Pwoson en Peki oh Wia

Riei ohl oh lih kesempwal akan, I inenen kapingki ansou mwahu wet ei kak koasoieng kumwail nan tiepene en mwurin souwas en Rahn Kaunop en kapokon lap wet. Nan sapwellime mahsen kapehse ong kapokon en nimenseng en rahnwet, Presiden Russell M. Nelson mahsanih me “kaudiahl mwakelekel ong iren kalelapak kan nan amwail mohngiong pahn kahrehda kapokon wet eh pahn katapan oh sohte pahn kak manoknokla. Ma kumwail saikinte rapahki kaweid sang Ngehn Sarawi pwehn sewesei kumwail en rong mwahu dahme Kauno ketin kupwurki kumwail en rong nan rahn riau pwukat, I lukei kumwail en wia met.”¹ I rapahkiher kapaio sang ni ai kaunopadahr en ale kaudiahl ong ni pwaredo wet rehmwail. Ei kapakap mwuledek iei kumwail en kak ale kaudiahlo sang rehn Koht.

Mwomwen alehdi kaudiahl sang rehn Koht saikinte wekidekla sang nan mwein Adam oh Ihp. E duhduwehte ong irail sounpapah kan koaros en Kauno me pilipildahr sang ni tapio leledo rahnwet. E duhduwehte ong kumwail oh ngehi. E kin ansou koaros pweida sang ni doadoahngki pwoson.²

Pwutak pwulopwul Joseph Smith ahniki pwoson me itar en kak kalelapak rehn Koht, ni ah kamehlele me Koht pahn ketin sapeng ah anahn me mih nan ah mohngiong. Pasapeng me kohdohu wekidala sampah. E men ese mehnia mwomwohdiso me e pahn iang pwehn mwakelekelda sang nan dihp. Pasapeng me e alehdio kalaudehla ah ineng en wie peipeidengki iren kalelapak kan oh kin pousehlahte wia dahme e kin alehdihsang kaudiahl me tepidahro.³

Amwail pepehm pil kakete duwehte ong nan kapokon wet. Kumwail kin ahniki kalelapak kan me kumwail kin raparapahki pasapengpe. Kumwail kin ahniki pwoson me itar en koapworopworki me kumwail pahn alehdi pasapeng kan sang Kauno rehn Sapwellime sounpapah kan.⁴ Kumwail pahn sohte ahniki ansou mwahu en idek ni ngihl laud ong pasapeng kan sang rehn sounkapahrek kan, ahpw kumwail kak peki rehn Sahmo me diren limpoak ni kapakap.

I ese sang ni ai lelehngehr me pasapeng kan pahn kin kohdo pwehn kin apwalih amwail anahn akan oh ong kaunopadahn palingenemwail. Ma kumwail anahne pasapeng me kesempwal ong amwail momour en mour soutuk de me ong soahng teikan, pasapengo udahn pahn kin kohdo. Ahpw, pil ni ansouohte, kumwail pahn kak alehdi—duwehte me Joseph Smith wia—pasapengo pahn anahne en mie kanengamah.⁵

Ma amwail pwoson Sises Krais wadohr mohngiong mwuterek me sang ni dahme sansal sang ni Sapwellime Tomwo, kumwail pahn kak en kalap kehn kisin ngihl tikitik en Ngehno nan pasapeng en amwail kapakap kan. Sang ni ei pein kehnehr, kisin ngihl tikitik—meleileio e udahn sansal—oh kak kilang nan ai madamadau ni ansou me I kehn meleilei loaleiet oh mweidohng kupwuren Kauno. Pepehm en karakarahk kak mih ni kawehweh keieu mwahu me duwehte “Kaidehn pein insenei, ahpw kupwuromwi, me en pweida.”⁶

Ni wiepen mwomwen kaudiahl wet me pahn kahrehda kumwail en rong sounkapahrek kan me pahn padahk nan kapokon wet me kahdaneki padahk en Krais.⁷ Kaudiahl kin kohdo rehtail ni wen uhwe ehu ni atail rapahkier oh alehda padahk en Krais nan atail mohngiong oh doadoahngki nan atail mour.

Kumwail taman sang nan Pwuhk en Mormon me Nihpai padahkihong kitail me pwoson Sises Krais iei me wia kih en kaudiahl en me mehlelo oh kih en ahniki koapwoaroapwoar me kitail idihdawehn kaweid en Sounkomouro. Nihpai intingihdier mahsen pwukat sounpar ngeder mwohn ipwidi en Sises Krais nan mour wet:

“Tohnleng kan kin mahsen sang ni manaman en Ngehn Sarawi; eri, irail mahsenki mahsen en Krais. Eri, I indahiong kumwail, en pereniki mahsen akan en Krais: pwe kilang, mahsen akan en Krais pahn indahiong kumwail soahng koaros me kumwail pahn wia.

