Bun̄ M̧aanļo̧k
Jerbal eo an Irooj ej bun̄ m̧aanļo̧k ilo dim.
Ro jeiū im jatū, ej juon menin lan̄lōn̄ bwe jen maron̄ pād ippemi ilo ad jino M̧ōttan eo Kein Karuo in 190th in Kweilo̧k eo Eļap an Kabun̄ eo an Jisōs Kraist im Armej ro Rekwojarjar ilo Raan Ko Āliktata. Im̧ōņōņō in kobawaj ippemi ilo m̧weo imōm̧ ak jabdewōt jikin kwoj pād ie n̄an ippān doon im ron̄jake ennaan ko an rikanaan ro, rilolo ro, im rikwaļo̧k revelsōn im ritōl ro jet an Kabun̄ in.
Eļap ad lukkuun in m̧ōņōņō kōn tecknology kein me rej kōtļo̧k ad maron̄ kobatok ippān doon āinwōt juon jarlepju eļap an rijilōk ro an Jisōs Kraist peļaakin laļ in. Kweilo̧k eo eļap ilo Eprōļ eo ļo̧k kar aluje jān elōn̄ļo̧k armej jān jabdewōt kweilo̧k m̧oktaļo̧k, im ewōr ad kōjatdikdik bwe kōtmāne in enaaj bar waļo̧k.
Ilo kar jejjo allōn̄ ko remootļo̧k, juon ajedeed in nan̄inmej laļ in, kijeek ko rekajoor, im kakkure ko waļo̧k jān laļ in rekar ukōt mour ilo juon wāween ekabwilōn̄lōn̄. Ij jan̄ ippemi kajjojo ro me rekar luuji juon eo ejitōn bōro ippāer ilo iien in. Im ij jar kōn aolep ro rej pād kiiō ilo en̄taan.
Ijoke, jerbal eo an Irooj ej bun̄ m̧aanļo̧k ilo dim. Ilubwilijin ad jab lukkuun kepaak doon, kōņak mask ko, im kweilo̧k ilo Zoom, jekar katak kōm̧m̧ani men ko roktakļo̧k im aaet jet iaer rekar wājabdik ad kōm̧m̧ani. Iien ko rejeja remaron̄ bōktok nōbar ko rejeja.
Mijenede ro ad im ritōl ro an mijen rekar lukkuun ļap aer jipan̄, kijejeto, im ilo m̧ool kabwilōn̄lōn̄. Men̄e enan̄in aolep mijenede ro rekar loe, wāween ko rem̧m̧anļo̧k n̄an kōm̧m̧ane jerbal eo aer, elōn̄ mijen ko rekar reboot bwe eļapļo̧k aer katakin armej jān kar m̧okta.
Jekar aikuj in kiili tampeļ ko ium̧win juon tōre, im jet jerbal in ekkal ko rekar jidik rum̧wijļo̧k, ak kiiō aolep jerbal kein rej bun̄ m̧aanļo̧k. Ilo kōļanta eo an iiō in 2020, jenaaj kar rube bwidej ko n̄an 20 tampeļ ko rekāāl.
Jerbal in menmenbwij em̧ōj an wanlōn̄ļo̧k. Elōn̄ ward ko rekāāl im stake ko rekar ejaak. Im jej m̧ōņōņō in riboot bwe Kabun̄ in ekar leļo̧k jipan̄ in humanitarian ko an ajedeed in nan̄inmej in n̄an 882 būrojāāk ko ilo 149 laļ ko.
Ekkatak gospel eo ej ļapļo̧k ilo elōn̄ m̧ōko im ej waļo̧k in naan in kam̧ool ko rekajoor im jem̧jerā ko an baam̧le. Juon m̧am̧a ekar je: “Eļapļo̧k am epaakeļo̧k ajri ro nejūm̧ im jibum̧ kiiō ke kōmij aiintok doon ilo Zoom aolep Jabōt. Kajjojo iaer rej bōk iien im kwaļo̧k ļōmņak ko aer kōn Itok, Ļoor Eō. Jar ko n̄an ro uwaan baam̧le ko ad rekar oktak kōnke ekar em̧m̧anļo̧k am meļeļe ta eo rej aikuji.”
Ij jar bwe kōj āinwōt armej ro rej kōjerbal iien in ejenolo̧k n̄an eddōkļo̧k. Jej pād ioon laļ in n̄an maron̄ idajon̄jon̄e kōj, n̄an lale eļan̄n̄e jej kāālet n̄an ļoore Jisōs Kraist, n̄an ukweļo̧k aolep iien, n̄an ekkatak, im n̄an eddōkļo̧k. Jetōb ko ad rej kōņaan eddōkļo̧k. Im em̧m̧antata ad kōm̧m̧ane menin jān ad dim wōt ilo iaļen bujen eo.
Jān aolepān menin, Jemedwōj Ilan̄ im Nejin, Jisōs Kraist, rej iakwe kōj! Rej kōjparok kōj! Er im enjeļ ro aer rej waaje kōj. 1 Ijeļā bwe menin em̧ool.
Ilo ad aiintok doon n̄an ron̄jake naan ko an Irooj kar im̧we rijerbal ro An n̄an litok, ij karuwaineneik kom̧ n̄an kejōkļo̧kjeņ kōn juon kallim̧ur Irooj ekar kōm̧m̧ane. Ekar ba bwe “jabdewōt eo ekōņaan maron̄ jirok ioon naan eo an Anij, eo em̧ōkaj im kajoor, eo enaaj ajeje ijeņ im ijeņ aolep m̧oņ im aujiid … im kōttōbalbal ko an devil, im tōl armej in Kraist in juon iaļ erānin̄ im aidik.” 2
Ij jar bwe kom̧ naaj jirok ioon naan ko an Anij āinwōt ej kwaļo̧k ilo iien kweilo̧k in eļap. Im ij jar bwe kom̧ maron̄ en̄jake iakwe ewāppen an Irooj n̄an kom̧, 3 ilo etan Jisōs Kraist, amen.