Sapwelimen Sises Krais Padahk kan

Kitail kamehlele Krais. Ni atail wia tohn Mwomwohdiso en Sises Krais en Souleng en Imwin-Rahn akan, kitail kin kaudekieng Ih oh idawehn Sapwelime padahk en nan pwuhk sarawi kan.

Mwohn Pwupilahu, Samatail Nanleng kin pein mahsenieng Adam oh Ihp. Mwurin ansouo, Sahmo kapehseieng kitail Sapwelime Iehros, Sises Krais, ni ah wia atail Sounkomour oh Soundoar oh poahngoake kitail en “rong Ih.”¹ Sang kaweid wet kitail ese me rekoht en mahsen en nan pwuhk sarawi kan me kohsang “Koht” de “Kauno” pali laud en ansou udahn iei mahsen kan en Siohwa, atail Kaun me iasadahro, Sises Krais.²

Pwuhk sarawi kan kohieng kitail pwehn kaweid atail mour kan. Duwen mahsen en soukohp Nihpai eh padahkieng kitailehr, kitail en “pereniki sapwellimen Krais mahsen akan; pwe kilang, sapwellimen Krais mahsen akan pahn kasalehda mehkoaros me kumwail en kin wia.”³ Pali laud en repwoht en nan pwuhk sarawi kan me pid Sapwelimen Sises doadoahk en pohn sampah wia kasalepen soahng kan E ketin wiadahr. Ahi padahk en rahnwet iangahki mahsen pilipildakei sang atail Sounkomour—soahng kan me E ketin mahsaniher. Mahsen pwukat me kileledier nan kadehde Kapw (iangahki en Joseph Smith kamarain kapatapat) oh nan Pwuhk en Mormon. Pali laud en ire pilipilda pwukat keirekila nin duwen Sounkomouro ah ketin mahsaniher.

“Sises ahpw ketin sapeng, mahsanih, I ndaiong uhk ni mehlel: sohte emen kak pedolong nan Wehin Koht, ma e sohte pahn ipwiki pihl oh Ngehn Sarawi.”⁴

“Meid pai … me [kin] ngoangki kapwaiada kupwur en Koht; pwe re pahn direkihla Ngehn Sarawi.”⁵

“Kapai ong irail soun kameleilei kan; pwe irail pahn kadaniki seri en Koht.”⁶

“Kumwail rongehr padahk pwoatet, Ke dehr kamwahl:

“A ngehi I indaing kumwail met: mehmen me pahn kilikilang lih emen oh men dihpki, nahn e wiadahr dipen kamwahl nan kapehde.”⁷

“Kumwail pil rongehr padahk pwoatet: Ke en poakohng mehn mpomw kan, oh kailongki omw imwintihti kan.

“A ngehi I ndaiong kumwail met: kumwail poakohng amwail imwintihti kan, wia mwahu ong me kin kailongkin kumwail, kapakapki me kin wia suwed ong kumwail;

“Pwe kumwail en wiahla sapwellimen Sahm me ketiket nanleng, me kin ketin dakerki sapwellime ketipin pohn me suwed oh me mwahu kan, oh kin ketin kamwerehdi keteu pohn me lelepek kan oh me dipan akan.”⁸

“Pwe ma kumwail pahn mahkong meteikan me wie sapwung re wiahiong kumwail, eri Samamwail me ketiket nanleng pahn pil mahkong kumwail dipwamwail kan:

“A ma kumwail sohte pahn mahkikihong meteikan ar sapwung kan ong kumwail, eri Samamwail me ketiket nanleng pil sohte pahn ketin mahkikihong kumwail sapwung kan me kumwal kin wiahda.”⁹

“Ma kumwail kisehn sampah wet, eri, sampah wet pahn poakohng kumwail duwehte eh kin poakohng nah kan.: kaidehn kumwail kisehn sampah, A I pilkumwailda sang nin sampah, iei kahrepen en sampah eh kin kailongkin kumwail.”¹⁰

“Eri, dehr rapahki soahngkan en nan sampah ahpw rapahki mahs en kauwada wehin Koht, oh wiahda sapwelime pwung kan, oh soahng pwukat koaros pahn kohweng uhk.”¹¹

“Eri, kumwail wiahiong meteikan me kumwail kin anahne aramas akan en kin wiahiong kumwail: ih met wehwehn kosonned en Moses oh padahk en soukohp ako.”¹²

“Kumwail kalekeikumwailsang soukohp likamw akan, me kin pwarodohng kumwail ni mwomwen sihpw, a loalarail re uhdahn rasehng kidien wel kan.

