Aapki Bhaavi-Pidhi ki Khaatir
Vishwaas ki is khubsoorat chain ki kamazor kadi na banein jise aapne shuru kiya tha, ya jo aapko viraasat mein mili thi. Mazboot bano.
Kuch saal pehle, jab main Dakshin America ke Uttar-Pashchimi Area mein sewa kar raha tha aur Peru mein reh raha tha, to mujhe ek khubsoorat anubhav hua jise main aapke saath baatna chahata hoon.
Yah tab hua jab main vyast saptaah ke kaam ke baad ghar laut raha tha. Havai adde ki immigreishan prakriya puri karne ke baad, mujhe hamari saamaanye taxi sewa se ek milanasaar taxi draivar mera intazaar karte hue mila. Woh mujhe apni kaar mein le gaya aur main piche baithkar aaraam karne aur ghar ki ek shaant yaatra ka aanand lene ke liye taeyaar ho gaya. Kuch blok draiv karne ke baad, draivar ko uske suparvaisar ka phon aaya, jismen usne bataya ki mainne galat taxi le li hai. Mere liye ek alag kaar aarakshit ki gai thi, aur suparvaisar ne usse kaha ki agar main kaar badalna chahata hoon to woh mujhe havai adde par vaapas le jaae. Mainne usse kaha ki yah aavashyak nahin hai, aur ham chalte rah sakte hain. Kuch minat ki kamoshi ke baad, usne mujhe riyarviu shisha se dekha aur pucha, “Aap ek Mormon hain, hai na?”
Khair, us aamantrit prashn ke baad, mujhe pata tha ki yaatra shaant nahin hogi balki baatcheet aur charcha se bharee hogi. Woh draivar ka prashn hamein kahan le jaaega jaane ke liye mai utsuk tha.
Mujhe pata chala ki uska naam Omar tha, uski patni ka naam Maria Teresa tha, aur unke do bachche the—Carolina, umr 14, aur Rodrigo, umr 10. Omar bachpan se hi Girjaghar ka sadasye tha. Unka parivaar sakriye tha, lekin ateet samay mein, unke maata-pita ne girjaghar jaana band kar diya. 15 saal ki umr mein Omar puri tarah se nishkriy(inactive) ho gae. Us samay unki umr 40 saal thi.
Us pal mujhe ehsaas hua ki mainne galat taxi nahi li hai. Yah koi sanyog nahin tha! Mainne use bataya ki main kaun tha aur main uski taxi mein tha kyunki Prabhu use vaapas Apne paas bula rahe the.
Phir hamne uh samay ke baare mein baat ki jab wah aur uska parivaar Girjaghar ke sakriy(active) sadasye the. Uske paas madhur pariwaarik gharelu shaam sabha ke samay aur kuch Praathamik geeton ki yaaden thi. Uske baad usne “I Am a Child of God” ke dheere se kuch shabd gaae ”1
Uska pata, phon nambar aur uske bishap se baatne ki anumati praapt karne ke baad, mainne usse kaha ki main girjaghar mein waapas aane waale uske pahale din par chepal mein rehna ka raasta dhoondhoonga. Hamne havaee adde se mere ghar tak apni yaatra puri ki, saath hi uske ateet ki apni choti yaatra bhi puri ki, aur ham apne-apne raaste chale gaye.
Kuch saptaah baad uske bishap ne mujhe phon kiya aur bataya ki Omar ek nishchit Raviwaar ko girjaghar mein jaane ki yojna bana raha hai. Mainne usse kaha ki main waha aaunga. Us Raviwaar ko Omar apne bete ke saath waha the. Uski patni aur beti ko abhi koi dilchaspi nahin thi. Kuch mahine baad, uske bishap ne mujhe phir se phon kiya, is baar mujhe yah batane ke liye ki Omar apni patni aur apne do bachchon ko baptisma dega, aur usne mujhe waha aane ke liye aamantrit kiya. Yah us Raviwaar ki tasveer hai jab weh Girjaghar ke sadasye bane the.
