Jises Kraist: Ewe Chon Tumunu Ngunuch
Atun sia ennetin aier seni ach tipis, sia mutngeni ewe achasefan an Kraist an epwe unusen angang non manawach.
Pwi me fefinei achengicheng, non ei saramen nesosorun Easter netipei a pwapwa ren achechemenian ewe foffor mwirino a fis non unusen uruon aramas ewe mi kon nap amwararan, ewe mi kon nap ningan, me ewe ese wor kaukun—ewe asoren achasefan an ach Samon, Jises Kraist. Ekkewe fatochun kapas an ewe soufos Isaiah a anapano watten me umoumochun manauen ewe Chon Amanau fan iten meinisin noun Kot:
“I a mefi ewe riaffou ururun ita ach riaffou, ewe metek ita sipwe metekini. Nupwen i a riaffou sia ekieki pwe Kot a eriaffou i.
“Nge pokiten ach kewe tipis i a kinas, ra opuni pokiten ekkewe foffor mi ngaw sia fori. Kich sia chikar ren ewe riaffou i a riaffouni sia unusoch ren ekkewe opup a angei.”1
Ren an finata ne wata won pwisin Inisin tipisin aramas meinisin, ese pung an chufon ngeni ewe irapenges, me a win ne akkufu mano non ewe aunungatin ran,2 Jises a awora ew wewe mi pin ngeni ewe angangepinen Passover ewe a fen kawor ngeni Israel non fansoun nom.3 Non ounusochun kapasen osini, I a fangano pusin inisin me chan mi auchea pwe ewe wachimuken asor,4 a anetata ewe esisinen oruni ra aea non ewe apwapwan an ewe Samon ewe Passover.5 Ren an fori, Kraist a mefi riaffoun inis me ngun minne aramas rese tongeni weweiti. Ewe Chon Amanau A pwisin apasa:
“Iwe nengeni, Ngang, Kot, uwa riaffouni ekkei mettoch fan iten meinisin, …
“Minne riaffou a efisi inisi, pwan mwo Kot, ewe a tekia seni meinisin, an epwe chech pokiten metek, me mononeni cha a sup seni, me riaffou non inis me ngun—me a mochen pwe esap un seni ewe kap mi kipwin—
Iwe nge, chen ngeni ewe Sam, me Ua angei me aweseno ai ammonata ngeni ekkewe noun aramas.6
Kraist a kirekiroch ne apwonueta mochenin ewe Sam7 ren an we umoumochun fangeno mi feinfeino. A akkufu ewe metekin manon inis me ngun,8 a kawor ngeni ewe fonufan seni ewe Turutiw,9 a ngeni kich ewe tufichin amanaua feinfeino.10
Jises i ewe chok emon a tufichin apwonueta ei fangeno mi feinfeino me unusoch fan itach meinisin.11 A fen kefinita me ewis me mwan me non ewe Opungupung mi Nap non Nang, pwan me mwen ewe fonufan a foruta.12 Soposoponon, ren an uputiw seni emon fefin, I a angei ewe manon inis, nge seni Kot, ren I ewe Noun Kot Anamon, I a angei ewe manaman an epwe pusin fangeno Manauan me pwan angei sefani.13 Pwan ew, Kraist a manaueni ew manau mi unusoch ewe ese tikitikipun, ina minne, mi ngaseno seni mochenin pungoch.14 Non ekkoch fansoun ewe Soufos Joseph Smith a aitikich:
“Manau esemuch ese tongeni feito ngeni ewe fonufan ika ese or ewe afor an Jises Kraist.
“Kot … a ammonata ew asor non niffangen pwisin Noun we, ewe epwe etto non fansoun epwe fich an epwe … suki ew asam minne aramas repwe tongeni tonong fan mesen ewe Samon.”15
Seni An ewe asor ewe Chon Amanau a angeiano ekkewe popun manon inis,16 I ese awesano wisach pusin ach sipwe aier ren ekkewe tipis sia fori.17 Nge, I a fen ngeni kich ew tongen tingor ach sipwe achasefan ngeni Samach Esemuch. Seni Jises Kraist me An asoren achasefan, sia tongeni mefi ew watten ekesiwinin ekiek me netip, a wato minafon nikinik, ngeni Kot me ngeni manau ren unusan.18 Nupwen sia ennetin aier seni ach tipis, akunnu netipach me ach mochen ngeni Kot me An kewe annuk, sia tongeni angei An omusomus me mefi angangen Noun we Ngun mi Fel non watten napanon non manauach. Sia orukono ach mefi ewe anonnonun riaffou ewe Chon Amanau a nikitu ngeni non an kirekiroch.19
Ewe niffangen aier ina ew esisinen an Kot kirekiroch ngeni Noun semirit, me ew napanapen An manaman ese wor met sipwe anonnou ngeni an epwe anisi kich ne akkufu ekkewe tipis sia fori. A pwan ew pisekin pwarata usun ewe tipepos me songomang an Samach Esemuch ren ach apwangapwang me nipwakingaw. President Russell M. Nelson, nouch achengicheng soufos, a founi ei niffang pwe “ewe kiien pwapwa me kinamwein ekiek.”20