“Eri, met mwurin ahi koasoiahier mahsen pwukat, ma kumwail sohte pahn kak wehwehkin irail a met pwehki kumwail sohte peki, de pil sohte letelet; eri, kumwail sohte pahn wisikdohng nan maraino, ahpw kumwail udahn pahn mehla nan rotorot.

“Pwe kilang, I pwurehng ndahiong kumwail me ma kumwail pahn pidelong ni wenihmwo, oh alehda Ngehn Sarawi, e pahn kasalehiong kumwail soahng koaros me kumwail pahn wia.

“Kilang, met iei padahk mehlel en Krais, oh sohte pil ehu padahk likin met me pahn kohwei lao lel ahnsou me e pahn ketin kasalehiong kumwail pein ih ni paliwar. “Oh ni ahnsou me e pahn ketin kasalehiong kumwail pein ih ni paliwar, soahng kan me e pahn mahsenihong kumwail me kumwail pahn nantihong kapwaiada.“⁸

Kauno pahn ketin doadoahngki Sapwellime tohnpadahk kan en mahsenieng kitail rahnwet oh pil nan rahn akan me pahn kohdo. E pahn ketin mahsanihong kitail dahngeh kan me kitail anahne wia.⁹ Sounkomouro sohte pahn weriki ah ruwes ong kumwail oh ngei. Met rasehng Ah ketin padahkiong Elijah:

“Oh e ketin mahsanih, Kohwei, oh kesihnenda pohn nahnahn mwohn Kauno. Oh, kilang, Kauno ahpw ketin kotehla wasahu, oh kisinieng laud oh kehlail ehu ahpw itikada dohl akan, oh pwalangpeseng takai kan ni pisetik mwohn Kauno; ahpw Kauno sohte ketket nan kisiniengo: oh mwurin kisiniengo ah rerrer en sahpw; ahpw Kauno sohte ketket nan rerrer en sahpwo:

“Oh mwurin rerrer en sahpwo ah kisiniei; ahpw Kauno sohte ketket nan kisinieio: oh mwurin kisinieio a kisin ngihl tikitik kis.“¹⁰

Rongorong ngihlo pahn kohdo sang ni atail pwoson Ih. Wen itar en pwoson me mie, kitail pahn peki kaweid ni ineng en kohla oh wia dahme E ketin kupwurki.¹¹ Kitail pahn kakairadahr pwosono pwe kitail en ese me dahme E ketin kupwurki pahn kapaiada mehteikan oh kitail pahn kak mwakelekelda nan wiewiahu pwehki sang Sapwellime limpoak ong kitail.

Ni ansou me kitail kin pwoson Sises Krais e kin kaweid kitail en peki rehn Samatailo ong pasapeng kan, me pwoson pahn pil ketkihdo pepehm mwahu en Sounkomouro me pahn itarehng kitail en rong Sapwellime kaweid oh kak pilada oh pereniki kapwaiada. Kitail ahpw pahn koulki mahsen kan en pwuhk en koul ni peren, itarete ni ansou me doadoahko apwal: “Doadoahk me kaselel, ai Kaun, ai Nanmwariki.“¹²

Ni atail pahn kakehlaka kolokol padahk en Krais nan atail mour oh mohngiong kan, atail pepehm en limpoak kin laudla oh pepehm en poakehla ong irail kan me saikinte alehdi kapai en pwoson Sises Krais de me nannanti en alehdi kan. E kin apwal en kapwaiada sapwellimen Kauno kosonned akan ma kitail sohte pwoson oh likih Ih. Ni ansou me ekei kin sohla pwoson Sounkomouro, irail pil kin kak kawehla Sapwellime kaweid, inda me mwahu suwed oh me suwed me mwahu.¹³ Pwehn dehr wiahda sapwung wet, kaudiahl mehlel kan koaros me kitail alehda udahn pahn pahrek ehng Sapwellimen Kauno soukohp akan arail padahk kan.

Riei ohl oh lihoko, pwoson kin mie pwe en kak peikiong Sapwellimen Kauno kosonned akan. Pwoson Sises Krais pwe en kak papah mehteikan ong Ih. Kitail kin anahne pwoson pwehn kohpeseng oh kalohki Sapwellime rongamwahu ohng irail akan me kakete soikala ngilen Ngehno oh soikala me mehlelpen padahk kan. Ahpw ni atail kin doadoahngki atail pwoson Krais—oh idawehn Sapwellime soukohp momour—pwoson kin kekeirda nan sampah. Pwehki inderned ape, mwein irail akan me pahn rong oh alehda Mahsen en Koht nan wihket pahn laudsang nan wihk kan koaros en poadpoapoad en Sampah pwon.

