່າຍປະທານຫ້ອງ. ບໍ່ວ່າຫ້ອງຮຽນກຸ່ມຍິງໜຸ່ມຈະຖືກຈັດຂຶ້ນໃນແບບໃດກໍຕາມ, ທຸກຫ້ອງຕ້ອງມີຝ່າຍປະທານຫ້ອງ!21 ມັນເປັນແບບແຜນຈາກສະຫວັນ ທີ່ໃຫ້ເອີ້ນຍິງໜຸ່ມເປັນຜູ້ນຳ ໃນໄວເຍົາຂອງເຂົາ.
ບົດບາດ ແລະ ຈຸດປະສົງຂອງຝ່າຍປະທານຫ້ອງໄດ້ຖືກດັດແປງໃຫ້ດີຂຶ້ນ ແລະ ແຈ່ມແຈ້ງກວ່າເກົ່າ. ວຽກງານແຫ່ງຄວາມລອດ ເປັນໜ້າທີ່ຮັບຜິດຊອບຢ່າງໜຶ່ງທີ່ສຳຄັນຫລາຍ, ໂດຍສະເພາະໃນເລື່ອງການປະຕິບັດສາດສະໜາກິດ, ວຽກງານເຜີຍແຜ່, ແລະ ວຽກງານພຣະວິຫານ ແລະ ປະຫວັດຄອບຄົວ.22 ແມ່ນແລ້ວ, ນີ້ຄືວິທີທີ່ເຮົາເຕົ້າໂຮມອິດສະຣາເອນ23—ເປັນວຽກງານທີ່ສະຫງ່າລາສີ ສຳລັບຍິງໜຸ່ມທຸກຄົນ ໃນຖານະສະມາຊິກຂອງກອງທັບຊາວໜຸ່ມຂອງພຣະຜູ້ເປັນເຈົ້າ.
ດັ່ງທີ່ພວກເຈົ້າຮູ້, ໃນທຸກລະດັບຂອງສາດສະໜາຈັກ, ພຣະຜູ້ເປັນເຈົ້າໄດ້ເອີ້ນຝ່າຍປະທານໃຫ້ນຳພາຜູ້ຄົນຂອງພຣະອົງ. ຍິງໜຸ່ມທັງຫລາຍ, ການເປັນສະມາຊິກໃນຝ່າຍປະທານຫ້ອງ ອາດເປັນໂອກາດທຳອິດຂອງພວກເຈົ້າ ທີ່ຈະມີພາກສ່ວນໃນແບບແຜນທີ່ດົນໃຈຂອງການເປັນຜູ້ນຳ. ຜູ້ນຳຜູ້ໃຫຍ່ທັງຫລາຍ, ຈົ່ງໃຫ້ການເອີ້ນຝ່າຍປະທານຫ້ອງມີຄວາມສຳຄັນອັນດັບໜຶ່ງ ແລະ ແລ້ວໃຫ້ນຳພາຄຽງຂ້າງໄປກັບເຂົາເຈົ້າ, ໃຫ້ຄຳແນະນຳ ແລະ ການຊີ້ນຳເຂົາເຈົ້າ ເພື່ອວ່າເຂົາເຈົ້າຈະປະສົບຄວາມສຳເລັດ.24 ບໍ່ວ່າລະດັບປະສົບການຂອງການເປັນຜູ້ນຳໃນຝ່າຍປະທານຫ້ອງຈະເປັນແນວໃດກໍຕາມ, ໃຫ້ເລີ່ມຕົ້ນໃນຈຸດທີ່ເຂົາເຈົ້າຢູ່ ແລະ ຊ່ວຍເຂົາເຈົ້າພັດທະນາຄວາມຊຳນານ ແລະ ຄວາມໝັ້ນໃຈ ທີ່ຈະເປັນພອນໃຫ້ແກ່ເຂົາເຈົ້າ ໃນຖານະຜູ້ນຳ. ຈົ່ງຢູ່ໃກ້ເຂົາເຈົ້າ, ແຕ່ຢ່າກ້າວກ່າຍ. ພຣະວິນຍານຈະນຳພາທ່ານ ຂະນະທີ່ທ່ານນຳພາເຂົາເຈົ້າ.
