Afanafanen Nesoponon

Pwi me fefninei mi acheingicheing, ren ach sia tori nesoponon ei mwichenap mi amwarar, sia kinisou ngeni ewe Samon ren An pwarata non afanafan me kon me tumun. Sia ennetin apwapwaiti ei kamatipen ngun.

Sia sinei ewe kapas allimen Jises Kraist mi niwinsefanito epwe awora epinukunuk me pwapwa ngeni aramas repwe ausening ngeni me apwonueta An kewe annuk. Sia pwan sinei pwe imw meinisin mi tongeni winiti ennetin eu nenien nuku, minne kinamwe, tong, me ewe Ngunun ewe Samon epwe nonnom.

Ennet, ewe tempel mi pin ina napanapan ewe Niwinsefanito. Ekkewe feioch me pwon mi pin mi namwot ren ammonatan aramas mi mochen etiwa ewe Chon Amanau non An Oruwan Niwinsefan. Iei mi wor 166 tempel mi pinino, me epwene pwan wor ekkoch.

Mwichen suki imw epwe fis me mwen epinanon eu me eu tempel minefo me mi for sefan. Chommong chiechiach kewe rese fiti ach nuku repwe tonong non ekkewe tempel me repwe kaeo ekkoch mettoch usun efeiochun tempel. Me ekkoch chon fiti repwe mochen sinei pwan och. Ekkoch repwe ennetin eisini ifa usun repwe tongeni weri ekkewe feiochun ewe tempel.

Fan iten kich chon ewe Mwichefen, sipwe monnota ne pwonueni ar kapas eis. Sia tongeni aweweitiw pwe ekkewe feiochun ewe tempel mi kawor ngeni meinisin aramas mi pwisin ammonerata. Nge me mwen repwe tonong non eu tempel mi pinino, mi namwot repwe apwonueta annukun. Ewe Samon a mochen pwe meinisin Noun kewe repwe weri ekkewe feioch ese much mi kawor non An tempel. A awewe met emon me emon aramas epwe fori ne tufichin tonong non imwan mi pin.

Ew neni mi ech sipwe pwopwuta ne aitir ina ne pwarano ekkewe kapas mi mak nukun ewe tempel: “Pin ngeni ewe Samol: Ewe Imwen ewe Samon.” An Preseten Eyring poraus ikenai me pwan chommong ra pesei ngenikich ach sipwe awateno ach pin. Eu me eu tempel mi eu neni mi pin; emon me emon chon fiti tempel a achocho ne pwan pinino.

Meinisin ekkewe annukun tonong non tempel mi fich ngeni pinin pwisin emon. Ne cheki monnotan, emon me emon aramas a mochen pwapwaiti ekkewe feiochun ewe tempel epwe interfiu fan ru: akkomwan ren ewe pisop; chon aninisin pisop, are presetenin pranch; oruwan ren presetenin steik are misin are emon chon aninisin. Non ekkena interfiu, repwe eisini ekkoch kapas eis.

Ekkoch nein ekkena kapas eis mi ekkesiwin ren fatafatochun. Ua mochen aporausar fan itemi iei:

1. A wor om nuku non me a wor om kapasen pwäratä usun Kot ewe Sam mi Napanap; Noun we At, Jises Kraist; me ewe Ngun mi Fel?

2. A wor om kapasen pwäratä usun ewe Achasefan an Jises Kraist me usun Wisan pwe I ach Chon Amanau me Chon Angasano?

3. A wor om kapasen pwäratä usun ewe Niwinsefaniton ewe kapas allimen Jises Kraist?

4. En mi etiwa ewe Presetenin Ewe Mwichefenin Jises Kraist ren Aramas mi Pin non Fansoun Soponon pwe i ewe soufos, chon osini, me chon pwäratä me i ewe emon chok aramas won fonufan a mwumwuta ne anganga meinisin ekkewe kien pristut?

   En mi etiwa chon ewe Aewin Presetensi me ewe Mwichen Engon me Ruemon Aposel pwe ir soufos, chon osini, me chon pwäratä?