Ussi Raviwaar ko, mainne Omar aur uske parivaar se kaha ki, yadi weh taeyaar ho, to ek saal mein, mujhe Lima Peru Mandir mein uski seeling karne ka sammaan milega. Yaha ham sabhi ke liye us yaadgaar pal ki ek tasveer hai, jo ek saal baad lee gai hai.
Main yah anubhav aapke saath kyon baatna chahata hoon? Main ise do uddeshyon se baatna chahata hoon
Sabse pehle, un achche sadasyon ko sambodhit karna jo kisi kaaran se Ishu Masih ke punarsthaapit susamaachaar se dur ho gaye hain. Dusra, aaj bhaag lene waale un sadasyon ko bhi sambodhit karna jo shaayad apne vachano ke prati utne wafaadaar nahin hain jitna unhein hona chahiye. Donon hi maamlo mein, unki aage ki peedhiyaan prabhaavit hoti hain, aur unki aane waali peedhiyon ke liye aarakshit aashirvaad aur vaade khatre mein padh jaate hain.
Aaiye pehle paridrshy se shuru karein, achche sadasye jinhonne anubandh ka maarg chhod diya hai, jaisa ki mere Peruvian mitr Omar ke saath hua tha. Jab mainne unse pucha ki unhonne waapas lautne ka phaisla kyon kiya, to unhonne kaha ki aisa isliye tha kyunki unhein aur uski patni ko laga ki uske bachche Ishu Masih ke susamaachaar ke saath jiwan mein adhik khush honge. Unhen laga ki ab apne bachchon ki khaatir girjaghar waapas jaane ka samay aa gaya hai.
Yah bahut dukhad hai jab ham Girjaghar ke nishkriy(inactive) sadasyon ya gair-sadasyon se milte hain jinke paas ek samay mein unke parivaaron ke bheetar susamaachaar tha aur unhonne use kho diya kyunki unke maata-pita ya daada-daadee kuch samay ke liye Girjaghar mein bhaag nahin lena chahate the. Us faesle ka unke bhaavee peedhee par hamesha ke liye prabhaav padh sakta hai!
Unke bachchon aur pote-potiyon ko unke jiwan mein Ishu Masih ke susamaachaar ki suraksha aur aashirvaad se vanchit(precluded) kar diya gaya hai. Isse bhi adhik dukh ki anubhooti yah hai ki unhonne ek anant parivaar ke waade kho diye hain jo ek din waha maujood the. Kisi ek ke faesle ka asar uske vanshajon ki kai peedhiyon par padhta hai. Vishwaas ki ek viraasat toot gayi hai.
Halaanki, jaisa ki ham jaante hain, kisi hi tuti hui cheez ko Ishu Masih dwara joda jaa sakta hai. Is kaaran se, krpya President Russell M. Nelson ke is nimantran par vichaar karein: “Ab, yadi aap raaste se hat gaye hain, main apne dil mein puri aasha ke saath aapko waapas aane ke liye aamantrit karta hoon. Chaahe jon bhi tumaar chinta hoi, jo bhi chunaotiyaan, aap ke liye Prabhu ke ih Girjaghar me ek jagah hai. Aap aur abhi nahi paeda hoe la peedhi aap ke abhi ke kaarwaahi se ashish paai vachanbadh maarg pe laute se ”2
Abh, dusre paridrshye par baat karte hain, aaj ke bhaag lene waale sadasye jo shaayad utne wafaadaar nahin hain jitna unhein hona chahiye. Jis tarah kal ke faisale aaj ki vaastaviktaon ko prabhaavit karte hain, usi tarah aaj ke phaisle hamare bhavishye aur hamare parivaar ke sadasyon ke bhavishye par asar daalenge.
President Dallin H. Oaks humko sikhaata hain:
“ Ishu Masih ka punahsthaapit susamachaar hamein bhavishye ke baare me sochne ka protsaahan deta hai. Woh bhavishye ke baare me badhe vichaar batta hai jiske anusaar hum aaj kaam karte hai.