ໃນການສາທິດບົດບາດທີ່ສຳຄັນຂອງພໍ່ແມ່ ແລະ ຜູ້ນຳ ໃນຖານະຜູ້ໃຫ້ຄຳແນະນຳ, ຂ້າພະເຈົ້າຈະເລົ່າເລື່ອງໜຶ່ງໃຫ້ທ່ານຟັງ. ນາງຄະໂລອີ ໄດ້ຖືກເອີ້ນໃຫ້ເປັນປະທານຫ້ອງ. ຜູ້ນຳຖານະປະໂລຫິດທີ່ສະຫລາດຂອງນາງ ໄດ້ຊຸກຍູ້ນາງໃຫ້ສະແຫວງຫາຄວາມຊ່ວຍເຫລືອຈາກພຣະຜູ້ເປັນເຈົ້າ ໃນການແນະນຳຊື່ສຳລັບຝ່າຍປະທານຫ້ອງ. ນາງຄະໂລອີ ໄດ້ອະທິຖານ ແລະ ໄດ້ຮັບການດົນໃຈທັນທີ ກ່ຽວກັບຜູ້ທີ່ນາງຄວນແນະນຳ ໃຫ້ເປັນທີ່ປຶກສາຂອງນາງ. ຂະນະທີ່ນາງໄຕ່ຕອງ ແລະ ອະທິຖານກ່ຽວກັບເລຂາ, ພຣະວິນຍານໄດ້ໃຫ້ນາງຄິດແລ້ວຄິດອີກກ່ຽວກັບຍິງໜຸ່ມຄົນໜຶ່ງ ຈົນນາງປະຫລາດໃຈ—ຜູ້ທີ່ບໍ່ເຫັນໄປໂບດ ຫລື ໄປຮ່ວມກິດຈະກຳຫລາຍປານໃດ.
ໂດຍທີ່ຮູ້ສຶກບໍ່ແນ່ໃຈກັບການກະຕຸ້ນນັ້ນ, ນາງຄະໂລອີ ຈຶ່ງໄດ້ເວົ້າລົມກັບແມ່, ຜູ້ໄດ້ອະທິບາຍວ່າ ວິທີໜຶ່ງທີ່ເຮົາສາມາດໄດ້ຮັບການເປີດເຜີຍ ແມ່ນຜ່ານທາງການຄິດແລ້ວຄິດອີກ. ດ້ວຍຄວາມໝັ້ນໃຈໃໝ່, ນາງຄະໂລອີ ໄດ້ຮູ້ສຶກວ່າ ນາງສາມາດແນະນຳຍິງໜຸ່ມຄົນນີ້. ອະທິການກໍໄດ້ເອີ້ນນາງ, ແລະ ນາງກໍໄດ້ຮັບເອົາ. ຫລັງຈາກໄດ້ຮັບການແຕ່ງຕັ້ງເປັນທາງການແລ້ວ, ເລຂາທີ່ອ່ອນຫວານຄົນນີ້ໄດ້ເວົ້າວ່າ, “ທ່ານຮູ້ບໍ, ຂ້ານ້ອຍບໍ່ເຄີຍຮູ້ສຶກວ່າຂ້ານ້ອຍມີບ່ອນ ຫລື ເປັນທີ່ຕ້ອງການໃນບ່ອນໃດ. ຂ້ານ້ອຍບໍ່ເຄີຍຮູ້ສຶກເໝາະກັບກຸ່ມ. ແຕ່ດ້ວຍການເອີ້ນນີ້, ຂ້ານ້ອຍຮູ້ສຶກຄືກັບວ່າພຣະບິດາເທິງສະຫວັນ ມີຈຸດປະສົງ ແລະ ມີບ່ອນສຳລັບຂ້ານ້ອຍ.” ຂະນະທີ່ນາງຄະໂລອີ ກັບແມ່ກຳລັງອອກຈາກການປະຊຸມ, ນາງຄະໂລອີໄດ້ຫັນໄປຫາແມ່ ແລະ ດ້ວຍນ້ຳຕາຄາປໍ້ນາງເວົ້າວ່າ, “ການເປີດເຜີຍມີຈິງ! ການເປີດເຜີຍເປັນຜົນແທ້ໆ!”