Chienei achengicheng, ua pwarata ngeni kemi pwe nupwen sipwe ennetin aier seni ach tipis,21 sia mut ngeni an Kraist we asoren achasefan epwe unusen fisioch non manauach.22 Sipwe winiti mi ngaseno seni fotekin tipis, kutta pwapwa non ach sai won fonufan, me mumuta ne angei manau esemuch, minne a mwonneta seni nongonongen ewe fonufan fan iten meinisin ekkewe ra nuku non Jises Kraist me feito ren I.23
Pwan kapachetan ren an ngenikich ei niffang mi amwarar ren manau esemuch, ewe Chon Amanau a fang ngeni kich ngaseno me kinamwe nupwen sia weri ach riaffou, sossot, me apwangapwangen manauen fonufan, mi pachenong ekkei nikinik sia mefi iei ren ei efeiengawen samwau. Ua tongeni pwon ngeni kemi pwe Kraist mi chok eteneki ekkei weires sia mefi non ei manau. I mi weweiti meinisin netipengaw, riaffou, me metekin inis me pwan weiresin netip me ngun sia weri. Netipen ewe Chon Amanau mi uren chen, me A mochen anisikich fansoun meinisin. Ei a tufich pun I a pusin mefi me wata won Inisin ewe metekin ach apwangapwang me apwangapwangen inis me ekiek.24
Fiti tipetekison me nimenimochun non netip, I a feitiw fan mettoch meinisin me etiwa an epwe koput, ese ketiw, me asaw me ren aramas, a kinas fan iten ach atai annuk me fofforungaw. A riaffouni ekkei mettoch fan iten meinisin, wata won pwisin I tipisinin ewe fonufan,25 me a winiti ewe amwuchunon chon tumunun ngun.
Nupwen sia arap ngeni I, fangeta inisich non pekin ngun ngeni An tumun, sipwe tongeni wata woch osan we, minne mi mecheres, me An chou, minne mi paan, iwe sipwe kuna ena pwonen kinamwe me asoso. Soposoponon, sipwe angei pochokun mi auchea ach sipwe akkufu riaffou, apwangapwang, me netipengawen manau, minne repwe fokkun weires ach sipwe nikitu ngeni me nuku An aninis me manamanen echikara.26 Ekkewe pukefel ra aitikich pwe sipwe “nikiti ngeni ewe Samon [ach] kewe riaffou, iwe i epwe anisi kich.”27 “Iwe mwirin amo Kot epwe mut ngeni [kich] pwe [ach] kewe chou repwe tongeni paneno, me non pwapwan Noun we.”28
Arap ngeni nesopun ewe ier a no, ua sinei usun manon ew pea pupunu achengicheng, Mario me Regina Emerick, ir ra men tupwen ngeni ewe Samon me a ruanu ran nefinen ar mano, pokiten osukosuken seni COVID-19.
Emon nein nour kewe mwan, ewe mi angangen pisop non Brazil, a aporousa ngeniei: “A fokkun weires ai kuna semei me inei ar no seni ei fonufan non ena napanap, nge a fat ai mefi poun ewe Samon non manauei non ei fansoun osukosuk, pokiten ua angei pochokun me kinamwe ewe a nap seni ai weweiti. Ren ai nuku non Jises Kraist me An Achasefan, ua angei aninis seni nang ne apochokuna me oururu chon ai famini me ekkewe ra anisi kem non ei fansoun weires. Inamo ewe manaman meinisin ra aneanei ese fis, ngang won inisi ngang emon chon pwarata usun pwan ekkoch manaman a fen fis non pwisin manauei me non manauen chon ai famini. Ua mefi ew kinamwe use tongeni awewei a pwereni anonnonun netipei, a ngeniei apinukunuk me nuku non ewe tong an ewe Chon Amanau fan itei me non ewe kokkoten pwapwa an Kot fan iten Noun semirit. Ua kaeo pwe non ekkewe ran mi kon uren-netipengaw, poun ewe Chon Amanau mi tong ir mi chok itito fansoun meinisin nupwen sia kutta I ren unusen netipach, manaman, ekiek, me pochokun.”
Pwi me fefinei achengicheng, non ei Raninfenin Paska, ua apasa ai ennetin pwarata pwe Jises a manau seni mano me I mi manau. Ua pwarata ngeni kemi pwe seni I me An asoren Achasefan, ewe Chon Amanau a awora ngeni kich ewe aan ne akkufu mano, ren pekin inis me ngun. Pwan kapachetan ngeni ekkei waten feioch, I apwan ngenikich kinamwe me epinukunuk non fansoun weires. Ua ennet ngeni kemi pwe nupwen sipwe wanong ach nuku non Jises Kraist me An Achasefan mi ning, engino non ach nuku tori nesoponon, sipwe pwapwaiti ekkewe pwon an Samach achengicheng non Nang, ewe a mochen fori mettoch meinisin non An manaman an epwe anisi kich ne niwin ngeni I non ew ran. Iei An angang me An ning!29 Ua pwarata ngeni kemi pwe Jises i ewe Kraist, ewe Chon Angasano ewe fonufan, ewe Messiah mi pwon, ewe Manausefanita me ewe Manau.30 Ua apasa ekkei ennet ngeni kemi non Itan mi pin, ewe Anamon chok noun ewe Sam, ach Samon, Jises Kraist, amen.