Udo Nke Onwe n’Oge Ihe Ịma Aka
Enwebeghị ma ọlị mgbe ọ kacha dị mkpa ịchọ udo nke onwe.
E nyere m ọrụ na nso nso a i do nso otu akụkụ nke Nauvoo nke agụgụala. Dịka akụkụ nke ọrụ ahụ, e nwere m ike ịga nleta na Mkpọrọ Liberty dị na Missouri. Dịka m lere mkpọrọ ahụ, a tụgharịrị m uche ihe omume niile nke mere ya ụdịrị akụkụ dị mkpa nke agụgụala Nzukọ nsọ. Ndụ nke Ndị Nsọ ka eyiri egwu n’ihi iwu mgbuchapụ e nyere site n’aka gọvanọ nke Missouri. Na mgbakwunye, Onye Amụma Joseph na ndị enyi ole ma ole ahọọrọ ka atụworo mkpọrọ na-ezighị ezi n’ime Mkpọrọ Liberty. Otu n’ime ebumnuche maka mmegide ahụ kpụ ọkụ n’ọnụ nye ndị otu bụ na ọtụtụ n’ime ha megidere ịgba ohu.1 Mkpagbu nkea dị ike nke Josef Smith na ndị na-eso ya mejupụtara otu oke ihe ịma atụ nke ime nhọrọ n’ezighị ezi nke nwere ike imetụta ndị eziomume. Oge nke Josef na Mkpọrọ Liberty gosipụtara na nsogbu abụghị ihe akaebe nke enweghị mmasị nke Onyenwe anyị ma ọ bụ mwepụ nke ngọzi Ya niile.
O metụtara m nke ukwuu dị ka m gụrụ ihe Onye Amụma Josef Smith mara ọkwa ya dịka ejichiri ya n’ime Mkpọrọ Liberty: “O Chineke, olee ebe ị nọ? Ma olee ebe ụlọ-ntu n’ekpuchita ebe nzuzo gị nọ?”2 Josef rịọrọ ugboro ole ka ndị nke Onyenwe anyị ga “ata ahụhụ mmegide ndịa na mmegbu ndị iwu akwadoghị.”3
Dịka m guzoro na Mkpọrọ Liberty, e nwetere m mmetụta dị omimi ka m gụrụ aziza nke Onyenwe anyị: “Nwa m udo dịrị mkpụrụ obi gị; ihe isi-ike gị na nsogbu nile gị ga-abụ maka nwa oge nta; Ma mgbe ahụ, ọ bụrụ na ị nagide ya nke ọma, Chineke ga-ebuli gị n’elu.”4 Ọ kwere nghọta na mmegide nwere ike mezie anyị maka akara selestial dị ebighị ebi.5
Ọmarịcha okwu niile nke Onye Nzọpụta “Nwa m, udo dịrị mkpụrụ obi gị”6 na-adara m n’onwe ma baa nnukwu uru maka ụbọchi anyị. Ha n’echetere m maka nkuzi Ya niile nye ndị n’eso ụzọ Ya n’oge ije ozi nke ndụ anụ ahụ Ya.
Tupu ntaram ahụhụ nke Kraịst n’ime Ubi nke Getsemene ma n’elu obe, O nyere Ndị Ozi Ya iwu ị “hụrịkọta ibe ha n’anya; dị ka m hụworo unu n’anya”7 ma na-esote jiri okwu ndịa gbaa ha ume: “Udo ka M na-ahapụrụ unu, udo m ka m na-enye unu: n’abụghị dịka ụwa si enye, ka M na-enye unu. Unu enyela obi unu nsogbu, nke unu ji atụ ụjọọ.”8
Otu nime aha niile kachasị mma nke Onyenwe anyị na Onye Nzọpụta anyị, Jizọs Kraịst, bụ “Onyeisi nke Udo.”9 N’ikpeazụ alaeze Ya ka a ga-ehiwe tinyekọta udo na ịhụnaanya.10 Anyị na-atụ anya nke ọchịchị milenia nke Mezaya.
N’agbanyeghị atụm anya ọchịchị milenia nkea, anyị ma na udo na nkwekọrịta nke ụwa ejughị n’ụbọchi anyị.11 N’oge ndụ m, ahụtụbeghị m enweghị ezi agwa karịrị akarị. Anyị jupụtara na okwu esemokwu, iwe na omume mkpasu iwe, na-agbawa obi nke na-emebi udo na obi iru ala.
