Ekkewe Feiochun Ngun

Kinisou ren ena murinon kon. Nupwen sia uta meinisin ne konu ena kon, “Sia kinisou, O Kot, ren noum Soufos,” mi wor ruu ekiek amen pochokun a tonong non ekieki. Eu usun ewe Soufos Joseph Smith, ewe soufosun ei kinikinin fansoun. Ai tong me ai mwareiti a fokkun wateno iteiten ran. Ewe oruwan ekiek a nonom rei nupwen ua nengeni punuwei we, nei kewe nengin, noun nei kewe nengin, me noun noun nei kewe nengin. Mefiei pwe ua ekieki pwe ami meinisin chochon ai famini.

Fitu maram ano, nesoponon eu mwichen tempel endowment, ua ereni punuwei we, “Ua anean amwo ekkewe fefin ra weweiti ekkewe feiochun ngun a wor non ewe tempel.” Fefinei kana, ua kan ekieki kemi iteitan, pachonong ekkewe ruu maram rano nupwen aua no Harmony, Pennsylvania, me Wendy.

A iei oruen am etino ikena. Ekkena ruu fansoun aua etino amen unusen kuu netipem nupwen aua fetan won ewe puun mi pin. Non Harmony John ewe soupaptais a pwa ngeni Joseph Smith me eniwinato ewe Pristut seni Aaron.

Ikewe ie ekkewe Aposel Peter, James, me John ra pwa me eniwinato ewe Pristut seni Melkesitik.

Non Harmony Emma Hales Smith ewe a aninis an punuwan we akaewin angang nupwen ewe Soufos Joseph a chiakuni ewe Puken Mormon.

Non Harmony Joseph ewe a angei an pwarata seni ewe Samon ren an angang ngeni Emma. Ewe Samon a aiti ngeni Emma an epwe awewei ekkewe pukefel me apochokuna ewe Mwichefen, an epwe angei ewe Ngun mi Fel, me anapano an fansoun ne kaeo. Emma apwan pesepes an epwe “nikitano metochun ei fonufan me kutta ekkewe mettoch mi murino” me komochunuk won an kewe pwon ngeni Kot. Ewe Samon a asopwano An kapasen aurour ren ekkei kapas: “Iei ai kapas ngeni kemi meinisin.”¹

Mettoch meinisin a fis non Harmony a awora kinamwe non manauom. Ewe niwinsefaniton ewe pristut, fiti an ewe Samon we aurour ngeni Emma, a tongeni emweni me efeiochu emon me emon. Ua fokkun mochen om kopwe weweiti pwe ewe niwinsefaniton ewe pristut a fokkun auchea ngeni kemi kana fefin usun chok pwan ekkewe mwan. Pokiten ewe niwinsefaniton ewe Pristut seni Melkesitik, mwan me fefin minne ra aponueta pwon mi pin ra tongeni angei “meinisinekkewe efeiochun ngun mi fel ren ewe mwichefen”² ika, sipwe fen apasa, ngeni meinsin ekkewe feiochun ngun mi fel mine ewe Samon a ngeni Noun semirit.

Fefin me mwan meinisin mine ra fori ekkewe pwon mi pin ngeni Kot me aponueta ekkena pwon mi pin, me ekkewe ra aponueta me nimenimoch non pusin annukun pristut, ewe a wor an tufich angei ewe manamanen Kot. Ekkewe mine ra fen angei ar kewe feioch non imwen ewe Samon we me ra angei ewe niffangen an Kot manamanen ewe pristut pokiten ar pwon mi pin, fiti ewe niffangen sinenapei anen ar repwe kommoch ena manaman.

Nang mi fokkun suuk ngeni fefin ekkewe rafen endowed ren an Kot manaman mi feito seni ar pwon mi pin non ewe pristut usun chok ekkewe mwan ekkewe ra angei ewe pristut. Ua iotek pwe ewe ennet epwe siwini netipemi pwe ua nuku pwe epwe ekesiwini manauom. Fefinei kana, mi wor om mumuta om kopwe aea an ewe Chon Amanau we manaman ne anisi om famini me ekkewe ka tonger.

