Pwata Ewe Anen Pwon mi Pin
Ewe sokofesenin ewe anen pwon mi pin ese pwan wor an me nukun me a auchea fochofoch.
Non unusen an angangen mwichefen, Preseten Russell M. Nelson a fen kaeo me afanafana an Kot pwon mi pin ngeni Noun semirit. I pwisin ew nenien appiru mi saram usun emon a fetanei ewe aanen pwon mi pin. Non an aewin porous non wisan ren Presetenin ewe Mwichefen, Preseten Nelson a apasa:
“Ami nikitu ne tapweno mwirin ewe Chon Amanau ren ami fori pwon mi pin ngeni I iwe mwirin apwonueta ekkena pwon epwe suki asam ngeni feiochun ngun meinisin me tufich mi fich ngeni mwan, fefin, me semirit ekis meinisin.
“… Ekkewe angangepinin ewe tempel me ekkewe pwon mi pin oua fori ikewe ir ekkewe kii ne apochokuna manauemi, ami pupunu me famini, me ami tufichin ungeni ekkewe feiengawen ewe chon ungenikich. Ami fen me non ewe tempel me ami angang ikewe fan iten ami kewe neuo epwe efeiochu kemi ren napenon ami pwisin pwarata me kinamwe me epwe apochokuna ami nikitu ne nom won ewe aanen pwon.”1
Met ewe anen pwon mi pin? A ewe eu chok aan epwe emweni ngeni ewe muun Kot celestial. Sia sai won ewe aan ren ewe titin papatais me mwirin “feino mwom fiti tipepos non Kraist, epwe wor ach unusochun saramen apinukunuk, me ew tongen Kot me aramas meinisin [ekkewe ru annnuk mi nap] … tori nesoponon.”2 Non fetanin ewe aanen pwon mi pin (minne, ina, mi chou no seni ei manau won fonufan), sia angei ekkewe angangepin meinisin me pwon mi pin mi fich ngeni manau esemuch me manau tekia.
Ach pwonen nukuchar mi watte pwe sipwe fori mochenin Kot “me aneasochis ngeni an kewe annuk non mettoch meinisin i epwe annuk ngenikich.”3 Fori ekkewe nongonong me annukun ewe kapas allimen Jises Kraist ran me ran ina aan mi kon apwapwa me menemenoch non ei manau. Ren ew mettoch, emon aramas a su seni chommong osukosuk me niemam. Sipwe aea kapas awewe ren pekin urumot. Non tennis, mi wor och mettoch itan mwanin pwisin emon. Mi wor mettoch usun opwunanong ewe pwor non ewe chew ika muan fan ruu nupwen serfini ewe pwor. Mwanin pwisin emon ir pungun an emon chon urumot pwisin muan nge ese fis ren angochun ewe chon apponua.
Fan chommong ach osukosuk ika weires sia pwisin forir, pungun ach finata mi ngaw, ika sia tongeni apasa, pwe pungun “mwanin pusin emon.” Nupwen sia achocho ne tapwei ewe aanen pwon mi pin, sia pwisin su seni chommong “mwanin pusin emon.” Sia mwet seni ekkewe sokkun napanapen umwesiti mettoch. Sisap turunong non ewe warawaren chofona me mwokutukut ese wenechar. Sia feino seni epekin ewe anonnonen tipisin manauangaw me sikefesen. Sia amonungaw seni ekkewe aramas me mettoch pwe, ika mwo ir mi itefouno, repwe angawa nonnomun inisich me ngunuch. Sia orukano ekiekich seni ekkewe pekin finata mi efeiengawa me rese och ngeni ekkoch me sia angei ekkewe orenien tumunun inis me angang.4
Elter J. Golden Kimball ita a apasa, “Meni use [soun] fetan wenechar me chokukun, nge ua [sossot] ne feino ewe epek fan chommong ua [tongeni].”5 Iwe ren foosun enet, ua sinei pwe Brother Kimball epwe tipew pwe ach nom won, esap chok feino epek, ewe aanen pwon ina ach apinukunuk mi nap ach sipwe suseni riaffou kich mi tongeni eppetime epek me fisioch ach anganga met kich mi tongeni eppetiweiresin manau me pwan epek.