Udo n’ime ụwa ka a n’ekweghị nkwa ma ọbụ jiri n’aka tutu ruo n’Ọbịbịa nke Ugboro Abụọ nke Jizọs Kraịst. Onye Nzọpụta gwara Ndị Ozi Ya na ozi elu ụwa Ya agaghị emetali udo zuru ụwa. Ọ kuziri, “Echekwala na M na-abịa izite udo n’elu ụwa.”12 Udo eluigwe na ala abụghị akụkụ nke ije ozi ndụ anụ ahụ nke Onye Nzọpụta na mbụ. Udo eluigwe na ala adịghị adị taa.
Kosiladị, udo nke onwe ka enwere ike imeta n’agbanyeghị iwe, esemokwu, na nkewa nke na-emebi ma merụọ ụwa anyị taa. Enwebeghị ma ọlị mgbe ọ kacha dị mkpa ịchọ udo nke onwe. Otu ọmarịcha abụ ọhụrụ dị mmasị edere maka ndị ntoroọbịa nke taa site n’aka Nwanne nwoke Nik Day, akpọrọ “Udo n’ime Kraịst” na-ama ọkwa, “Mgbe ana enweghị udo n’elu ụwa, enwere udo n’ime Kraịst.”13 Agọziri anyị inwete abụ nkea naanị tupu ọrịa mkpochapụ COVID-19 gburugburu ụwa.
Abụ nkea na-egosipụta n’ọmarịcha ụzọ ọchịchọ ahụ maka udo ma n’ụzọ kwesịrị ekwesị kwusie ike na udo ka agbadoro na ndụ na ozi nke Jizọs Kraịst. Onyeisi Josef F. Smith mara ọkwa, “Enweghị ike ma ọlị abịa n’ụwa na mmụọ nke udo na ịhụnaanya … tupu ruo mmadụ ga-anata eziokwu nke Chineke na ozi nke Chineke … ma nakwere ike na ikike ya nke dị nsọ.”14
Ebe anyị enweghị ike echighaazụ na mbọ niile iji meta udo eluigwe na ala, ekwewo anyị nkwa na anyị nwere ike inwe udo nke onwe, dịka Kraịst na-akuzi. Ụkpụrụ nkea ka edepụtara n’ime Ozizi na Ọgbụgba ndụ niile: “Mana mụta nụ na onye ahụ na-arụ ọrụ nke eziomume ga-anata ụgwọ-ọrụ ya, ọbụna udo n’ime ụwa nke a na ndụ ebighi-ebi n’ụwa nke na-abịa.”15
Gịnị bụ ụfọdụ “ọrụ nile nke eziomume” nke ga-enyere anyị aka nagide okwu na ụka niile ma belata esemokwu ma chọta udo n’ime ụwa nkea.? Nkuzi Kraịst niile na-arụtụ aka n’ụzọ nkea. A ga m akpọpụta ole ma ole nke m kwere dịkarịsịrị mkpa.
Nke mbụ: Hụ Chineke n’anya, Debe Iwu nsọ Ya niile, ma Gbaghara Onye ọbụla
Onyeisi George Albert Smith bụrụziri Onyeisi Nzukọ nsọ na 1945. Amarawo ya rịị n’afọ ya niile ka Onye Ozi dịka onye ndu hụrụ udo n’anya. N’afọ ndị gara aga tupu ya abụrụ Onyeisi, aka mgba niile na mnwale niile nke ịda mbà n’obi jupụtara gburugburu ụwa, nke ọnwụ na mbibi nke World War II sotere, abụrụworịị ihe ọbụla ma ọ bụghị udo.