Iei, eni kopwe apasa pwe, “Amen fokkun murino, nge epwe ifa usun ai upwe fori? Ifa usun ai upwe ani an ewe Chon Amanau we manaman non manauei?”

Kosapw kuna ei sokkun foffor epwe mak non eu puk. Ewe Ngun mi Fel mine epwe anisuk nupwen kopwe kukuta om kopwe weweiti met ewe Samon a mochen kopwe sinei me fori. Ei foffor ese mwitir ika mecheres, nge iei ewe amefien ngun mi fel. Met akon fen amwarar nap seni ach sipwe angang ren ewe Ngun mi Fel ren ach sipwe weweiti manamanen Kot—manamanen pristut?

Met upwe tongeni oronuk pwe anen om kopwe aani ewe manamanen Kot non manauom kopwe chok pwan fori metekewe ewe Samon a auroura ngeni Emma epwe fori pwan ami opwe pwan fori.

Iwe, upwe etiwa kemi ami opwe fokkun kaeo me ioteki sopun 25 ren ewe Doctrine and Covenants me opwe kuna met ewe Ngun mi Fel epwe aiti ngeni kemi. Pusin om otures non pekin ngun epwe awora ngonuk om pwapwa, weweiti, me aea ewe manaman ren met kafen angei.

Masowen om otures epwe awora ngonuk om kopwe nikitano chommong mettochun ei fonufan. Fan ekkoch sia kan apasa usun ach sia omonungaw seni mettochun ei fonufan ren ach sise tipeeu ngeni, sosotun etiwetiwengaw, me kapas chofona. Nge ennetin fofforun a anisuk om kopwe nengeni fichi manauom om kopwe monefich me fori iteitan. Nupwen ka fori ekkei, ewe Ngun mi Fel epwe ait ngonuk met ese chiwen namot, met ese namot ngeni om fansoun me om pochokun.

Nupwen ka okunano om ekiek seni metochun ei fonufan, met epwene kon auchea ngonuk iei kopwene chok ekieki met akon namot ngonuk. Ka tongeni om kopwe apasa apw ngeni och mettoch, ina mwo ika rese nikinikin efeiengaw. Nupwen ka apochokuna om ekiek me sopwosopwono non ei manau ren om nikitu ngeni ewe Samon, ewe ekesiwin non manauom me memef, me kopwe fokkun mwar ren ewe manamanen ewe ngun mi fel!

Iei ekis kapasen anukunuk. Mi wor ion epwe epitano om kopwe kutta ewe manaman an Kot. Mi wor ekkoch repwe fori om kopwe tipemwaramwar me ekisano om we manauen achifouwa usun emon fefin mi murino.

Napengeni, ewe chon otupwutup ese mochen kopwe weweiti om kewe pwon mi pin ka fori nupwen om we paptais ika ewe feiochun sinei ren om weiweiti me manaman ka angei ika kopwe angei non ewe tempel—imwen ewe Samon. Me Setan a fokkun mochen pwe kosapw weweiti pwe iteitan om kopwe nimenimoch ne angang me fan non ewe tempel, ka mut ngeni ewe manamanen Kot me Noun kewe chon nang repwe wisen “nemenuk”.³

Setan me noun kewe sounfiu repwe chok fokkun achocho ne atupwakono om kosapw weweiti ekkewe niffangen ngun met ekkewe kafen angei me ka tongeni kuna feioch ren. Ewer mi pung, ekkoch anen epet epwe fis seni tipisin emon. A aworato ai netipengaw nupwen ua ekieki pwe ekkoch me neimi repwe mefi pwe ra chok echim ika pwe rese fen nukku ewe souemwenin pristut, ika rafen riafou ika amwam me ren punuwer, semenap, ika fen chiener. Ua men unusen netipengaw ika pwe ekkoch me neimi oua mefi pwe mi towaw, ese wor sufonun, me uren esit. Ekkei sokkun napanap ese fich me fan mesen Kot.