“Kumwail pahn esehkin irail arail wiewia. Kumwail kak dolungasang wahn wain ni dihpw tekatek, de kehngid ni tuhke leles?

“Tuhke mwahu kin wa mwahu, a tuhke sakanakan kin wa suwed.”¹³

“Kaidehn aramas koaros me kin likwerih ie, ndinda, ‘Maing ei Kaun, Maing ei Kaun,’ me pahn pedolong nan Wehin Koht, pwe irail kan me kin kapwaiada kupwur en Semei me ketiket nanleng.”¹⁴

“Kumwail kohdo rehi, kumwail koaros me pwangadahr oh toutoukilahr amwail mehn wisik kan, I ahpw pahn kommoaleikumwailla.

“Kumwail ale oh kapaikada ei mehn wisiket, oh kumwail padahngki sang ie, pwe I me opampap oh nan kapehd karakarahk: kumwail ahpw pahn diar kommoalpen ngenimwail kan.

“Pwe mehn wisik me I pahn kihong kumwail me mengei, oh audepe kan me marahra.”¹⁵

“Mehmen me men idawehniehdo, en tounmeteikihla pein ih, kapaikada eh lohpwu, oh idawehniehdo.

“Oh met aramas men me men wahda eh lohpwu, iei en tounmeteikihla pein ih, oh ineng en sampah koaros, oh kolokol ahi kosonned akan.”¹⁶

“Eri, soikala sampah, oh doarehla amwail mour kan; pwe ia pahn katepehiong aramas, ma e pahn sapwenkihla sampah pokon, oh e pahn katiasang uhdahn eh mour? Dahme emen kak kihda pwe en pwurehng eh mour?”¹⁷

“Mehmen me anahne kapwaiada kupwur en Koht , iei ih me pahn wehwehki duwen ei padahk kan, ma sang rehn Koht de sang pein ei manaman.”¹⁸

“Eri ih indahiong kumwail, Peki, kumwail ahpw pahn ale; kumwail rapahki, kumwail ahpw pahn diar; kumwail letelet, e ahpw pahn ritidahng kumwail.

“Pwe koaros me kin peki pahn ale; oh me kin rapahki pahn diar; oh me kin letelet, e pahn ritida.”¹⁹

“Pil mie ekei nei sihpw me sohte mi nan kehl wet: I uhdahn pahn weiraildo, oh re pahn rong ngilei; re pahn wiahla pwihn sihpw teieu, oh sileperail pahn metehmen.”²⁰

“Sounkomouro kasaledahr me, Ngei me moursapahl, ohsounkomour: mehmen me pwosonie, mehndama e mehlahr, ahpw e pahn pwurehng mourda;

“Oh mehmen me momour oh pwoson ie, sohte pahn mehla kohkohlahte.”²¹

“[Kosonned laudo iei:] Ke pahn poakohng Kauno ahmw Koht sang nan kapehdomw unsek, sang ni ngenomw unsek, oh sang ni omw lamalam koaros unsek.

“Ih met kosonned me keieu lapalap oh kesempwal.

“A me keriaun kesempwal, me rasohngete met, iei, pil duwehte, Ke pahn poakohng mehn mpomw duwen omw kin poakohng pein kowe.

“Kosoned riau pwukat, iei me poahsoan en pelien kosonned koaros oh padahk en soukohp ako.”²²

“Mehmen me kin rong oh kapwaiada ei kosonned kan, iei ih me kin poakohng ie: Semei pahn loalloale mehmen me kin poakohng ie, oh I pil pahn poakohng, oh kasalehiong pein ngehi.”²³

“I kihong kumwail popohl, pein ei popohl me I kihong kumwail. I sohte kihong kumwail nin duwen me sampah wet kin wia. Kumwail dehr nsensuwed, oh pahtou, oh masak.”²⁴

“Iet ei kosonned ong kumwail: kumwail en poakpene nanpwungamwail, duwehte ei kin poakohng kumwail.”²⁵