Na mmechi Agha Ụwa II, n’oge ọgbakọ zuru ọha ya mbụ dịka Onyeisi na Ọktoba 1945, Onyeisi Smith chetaara Ndị Nsọ maka ọkpụkpọ oku nke Onye Nzọpụta inwe ịhụnaanya n’ebe ndị agbata obi ha nọ ma gbaghara ndị iro ha ma mesịa kuzie na, “Nke ahụ bụ mmụọ nke Ndị Nsọ Ụbọchi ikpeazụ a niile kwesịrị ịchọ inwe ma ọbụrụ ma ha nwee olileanya otu ụbọchi iguzoro n’ihu Ya ma nata n’aka Ya nnabata dị ebube n’ebe obibi.”16
Nke abụọ: Chọọ Mkpụrụ niile nke Mmụọ ahụ
Onye ozi Pọl n’Ozi ya nye Ndị Galetia, depụtara ihe dị iche n’etiti ọrụ nke eziomume nke na-eme anyị etozuo oke irite alaeze nke Chineke na ọrụ nke nwere ike, na-enweghị nchegharị, mee anyị ahara itozu oke. N’etiti ndị ahụ na-eme anyị etozuo oke bụ mkpụrụ niile nke Mmụọ “ịhụnaanya, ọńụ, udo, ogologo ntachi obi, inwe obiọma, ịdị mma, okwukwe, ịdị umeala n’obi, [na] ịdị nwayọọ.”17 Pọl tinyekọtakwara ibukọrịta ibu onye na ibe ya ma ghara inwe ike ọgụgụ na-ime ihe dị mma.18 N’etiti ọrụ ndị ahụ nke n’enweghị eziomume o tinyekọtara ịkpọ asị, iwe, na esemokwu.19
Otu n’ime nnukwu nkuzi dị n’oge Agba Ochie kọrọ banyere Nna Ebraham. Ebraham na Lọt, nwa nwanne ya, bara ụba mana chọpụta na ha enweghị ike ịnọkọta ọnụ. Iwepụ esemokwu, Ebraham kwere ka Lọt họrọ ala nke ọ chọrọ. Lọt họọrọ ala larịị nke Jodan, nke nwere mmiri nke ọma ma maa mma. Ebraham weere ala larịị nke Mamre kacha peempe n’inwe nri. Akwụkwọ nsọ niile na-agụ na Ebraham bịara rụnye ụlọ ikwuu ya ma rụọ “ebe nchụaja nye Onyenwe anyị.”20 Lọt, naka nke ọzọ, “rụnyere ụlọ ikwuu ya gawa Sodom.”21 Inwe mmekọrịta jupụtara n’udo, nkuzi ahụ dị mfe nghọta: anyị kwesịrị ịdị njikere imejupụta ma wezuga esemokwu nihe gbasara ihe niile nke na-agụnyeghị eziomume inwe mmekọrịta ndị jupụtara n’udo. Dịka Eze Benjamin kuziri, “Unu agaghị enwe uche ịmerụ ibe unu ahụ, kama ibi n’udo.”22 Mana n’agwa gbasara ihe ndị dị mkpa nke eziomume na ozizi, anyị kwesịrị ịnọgide kwụrụ chịm ma guzosie ike.
Ọ bụrụ na anyị chọrọ inwe udo nke bụ ihe nrite nke ọrụ niile nke eziomume, anyị a gaghị arụnye ụlọ ikwuu anyị chewe ihu n’ụwa. Anyị ga a rụnye ụlọ ikwuu anyị chewe ihu na tempụl.
Nke Atọ: Tinye Ohere Nhọrọ N’ọrụ iji Họrọ Eziomume
Udo na ohere nhọrọ ka ejikọtara ọnụ dịka ihe ndị dị mkpa nke atụmatụ nke nzọpụta. Dịka a kọwara nime Isiokwu Oziọma maka “Ohere nhọrọ na Inye nkọwa,” “Ohere nhọrọ bụ ike na ohere ọma Chineke na-enye anyị iji họrọ ma mee ihe maka onwe anyị.”23 Ya mere, ohere nhọrọ dị n’etiti uto na nhumihe nke onwe nke na-agọzi anyị dịka anyị n’eso Onye Nzọpụta.24
Ohere nhọrọ bụ isi okwu Kansụl ndụ tupu ndụ anụ ahụ n’ime Eluigwe na esemokwu n’etiti ndị ahụ họọrọ isoro Kraịst na ndị na-eso Setan.25 Ịgbaghapụ mpako na ike nchịkọta na ịhọrọ Onye Nzọpụta ga-ekwe ka anyị nwee ihé Ya na udo Ya. Mana udo nke onwe ga-enwe ịma aka mgbe ndị mmadụ tinyere n’ọrụ ohere nhọrọ ha n’ụzọ ndị na-emerụ ahụ ma na-afụ ụfụ.
