Ndi Uduak oro Ofon?

Ndi Uduak oro Ofon?

Mmi-mmi emi ami mma nyene nneme ye iwaad kiet emi ama okokure mission ke ediwak isua ke edem ndien idahaemi akanam ata utom esie. Ke ndusuk usung, uwem esie eketie nte ofon. Edi mbuotidem esie ama oduo. Enye okoduo oduk ke inyang eyighe kabanga Andinyanga ye Ufok Abasi Esie. Enye anam anwanga ete ke enye ikiboho mme edidiong emi enye ekekerede oto mfiak nda ndi iko-Abasi. Enye ikikereke ite ke uduak erinyanga ukpong ama ofon ke uwem esie.

Etop mi mfin emi abanga kpukpru mmo oro enyenede ukem ekikere oro. Nting iko nno mbon oro emi ke mme ini kiet “ema ekere ndikwo ikwo eke edidemede ima” edi mmo “ikikopke oro idahaemi.”¹

Edima Ete Heaven nnyin ama ebenge ono nnyin inem uduak ono nsinsi inemesit nnyin. Edi ke ini uwem miwutke usung emi nnyin ikerede mme idoride enyin, ekeme nditie nte ke uduak eke Ete Heaven ifonke.

Kakpan nnyin imisikere ke ukem usung mme mbet Jesus ekekerede kini mmo ekedude ke ubom, “ke ufot akpa-inyang, obumede ye oyobio: edi ofim ekedi ke usung efen.”²

Ekem, ke ata usenubok:

“Jesus ebinede mmo, asanga ke enyong akpa-inyang.

“Ndien kini mme mbet ekekutde enye nte asangade ke akpa mmong, mmo ekedu ke mfina, … ndien mmo etuanga ye ndik.

“Edi ke ndo-ndo oro Jesus eting iko ye mmo, ete, Edu ke inemesit; edi ami; ekukop ndik.

“Nte Peter okoborode enye onyung odoho ete, Obong, edieke edide fi, nam mmi nsanga ntiene fi ke enyong akpa-mmong.

“Ndien enye odoho ete, Di. Ndien nte Peter osuhode oworo ke ubom, enye asanga ke akpa-mmong, man etiene Jesus.

“Edi nte enye okutde idiok ofim, enye ama okop ndik; ndien ke otongode ndideng, enye ama ofiori ette, …Obong, nyanga mi.

“Ndien ke ndo-ndo oro Jesus anyan ubok ono enye, oyung omum enye, ndien odoho enye ete, O afo owo ekpri mbuotidem, se nte afo enyenede eyihe?”³

Ndi ami mmekeme ndibuana ye mbufo akpan-nkpo emi nkekpepde nto Peter? Mmebong akam nte yak mme akpan-nkpo emi ekeme ndinwam owo ekededi emi ekerede ke uduak erinyanga ukpong inyeneke ufon ke uwem mmo.

Akpa, nam-nkpo ke mbuotidem ke Jesus Christ.

Ami ndu ke mkpa idem ke mbuotidem eke Peter. Ke ekpri ikoot Jesus man “etiene,” enye ama okpong ubom esie emi ofim enyenegede. Eketie nte enye ama ofiok ete edieke Jesus Christ okokotde enye ke ndinam nkpo, enye ekeme ndinam oro.⁴ Peter ama onim Andinyanga ke akpaniko akan nte enye ekenimde ubom esie. Ndien mbuotidem oro okono enye odudu ye uko kini mfina, ye ndik.

Mbuotidem Peter eti mi abanga mbufiok emi Elder Jose L. Alonso akabuanade ye ami. Ke ekpri ini ke eyen-eren Elder Alonso ama akakpa, okpongde ufokemana ye mkpri ndito, Elder Alonso okop nte ndito-nwong etingde iko.

“Nso ke nnyin idinam?” mmo ekebup.

Eyenanwan isua Usukiet ama oboro, “Daddy oro ekem. Enye ke okworo iko Abasi ye Jesus Christ.”

Nte Peter, ekpri eyenanwan esie ama okut ebe mme mfina esie onyung onim Jesus Christ ye Erisio-isop Esie ke akpaniko. Mbuotidem ke Andiyanga ada emem edi onyung ono osongo ke ndika iso.

Edieke afo afiakde ese ke mme mbufiok fo, mmenim nte ke afo eyekut ete ke afo amanam nkpo mbuotidem ke ediwak ndaha ke uwem fo. Ndiduk Ufok Abasi edi utom mbuotidem. Nditing iko ye Ete Heaven ke akam edi utom mbuotidem. Ndikot nwed Abasi edi utom mbuotidem. Ndikop mme etop mi ke akwa mbono edi utom mbuotidem. Nte President Russel M. Nelson okodohode ete, “Kusuhode mbuotidem emi afo ekenyenede.”⁵

Ukpepnkpo efen emi nkekpepde nto Peter edi emi:

Kini mfina, wongore tiene Jesus Christ ke usop.

Nte enye ekesangade ebine Andinyanga, Peter ama okop ndik otode ke ofum ndien enye otongo ndideng. Edi kini Peter okofiokde se iketibede, enye ikoyomke ndisanga ke akpa mmong ke odudu esie mme ke ndifiak nwok nka ubom. Edi ayak mbuotidem esie ono Christ, enye osongo eyire, ofioride, “Obong, yanga mi.”

