Aton Na Ini Tiyempo!
Ginpadala kita sang Dios diri, subong, sa sining importante nga tion sa kasaysayan.
Sang 1978, nagtindog ako sa ginahampangan sang futbol sa istadyum nga may 65,000 ka tumalan-aw. Sa akon atubang ang pila ka dalagko kaayo nga mga kontra nga ang mga hitsura daw gusto nila ako kuhaan sang ulo. Una ko ato nga hampang bilang starting quarterback sa National Football League, kag nagahampang kami bilang mga kampeyon sadto nga tuig sa Super Bowl. Ang matuod, nagduda ako kon bala bagay gid man ako nga maghampang. Nag-atras ako para ihaboy ang una ko nga pasa, kag sang ginbuy-an ko ang bola, ginbunggoan ako sing mabaskog pa sangsa bisan ano nga naagyan ko. Sina nga tion, samtang ginapit-alan sadtong dalagko kaayo nga mga atleta, napensar ko kon ano ang ginahimo ko didto. Kinahanglan ko magdesisyon. Tugtan ko bala nga dag-on ako sang pagpangduhaduha, ukon mangita ako sang kaisog kag kusog nga magbangon kag magpadayon?
Associated Press
Wala ko sadto mahunahuna kon paano ako ihanda sining eksperiyensya sa palaabuton nga mga oportunidad. Kinahanglan ko matun-an nga sarang ako mangin mabakod kag maisog sa atubang sang mga kabudlayan.
Ang hampang nga futbol siguro daw indi pareho kaimportante sa mga hangkat nga inyo pagaatubangon. Sa kalabanan sini, wala sang istadyum nga puno sang tumalan-aw. Pero ang inyo isganan nga mga desisyon may epekto sa wala katapusan.
Siguro indi naton pirme mabatyagan nga masarangan naton ining hangkat. Pero ang aton Amay nga Langitnon nagatan-aw sa aton bilang wala-kahadlok nga mga tagpatukod sang Iya ginharian. Amo nga Iya kamo ginpadala diri sa sining pinakakritikal nga tion sa kasaysayan sang kalibutan. Aton na ini tiyempo!
Pamatii kon anong ginsiling ni Pangulong Russell M. Nelson pagkatapos gid nga mangin Pangulo sang Simbahan: “Ang aton Manluluwas kag Manunubos, nga si Jesucristo, magahikot sang pila sang Iya pinakadalagko nga mga buhulaton sugod karon tubtob magbalik Sia liwat. Makakita kita sang milagroso nga mga pagpahayag nga ang Dios nga Amay kag ang Iya Anak, nga si Jesucristo, magapamuno sa sining Simbahan sa kahalangdon kag himaya” (“Revelation for the Church, Revelation for Our Lives,” Liahona, Mayo 2018, 96).
Pinakadalagko nga mga buluhaton? Milagroso nga mga pagpahayag? Ano ang hitsura sina? Ano ang papel nga aton tungdan, kag paano naton maintiendihan kon ano ang himuon? Wala ako makahibalo sang tanan nga sabat, pero nahibal-an ko nga kinahanglan kita sang Ginuo nga maghanda! Ang nagakaangay nga paggamit sang gahum sang priesthood mas importante kaayo karon.
Nagatuo bala kita sa propeta sang Dios? Makita bala naton kag tumanon ang aton kapalaran? Huo, masarangan naton, kag huo, himuon naton, kay aton na ini tiyempo!
Kon mabatian naton ang mga istorya parte sa dungganon nga mga alagad sang Dios nga nauna sangsa aton—pareho nanday Moises, Maria, Moroni, Alma, Ester, Joseph, kag madamo pa—daw kamakakulunyag sang ila kabuhi. Pero indi sila lain sa aton. Regular man sila nga mga tawo nga nag-atubang sang mga kabudlayan. Nagsalig sila sa Ginuo. Naghimo sila sang husto mga mga pagpili sa importante nga tinion. Kag, upod ang pagtuo kay Jesucristo, ginhimo nila ang mga buluhaton nga ginpangayo sa ila tiyempo.