Obi siri m ike na mmesi obi ike jupụtara n’udo n’emetụta anyị n’obị nwetere mgbam ume site na mmụta anyị nwetere nke ihe Onye Nzọpụta nke ụwa ga-emeta n’aha anyị. Nkea ka ekwuru nke ọma n’ime Kwusaa Ozi ọma M: “Dịka anyị na adabere na Aja mgbaghara mmehie nke Jizọs Kraịst, O nwere ike nyere anyị aka nagide mnwale anyị niile, nrịa nrịa niile, na mgbu. Anyị nwere ike jupụta n’ọńụ, udo, na nkasi obi. Ihe niile na-adịchaghị mma banyere ndụ ka enwere ike imezi site na Aja mgbaghara mmehie nke JIzọs Kraist.”26
Nke Anọ: Wulite Zayọn nime Obi na Ebe Obibi Anyị niile
Anyị bụ ụmụ nke Chineke na akụkụ nke ezi na ụlọ Ya. Anyị bụkwa akụkụ nke ezi na ụlọ nke n’ime ya amụrụ anyị. Nkwadebe nke ezi na ụlọ bụ ntọala maka ma ańụrị na udo. Onyeisi Russell M. Nelson akuziworo anyị—ma noge ọrịa mkp0chapụ a anyị amụtawo—na ememe dabeere n’ebe obibi, Nzukọ nsọ kwadoro nwere ike “tọpụta ike nke ezi na ụlọ niile … ịgbanwe ebe obibi [anyị] [niile] ịbụrụ ebe nsọ nke okwukwe.”27 Ọbụrụ na anyị mee ememe okpukperechi nkea n’ebe obibi anyị, anyị ga-enwekwa udo nke Onyenwe anyị.28 Anyị maara na ọtụtụ n’ime unu enweghị ngọzi niile nke ezi na ụlọ eziomume ma n’ese okwu mgbe niile unu na ndị họọrọ enweghị eziomume. Onye Nzọpụta nwere ike iwete nchekwa na udo iji tuziere unu aka n’ikpeazụ baa na nchekwa ma kpuchite unu site na ọgbaghara niile nke ndụ.
A na m ekwe unu nkwa na ọńụ ahụ, ịhụnaanya, na mmejupụta ahụtara n’ezi na ụlọ eziomume dị ịhụnaanya, n’ewete ma udo ma ańụrị. Ịhụnaanya na obi ọma dị n’etiti inwe Zayọn n’ime obi na ebe obibi anyị niile.29
Nke Ise: Soro Ndụmọdụ Nke Ugbua niile nke Onye Amụma Anyị
Udo anyị na-abawanye nke ukwuu mgbe anyị n’esoro onye amụma nke Onyenwe anyị, Onyeisi Russell M. Nelson. Oge na-adịghị anya anyị ga-enwe ohere ịnụ site n’aka ya. Akwadoro ya site na ntọala niile nke ụwa maka ọkpụkpọ oku nkea. Nkwadebe nke onwe ya adịrịwo iche kachasị.30
Ọ kuziworo anyị na anyị nwere ike “nwee mmetụta udo na ọńụ na-anọgide, ọbụna oge ọgba aghara niile,” dịka anyị na-agbalị ịdịrịzi karịa dịka Onye Nzọpụta anyị, Jizọs Kraịst.31 O nyewo anyị ndụmọdụ “ichegharị kwa ụbọchị” iji nata “nsacha, ọgwụgwọ, na ike mgbam ume” nke Onyenwe anyị.32 A bụ m onye akaebe na mkpughe ka anataworo ma na aganihu ịnata site n’eluigwe site n’aka onye amụma anyị hụrụ n’anya.
Ka anyị na-enye nkwanye ugwu ma kwadoo ya dịka onye amụma anyị, anyị n’efe Nna anyị nke Eluigwe na Onye Nzọpụta anyị Jizọs Kraịst ofufe. Onye na-elekọta anyị bụ Mmụọ Nsọ.
A na m agba ama ma gbaa akaebe onye ozi nke onwe m na Jizọs Kraịst, Onye Nzọpụta na Onye Mgbapụta nke ụwa, na-edu ma tuziere Nzukọ nsọ Ya. Ndụ Ya na ozi aja mgbaghara mmehie Ya bụ ezi ụzọ nke udo. Ọ bụ Onyeisi Udo. A na m agba akaebe m siri ike ma dị nsọ na Ọ dị ndụ. N’aha nke Jizọs Kraịst, amen.