Gusto Ko Gid sa Templo

Mahal kong mga kauturan, nalipay ako nga nakaupod ko kamo sa sining una nga sesyon sang pangkabilogan nga komperensya. Ang mga humalambal, ang musika, kag ang pangamuyo nagdala sang Espiritu—kag sang balatyagon sang kasanag kag paglaum.

Ang ina nga balatyagon nagpadumdom sa akon sang una nga adlaw nga nagsulod ako sa templo sang Salt Lake. Bataon pa ako sadto. Ang mga ginikanan ko lamang ang akon mga kaupod sina nga adlaw. Sa sulod, nagpundo sila sing makadali kay gintamyaw sila sang isa ka temple worker. Nag-una ako sa ila, nagaisahanon sing makadali.

Gintamyaw ako sang isa ka gamayon nga babayi nga puti na ang buhok nga nagasuksok sang matahom nga puti nga panapton sang templo. Nagtangla sia sa akon kag nagyuhum kag dayon naghambal sa mahinay kaayo nga tingug, “Ginaabiabi ko ikaw sa templo, Brother Eyring.” Namensar ako sing makadali nga isa sia ka anghel tungod kabalo sia sang akon ngalan. Wala ko natalupangdi nga may natakod nga gamay nga kard nga may ngalan nakon sa sulapa sang akon amerikana.

Nagtikang ako lampas sa iya kag nagpundo. Nagtangla ako sa mataas nga puti nga kisami nga nagpasanag sang kuwarto nga daw halos bukas ini sa langit. Kag sa sina nga tion, nagsulod sa akon hunahuna ining maathag nga mga pulong: “Nakakadto na ako sa sining masanag nga lugar sadto.” Apang sa gilayon nagsulod sa akon hunahuna, indi sa akon kaugalingon nga tingug, ining mga pulong: “Wala, wala ka pa gid diri nakakadto. Nadumduman mo lang ang isa ka tion antes ka natawo. Ara ka sa isa ka sagrado nga lugar pareho sini.”

Sa gwa sang aton mga templo, ginabutang naton ang mga pulong nga “Balaan sa Ginuo.” Nakahibalo ako mismo nga matuod gid ang ina nga mga pulong. Ang templo isa ka balaan nga lugar sa diin ang rebelasyon mahapos nga nagaabot sa aton kon bukas ang aton mga tagipusuon sa sini kag takos kita sini.

Sang ulihi sinang una nga adlaw nabatyagan ko liwat ang amo sa gihapon nga Espiritu. Ang seremonya sa templo nagalakip sang pila ka mga pulong nga nagdala sang balatyagon nga nagadabadaba ang akon tagipusuon, nga nagakompirma nga ang ginapakita matuod. Ang akon nabatyagan personal sa akon parte sa akon palaabuton, kag nagmatuod ini pagligad sang 40 ka tuig paagi sa isa ka tawag nga mag-alagad halin sa Ginuo.

Naeksperiyensyahan ko ang amo man nga balatyagon sang ginkasal ako sa templo sang Logan Utah. Si Pangulong Spencer W. Kimball ang naghikot sang paghugpong. Sa pila ka tinaga nga iya ginhambal, ginhatag niya ining laygay: “Hal kag Kathy, magkabuhi [kamo] sa bagay nga kon mag-abot ang tawag, mangin mahapos lang para sa inyo nga magbiya.”

Samtang ginahambal niya yadtong pila ka tinaga, nakita ko sing maathag sa akon hunahuna, nga punong sing duga, ang isa ka mataas nga bungyod kag isa ka dalan padulong sa ibabaw. May puti nga kudal nga nagaubay sa nawala nga bahin sang dalan kag natabunan sang nagaraya nga mga kahoy sa ibabaw sang bungyod. Isa ka puti nga balay ang halos makit-an sa mga kakahuyan.

Pagligad sang isa ka tuig, nadumduman ko ina nga bungyod samtang nagamaneho ang akon ugangan nga lalaki sa sina nga dalan. Detalyado ang akon nakita sang si Pangulong Kimball naghatag sang laygay sa templo.

Sang makalab-ot kami sa ibabaw sang bungyod, ang akon ugangan nagpundo sa may puti nga balay. Ginhambalan niya kami nga baklon nila sang iya asawa ang balay kag luyag niya nga ako kag ang iya anak mag-istar sa dalayonan sang bisita. Sila ang magaistar sa mayor nga balay, pila lang ka tapak ang kalayuon. Gani, sa 10 ka tuig nga nag-istar kami sa sinang manami nga balay upod sang pamilya, ako kag ang akon asawa nagahambal halos adlaw-adlaw, “I-enjoy na naton ini kay indi kita maglawig diri.“

Nag-abot ang tawag gikan sa komisyoner sang edukasyon sang Simbahan, si Neal A. Maxwell. Ang paandam nga ginhatag ni Pangulong Kimball nga “mangin hapos lang nga magbiya” nagmatuod gid. Isa yadto ka tawag nga bayaan ang daw manami kuntani nga kahimtangan sang pamilya agud mag-alagad sa isa ka lugar nga wala ako sing may nahibaloan. Ang amon pamilya handa sa pagbiya sinang ginpakamaayo nga tion kag lugar tungod ang isa ka propeta, sa balaan nga templo, nga lugar sang rebelasyon, nakakita sang palaabuton nga ginpahandaan sa amon.