Sang ni lalaudlahn pwoson me iei met me wia Sapwellimen Kauno Mwomwohdiso oh wehi pohn sampah, tohtohlahr toweh kan me pwain eisek kis ehu oh kihda sawas ong irail kan me anahne sawas, oh pil ong irail toweh kan me sohsohpai pein arail kahpwal akan. Sang ni pwoson me Sises Krais ketin malipeirailehr, misinerih kan nan nan sampah diarehr ahl akan en powehdi kahpwal akan me pwarada sang ni soumwahu doar me kipehdi sampah, ni arail wiewia met ni eimah oh pereperniki. Oh kalaudpen arail doadoahk mwahu, arail pwoson kehkehlailahr.

Uhpene oh kahpwal akan, ansou reirei wia mwutumwut en pwehl ehu ong ni kakairadahn pwoson. Met e kin kalap mehlel, ahpw mehlel sang ni tepin Kopwurupwurdohu oh kokoudahn Sapwellimen Kauno Mwomwohdiso.¹⁴

Dahme Preseden George Q. Cannon mahsaniher mahso e mehlel rahn wet oh pahn duhduwehte lau ketdohn Sounkomouro pwe en pein kaweid Sapwellime Mwomwohdiso oh Sapwellime aramas akan: “Peikiong Rongamwahuo pahn wahdo [aramas akan] en karanih oh ehuieng Kauno. E wiahda en kak mie dokpene nan pwungen aramas pohn sampah oh atail Soun Kepikipik en nanleng kan. E wadohng en aramas madamadau pepehm en likilik unsek ong Wasa Lapalahpie oh Sapwellime kupwuriso en rong oh sapeng pekipek kan sang irail kan me likih Ih. Ni ansou kan en kahpwal oh apwal likilik wet me kin inenen kesempwal. Pingiping pahn kak en pwarada rehn emen emen de rehn aramas akan, kahpwal kak pwarada oh en aramas koapwoaroapwoar pahn kak luwetala, ahpw, wasa me [aramas] alehier kapai kan me kohsang ni peikiong Rongamwahuo, irail ahniki wasa ehu me keskesihnente; nehrail kan mihmi pohn takai ehu me sohte kak mwekid.”¹⁵

Met iei ahi kadehde me takai me kitail keskesihnen powe iei atail kadehde me Sises iei me Krais, me iei met me Sapwellime Mwomwohdiso me E kin ketin pein kaweid; oh me Presiden Russell M. Nelson iei Sapwellime soukohp ieias rahnwet.

Presiden Nelson kin rapahki oh alehdi kaweid sang Kauno. Iei ih ong ie me wia karasaras en kak rapahki kaweido ki ni ineng en idawehn. Inengohte en pil sang ni peikiong Sapwellimen Kauno kaweid iei e mih nan mongiong en irail kan koaros me kapahrekehr de me pahn kapahrek, kapakap, de koul nan kapokon lap wet en Sapwellime Mwomwohdiso.

I kapakapki me irail akan nan wasah koaros nan sampah me kilang de rong kapokon wet pahn kak ahniki pepehm en limpoak en Kauno rehrail. Sahm Nanleng ketin sapengehr ai kapakap me I pahn kak en kehnte ekis Sapwellimen Sounkomouro limpoak ong ie oh Sapwellime limpoak ong Sapwellime Sahm Nanleng, me wia Samatail Nanleng.

I kadehde me Sises Krais ketin ieias. Iei Ih me atail Sounkomour oh Soundoar . Sapwellime Mwomwohdiso met. Iei Ih me tapwi. Iei Ih oh Sapwellime Sahm Nanleng me pwarehng Joseph Smith ni paliwar nan mweten tuhke ehu nan New York. Rongamwahu en Sises Krais oh Sapwellime prihsduhd kopwurupwurdo sang irail meninkeder en nanleng kan.¹⁶ Sang ni manaman en Ngehn Sarawi I ese me mepwukat mehlel.

I kapakapki kumwail en ahniki soangen kadehdehute. I kapakapki kumwail en peki rehn Sahm Nanleng ni pwoson Sises Krais me kumwail anahne wiahda oh kolokol inou sarawi kan me pahn kak mweidehng Ngehn Sarawio en wia iengomwail ansou koaros. I pwilikihdiong kumwail ai limpoak oh ai kadehde ni lengileng sarawi en Sises Krais, amen.