Soai en Ihster me Keieu Kaselel

Kumwail pahn taman amwail rong kisin likou ehu sang Presidensi Keieu me wadawada nan amwail ward de branch kan wihk kei samwalahro. Audepen kisin likouo iei me Rahn Sarawi kohkohdo—Rahn Sarawi en Ihster—ward oh branch koaros pahn sarawi en kamadipw sarawihte, pwe en mie ansou ong peneinei kan en iang kawawih rahn kesemwpwal wet.¹

Sapwellimen Presidensi Keieu kisin likouo saihrie, oh e katamankieng ie mwomwen aht peneinei ah kin iang kawawih Ihster nan pahr akan me nekier. Ni ahi wie medemedewe duwen aht kin iang kawawih rahno, ehu ahi kin medewe ma se sou wekidalahr udahn mwomwen de wehwepen rahn kesempwal wet me kin inenen kesempwal ong irail koaros me kin kamehlele Sises Krais.

Madamadau pwuko kahrehiengie ai medemedewe mwahu mwomwen wekpeseng en atail kin kawawih Kirismas karasahieng Ihster. Nan Tihsempe, kitail sohngada oh wiahkihla ehu ansou en kaperen “Sekeseken Pehl akan,” sidakin kan en Kirismas, oh kisakis kan me pil patehng soahng kei, songsongen wiepe teikan—me duwehte sewese irail kan me anahne sawas, kokoulki koul en Kirismas kan me kitail kin pereniki koulki, oh ni mehlel wadek soai en Kirismas kan me mih nan pwuhk sarawi kan Luhk 2. Pahr koaros me kitial kin wadek soai kesempwal wet sang nan ehu lapalahn Pwuhk Sarawi me meringlahr, aht peneinei kin wia dahme amwail peneinei kin pil wia—se kin pwiliki daul pohn monget kan oh pohn pwopwet kan oh likauwihda likou reirei pwe sen kin kamwomwehda me kiiht Sohsep, Mary, oh irail me tohtoh kan me kohdo pwehn pwongih kisin seri pwelel Sises, se kin katamando soai en Kirismas me pid ipwidi en Sounkomouro.

Aht peneinei eh kin kawawih Ihster, mwur ekis, weksang dahme kin wiawi. I kehn me aht peneinei kin kalahpw “kohla sarawi” nan Rahn Sarawi kesempwalo pwe sen kak wewekihla mwahu, me Krais me wia poahsoan en nan Ihstero; oh ni aht wia peneinei ehu, se kin pokonpene oh ehukipene ekei wiepen tiahk en Ihster kan me mie. I udahn kin pereniki kilang nait serih kan oh met nein nait serih kan seri arail kin rapakihda kutohr en iIhster oh pwilikidiong nan arail pahsked en Ihster kan.

Ahpw sapwellimen Presedensi Keieu kisin likouo e wia mehn kapir kitailda. Kaidehnte irail lukei kitail koaros pwehn tehk mwahu atail kawauwih rahn kesemwpwal wet en wiawihte pohn sampah wet—Tomw oh Iasadahn Sises Krais—iangahki meleilei oh wahu me anahne kohieng Kauno, irail pil kiheng kitail atail ahnsou ong atail peneinei kan oh kempoakepahtail kan nan Rahn Sarawi en Ihster wet.

Kilel

Sounkomouro Iasadahr

Mahsen pwukat en Soukohp Joseph Smith pil wia iren kapatapat ong kemwekid kan me kin wiawi nan Ihster me iei: “Poahson en padahk kan en atail pali en lamalam kadehdeh en Wahnpoaron akan oh Soukohp akan, me pid duwen Sises Krais, me E ketin pwoula, oh seridi, pwurehng iasada ni rahn kesiluh, oh ketdahla nanleng; oh soahng teikan koaros me pid duwen atail pelien lamalam iei e pil wiahte kisehrail.”²

Ngei oh Lesa koasoiapenehr soangen wiehpe mwahu dah me aht peneinei kak wia ansou en Ihster wet. Mweihn ele pein atail iren peidek kan me kitail koaros anahne medemedewe: Ia mwomwen atail pahn kak kamwahuiala mwomwen atail padahngki oh kawauwih Iasadahn Sises Krais, Soai en Ihsterpwehn kak pahrekiongete, ni unsek, wiepe koasoandi en tiahk sarawi kan en ipwidi en Sises Krais, Soai en Krismas?