“Kumwail kadehde pehi kat oh nehi kat, oh kilang mwahu pwe ngehi met: Kumwail doahke ie, kumwail ahpw pahn kadehde mehlel pwe eni sohte kin mie uduke de tih, duwem me kumwail kilikilang rehi.”²⁶

“Kumwail eri kohwei wasa koaros oh padahkihong tohn wehi kan koaros; pwe re en wiahla nei tohnpadahk: papidaisihirailla ni mwaren Sahm oh Sapwellime oh Ngehn Sarawi:

“Kehkehlingkihong irail re en peikiong mehkoaros me I koasoanediong kumwail: Eri, kumwail en ese pwe i pahn ieiang kumwail, lao lel imwin sa mpah.”²⁷

Mwurin Sapwelime doadoahk nan sahpw Sarawio, E ketin pwaralahng irail me pwoson koa nan sapwen Amerika. Mepwukat iei ekei mahsen akan me E ketin mahsaniher wasahu:

“Kilang, ngehi me Sises Krais, Sapwelimen Koht Ieroso. I kapikadahr nanleng oh sampah, oh soahng koaros me mie loalarakan. I mihmi rehn Sahmo sangehr nin tapio. I kin mihmi nan kupwur en Sahm, oh Sahm kin ketiket nan mohngiongi; oh pwehki ngehi Sahmo kalinganadahr mware.”²⁸

“Ngehi me marain oh mour en sampah. Ngehi me Alpa oh Omeka, tapi oh imwi.

“Kumwail solahr pahn meiroang en kakerehdi inta ong ie; ei, amwail meiroang en isihs kan pahn uhdier, pwe I solahr pahn alehda amwail meiroang en isihs kan.

“Kumwail pahn tounmetei kihong ie meiroang en mohngiong karakarahk oh ngehn peik ehu. Oh mehmen me patohkihdo ni mohngiong karakarak ehu oh ngehn en peik ehu, e pahn ale pepdais en kisiniei oh Ngehn Sarawi. …

“Kilang, I kohdo nan sampah pwehn wahdo poadoandoarepen sampah, en doarehsang sampah nan dihp.”²⁹

“Oh I pahn pwurehng indahng kumwail, kumwail anahne koluhla, oh pepdaisla ni mwarei, oh duwehla kisin seri, pwe kumwail de sohte kak sohsohki wein Koht.”³⁰

“Eri I pahn kasik me ke pahn unsekla duwehte ngehi, de Sememw me ketiket nanleng me unsek.”³¹

“Mehlel, mehlel, I indahiong kumwail, kumwail anahne tetehk oh kapakap ansou koaros, pwe tepelo de kasongosong ih kumwail, oh kumwail lohdieng reh.”³²

“Eri kumwail en kin poaden kapakap ong Sahmo ni edei.”³³

“Eri, soahng koaros kumwail wia, wia ni edei; eri, kumwail pahn kahdanki ei mwomwohdiso ni edei.”³⁴

“Eri I kiheng kumwailehr ahi rongamwahu, oh ih rongamwahu wet me I kiheng kumwailehr—me I kodohr nan sampah pwe I en wia kupwuren Semeio, pwehki Semeio me kadariehdo.

“Oh Semeio kadariehdo pwe I en langada pohn lohpwuo; oh mwurin ei langadahr pohn lohpwuo, me I pahn wahdo aramas koaros rehi … pwe irail en kopwungki arail doadoahk kan, ma irail doadoahk mwahu de suwed.”³⁵

Kauno mahsani, “Met iei kosonnedo: Koluhla, kumwail koaros me mihmi nan sampah pwon, oh kodohng ie, oh kohdo rehi oh pepdaisla ni edei, pwe kumwail en kak mwakelekelda ong ni amwail pahn alehda Ngehn Sarawi, pwe kumwail en mwakelekel ni amwail en kesihnen mwohi ni imwin rahno.”³⁶

Kitail kamehlele Krais. I kaimwsengkihla dahme E ketin mahsanih duwen mwomwen atail pahn ese oh idawehn Sapwellime padahk kan:

“A Sounsawaso, Ngehn Sarawi, me Semei pahn poaronehdo ni edei, iei ih me pahn kawehwehiong kumwail mehkan koaros, oh katakatamankin kumwail mehkoaros me I ndaiongkumwailehr.”³⁷

I kadehdehki mehlel en padahk pwukat ni mwaren Sises Krais, ahmen.