Goodsalt
Pamensara ang baganihan sa Daan nga Katipan nga si Josue. Isa sia ka debotado nga sumulunod ni Moises, isa sa pinakabantog nga mga lider sa kasaysayan. Paghalin ni Moises, tiyempo na ni Josue. Kinahanglan niya pangunahan ang mga anak sang Israel padulong sa duta nga ginpanaad. Paano niya himuon ina? Natawo kag nagdako si Josue sa pagkaulipon sa Egipto. Wala sia sing gabayan nga libro ukon mga video nga nagabulig tudlo sa iya. Wala sia gani sang smartphone! Pero may ari sia sining promisa halin sa Ginuo:
“Subong nga nag-upod ako kay Moises, sa amo magaupod ako sa imo: indi ako magpabaya sa imo, ukon magbiya sa imo.
“Magpakabakod kag magpakaisog” (Josue 1:5–6).
Sang bag-o pa ako kag wala sing eksperiyensya nga Kapitoan, nakabaton ako sang ginadalian nga tawag halin sa Opisina sang Unang Panguluhan, nga nagapamangkot kon pwede ako magtindog para sa propeta sa pagbisita sang isa ka pamatan-on sa ospital—insigida. Ang ngalan sang pamatan-on si Zach. Nagahanda sia nga mangin misyonero pero naaksidente kag nakaangkon sang seryoso nga pilas sa ulo.
Sang nagapakadto ako sa ospital, madasig ako nga nagapamensar kon ano ang ihambal ukon himuon. Isa ka tulumanon para sa propeta—nagalahog ka? Ano ang akon alatubangon? Paano ko mabuligan ining pamatan-on? Igo na bala ang akon pagtuo? Ang hugot nga pangamuyo kag ihibalo nga nagakapot ako sang awtoridad sang balaan nga priesthood ang nagpabakod sa akon.
Pag-abot ko, nagahigda si Zach sa katre sang ospital. Ang kabulig handa na nga dalhon sia sa operating room para mabuhinan sang mga doktor ang presyur sa iya utok. Gintulok ko ang iya nagahilibion nga iloy kag ginakulbaan nga lamharon nga abyan nga nagatindog sa unhan, kag nahibal-an ko sing maathag nga kinahanglan ni Zach sang bendisyon sang priesthood. Ang iya abyan bag-o lang nakabaton sang Melchizedek Priesthood, gani ginpangabay ko sia nga magbulig sa akon. Nabatyagan ko ang gahum sang priesthood sang mapainubuson namon nga ginhatagan si Zach sang bendisyon. Dayon hingagaw nga gindala sia sa operasyon, kag ang matawhay nga pamatyagan nagkumpirma nga ang Manluluwas na ang mahibalo suno sa Iya kaalam.
Ang mga doktor naghimo sang isa pa ka X-ray antes naghimo sang primero nga hiwa. Nadiskubrehan nila, sa ila kakibot, nga indi na kinahanglan ang operasyon.
Pagkatapos sang malawig nga terapiya, nakatuon si Zach nga maglakat kag maghambal liwat. Nagserbe sia sang madinalag-on nga misyon kag nagapadako karon sang matahum nga pamilya.
Siyempre, indi amo sina pirme ang resulta. May iban pa ako nga ginhatag nga mga bendisyon sang priesthood nga may pareho nga pagtuo, kag ang pagbuot sang Ginuo indi ang paghatag sang kompleto nga pag-ayo sa sining kabuhi. Nagasalig kita sa Iya mga katuyuan kag ginabilin sa Iya ang mga resulta. Indi kita pirme makapili sang resulta sang aton mga aksyon, pero makapili kita nga mangin handa sa pag-aksyon.
Mahimo nga indi kamo pagpangabayon sang Unang Pangulohan nga magtindog para sa ila sa amo kaital-ital nga sitwasyon. Pero tanan kita gintawag sa paghimo sang makabag-o-kabuhi nga mga butang bilang mga tiglawas sang Ginuo. Indi Niya kita pagsikwayon. Aton na ini tiyempo!