Porous murino, ekan apochokuna ei nupwen ua sinei pwe ekkewe souemwenin pristut ra achocho ne kutta met ekkewe fefin non ward me mwichen steik ra fori. Ua men mwar nupwen emon mwan mi pupunu nupwen epwe apasa pwe wisan akon auchea ren pristut an epwe tumunu punuwan.⁴ Ua mwareiti ena mwan ion mine a unusen sufoniti auchean punuwan an epwe angei an pwarata me sufoniti i pwe ir chiechi mi chok taitap non ar pupunu fengen.

Nupwen emon mwan epwe weweiti ewe ningochun me manamanen emon fefin Mi Pin non Fansoun Soponon mi tupwen, kutta, me mi fen angei an endowment, ua ekieki epwe fen mefi an epwe uta nupwen ewe fefin a tonong non ewe rum?

Seni nepoputan ewe fansoun, fefin rafen feioch ren eu auchean emwen non manauach—ewe tufichin sinei och seni ngaw. Ei niffang a nonom ren ekkewe ra fori me aponueta ekkewe annuk. Me ese tongeni epwe nonomw ren ekkewe ra ungeni an Kot kewe annuk.

Upwe mwitir ne apachata pwe use apasa pwe mwan rese pwan tufich ngeni an Kot kewe angang faniter ren ar repwe pwan sinei nefinen och me ngaw. Nge fefinei kana achengicheng, ami tufichin sinei ewe ennet seni met mi mwan, ami chon masen manauach iei non ekkei fansoun, a fokkun auchea non ei fansoun soponon. Me sia epinukunuku ngonuk om kopwe aiti ekkoch usun ekkei mettoch. Mut ngeni ei upwe afata ochu ei porous: ika pwe ese wor ekkei sokkun fefin won ei fonufan, ei fonufan ese tongeni epwe fisioch.

Kich chon Aramas mi Pin non Fansoun Soponon esapw kich chon ei fonufan; kich chon Israel mi pwon. Sia koko ngeni ach sipwe amonata aramas ren ewe Oruen Niwinsefanito an ewe Samon.

Iei, upwe afataochu ekkoch mettoch akon auchea ren fefin me pristut. Nupwen ka angei wisom ren om kopwe aninis non eu wis fan emwenien emon mi komoch ekkewe kien pristut—ren noum we pisop ika presetenin steik—a ngonuk ewe mumuta seni ewe pristut ren om kopwe fori ewe wis.

Usun chok, non ewe tempel mi pin ka pwan angei ekkewe mumuta seni pristut ren om kopwe fori me angang non ekkewe annukun pristut iteitan ka fiti. Om tempel endowment a amonaketa om kopwe fori

Ika pwe ka endowed nge kose mwo awen punuweni emon mwan a komoch ewe pristut me emon a apasa ngonuk, “Omusano pwe ese wor pristut non imwom we,” kose mochen kopwe weweiti pwe ena porous mi mwan. Enipw ese wor reom chon komoch ewe pristut non imwom we, nge kafen fori pwon mi pin ren Kot non An tempel. An mumutan pristut a feito ngonuk seni ekkewe pwon mi pin ka fen fori. Me chechemeni, ika punuwom we a mano, en kopwe wisen nemeni imwom we.

Usun ewe mi wenechar, endowed ren fefin Mi Pin non Fansoun Soponon, kopwe kapas me asukusun ren manaman me mumuta seni Kot. Ren kapas pesepes are aporous, nouwom ne asukuna ewe annuk an Kraist a fokkun auchea ngeni kich. A auchea ngeni kich om aninis non famini, wart, me mwichen steik. Om aninis amen fokkun auchea ese tongeni epwe namot mwan!