   En mi etiwa ekkewe pwan ekkoch Meinap Unusen me ekkewe souemwenin ewe Mwichefen non pwisin neniom?

5. Ewe Samon a apasa pwe mettoch meinisin repwe fis non nimenimoch me mwen I (Doctrine and Covenants 42:41).

   En mi achocho ngeni an epwe wor nimenimoch mi pung non om ekiek me mwokutukut?

   En mi anneasochisi ewe annukun nimenimoch?

6. En mi tapweno mwirin ekkewe asukunen ewe Mwichefenin Jises Kraist non om mwokututuk mi monomon me pwano ngeni chon om famini me ekkoch?

7. En mi etiwa ika pesei och afanafan, foffor, ika annuk mi ungeni ekkewe an ewe Mwichefenin Jises Kraist ren Aramas mi Pin non Fansoun Soponon?

8. En mi achocho ne epini ewe ranin Sabbath, non imw me non fan; fiti om kewe mwich; mwoneta ngeni me angei ewe sakrament non minenimoch; me manaueni manauom epwe fich ngeni ekkewe annukun ewe kapas allim?

9. En mi achocho kopwe wenechar non mettoch meinisin en mi fori?

10. En mi chon monatiw unusen eu ne engon?

11. En mi weweiti me anneasochisi ewe Kapasen Emirit?

12. Mi wor om pekin aninisin moni ika ekkoch pekin aninis ngeni emon punuwom akkom are noum semirit?

    Ika a wor, en mi fori wisom pwe kopwe anisir?

13. En mi anneasochisi ekkewe pwon mi pin ka fen fori me non ewe tempel, mi pachenong ufoufen ewe uf mi pin usun mi affatetiw me non ewe endowment?

14. Mi wor tipis mi anieput non manauom mi auchea an epwe wesino me ren souemwinin pristut pwe pekin om aier?

15. En mi ekieki pwe en mi nimenimoch ne tonong non imwen ewe Samon me fori ekkewe angang mi pin non tempel?

Nesor, ekkei kapas eisin tufichin tonong non tempel repwe kawor ngeni souemwenin Mwichefen non unusen ewe fonufan.

Fiti ennetin ar pwonueni ekkena kapas eis, mi weweiti pwe emon me emon chon no ngeni ewe tempel repwe ufouf ewe ufen ewe pristut mi pin fan ufer kewe. Ei minen awewen pwisin pwon ne achocho iteitan ran ne pwan winiti usun chok ewe Samon. A pwan achema ngenikich pwe sipwe wenechar iteiten ran ngeni ekkewe pwon sia fori me sipwe fetan won ewe an mi pin iteitan ran non eu napanap mi tekia me unusen pin.

Iei, ren ekkis chok, ua mochen poraus ngeni nouch kewe serafo. Sia pesei ngenikemi pwe oupwe tufich ngeni toropwen mumuta non tempel mi aukuk nounoun. Kopwe chok pwonueni ekkewe kapas eis mi fich ngonuk non om monnota ngeni ekkewe angangen papatais ren mi mano me efisano. Sia fakkun kinisou chapur ren ami nimenimoch me mochen fiti ewe angangen tempel mi pin. Aua kinisou chapur!

Pwisin nimenimoch ne tonong non imwen ewe Samon mi namwot chommong repwe pwisin ammonata non pekin ngun. Nge ren aninis seni ewe Samon, mettoch meinisin mi tufich. Non ekkoch napanap, mi mecheres ne kouta eu tempel nap seni kouta aramas mi monnota ren eu tempel. Pwisin nimenimoch mi namwot siwinin unusan ekiek me netip ne winiti usun chok ewe Samon, ne winiti emon mi pungoch, ne winiti nenien awewe, me winiti emon aramas mi pin.

