Kinatibuk-ang Komperensiya
Ang Dios Nakaila ug Nahigugma Kaninyo
Oktubre 2023 nga kinatibuk-ang komperensiya

Ang Dios Nakaila ug Nahigugma Kaninyo

Ni Elder Alan T. Phillips

Sa Seventy

Ang plano sa Dios alang sa kalipay mahitungod tanan kaninyo. Kamo Iyang bililhon nga anak ug may talagsaon nga bili.

Unom ka tuig nang milabay nagbiyahe ang among pamilya sa pagkagabii sa gawas lang sa siyudad sa Oxford. Sama sa kasagarang sitwasyon sa gagmayng mga bata, kinahanglan kami nga mohunong, ug nakakita kami og service station nga may daghang tindahan ug mga restawran. Sama sa naandan, nanggawas mi sa sakyanan, nangadto sa tindahan, ug nanakay og balik, nagpadayon sa among biyahe.

Paglabay sa kinse minutos nangutana ang among kamagulangang anak: “Asa si Jasper?” Si Jasper kanunayng molingkod sa luyo sa sakyanan. Nagtuo kami nga nakatulog siya o nagtago o nangomedya namo.

Dihang gisusi og klaro sa iyang igsoon, nahibaloan namo nga ang among singko anyos nga anak wala didto. Ang among kasingkasing napuno sa kabalaka. Dihang niliko kami balik sa service station, nangamuyo kami sa Langitnong Amahan nga unta luwas ra si Jasper. Nanawag mi sa pulis ug gipahibalo sila sa sitwasyon.

Dihang mabalak-on kami nga miabot, kapin sa 40 minutos ang milabay, nakakita kami og duha ka sakyanan sa pulis sa parkinganan, nagkidlapkidlap ang mga suga. Sulod sa usa niini mao si Jasper, nalingaw ra nga nagpislit-pislit sa mga button. Dili gyod ko makalimot sa kalipay nga among gibati nga gikauban na usab siya.

Daghan sa mapasumbingayong pagtulon-an sa Manluluwas nakatutok sa pagpundok, pagpahiuli, o paningkamot nga makit-an ang unsay nagkatibulaag o nawala. Uban niini mao ang mga sambingay sa nawalang karnero, ang nawalang sinselyo, ug ang nawalang anak.1

Samtang kining hitabo bahin ni Jasper misantop sa akong hunahuna sulod sa katuigan, akong gipamalandongan ang balaanong kailhanan ug kaimportante sa mga anak sa Dios, ang makatubos nga gahom ni Jesukristo, ug ang hingpit nga gugma sa usa ka Amahan sa Langit, kinsa nakaila kanimo ug kanako. Ako nanghinaot nga makahatag og pagsaksi niini nga mga kamatuoran karon.

I. Mga Anak sa Dios

Ang kinabuhi mahagiton. Daghang tawo mobati nga nabug-atan, nag-inusara, nahilayo, o naluya. Kon lisod ang mga butang, tingali mobati kita nga nahisalaag o napakyas. Ang pagkahibalo nga kitang tanan mga anak sa Dios ug mga sakop sa Iyang mahangtorong pamilya mopahiuli sa pagbati nga nahisakop ug may katuyoan.2

Si Presidente M. Russell Ballard mipakigbahin: “Adunay usa ka importanteng kailhanan nga giambitan natong tanan karon ug hangtod sa hangtod. … Mao kana nga kamo ug sa kanunay usa ka anak nga lalaki o anak nga babaye sa Dios. … Ang pagsabot niini nga kamatuoran—ang tinuoray nga pagsabot niini ug paghangop niini—makausab sa kinabuhi.”3

Ayaw saypa sa pagsabot o ipakawalay bili kon unsa kamo kaimportante sa inyong Amahan sa Langit. Dili kamo aksidente lang nga mibutho sa kalikopan, o walay mga ginikanan, o resulta lang nga basta naporma dinhi. Kon dunay desinyo, dunay tigdesinyo.