E sansal me kitail koaros wie nananti. I kin kasawih kekeirda mwahu kan me mih nan pwungen Souleng en Imwin Rahn-akan me kin nanantiheng Krais en wia poahson en arail Ihster. Met iangahki kemwekid laud me kin sansal Rahn Sarawi en Powehdi oh Rahn Sarawi en Iasada me riatail Souleng teikan kin wiewia. Kitail pil kak alehda kemwekid mwahu en tiahk en Krais-poahsoan en Ihster me dierekda nan tiahk kan oh wihwiawi nan wehi kan nan sampa pwon.

Kadedeh Kapw emen ohl semen N. T. Wright koasoia me: “Kitail anahne koahiekla ni soangsoangen wiepe kapw kan en kawauwih Ihster: nan palien mahlen, nting, kamwadong en serih kan, intingihda koasoi kaselel kan, keseng, kahlek, kapokon, pehl kan, kapokon en koul kan. … Iei met me kin wia atail kapokon keieu kesempwal. Sohte Kirismas, eri iralaud riau nan pwuhk sarawi tepin pwuhk en Madiu oh Luhk, salongala, sohte palahsang. Ma sohte Ihsder, sohte Kadehde Kapw; pil sohte lamalam en Krais pahn mie.”³

Kitail kin kesempwaliki padahk kan koaros en nan Pwuhk Sarawi me pid ipwidi, papah, Kalohpwuhla, oh Iasada en Sises Krais. Sohte lepin mahsen siluh me kak kasalehda koapwoaroapwoar laud oh kasalepen mour soutuk ong aramas koaros me duwehte dahme tohnlengo koasoia nimenseng en Ihstero ni sousouo: “E ketin iasadahr.”⁴ Kitail inenen kapingki iren pwuhk sarawi kan en Kadehde Kapw me kolokol soai en Ihster oh sapwellimen Sounkomouro papah aramas akan nan Sudia oh Kalili.

Ni ngei oh Lesa doulahte medemedewe oh raparapahki wiepeh kan me kak katehlapahla en aht peneinei kawauwih Ihster pwe Krais en poasoanehda, se pwungkidahr mehnia soai en nan pwuhk sarawi me se pahn ehukiong aht peneinei—iei Luhk 2me koasoia Ihster duwen, ma kumwail kupwurki.

Eri se aledier kaweid ehu sang nanleng: me patehng ire kesempwal kan me pid Ihster nan Kadedeh Kapw, ni atail wia Souleng en Imwin Rahn-akan kasarawihongehr kisakis kesempwal en Ihster! Kisakis en kadedeh sansal wet, ehu kadehdehpen manaman en Ihster me audauwudki, mehlel, iren pwuhk sarawi kesempwal akan en Ihster ong koaros me ese Kauno. Iei Pwuhk en Mormon me I koskosoia, oh ni pisetik, iei kosoiepen Sises Krais ah pwarehng irailko me mihmi nan Sampah Kapwo, ni Sapwellime lingan en iasadao.

Soukohp Joseph Smith kawewehdi me Pwuhk en Mormon iei “pwuhk keieu pwung nan pwuhk koaros,”⁵ oh e tepkihda 3 Nihpai 11, e koasoia duwen soai kaselel kopwuriamwei kan Krais Eh ketin iasada oh pwarek mehn Nihpai kan, Sapwellimen Sounkomouro papah en Ihster. Iren pwuhk sarawi pwukat me pid duwen Ihster en kadehdehki rekohd kan en Iasadahn Kaun Sises Krais.