ຝ່າຍປະທານຫ້ອງທັງຫລາຍ, ພວກເຈົ້າໄດ້ຖືກເອີ້ນຈາກພຣະເຈົ້າ ແລະ ໄດ້ຮັບຄວາມໄວ້ວາງໃຈ ໃຫ້ນຳພາກຸ່ມທິດາຂອງພຣະອົງ. “ພຣະຜູ້ເປັນເຈົ້າຮູ້ຈັກພວກເຈົ້າ. … ພຣະອົງໄດ້ເລືອກເອົາພວກເຈົ້າ.”25 ພວກເຈົ້າໄດ້ຮັບ ການແຕ່ງຕັ້ງເປັນທາງການ ໂດຍຜູ້ທີ່ມີສິດອຳນາດຂອງຖານະປະໂລຫິດ; ຊຶ່ງໝາຍຄວາມວ່າ ຂະນະທີ່ພວກເຈົ້າປະຕິບັດໜ້າທີ່ການເອີ້ນຂອງພວກເຈົ້າ, ພວກເຈົ້າຈະໃຊ້ສິດອຳນາດຂອງຖານະປະໂລຫິດນັ້ນ. ພວກເຈົ້າມີວຽກງານທີ່ສຳຄັນ ທີ່ຈະເຮັດ. ຈົ່ງມີຄວາມຮູ້ສຶກໄວ ແລະ ກະທຳຕາມການກະຕຸ້ນຂອງພຣະວິນຍານບໍລິສຸດ. ເມື່ອພວກເຈົ້າເຮັດແນວນັ້ນ, ພວກເຈົ້າຈະສາມາດຮັບໃຊ້ດ້ວຍຄວາມໝັ້ນໃຈ, ເພາະພວກເຈົ້າບໍ່ໄດ້ຮັບໃຊ້ຕາມລຳພັງ!
ປະທານຫ້ອງທັງຫລາຍ, ພວກເຮົາຕ້ອງການ ສະຕິປັນຍາ, ສຽງ, ແລະ ພະລັງຂອງພວກເຈົ້າ ໃນສະພາຊາວໜຸ່ມໃໝ່ຂອງຫວອດ ດັ່ງທີ່ ແອວເດີ ຄວິນຕິນ ແອວ ຄຸກ ໄດ້ປະກາດໃນມື້ນີ້. ພວກເຈົ້າເປັນພາກສ່ວນທີ່ສຳຄັນ ຂອງຄຳຕອບຕໍ່ການສະໜອງຄວາມຕ້ອງການຂອງອ້າຍເອື້ອຍນ້ອງຂອງພວກເຈົ້າ.26
ການປ່ຽນແປງເຫລົ່ານີ້ ໃນການຈັດຕັ້ງຫ້ອງຮຽນ ແລະ ການເປັນຜູ້ນຳ ສາມາດເລີ່ມຕົ້ນ ທັນທີທີ່ຫວອດ ແລະ ສາຂາ ພ້ອມແລ້ວ ແຕ່ຄວນເລີ່ມຕົ້ນບໍ່ໃຫ້ກາຍວັນທີ 1 ເດືອນມັງກອນ, 2020.
ເອື້ອຍນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າເປັນພະຍານວ່າ ການປ່ຽນແປງເຫລົ່ານີ້ ທີ່ຂ້າພະເຈົ້າກ່າວໃນມື້ນີ້ ເປັນການຊີ້ນຳທີ່ດົນໃຈຈາກພຣະຜູ້ເປັນເຈົ້າ. ເມື່ອເຮົານຳເອົາການປ່ຽນແປງເຫລົ່ານີ້ໄປໃຊ້ຢ່າງພາກພຽນ, ຂໍໃຫ້ເຮົາຈົ່ງຢ່າລືມຈຸດປະສົງຂອງເຮົາ ນັ້ນຄື: ທີ່ຈະເພີ່ມຄວາມເຂັ້ມແຂງໃຫ້ແກ່ການຕັດສິນໃຈຂອງເຮົາ ທີ່ຈະຕິດຕາມພຣະເຢຊູຄຣິດ ແລະ ຊ່ວຍຄົນອື່ນໃຫ້ມາຫາພຣະອົງ. ຂ້າພະເຈົ້າເປັນພະຍານວ່າ ນີ້ແມ່ນສາດສະໜາຈັກຂອງພຣະອົງ. ຂ້າພະເຈົ້າມີຄວາມກະຕັນຍູຫລາຍ ທີ່ພຣະອົງອະນຸຍາດໃຫ້ເຮົາມີພາກສ່ວນໃນວຽກງານທີ່ສັກສິດຂອງພຣະອົງ.
ຂ້າພະເຈົ້າອະທິຖານວ່າ ພຣະວິນຍານດຽວກັນນັ້ນ ທີ່ນຳພາການປ່ຽນແປງເຫລົ່ານີ້ ຈະນຳພາທ່ານ ຂະນະທີ່ທ່ານດຳເນີນໄປໜ້າ ໃນເສັ້ນທາງແຫ່ງພັນທະສັນຍາ. ຂ້າພະເຈົ້າເປັນພະຍານ ໃນພຣະນາມຂອງພຣະເຢຊູຄຣິດ, ອາແມນ.