Ang inyong kinabuhi dunay kahulogan ug katuyoan. Ang padayon nga Pagpahiuli sa ebanghelyo ni Jesukristo nagdala og kahayag ug panabot kabahin sa inyong balaanong kailhanan. Kamo pinalangga nga anak sa Langitnong Amahan. Kamo ang gihisgotan sa tanan nga sambingay ug mga pagtulon-an. Gihigugma kamo sa Dios sa hilabihan nga Siya mipadala sa Iyang Anak aron moayo, moluwas, ug motubos kaninyo.4

Si Jesukristo miila sa balaanong kinaiyahan ug mahangtorong bili sa matag tawo.5 Iyang gipasabot kon sa unsang paagi nga ang duha ka dagkong mga sugo sa paghigugma sa Dios ug paghigugma sa atong silingan mga pundasyon sa tanang sugo sa Dios.6 Usa sa atong balaanong mga responsibilidad mao ang pag-atiman niadtong mga nanginahanglan.7 Mao kini ang hinungdan kon nganong isip mga disipulo ni Jesukristo, kita “magtambayayong sa usag usa nga mga alantoson, … magbangutan uban niadto nga nagbangutan … ug maghupay niadtong nagkinahanglan sa kahupayan.”8

Ang relihiyon dili lamang mahitungod sa atong relasyon sa Dios; mahitungod usab kini sa atong relasyon sa usag usa. Si Elder Jeffrey R. Holland mipasabot nga ang Iningles sa pulong nga relihiyon naggikan sa Linatin nga pulong nga religare, buot ipasabot “paghigot” o, sa mas literal, “ibalik og higot.” Sa ingon niana, “ang tinuod nga relihiyon [mao] ang higot nga nagbugkos kanato sa Dios ug sa usag usa.”9

Kon giunsa nato pagtagad ang usag usa importante gayod. Si Presidente Russell M. Nelson nagtudlo, “Ang mensahe sa Manluluwas klaro: Ang Iyang tinuod nga mga disipulo molig-on, mobayaw, moawhag, moagni, ug modasig.”10 Gani kini mas importante pa kon ang atong isigka-tigbiyahian mobati nga nahisalaag, nag-inusara, nahikalimtan, o gisalikway.

Wala kinahanglana nga motan-aw kita og layo sa pagpangita og mga tawo nga nagkalisod. Makasugod kita sa pagtabang og tawo sa kaugalingon natong pamilya, kongregasyon, o lokal nga komunidad. Mahimo usab nga magtinguha kita sa paghupay sa nanag-antos nga 700 ka milyon nga mga tawo nga nagpuyo sa labihang kakabos11 o sa 100 ka milyon nga mga tawo kinsa napugos sa pagpahawa tungod sa pagpanglutos, panagbangi, ug kabangis.12 Si Jesukristo mao ang hingpit nga ehemplo sa pag-amuma sa mga nanginahanglan—sa gigutom, sa langyaw, sa masakiton, sa kabos, ug sa nabilanggo. Ang Iyang buhat atong buhat.

Gitudlo ni Elder Gerrit W. Gong nga ang “atong panaw paingon sa Dios kasagaran makaplagan sa pagtambayayong.”13 Sa ingon niana, ang atong mga ward kinahanglan nga mahimong dalangpan alang sa tanan nga anak sa Dios. Kita ba wala kaayo mobati samtang nagsimba o dili kaayo aktibong nagmugna og mga komunidad kansang katuyoan mao ang pagsimba, paghinumdom kang Kristo, ug pagpangalagad sa usag usa?14 Makapatalinghog kita sa tambag ni Presidente Nelson pinaagi sa minos nga pagpanghukom, dugang nga paghigugma, ug pagpakita sa putli nga gugma ni Jesukristo pinaagi sa atong mga pulong ug mga buhat.15

II. Ang Makatubos nga Gahom ni Jesukristo

Ang Pag-ula ni Jesukristo mao ang kinatas-ang pagpahayag sa gugma sa atong Langitnong Amahan alang sa Iyang mga anak.16 Ang pulong nga pag-ula naghulagway sa “paghiusa” niadtong kinsa nalahi o nahibulag.