Ekkoch repwe apasa, “Ua tongeni finata mi pung ren ika esap ren papatais; ese namot ngeniei pwon mi pin ai upwe emon aramas sufon me wewoch.” Ennetin, mi chommong ir ekkewe, nupwen rese pwisin nom won ewe aanen pwon, ra foffor non ew napanap mi usun ekkewe finata me aninis an ekkewe ir mi nom won ewe aan. Meni kopwe apasa pwe ra angei feiochun ar fetan won ew aan mi “foffori usun pwon mi pin.” Iwe, met, ewe sokofesenin ewe aanen pwon mi pin?
Ennetin, sokofesenin mi sokkono me auchea fochofoch. Mi pachenong napanapen ach aneasochis, ewe nikinikin an Kot pwon ngeni kich, ewe aninis seni nang sia angei, ekkewe feioch mi pachengeni achufengenin aramas pwon, me auchean, met sipwe angei esemuch.
Aneasochis mi Nikitu
Aewin ina nikinikin ach aneasochis ngeni Kot. Nap seni chok ochun kokkot, sia ennetin pwon pwe sipwe manaueni kapas meinisin mi feito seni awen Kot. Ren ei, kich sia tapwei an Jises kewe awewe, ewe, ren an papatais, i a pwar ngeni ekkewe noun aramas pwe, ren ewe aion i a pwisin atipetekisonei me mwen ewe Sam, me pwarata ngeni ewe Sam pwe i epwe aneasochis ngeni i ne apwonueta an kewe annuk.”6
Fiti pwon mi pin, sia wesen anonga nap seni chok ach orukano ekiekich seni muan ika ach mirit. Sia mefi sipwe pwarata ngeni Kot ren ach kewe finata me manauach. Sia wata iten Jises Kraist woch. Sia anonga Kraist—won ach nikitu non ewe kapasen pwarata usun Jises me won amari napanapen Kraist.
Ren pwon mi pin, aneasochisi nongonongen kapas allim ra pochokununo non wesewesen ngunuch. Ngang mi sisinei ew pea pupunu ikewe, atun ar we apupunu, ewe fefin ese pochokun non ewe Mwichefen me ewe mwan ese mwo emon chon ewe Mwichefen. Upwe eita ngenir Mary me John, esap wesetan iter. Nupwen a poputa wor nour semirit, Mary a ennetin mefi auchean an epwe amarir, usun ewe pukefel a apasa, “non ewe tumun me fon an ewe Samon.”7 John a tipew ngeni. Mary a fori ekkoch auchean angangen asor an epwe nomwetiw non imw an epwe chok aitir ewe kapas allim iteitan fansoun. A tumunuochu pwe ewe famini epwe aunusa an fiti fenin Mwichefen me mokutukutun. Mary me John ra winiti sam me in nenien appiru, me nour kewe (meinisin at mi uruppich) ra marita non nuku me nikitu ngeni nongonongen kapas allim.
Seman me inen John kewe, an ekkewe at grandparent, ra pwapwaiti ochun manauen me murinon noun nour kewe, nge pokiten ar ungeni ewe Mwichefen, ra chok mochen ekieki pwe murinon angangen tumun a chok pokiten sineochun John me Mary. Inamo, ika John, esap emon chon ewe Mwichefen, ese mut ngeni ar na ekiek an esap apponuwa. A echimwer pwe ra kuna uwan afanafanen ewe kapas allim—met noun kewe at ra kaeo non mwichefen me pwan met a fis non imwer.
John pwisin a emwen me ren ewe Ngun, ewe tong me nenien appiru an punuwan we, me pesepesen noun kewe at. Mwirin och fansoun, i a papatais, a watte pwapwa ngeni chon ewe wart me chiechian.