Fefinei kana achengicheng, om pochokun are manaman epwe watteno ika ka anisi ekkoch. Om iotek, echikifen, fansoun ne anea pukefel, aninis non tempel, me angangen uruon famini epwe suk ngonuk ewe asamen nang.

Upwe pese ngonuk om kopwe kaeo me iotek fansoun meinisin ewe ennet ka tongeni kuna usun manamanen ewe pristut. Kopwe poputa ren Doctrine and Covenants sopun 84 me 107. Ekkena sopun epwe emwenuk ngeni pwan ekkoch wokisin. Ekkewe pukefel me ekkewe osukun seni ekkewe soufos, chon osini, me chon pwarata a wor rer ekkei ennet. Om weweiti epwe wateno me om we angangen nuku non ewe Samon me An manamanen pristut, om tufichin arapakan ngeni ekkewe feiochun ngun mine ewe Samon a awora ngonuk epwe wateno. Ika pwe ka fori ekkei, kopwe tongeni kuna om tufichin aninis ne forata eu famini esemuch epwe chufengen, ririfengen non ewe tempel an ewe Samon, me ureno ren om tongei Samach won Nang me Jises Kraist.

Meinisin ach angangen iamwiri ngeni ekkoch, epwe pwarata ewe kapas allim, unusochun ekkewe Souneng, me angasano ngunun ekkewe mi mano me non ewe tempel mi pin. Iei a 166 ach tempel non unusen fonufan, me chommong epwe pwan wor.

Ren ami opwe sinei, ewe Salt Lake Tempel, Tempel Square, me ewe neni unukun ewe Church Office Building ra nomw non kokoten forsefan epwe poputa nesoponon ei ier. Ei tempel mi pin epwe kawor me moneta faniten ekkewe minefon tappin aramas non kan fansoun mwach, usun chok an anisi kich non ach ei fansoun.

Nupwen ewe Mwichefen a mamarita, chommong tempel repwe kouta pwe epwe pwan chommong famini repwe angei ekkewe wachepuken feioch, ren manau ese much.⁵ Sia esina ekkewe tempel pwe eu imw mi napanapan auchea non ewe Mwichefen. Nupwen eu kokotun kouta tempel a katou, a fokkun unusen auchea me non porousen ach mwichefen. Usun am aua porous usun nepwinei, ami fefinei kana oua fokkun unusen auchea ngeni ewe angangen ewe tempel, me ewe tempel ikewe ie oupwe angei ami kewe feiochun ngun mi tekia.

Ose mochen rongorong och me mosonoson nupwen upwe atou porousen wanu minefo tempel ra nomw non kokot ar repwe kouta. Ika pwe mi wor eu mi katou non eu neni mi auchea ngonuk upwe tingor kopwe chapetiw non iotek ren kinisou non netipom. Sia fokkun kinisou ne mochen kapas won kokotun forutan ekkewe tempel non ekei fitu neni: Freetown, Sierra Leone; Orem, Utah; Port Moresby, Papua New Guinea; Bentonville, Arkansas; Bacolod, Philippines; McAllen, Texas; Cobán, Guatemala; me Taylorsville, Utah. Kinisou ngeni kemi, fefinei kana achengicheng. Sia ennetin kinisou ngeni ami angang fan iten ei kokot me ami mosonosonun ponueni.

Iei, nesoponon ai afanafan, ua mochen upwe isetiw eu feioch womi, pwe kopwe weweiti manamanen ewe pristut ren ewe kafen endowed me kopwe komochunuk won ena manaman ren om anganga om nuku non ewe Samon me An manaman.

Fefinei kana achengicheng, ren unusen ai sufon me kinisou, ua pwarata ai tong ngeni kemi. Tipetekisonen netipei, ua pwarata pwe Kot mi manau! Jises ii ewe Kraist. Iei An Mwichefen. Ua pwarata non itan Jises Kraist mi pin, amen.