Ang misyon sa atong Manluluwas mao ang paghatag og paagi aron makabalik sa Langitnong Amahan ug kahupayan panahon sa panaw. Nasayod ang Manluluwas pinaagi sa Iyang kasinatian kon unsaon sa pagsuporta kanato latas sa mga hagit sa kinabuhi.17 Dili kita angay mga masayop sa pagsabot: si Kristo ang atong tigluwas ug tig-ayo sa atong mga kalag.

Kon mogamit kita sa atong hugot nga pagtuo, Iya kitang tabangan nga makapadayon sa unahan latas sa mga kalisdanan. Padayon siyang nagtanyag sa Iyang mapinanggaon ug manggiluy-ong pagdapit:

“Duol kanako, kamong tanan nga nagbudlay ug nabug-atan ug papahulayon ko kamo.

“Isangon ninyo ang akong yugo diha kaninyo, ug pagtuon kamo gikan kanako; … ug makakaplag kamog pahulay sa inyong mga kalag.”18

Ang pagkumpara sa yugo puno sa gahom. Sama sa gipasabot ni Presidente Howard W. Hunter: “Ang yugo usa ka himan … nga magtugot sa ‘kusog’ sa ikaduhang hayop nga modugang ug mohiusa sa paningkamot sa usa ka hayop, magtinabangay ug mopaminos sa kabug-aton sa bug-at nga trabahoon sa [anaa nga buluhaton]. Ang palas-anon nga labihan ka bug-at o tingali imposibleng mapas-an sa usa ka tawo mas daling pas-anon sa duha nga parehong gitaoran sa sama nga yugo.”19

Si Presidente Nelson mitudlo: “Kamo makaduol ngadto kang Kristo aron mayugohan uban Kaniya ug sa Iyang gahom, aron kamo dili magbira sa palas-anon sa kinabuhi nga mag-inusara. Nagbitad kamo sa palas-anon sa kinabuhi nga nakayugo uban sa Manluluwas ug Manunubos sa kalibotan.”20

Unsaon nato sa pagyugo o pagbugkos ang atong mga kaugalingon ngadto sa Manluluwas? Si Elder David A. Bednar mipasabot:

“Ang paghimo ug paghupot og sagradong mga pakigsaad nagyugo kanato ngadto ug uban ni Ginoong Jesukristo. Sa tinuod nga kahulogan, ang Manluluwas nagtawag kanato sa pagsalig ug sa dungan nga pagbitad uban Kaniya. …

“Kita dili ug dili gayod angay nga mag-inusara.”21

Sa tanan nga nabug-atan, nahisalaag, naglibog: dili angay nga buhaton ninyo kining mag-inusara.22 Pinaagi sa Pag-ula ni Kristo ug sa Iyang mga ordinansa, mahimo kamong mayugohan o mabugkos ngadto Kaniya. Siya sa mapinanggaong paagi mohatag sa kusog ug pagkaayo nga inyong gikinahanglan sa pag-atubang sa panaw sa unahan. Siya sa gihapon ang dalangpanan gikan sa atong mga panahon sa kalisod.23

III. Gugma sa Langitnong Amahan

Akong klarohon, nga si Jasper hawod, mabination, intelihente, ug kiat. Apan ang importanteng bahin sa istorya nga siya akoa. Anak nako siya, ug siya akong gihigugma labaw kay sa iyang nahibaloan. Kon ang imperpekto, yutan-ong amahan mobati sa ingon niini bahin sa iyang anak, mahunahuna ba ninyo kon unsa ang gibati sa hingpit, nahimaya, mapinanggaong Langitnong Amahan bahin kaninyo?

Ngadto sa minahal kong mga higala sa nagtubo nga henerasyon, Gen Z ug Gen Alpha: Palihog hibaloi nga ang hugot nga pagtuo nagkinahanglan og lihok.24 Nagpuyo kita sa panahon diin, alang sa kadaghanan, “ang makita lamang maoy tuohan.” Ang hugot nga pagtuo mahagiton ug nagkinahanglan og mga pagpili. Apan ang mga pag-ampo matubag.25 Ug ang mga tubag mabatyagan.26 Ang pipila sa labing tinuod nga mga butang sa kinabuhi dili makita; kini mabatyagan, mahibaloan, ug masinati. Tinuod kaayo kini.