Nupwen manau mi wor weires ngenir me nour kewe at, Mary me John ra unusen apungano pwe ina ennetin ewe pwonen kapas allim ewe popun ar kewe feioch. Ra fen kuna an ewe Samon kapas ngeni Jeremiah a pwonuta non manauen nour kewe me pwan manauer pwisin: Upwe atononga ai kewe annuk non ir o makeretiu non netiper. Iwe, upwe ar Kot, nge ir repwe nei aramas kana.”8
Chu ngeni Kot
Ew oruwen sokkonon pekin ewe aanen pwon mi pin ina nefinach me Kot. Ekkewe pwon mi pin Kot a ngeni Noun semirit ra fori nap seni chok ar emweni kich. Ra ochukem ngeni, rikem ngeni, sipwe tongeni pich seni mettoch meinisin.9
Fan ew ua anneani echo toropwe seni emon chon mak simpung ese sineochu mettoch a awewei pwe ewe napanapen ach fori papatais ren ekkewe mi mano ina sia akokano pinukun toropwen sasing non konik. Mwirin ekkena meinisin it mi pwano won ekkewe toropwen sasing ra papatais. Ena angang epwe atawoch, nge a atano ewe auchean emon me emon ngun me ewe auchean an emon me emon pwon ngeni Kot.
“[Jises] a apasa … : Oupwe tonong non ewe asamen ewe tit; pokiten mi chokukunun ewe tit, me chokisikis ewe aan minne a aaneno ngeni manau, iwe chokukkun ekkewe repwe kuna.”10 Non kapasen awewe, ei tit mi kon chokisikis a chok mutata emon fan ew an epwe tonong non eu fansoun. Emon me emon a fori pwisin an pwon ngeni Kot me seni I ra angei eu pwon mi pin pwisin, ren iter, ewe sia tongeni unusen anongonong non iei me feinfeino. Fiti kewe anuk me pwon, ewe pechekunen kot mi ech epwe pwenueta non manawach.11
Aninis seni Kot
Ei a esenipato ach sipwe ekieki usun ew aunungatin auchean feiochun ewe aanen pwon mi pin. Kot a awora ew niffang sise tongeni weweiti an epwe anisi chon fori pwon mi pin ar repwe chon amwochu pwon mi pin: ewe niffangen ewe Ngun mi Fel. Ei niffang ina ewe pung ngeni chiechien, tumunun, me emwenin an ewe Ngun mi Fel.12 A pwan iteni ewe Chon Ekinamwe, ewe Ngun mi Fel a “uren apinukunuk me unusochun tong.”1312 Ii a “sinei metoch meinisin, me a makei usun ewe Sam me ewe Nau,”14 neun io chon pwarata sipwe winiti.15
Won ewe anen pwon mi pin sia pwan kuna ekkewe auchean feiochun omusomus me nimoch seni tipis. Ei ew aninis a chok tongeni fis seni chenin Kot, a feito seni ewe Ngun mi Fel. “Iwe iei ewe annuk,” anon ewe Samon, “Aier, ami meinisin ekis meinisin non ewe fonufan, me feito rei me papatais non itei, pwe oupwe tongeni enimenimochuno me ren ketiwen ewe Ngun mi Fel, pwe oupwe tongeni uta non nimenimoch me mwei atun ewe ranin soponon.”16
Chufengen me ekkewe Aramas Pwon
Eruwanun, ekkewe ra tapwei ewe aanen pwon mi pin ra kuna auchean feioch non sokopaten finitan chufengen. Osuni usun ew wesetan achufengenin ekkewe einangen Israel mi toropas ngeni fonuen ar kewe neuo ra pwa non unusen ekkewe pukefel.17 Pwonutan ekkena osuni me pwon iei ra poputa fiti fengen me ewe achufengenin ekkewe aramas pwon ngeni ewe Mwichefen, ewe muun Kot won fonufan. Preseten Nelson a awewei, “Nupwen sia kapas usun ewe ionfengen, sia chok kapas usun ekkei nongonongun ennet: pwe meinisin noun Semach won Nang semirit … a namwot repwe rongorong ewe porausen ewe kapas allimen Jises Kraist mi niwinsefanito.”18
Ewe Samon a annuku chon Ewe Mwichefenin Jises Kraist ren Aramas mi Pin non Fansoun Soponon ar repwe “uta me sarameno, pwe ar saram epwe ew nongonong ngeni ekkewe muu; … pwe ewe ionfengen won ewe fonuen Zion, me won an kewe steik, repwe ew epet, me ew nenian asoso seni ewe menumen, me seni rochongau nupwen epwe niu won fonufan o esapw wor nofitin.”19
Mi pwan wor ew chufengen iteiten wik ren noun aramas pwon ngeni ewe imwen iotek non ranin ewe Samon, pwe sipwe tumunochu [inisich] seni ewe fonufan an esap nimengaw.”20 A ew chufengen pwe repwe angei ewe sakrament ren pinewa me konik non achechemenien ewe Achasefan an Jises Kraist me ew fansoun “echikipin me iotek, me repwe kapas fengen nefiner usun tufichin [ngunuch].”21 Nupwen ai emon serafo, ngang chok ewe ua choni ewe Mwichefen me non ai we klassin high school. Ua pwapwaiti ewe echiechi fengen me chommong chienei mi och non sukun, nge ua kuna pwa ua anongonong won ei achufengenin Sabbath iteiten wik ai upwe apochokuna sefani me aminafou nguni, me pwan inisi. Ifa usun ach mefi turunon ei soun chufengen ren pwon non fansoun ei chewnon watten semwen, me ifa chengenin ach atapwana ewe fansoun sia tongeni chusefan usun akkom.