Iske alaawa, hum sab waisan insaan ke janta jon aaj ke khali parwaah kare: aaj kharcha karo, aaj maze karo, aur bhavishye ki chinta mat karo.
Jab hum long abhi koi chunaao karta, hum long ke chaahi pucho, ‘Iske konchi natija rahi?’”3 Kya hamare vartamaan faesla hamein abhi aur anant kaal tak aanand ki or le jaaenge, ya weh hamein dukh aur aansuon ki or le jaaenge?
Kuch log sochenge, “Hamein har Raviwaar ko girjaghar mein jaane ki zaroorat nahin hai,” ya “Jab stithiyaan behtar ho jaengee to ham daswa-hissa denge,” ya “Main is vishay mein Girjaghar ke netaon ka samarthan nahin karunga.”
“Lekin,”weh kahate hain, “ham jaante hain ki Girjaghar sachcha hai, aur ham Ishu Masih ke susamaachaar ko kabhi nahin chodenge.”
Is tarah ke vichaar rakhne vaalon ko yah ehsaas nahin hai ki is “gungunee” prakaar ki sadasyata ka unke jiwan aur unki bhaavee pidhi ke jeevan par kitna nakaaraatmak prabhaav padega. Maata-pita ekteev rah sakte hain, lekin apne bachchon ko khone ka jokhim bahutadhik hai—is jeevan mein aur anant kaal mein.
Un logon ke baare mein jo apne parivaaron ke saath swargiye mahima praapt nahin karenge, Prabhu kehte hain, “Yeh weh hain jo Ishu ki gawahi mein bahadurnahin hain; isliye, weh hamare Parmeshwar ke raajye par mukut praapt nahin karte hain ”4 Kya ham apne liye ya apne bachchon ke liye yahi chahate hain? Kya hamen apne liye aur apni aane waali pidhi ke liye adhik bahaduraur kam gungunanahin hona chahiye?
President M. Russell Ballard ne bhi isi tarah ki chinta ko sambodhit kiya:
“Kuch logon ke liye, vishwaas karne aur bane rehne ke liye Masih ka nimantran kathin bana hua hai. Kuch chelein kisi khaas Girjaghar neeti ya shikshan ko samajhne ke liye sangharsh karte hain. Dusron ko hamare itihaas ya ateet aur vartamaan ke kuch sadasyon aur netaon ki khaamiyon par chinta dikhti hai. …
“… Girjaghar ke sadasyon aur Prabhu ke chune huwe netaon ke saath ab ‘aur nahin chalne’ ke nirnay ka bahut-samay ka prabhaavhoga jise abhi hamesha nahin dekha ja sakta hai.”5
Yah kaisi dukhad viraasat hai jo aage badhani hai—aur kis karan se? Chaahe jo bhi ho, yah aane waali pidhiyon par padne waale nakaaraatmak dhaarmik prabhaav ko nazarandaaz karne ke liye paryaapt nahin hai.
Mere pyaare bhaiyon aur bahanon, yadi aap in do sthitiyon mein se kisi ek se guzar rahe hain jinka mainne apne sandesh mein bataya hai, to krpya apni kaarwaahi par fir se vichaar karein. Aap jaante hain ki is jeevan mein hamare liye ek yojna hai. Aap jaante hain ki parivaar anant ho sakte hain. Aapno ko jokhim me kyon daalein? Vishwaas ki is khubsoorat chain ki kamazor kadi na banein jise aapne shuru kiya tha, ya jo aapko viraasat mein mili thi. Mazboot bano. Ise karne ki baaree aapki hai, aur Prabhu aapki sahaeta kar sakte hain.
Apne dil ki gaharai se, main aapko iske baare mein sochne, aage dekhne aur moolyaankan(evaluate) karne ke liye aamantrit karta hoon ki “yah kahan le jaaega” aur, yadi aavashyak ho, to apni bhaavi pidhi ki khaatir apne raaste ko naya aakaar dene ke liye paryaapt bahadur baniye. Ishu Masih ke naam se, amen.