Gusto ni Jesukristo nga kamo makaila ug makabaton og relasyon sa inyong Amahan sa Langit.27 Mitudlo Siya, “Unsang tawhana diha kaninyo, nga dunay anak nga lalaki, ug anaa nagbarog sa gawas, ug moingon, Amahan, ablihi ang pultahan aron makasulod ako ug makigsalo kanimo, ang dili moingon nga, Dali sulod, akong anak; kay unsay anaa kanako maimo, ug ang anaa kanimo maakoa?”28 Mahunahuna kaha ninyo ang mas personal, mapinanggaon nga imahe sa Dios nga Amahan sa Kahangtoran?

Kamo Iyang anak. Kon mobati kamo nga nahisalaag, kon kamo dunay mga pangutana o kulang sa kaalam, kon naglisod kamo sa inyong mga kahimtang o nakigbisog sa espirituwal nga mga baroganan, dangop ngadto Kaniya. Pag-ampo Kaniya alang sa kahupayan, gugma, mga tubag, ug direksyon. Bisan unsay gikinahanglan ug bisan asa kamo, ibubo ang inyong kasingkasing ngadto sa inyong Langitnong Amahan. Alang sa uban, tingali gusto ninyong sundon ang pagdapit ni Presidente Nelson ug “mangutana kon Siya anaa ba gayod—kon Siya nakaila ba kaninyo. Pangutan-a Siya unsay Iyang gibati bahin kaninyo. Ug dayon maminaw.”29

Minahal nga kaigsoonan:

  • Ilha ang inyong Amahan sa Langit. Hingpit Siya ug mapinanggaon.

  • Hibaloi kon kinsa si Jesukristo.30 Siya ang atong Manluluwas ug Manunubos. Ibugkos ang inyong kaugalingon ug ang inyong mga minahal ngadto Kaniya.

  • Ug hibaloi kon si kinsa kamo. Hibaloi ang inyong tinuod nga balaanong kailhanan. Ang plano sa Dios alang sa kalipay mahitungod tanan kaninyo. Kamo Iyang bililhon nga anak ug may talagsaon nga bili. Nakaila Siya ug nahigugma kaninyo.

Niining yano apan mahinungdanong mga kamatuoran ako mopamatuod sa ngalan ni Jesukristo, amen.

Mubo nga mga Sulat

  1. Tan-awa sa Lucas 15:4–32.

  2. Tan-awa sa Preach My Gospel: A Guide to Sharing the Gospel of Jesus Christ (2023), 1.

  3. M. Russell Ballard, “Children of Heavenly Father [Mga Anak sa Langitnong Amahan]” (Debosyonal sa Brigham Young University, Mar. 3, 2020), speeches.byu.edu.

  4. Tan-awa sa Juan 3:16; Mosiah 15:1; 3 Nephi 17:6–10.

  5. Tan-awa sa Isangyaw ang Akong Ebanghelyo, kapitulo 3.

  6. Tan-awa sa Mateo 22:36–40.

  7. Tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 1.2, Gospel Library.

  8. Mosiah 18:8, 9.

  9. Tan-awa sa Jeffrey R. Holland, “Religion: Bound by Loving Ties” (Debosyonal sa Brigham Young University, Ago. 16, 2016), speeches.byu.edu.

  10. Tan-awa sa Russell M. Nelson, “Gikinahanglan ang mga Tigpasiugda og Kalinaw,” Liahona, Mayo 2023, 99.

  11. “Ang gidaghanon sa mga tawo nga anaa sa labihang kakabos misaka og kapin sa 70 ka milyon ngadto sa mokapin sa 700 ka milyon nga katawhan” (“Poverty,” Nove. 30, 2022, World Bank, woldbank.org).