Nan iralaud pwukat, Krais pilada Wahnpoaren Ehk-riemen, padapadahki soahng koaros me E ketin padahki pohn dohlo ong koaros me kin kohpene, pakairki me E ketin kapwaiadahr kosonned en Moses, oh kohpadahr duwen kopwurpwurpene en mehn Isrehl ni imwin rahn akan. E ketin kamwauhwiala me soumwau oh kapakapki aramas akan ni wiepe kopwuriamwei kan me “sohte loh ehu kak koasoia, de me aramas emen kak intingihdi, de mongiong en aramas emen eh pahn kak koledi songen kemwekid kaselel oh kopwuriamwei kan me kitail koaros kilang oh rong Sises eh mahsanih; oh sohte emen me kak alehdi songen popohl me audeikitaila ni ansou me kitail rong E loulou kin kitail ong Sahmo.”⁶

Kilel

Ketidohn Sihses Krais rehn Mehn Nihpai Ko

Ihster wet, aht peneinei pahn doadoakihte tepin iretikitik kan en 173 Nipahi 11, me kumwail pil esehiero. Kumwail kak tamanda pokon laud me pokonpene ni tehnpas sarawi nan sahpw en Bountiful me rongada kepitien Koht Sahm oh kilangada Sises Krais ketket kohdihdo sang nanleng luklukehieng aramas ong Ihster:

“Uhda oh kohdo rehi, … pwe kumwail en kak kehn lipwen mete kan nan pehi kat oh ni nehi kat, pwe kumwail en ese me ngehi … iei Koht en sampa pwon, oh me melahr pwehki dipen sampa.

“Oh … pokono eri uhda kohla, … emen mwuri emen … oh irail ahpw kilangki masarail oh doahkehki pehrail kan, … oh kadehdehki, me iei Ih mwo, …

“Oh … irail wiakintehieu werda, ndinda:

“Ohsahna! Iawen kapai en mwaren Koht me Lapalahpie! Oh irail ahpw pwupwidieng ni aluweluwen Sises, oh pwongih Ih.”⁷

Medewe: mehn Nihpai kau me mih ni Dolen Tehnpas Sarawio udahn doahkehdi limen Kauno me iasadahro! Se koapwoaroapwoariki me kitail pahn doadoahngki iralaud pwukat nan 3 Nihpai en wia kisehn atail tiahk en kawauwih Ihster ni eh pahn pil duwehte Luhk 2ong atail kemwekid en Kirismas. Ni mehlelo, Pwuhk en Mormon kasalehda soai kopwuriamwei me pid Ihster. Ke dehr wiahda soai en Ihster kaselel en dehr sansalda.

Ahpw I luke kumwail en kilang Pwuhk en Mormon ni marain lingan ehu oh doadoahngki kadehde kaselel kan me e koasoiahki duwen iasadahn Krais pil iangahki padahk sarawi tohtoh oh loal kan me pid duwen Krais.

Kitail kak idek, ia mwomwen wadek Pwuhk en Mormon nan rahn en Ihster pahn kapaiada atail mour oh katapan ong irail kan me kitail poakoahng? Tohtohsang ehu ma kitail pahn medewe. Sohte lipilipil en ansou me kitail kin wadek oh onopki Pwuhk en Mormon, kitail kak kasik me mie mehkot mwahu pahn pweida.

Ansou kis samwalahro, ngehi oh Lesa iang patehng mehlahn kempoakepaht men, lih pwoson men me ah mour ididi mwadang pwehki sang ni soumwahu laud. Se pokonpene rehn ah peneinei oh kempoakepah kan, emen emen te kin koasoiada ansou kan me irail kin ehuieng souleng mwahu menet me sewesehda aht mour.

Ni ansou me I keskesinen ekis dohsang kohpwauo lokolokaiahng ekei aramas, I tehkada kisin serepein Praimeri riemen pa kohla ni kohpwau oh sikelda—meserahkau itarehngte en lel ni keilen kohpwau—pwe irahn rahmwauiala ara andio. Pwehki sohte me karanih ira, Lesa keila rehra oh keipwekidiong rehra pwehn koaloalamwahui ira oh padahkih ira. E idek rehra ia irara oh ma ira ese iawasa ara andio mihmi ie met. Ira ehukieng ih ara pahtou, ahpw sapwellimen Koht serepein kesemwpal pwukat, sang ni ara kamehlele ni ah sansal nan meserah kan, inda me ira ese me ara andio insenamwahu met, oh mweihn e mihmier rehn Sises.