Si Pedro, ang mayor nga Apostoles sang Manluluwas, nagasakay sa barko sa tunga sang dagat sang iya makita si Jesus nga nagalakat sa tubig. Gusto niya nga mag-upod sa Iya, kag ang siling sang Manluluwas, “Kari.” Maisog kag sa milagro, nagtakas si Pedro sa baruto kag nagsugod sa paglakat padulong sa Manluluwas. Pero sang magtutok si Pedro sa mabaskog nga hangin, nauyog ang iya pagtuo. “Nahadlok sia; kag sang nagakalugdang, nagsinggit sia, Ginuo, luwasa ako. Sa gilayon gin-untay ni Jesus ang iya kamot kag ginkaptan sia.” (Tan-awa sa Mateo 14:22–33.)
Kon maghuyop ang hangin sa aton mga kabuhi, sa diin kita nagatutok? Tandai, isa lang gid ang masaligan nga ginahalinan sang kusog kag kaisog. Ang mga kamot ni Jesus nagauntay sa aton, pareho nga nag-untay ini kay Pedro. Kon lab-uton naton Sia, mapinalanggaon Niya kita nga luwason. Iya kita. Siling Niya, “Dili ka mahadlok: kay gintubos ko ikaw, gintawag ko ikaw sa imo ngalan; akon ikaw” (Isaias 43:1). Magapangibabaw Sia sa inyo kabuhi kon tugtan ninyo Sia. Kamo ang magapili. (Tan-awa sa Russell M. Nelson, “Tugoti ang Dios nga Magpangibabaw,” Liahona, Nob. 2020, 92–95.)
Sa katapusan sang iya kabuhi, nagpangabay si Josue sa iya katawhan, “Magpili kamo sini nga adlaw kon sin-o ang inyo alagdon; … apang nahanungod sa akon kag sa akon panimalay, magaalagad kami sa Ginuo” (Josue 24:15). Tungod sang mga pagpili nga iya ginhimo nga mag-alagad sa Ginuo, si Josue nangin maayo nga lider sa iya tiyempo. Pinalangga kong mga abyan, aton na ini tiyempo! Kag ang mga pagpili nga aton ginahimo ang magapakot sang aton kapalaran (tan-awa sa Thomas S. Monson, “Decisions Determine Destiny” [Brigham Young University fireside, Nob. 6, 2005], speeches.byu.edu).
Samtang nagaalagad bilang bishop, may hambalanon kami sa amon ward: Ang maayo nga mga pagpili nagakahulugan sang kalipay—sa wala katapusan. Labyan ako sang mga lamharon sa pasilyo nga nagasiling, “Bishop, nagahimo ako sang maayo nga mga pagpili!” Amo ina ang handum sang isa ka bishop!
Ano ang buot silingon naton sang “maayo nga mga pagpili”? Sadto may namangkot kay Jesus, “Ano bala ang dakong sugo sa kasuguan?” Nagsabat sia:
“Higugmaa ang Ginuo nga imo Dios sa bug-os mong tagipusuon, kag sa bug-os mong kalag, kag sa bug-os mong hunahuna.
“Ini amo ang dako kag nahaunang sugo.
“Kag ang ikaduha kaangay sini, Higugmaa ang imo isigkatawo subong sa imo kaugalingon” (Mateo 22:36–39).
Ambot sa inyo, pero sang mabasa ko ining duha ka dalagko nga kasuguan, nabatyagan ko ang ikatatlo ka ginapahangop nga kasuguan: nga palanggaon ang inyo kaugalingon.
Nahunahuna bala ninyo nga ang pagpalangga sang inyo kaugalingon isa ka kasuguan? Mahigugma gid bala naton ang Dios kag mapalangga ang Iya mga anak kon wala naton ginapalangga ang aton mga kaugalingon?
Isa ka maalam nga lider sining nagligad lang naglaygay sa isa ka tawo nga nagatinguha nga malampuwasan ang tinuig sang makaguba nga mga pagpili. Nakabatyag sang kahuya ang tawo, nagaduda kon bala angayan pa sia nga palanggaon sang iban.