Ekkewe aramas mi pwon ra chufengen ren ewe tempel, ewe imwen ewe Samon, ar repwe angei ekkewe angangepin, feioch, me pwarata mi chok wor ikewe. Ewe Soufos Joseph Smith a aitikich: “Met ewe popun ewe ionfengenin ekkewe … aramasen Kot non och fansoun ewe fonufan? … Ewe popun pwe epwe kauta ngeni ewe Samon ew imw ikeweia I a tongeni pwarata ngeni Noun aramas ekkewe angangepin seni Imwan me ningan An we muu, o aiti ekkewe aramas ewe aanen manau; pun mi wor ekkoch angangepin me annuk pwe, nupwen ra kaeo me achocho ngeniir, mi namwot pwe repwe fis non ew neni are imw mi kauta ngeni ena popun.”22
Angei ekkewe Pwonen ewe Pwon mi Pin
Nesoponon, epwe ina ren chok ach tapweno ewe aanen pwon sia tongeni angei ekkewe feiochun Abraham, Isaac, me Jacob, ewe amuchunon feiochun manau esemuch me manau tekia ewe Kot chok a tongeni fang.23
Ekkewe kapasen non pukefel ngeni ekkewe aramas pwon ir wewen pwe wesetan mwirimwirin Abraham ika ewe “imwen Israel.” Nge ekkewe aramas pwon mi pachenong meinisin ekkewe ra angei ewe kapas allimen Jises Kraist.24 Paul a awewei:
“Ren chommong me neimi oua fen paptaiseno non Kraist oua pwinitanong Kraist. …
“Ika ami noun Kraist, iwe ami murimurin Abraham, iwe oupwe angei minne Kot a pwonei.”25
Ekkewe ir mi nikitu ngeni ar pwon repwe feito non ewe aewin manausefanin ekkewe mi pung.”26 Ir ra unusochuno non Jises ewe chon afforun ewe minafon pwon mi pin. … Ikkei ir ekkewe inisir mi selestial, ar ning a usun ewe akkar, pwan mwo ewe ningen Kot, ewe mi nap seni meinisin.27 Ina minne mettoch meinisin epwe ar, ika manau are mano, ika mettoch iei, ika mettoch epwe war, ir meinisin ar me ir noun Kraist, me Kraist noun Kot.28
Sipwe aneasochisi an ewe soufos kokko ach sipwe nom won ewe aanen pwon mi pin. Nifai a a kuna kich me ach fansoun me rekotuni, “Ngang, Nifai, ua kuna ewe manamanen ewe Namen Kot, pwe a feitiw won ekkewe sounengin ewe mwichefenin ewe Nam, me won ekkewe aramas pwon noun ewe Samon, ekkewe ra toropas fetan won ewe unusen ewe fonufan; iwe ra fotata wenechar me ren ewe manamanen Kot non ning mi napanap.”29
Fiti Nifai, “nguni a mwar non ewe pwon an ewe Samol.”30 Non ei Raninfenin Paska, Ua pwarata usun Jises Kraist, ewe an Manausefan ina ach apinukunuk me ewe ennetin mettoch mi pwon ngeni kich won me nesoponon ewe aanen pwon mi pin. Non iten Jises Kraist, amen.