Nakahibalo ako nga ang mga templo sang Ginuo balaan nga mga lugar. Ang akon tuyo karon nga adlaw sa paghambal parte sa mga templo amo nga dugangan ang inyo handum kag ang akon man nga mangin takos kag handa para sa nagadugang pa nga mga oportunidad sa pag-eksperiyensya sang templo nga magaabot sa aton.

Para sa akon, ang pinakadako nga motibasyon agud mangin takos sa mga eksperiyensya sa templo amo ang ginhambal sang Ginuo parte sa Iya balaan nga mga balay:

“Kag kon magpatukod ang akon katawhan sing isa ka balay para sa akon sa ngalan sang Ginuo, kag wala ginatugotan ang bisan ano nga mahigko nga butang nga magsulod diri agud indi ini mahigkoan, magapuyo ang akon himaya diri;

“Huo, kag ang akon presensya mangin yara dira, kay magasulod ako dira, kag ang tanan nga putli sing tagipusuon nga magasulod diri makakita sa Dios.

“Apang kon mahigkoan ini indi ako magsulod diri, kag ang akon himaya mangin wala dira; kay indi ako magsulod sa di-balaan nga mga templo.”¹

Si Pangulong Russell M. Nelson nagpaathag sa aton nga mahimo naton “makita” ang Manluluwas sa templo sa punto nga indi na Sia estranghero sa aton. Si Pangulong Nelson nagsiling sini: “Nakahangop kita sa Iya. Nahangpan naton ang Iya buluhaton kag ang Iya himaya. Kag mabatyagan na naton ang wala dulonan nga epekto sang Iya di-matupongan nga kabuhi.”²

Kon kamo ukon ako magkadto sa templo nga di-nagakaigo ang pagkaputli, indi naton makita, paagi sa gahum sang Balaan nga Espiritu, ang espirituhanon nga panudlo parte sa Manluluwas nga mahimo naton mabaton sa templo.

Kon takos kita sa pagbaton sang amo nga panudlo, may ara nga magtubo paagi sa aton eksperiyensya sa templo sing paglaum, kalipay, kag positibo nga pagtamod sa bug-os naton nga mga kabuhi. Ang ina nga paglaum, kalipay, kag positibo nga pagtamod matigayon lamang paagi sa pagbaton sang mga ordinansa nga ginahikot sa balaan nga mga templo. Sa templo lamang nga mabaton naton ang kapat-uran sang mapinalanggaon nga pag-angot sang mga pamilya nga magapadayon pagkatapos sang kamatayon kag magalawig tubtob sa wala katapusan.

Pila ka tuig na ang nagligad, samtang nagaalagad ako bilang bishop, isa ka gwapuhon nga pamatan-on ang nagpamalibad sang akon pangagda nga mangin takos sa pagpuyo upod sa Dios sa mga pamilya tubtob sa katubtuban. Sa akig nga paagi ginsugid niya sa akon ang masadya nga tinion nila sang iya mga abyan. Ginpabay-an ko sia nga mag-istorya. Dayon ginsugiran niya ako parte sa isa ka tion sa isa sang iya ginhiwat nga kasadyahan, sa tunga-tunga sang kagalong, sang gulpi lang niya narealisar nga nasuboan sia. Ginpamangkot ko sia kon ano ang natabo. Nagsiling sia nga nadumduman niya ang tion sang gamay pa sia, nga nagasabak sa iya nanay, nga ginahakos sia. Sa sina nga tion samtang ginaistorya niya ina, naglumaw-lumaw sia. Ginsugiran ko sia sang nahibal-an ko nga matuod: “Ang paagi lamang nga mabatyagan mo inang hakos sang pamilya sa katubtuban amo nga mangin takos mismo kag magbulig sa iban nga magbaton sang nagahugpong nga mga ordinansa sang templo.”

Wala kita makahibalo sang mga detalye sang pag-angot sang mga pamilya sa kalibutan sang mga espiritu ukon sa matabo pagkatapos nga mabanhaw kita. Apang nakahibalo kita nga ang propeta nga si Elias nag-abot suno sa ginpromisa agud lisuon ang mga tagipusuon sang mga amay sa ila mga anak kag ang mga anak sa mga amay.³ Kag nakahibalo kita nga ang aton wala katapusan nga kalipayan nagadepende sa paghimo naton sang aton pinakamaayo sa paghatag sang amo man nga nagadugay nga kalipay sa madamo sa aton mga kaliwat nga masarangan naton.

Nagabatyag ako sang amo man nga handum nga magmadinalag-on sa pag-agda sang buhi nga mga miyembro sang pamilya nga maghandum nga mangin bagay sa pagbaton kag sa pagtahod sang nagahugpong nga mga ordinansa sang templo. Kabahin ina sang ginpromisa nga pagtipon sang Israel sa katapusan nga mga adlaw sa magtimbang nga bahin sang belo.