Ni soangen sounpar wet, ira diar meleilei nan pilahn lap en peren soutuk oh, ni ara wia serih kei, kadehdehkier ni sansal oh lingan en Iasadahn Sounkomouro. Ira ese met nan ara mongiong pwehki sang ni padahk mwahu en limpoak en pahpa oh nohno, peneinei, oh kaun en Praimeri kan me poadokedieng ira pwoson Sises Krais oh mour soutuk. Ara marain pahn ieiangada pahr akan, uwen tohtohn mehlel kan me serepein pwulopwul pwukat wewehki e sansalehng kitail nan padahk en Ihster oh padahk sarawi en Sounkomouro oh mahsen akan en soukohp akan me mih nan Pwuhk en Mormon.

I kilangehr me ansou me Preseden Russell M. Nelson kin kiskisehki Pwuhk en Mormonirail akan me sohte iang atail pelien lamalam, pil iangahki kaun lapalap akan en sampa, e kin kalapw pahkalahng 3 Nipahi oh wadekada duwen Krais ah pwarehng mehn Nihpai kau mwurin ah iasadao. Wia duwehte met, soukohp ieiaso kasalehda ah kadedeh me Krais ieias.ieiaso.

Kitail sohte kak kesihnenda pwehn wia emen soun kadehde en Sises Krais lauo kitail kak kasalehda atail kadehdehki Ih. Pwuhk en Mormon wia ehu kadehdehpen Sises Krais pwehki wasa koaros nan pwuhko, emen emen soukohp kin kadehdehki kaidehnte me Krais pahn ketdo, ahpw me E ketin ketdohr.

I kolokol nan pehiet tepin koapi en Pwuhk en Mormon. Ni ei kin wia met e kin kalapw kamwakid ie. Ni ei wia aramas laud men, I kin wie kapkapingki, sohte kak uhdisang medmedewe, oh kolokol teng dahme kisin pwutak pwulopwul Joseph Smith wia me e kak alehkihdi pwuhk sarawi pwukat pwehn kawewehdi oh wiahda. Manaman kan me wiawi me nohn kopwuriamwei en kak medewehda.

Ahpw kaidehn ih me karehda pwuhk wet a kamwakid ie. E pwehki pwuhk wet, sohte ehu pwuhk me wiawihda nan sampa wet, me kin kasalehda kadehdepen mour, doadoahk en papah, padahk kan, Tomwo, oh Iasadahn Sises Krais. Riei ko, ma kumwail pahn kin onopiki oaralap en Sises Krais nan pwuhk wet, eh pahn wekidala amwail mour. E pahn kasalehieng kumwail soang tohto me kak pweida. E pahn kalaudehla amwail koapwoaroapwoar oh kumwail pahn direkihla limpoak. Ni mehkoaros, e pahn kakairada oh kakehlakahla amwail pwoson Sises Krais oh kapai kin kumwail eripit mehlel me Ih oh Samatailo mwahngih kumwail, poakoahng kumwail, oh men kumwail en diar ahl en pwuralahng ni imwamwailo, wasa kumwail kohsangiehu .

Riei ko, ansouo leledohr, me soukohp en mahsoko kohpadahr, ”me ni ansou me eripit en Sounkomouro pahn kohpeseng nan sahpw laud kan, nan peneinei kan, ni lokaia koaros, oh aramas koaros.”⁸ Kokohp wet wiwiawi mwohn mesatail kan, sang ni kadehde en Sises Krais me dierek nan Pwuhk en Mormon.

Kilel

Sounkomour Sises Krais

Sohte ehu pwuhk likin pwuhk wet me kin kasalehda sansalsang met me:

• Pwehki Sises Krais, soahng koaros wekidekla.

• Pwehki Ih, soahng koaros mwahula.

• Pwehki Ih, mour kak epwel mwahula—mehlel ni ansou kan me kin udahn apwal.

• Pwehki Ih, soahng koaros kak pweida.

E ketido ni ah wia Sounkomour men me iasadahr, kapehse sang Koht Sahm, iei me wia padahk en Ihster keieu lingan oh kaselel. E pahn sewese atail peneinei kan kalaudehla ahn emen emen pein kadehde en Sises Krais atail Sounkomour oh Soundor, me ketin powehdier mehla.

I pahn kaimwsengkihla ai kadehdehki mehlel unsek en Pwuhk en Mormon oh Sises Krais me wia Ieros en Koht Ieias. Ni mwaren Sises Krais, amen.