“Ndien ke ndo-ndo oro Jesus anyan ubok, omum enye.”⁶

Kpukpru nnyin imisobo ye idiok ofum emi ekemede ndiyenge mbuotidem nnyin onyung anamde nnyin ideng. Kini emi etibede, mbok ti ete ke uduak inemesit eke Ete Heaven enyene enying efen—uduak erifak. Uduak oro ikidighe ino nnyin ndisanga sung-sung mbe ke uwem, utuake ukot akananam, udengke akananam, ye inua iman ke iso nnyin kpukpru ini. Ete Heaven ama odiongo ete ke nnyin iyeyom erifak-nsio. Emi ekedi ntak emi Enye akanamde mbenge idem emi anim uduak edifak.⁷ Emi ekedi ntak emi Enye okonode Andifak edi. Kini nnyin inwanade—ke ntak ekededi—oro iworoke ite ke uduak oro ifonke. Emi edi ntak eke nnyin iyomde uduak oro ofon.

Ke mme ini oro, tiene uwutnkpo Peter. Wongore tiene Andinyanga ke usop.

“Idahaemi edi ini ye usen erinyanga fo. … Kusik usen nkabare esit.”⁸

Ke imisehe ebiet emi idude ye ebiet emi nnyin ekedude, mkpofiok edi usung ndika iso. President Nelson ekepeb ete:

“Iduhe nkpo se itatde-iyak, ofonde, mme ekemde ye nkori nnyin kiet-kiet akan ndiwak, ntua mkpofiok ke kpukpru usen.

“Mme mbufo emenehede esanga ke usung ediomi, enam ndudue mme eworo ekpong usung ediomi, mme ukutke usung ediomi ke ebiet emi mbufo edude idahaemi, mmekpe ubok nte yak ekabare-esit. Enyene-ifiok ke ukeme edikabare-esit k’usen-k’usen—ke edinam nyung nam-ofon esisit kpukpru usen.”⁹

Ndidi ntiene Christ okpon akan ndikere nkpo mbanga Enye mme nditing iko mbanga Enye mme ke ndima Enye. Oro oworo nditiene Enye. Oro oworo ndidu ke usung emi Enye ekpepde nnyin ete idu. Ndien onode kpukpru nnyin, oro oworo nkabare esit, emi mubiatke ini.

Eyenanwan mi kiet esinam utom ke missionary training center. Enye eting ono mi abanga elder kiet emi enye ekekpepde emi eketingde ono enye ke enye ifiokke mme Nwed Mormon ekedi akpaniko. Enye ama obong akam afiak obong ndinyene ntiense eke spirit, edi enye ikiboho iboro.

Eyenanwan mi obong akam oyom se enye edinamde man anwam missionary oro. Nntuk emi enye okobode ekedi ke owo ikinoho iko Abasi kpot man nnyin ikoot mmo inyung ibo ntiense; ekeno mmo nko ndikpep nnyin man inim mbet Abasi. Eyenanwan mi ama abuana ekikere emi ye missionary oro.

Ebede, enye afiak okut missionary emi, enehede okop inemesit. Enye odoho enye ete ke enye ke akpatre ama obo iko ntiense ete ke Nwed Mormon edi akpaniko. Enye ofiok ete ke ntiense emi ekedi koro enye akanamde akwa ukeme ke ndinam se Nwed Mormon ekpepde.

Yak nnyin itiene uwutnkpo Peter ke ndifiak ntiene Andinyanga kini mfina ke nnyin. Etiene Jesus Christ utu ke ndibere-edem ke ifiok ye osongo mbufo. Ibeheke uniong nte afo odomode ke ndisanga ke akpa-mmong ke Enye miduhe, ini ibiarake ke ndika mbine Enye. Uduak oro Ofon!

Oyoho ukpepnkpo ita emi mkpepde nto Peter ye mbufiok esie edi emi:

Suhode idem fo ke iso Obong, ndien Enye eyedibede fi ke enyong aka akwa ndaha.

Peter ama owut mbuotidem, ke mbiba ndisanga ke enyong mmong ye ke ndibine Andinyanga kini enye oyomde unwam. Okposuk edide ntre, Andinyanga okut Peter ye eti ndaha ke ediwak nkpo eken. “O afo owo ekpri mbuotidem, ” Enye okodoho, “ke ntre afo ama eyik?”¹⁰

Peter ekeme ndikpiki-yat esit ke nduari oro. Edi enye ama enyime ye nsuhode idem. Enye aka iso oyom akwa mbuotidem ke Jesus Christ. Otode ke mme ifiok-ukpep edibop mbuotidem efen—ndusuk mmo enehede, enehede osong—Peter ke ndise akabade edi ata adausung emi Obong okoyomde enye edi. Enye ama anam mme akwa nkpo oworo osu ke utom Obong.

Nso akwa nkpo ke Obong oyom fi ete anam? Ke Ufok Abasi Esie ye obio-ubong, odu ediwak ufang ke ndinam utom ye ndikworo iko nno mbon efen nte Andinyanga akanamde. Enye oyom fi ke otu akwa utom Esie. Uduak inemesit ididihe eti ino fi ke mibohoke kini afo anwamde mbon efen ke ndinam oro.

Ke ndinam mbuotidem mi okori, mme iko Alma emi ekedi nkpo emi okpuhode uwem: “Ofofon ono mmo oro esuhode idem mmo ke owo minyike mmo ke ndisuhode idem.”¹¹ Yak nnyin isin idem nnyin ke nsuhode idem ke ndaha eke Jesus Christ ekemede ndidibede nnyin, ndida usung, nyung nam ata ukeme nnyin.¹²

Ami nno iko ntiense nte ke uduak inemesit ofon. Edi Ete Heaven fo akanam enye, emi ama fi. Enye ofon koro Jesus Christ ama akan idiok nkpo ye mkpa otode ke Uwa-usio-isop Esie. Di bine Enye, tiene Enye, nko “ke iwiwa ke akwa uduak erifak edi-di kabanga fi.”¹³ Ke enying Jesus Chrst, amen.