Isa sang aton pinakadako nga oportunidad amo nga kon lamharon pa ang mga miyembro sang aton pamilya. Nabun-ag sila upod ang Kasanag ni Cristo bilang dulot. Nagabulig ini sa ila nga mabatyagan kon ano ang maayo kag kon ano ang malain. Bangod sini, bisan ang makita ang templo ukon litrato sang templo makapalambo sa sulod nila sang handum nga mangin takos kag mahatagan sang pribelihiyo sa pila ka adlaw nga makasulod diri.

Ang adlaw dayon maabot kon, bilang mga lamharon, makabaton na sila sang rekomendasyon para sa templo agud makahikot sang tal-os nga mga bunyag sa templo. Sa sina nga eksperiyensya, ang ila balatyagon magatubo nga ang mga ordinansa sang templo pirme nagatudlo sa Manluluwas kag Iya Pagbayad-Sala. Kon mabatyagan nila nga ginahatagan nila ang isa ka persona sa kalibutan sang mga espiritu sang kahigayunan nga matinloan sa sala, ang ila balatyagon magatubo sa pagbulig sa Manluluwas sa Iya sagrado nga buluhaton nga pakamaayuhon ang anak sang aton Amay nga Langitnon.

Nakita ko na ang gahum sang sinang eksperiyensya nga nagbag-o sang kabuhi sang isa ka lamharon. Mga pila na ka tuig ang nagligad nagkadto ako sa templo upod ang akon anak nga babayi sang isa ka hapon. Sia ang katapusan nga nag-proxy sa bulunyagan. Ginpamangkot ang akon anak kon puwede sia magpabilin agud kompletuhon ang mga ordinansa para sa tanan nga tawo nga nahanda na ngadaan ang mga ngalan. Nagsiling sia huo.

Nagalantaw ako samtang ang akon gamay nga anak nagsulod sa tulugmawan. Nagsugod ang mga pagbunyag. Nagailig ang tubig sa guya sang akon gamay nga bata sa kada bes nga ginabutwa sia gikan sa tubig. Ginapamangkot sia sing sulit-sulit, “Puwede ka pa magdugang?” Sa kada bes nagasiling sia huo.

Bilang nagakabalaka nga tatay, nagalaum ako nga tani pauntaton na sia. Pero madumduman ko pa gihapon ang iya kalig-on sang ginpamangkot sia kon puwede pa sia magdugang kag nagsiling sia sa determinado nga gamay nga tingug, “Huo.” Nagpabilin sia tubtob nga ang katapusan nga tawo sa listahan sina nga adlaw nakabaton sang pagpakamaayo sang bunyag sa ngalan ni Jesucristo.

Sang naggwa ako sa templo upod sa iya sina nga gab-i, nahalawhaw ako sang akon nakita. Isa ka bata ang ginbayaw kag nabag-o sa atubangan sang akon mga mata paagi sa pag-alagad sa Ginuo sa Iya balay. Madumduman ko pa sa gihapon ang balatyagon sang kasanag kag paghidaet samtang nagalakat kami halin sa templo.

Naglabay ang mga tinuig. Padayon sia gihapon nga nagahambal sang huo sa pamangkot halin sa Ginuo kon magahimo sia sing dugang pa para sa Iya bisan mabudlay katama. Amo ina ang mahimo sang pag-alagad sa templo sa pagbag-o kag pagbayaw sa aton. Amo ina kon ngaa ang akon ginalauman para sa inyo kag para sa tanan ninyo nga pinalangga nga pamilya amo nga magtubo ang inyo handum kag determinasyon nga mangin takos sa pagkadto pirme sa balay sang Ginuo tubtob posible.

Gusto Niya nga abiabihon kamo didto. Ginapangamuyo ko nga magtinguha kamo sa pagpatubo sang handum sa mga tagipusuon sang mga anak sang Amay nga Langitnon nga magkadto didto, sa diin mabatyagan nila nga malapit sila sa Iya, kag agdahon man ninyo ang inyo mga katigulangan nga mangin kaangay nga makaupod Sia kag kamo tubtob sa katubtuban.

Ining mga pulong mahimo nga mangin aton:

Sagrado ako nga pagpamatuod nga mga anak kita sang isa ka mapinalanggaon nga Amay nga Langitnon. Ginpili Niya ang Iya Hinigugma nga Anak, si Jesucristo, nga mangin aton Manluluwas kag Manunubos. Ang solo lamang nga paagi nga makabalik sa pagpuyo kaupod Nila kag kaupod sang aton pamilya amo ang paagi sa mga ordinansa sang balaan nga templo. Nagasaksi ako nga si Pangulong Russell M. Nelson nagakapot kag nagagamit sang tanan nga yabi sang priesthood nga patigayon sang kabuhi nga wala katapusan para sa tanan nga anak sang Dios. Nagasaksi ako sini sa sagrado nga ngalan ni Jesucristo, amen.