  12. “Kapin sa 100 ka milyon nga katawhan ang napugos sa pagpahawa” (“Refugee Data Finder,” Mayo 23, 2022, United Nations High Commissioner for Refugees, unhcr.org).

  13. Gerrit W. Gong, “Lawak sa Balay Abotanan,” Liahona, Mayo 2021, 25.

  14. Tan-awa sa Kinatibuk-ang Tamdanan nga Basahon, 1.3.7, Gospel Library.

  15. Tan-awa sa Russell M. Nelson, “Gikinahanglan ang mga Tigpasiugda og Kalinaw,” 98–101.99.

  16. Tan-awa sa Juan 3:16.

  17. Tan-awa sa Alma 7:11–12; Doktrina ug mga Pakigsaad 122:8.

  18. Mateo 11:28–29.

  19. Howard W. Hunter, “Come unto Me,” Ensign, Nob. 1990, 18.

  20. “The Mission and Ministry of the Savior: A Discussion with Elder Russell M. Nelson,” Ensign, Hunyo 2005, 18.

  21. David A. Bednar, “Makadaug sa Ilang mga Alantuson uban sa Kasayon,” Liahona, Mayo 2014, 88.

  22. Si Presidente Camille Johnson miingon: “Mga kaigsoonan, dili ko kini mahimo nga mag-inusara, ug wala kinahanglana nga mag-inusara ko, ug dili gayod ako. Ang pagpili nga mabugkos ngadto sa akong Manluluwas, nga si Jesukristo, pinaagi sa mga pakigsaad nga akong gihimo uban sa Dios, ‘Mahimo ko ang tanang butang pinaagi kaniya nga nagapalig-on kanako’ [Mga Taga-Filipos 4:13]” (“Si Jesukristo Mao ang Kahupayan,” Liahona, Mayo 2023, 82).

  23. Tan-awa sa Salmo 62:6–8.

  24. Tan-awa sa Santiago 2:17.

  25. Tan-awa sa Mateo 7:7–8; Santiago 1:5.

  26. “Siya [ang Espiritu Santo] mao ang Maghuhupay (Juan 14:26). Sama nga ang makahupay nga tingog sa mapinanggaong ginikanan makapahilom sa naghilak nga bata, ang mga hunghong sa Espiritu makapakalma sa atong mga kahadlok, makapahilom sa makahasol nga mga kabalaka sa atong kinabuhi, ug makahupay kanato kon kita magbangotan. Ang Espiritu Santo makapuno kanato ‘uban sa paglaom ug hingpit nga gugma’ ug ‘motudlo [kanato] sa malinawon nga mga butang sa gingharian’ (Moroni 8:26; Doktrina ug mga Pakigsaad 36:2)” (Topics and Questions, “Holy Ghost,” Gospel Library).

    “Siya [ang Espiritu Santo] ‘mosaksi sa Amahan ug sa Anak’ (2 Nephi 31:18). Pinaagi lamang sa gahom sa Espiritu Santo nga kita makadawat og usa ka segurado nga pagpamatuod sa Dios nga Amahan ug sa Iyang Anak, si Jesukristo.

    “Ang Espiritu Santo mopamatuod sa kamatuoran, ug pinaagi sa Iyang gahom nga kita ‘mahimo nga masayod sa kamatuoran sa tanan nga mga butang’ (Moroni 10:5)” (“Ang Espiritu Santo Mopamatuod sa Kamatuoran,” Liahona, Mar. 2010, 14, 15).

    “Apan inig-abot unya sa Manlalaban, ang akong igapadala kaninyo gikan sa Amahan, ang Espiritu sa kamatuoran nga magagikan sa Amahan, kini siya mao ang magahimog panghimatuod mahitungod kanako” (Juan 15:26).

  27. Tan-awa sa Juan 14:6–7; 17:3.

  28. Tan-awa sa Joseph Smith Translation, Mateo 7:17 (sa Bible appendix).

  29. Russell M. Nelson, “Dali, Sunod Kanako,” Liahona, Mayo 2019, 90.

  30. Tan-awa sa Marcos 8:27–29.