Hambal sang iya lider sa iya, “Ang Ginuo nakakilala sa imo, nagapalangga sa imo, kag nalipay [sa] imo kag sa maisog nga mga tikang nga imo ginahimo.” Pero iya dayon gindugang, “Kinahanglan [mo] mabatian ang kasuguan nga palanggaon ang imo kaugalingon para mabatyagan mo ang pagpalangga sang [Dios] kag palanggaon ang iban.”
Sang mabatian sining utod inang laygay, nakita niya ang kabuhi sa lain nga panglantaw. Sang ulihi siling niya, “Bug-os kabuhi ko nga ginpangita ang paghidaet kag pagbaton. Ginpangita ko inang mga butang sa sala nga mga lugar. Sa pagpalangga lamang sang Amay nga Langitnon kag sang Manluluwas nakon nakita ang kaumpawan. Nahibal-an ko nga gusto Nila nga palanggaon ko ang akon kaugalingon; amo lang gid ini ang paagi nga mabatyagan ko ang Ila pagpalangga sa akon.”
Gusto sang aton Amay nga Langitnon nga palanggaon naton ang aton kaugalingon—indi agud mangin bugalon ukon maiyaiyahon, kundi para kabigon ang aton kaugalingon pareho sang Iya pagkabig sa aton: pinalangga Niya kita nga mga anak. Kon magdulot ini sing madalom sa aton tagipusuon, ang aton pagpalangga sa Dios magatubo. Kon tratuhon naton ang aton kaugalingon nga may sinsero nga respeto, mabuksan ang aton tagipusuon nga tratuhon man ang iban sa pareho nga paagi. Kon mas makita naton ang aton diosnon nga bili, mas maintiendihan naton ining diosnon nga kamatuoran: nga ginpadala kita sang Dios diri, subong, sa sining makahulugan nga tion sa kasaysayan, agud mahimo naton ang pinakadako nga kaayuhan gamit ang aton mga talento kag dulot. Aton na ini tiyempo! (Tan-awa sa Russell M. Nelson, “Becoming True Millennials” [bug-os-kalibutan nga debosyonal para sa hubin nga mga hamtong, Ene. 10, 2016], broadcasts.ChurchofJesusChrist.org).
Si Joseph Smith nagtudlo nga ang tagsa ka propeta sa tagsa ka panahon “nagpaabot nga may kalipay sa adlaw nga kita nagakabuhi; … nagkanta sila kag nagsulat kag nagpropesiya parte sa aton panahon; … kita ang pinasulabi nga katawhan nga [ginpili] sang Dios nga magdala sang himaya sang Ulihing-adlaw” (Teachings of Presidents of the Church: Joseph Smith [2007], 186).
Samtang inyo ginaatubang ang inyo adlaw-adlaw nga mga hangkat, tandai ining pagpasalig nga gintanyag ni Elder Jeffrey R. Holland: “Kadako sang aton responsibilidad, pero mangin mahimayaon kag madinalag-on ini nga eksperiyensya. … Ang kadalag-an sining katapusan nga paindis-indis gindeklarar na. Ang kadalag-an nasulat na sa mga libro … , sa balaan nga mga kasulatan!” (“Be Not Afraid, Only Believe” [pamulong-pulong sa relihiyoso nga mga manunudlo sang Church Educational System, Peb. 6, 2015], broadcasts.ChurchofJesusChrist.org).
Sa sining hingapusan sang semana sang Paskwa sang Pagkabanhaw, ginapalab-ot ko ang imbitasyon nga magpangamuyo kita tanan para makilala kag batunon ang tagsa naton ka tulumanon samtang nagahanda kita para sa mahimayaon nga adlaw nga magkari liwat ang Manluluwas. Palangga kita sang Ginuo masobra pa sangsa mahangpan naton, kag pagasabton Niya ang aton mga pangamuyo! Bisan ara kita sa ginahampangan sang futbol, sa kuwarto sang ospital, ukon sa bisan diin, sarang kita mangin importante nga bahin sining dalagko nga mga hitabo—tungod aton na ini tiyempo! Sa ngalan ni Jesucristo, amen.