Ua pwarata pwe ena sokkun angangen ammonata mi efisita chommong feiochun ei manau me feioch sise mo weweiti fan iten ewe manau epwe waroto, fiti sopwenon tettenin niwinin om famini non fansoun meinisin “non napanapan pwapwa-ese much.”¹

Iei ua sani ai upwe kun ngeni pwan ew itenap: kokkotun ei ier epwe war. Non atun ras non ewe ierin 2020, epwe ennetin 200 ier seni Joseph Smith a weri met sia iteni ewe Aewin Nemasepwi. Kot ewe Sam me Noun we At mi Achengicheng, Jises Kraist, ra pwa ngeni Joseph, emon at mi 14 ierin. Ena fansoun mi nepoputani ewe Niwinsefaniton ewe kapas allimen Jises Kraist non unusan, usun chok mi pwarano non ewe Paipel mi Pin.²

Mwirin a wor fitu mwich ren chon nang, fiti Moronai, John ewe Sou Papatais, me ekkewe Aposel Peter, James, me John. Pwan ekkoch ra tapweno mwirin, fiti Moses, Elias, me Elijah. Emon me emon a awora mumuta ar repwe efeiochu safani noun Kot kewe semirit won fonufan.

Amwararan, sia pwan weri ewe Puken Mormon: Pwan eu Kapasen Pwaratan Jises Kraist, echo chiechian pukfel me ewe Paipel mi Pin. Ekkewe pwarata mi mak non ewe puken Annuk me Pwon me ewe Fau mi Auchea ra pwan aochuno ach weweiti an Kot kewe annuk me napanapan ennet ese much.

Ekkewe kii me ofesin ewe pristut mi niwinsefanito, fiti ekkewe ofesin Aposel, Fiik, petriark, pris mi tekia, elter, pisop, pris, sense, me tiiken. Me fefin ra tongei ewe Samon ra angang non nukuchar non ewe mwichen Fin Anisi, Kinter, Ekkewe Fopun, Asukunen Raninifel, me pwan ekkoch wis non Mwichefen—meinisin kinikin mi namwot non pekin Niwinsefaniton ewe kapas allimen Jises Kraist non unusan.

Iwe, ewe ier 2020 epwene iteni ewe ierin ruepuku. Mwichenapen Mwichefen non April epwe sokkono seni ekkewe mwichenap mi fen fisita. Non ekkei oru maram, ua annean pwe chon mwichefen meinisin me famini meinisin sipwe ammonata ngeni eu mwichenap epwe sokkono epwe apwapwaiti ekkewe chok nongonongen ewe kapas allim mi niwinsefan.

Eni oupwe mochen ammonata me ren anneani an Joseph Smith porausen ewe Aewin Nemasepwi usun mi mak non ewe Pearl of Great Price. Non nan ier sipwe kaeo non Feito, Tapweto Mwirin ina ewe Puken Mormon. Kopwe aneanei omw kopwe ekieki kei kapas eis mei auchea usun, “Ifa usun manawei epwe sokono ika ai sine seni ewe puken Mormon ra no seniei?” ika “Ifa usun ewe fofor a tapwoto mwirin ewe aewin kuna a forata sokofesen ren ngang me atongei kewe?” Pwan, ren ekkewe kachiton Puken Mormon repwene kawor, meni oupwe mochen katon non fansoun kaeo anaemon me non famini.

Oupwene fini pwisin ami kapas eis. Fori pwisin ami kokkot. Oupwe ennetin apwapwaiti ewe saramen ewe Niwinsefanito mi amwarar. Nupwen oua fori, mwichenapen mwichefen non April sipwe tonongei esapw chok minen achechem; ousap monuki.

Iei nesoponon, ua nikiti ngeni kemi ai tong me efeioch pwe emon me emon ami oupwe pwan pwapwa me pinino iteitan ran. Nge iei chok, ouse mochen oupwe sineiochu pwe pwarata mi sopweno non ewe Mwichefen me epwe sopweno fan emwenien ewe Samon tori “ekkewe popun Kot repwe pwonueta, me ewe Jehovah mi Napanap epwe apasa pwe ewe angang a wes.”³

Ua efeiochukemi, fiti ai tong ngenikemi, ren ai kapasen pwarata pwe Kot a manau! Jises ii ewe Kraist! Iei an Mwichefel me kich Noun aramas. Non iten Jises Kraist mi pin, amen.