Pagdayeg sa Tawo

Akong minahal nga kaigsoonan, nalipay ko nga makauban kamo karong buntaga. Nag-ampo ko nga ang Ginoo mopanalangin kanako.

Ang akong mga mata dili na sama kaniadto. Nakigkita ko og doktor sa mga mata, ug miingon ko, “Dili ko makakita sa teleprompter.”

Ug siya miingon, “Ang imong mga mata tigulang na. Dili na kini maulian.”

Mao nga buhaton nako kutob sa akong mahimo.

Gusto kong mopakigbahin kaninyo og pipila ka butang nga akong gihunahuna. Ingon og naghunahuna ko ni Propeta Joseph sa miaging pipila ka bulan. Naglingkod ko ug namalandong sa iyang mahimayaong responsibilidad nga nahimong propeta niining dispensasyon sa kahingpitan sa mga panahon.

Naghunahuna ko kon unsa kita ka mapasalamaton isip mga miyembro sa Ang Simbahan ni Jesukristo sa mga Santos sa Ulahing mga Adlaw nga si Joseph Smith, usa ka batang lalaki kinsa nagtinguha nga masayod kon unsay angay niyang buhaton aron ang iyang mga sala mapasaylo, nakakaplag og kaisog nga moadto sa kakahoyan duol sa iyang balay sa Palmyra, New York, ug didto miluhod sa pag-ampo, ug—sa iyang kaugalingong pamahayag—nag-ampo sa kusog nga tingog sa unang higayon (tan-awa sa Joseph Smith—Kasaysayan 1:14).

Nianang higayona, samtang nagluhod si Joseph diha sa unsay atong gitawag nga Sagradong Kakahoyan, ang kalangitan naabli. Ang duha ka personahe, labaw sa kahayag sa adlaw, nagpakita kaniya. Ang usa namulong kaniya ug miingon, “[Joseph,] kini mao ang Akong Hinigugmang Anak. Paminaw Kaniya!” (Joseph Smith—Kasaysayan 1:17). Sa ingon niana nagsugod ang Pagpahiuli sa kahingpitan sa walay kataposan nga ebanghelyo ni Jesukristo.

Tungod kay si Jesus, ang atong Manluluwas ug atong Manunubos, nakigsulti ngadto sa batang lalaki nga si Joseph ug miabli niining dispensasyon sa panahon nga atong gipuy-an karon, kita nagkanta og, “Pagday’g sa tawong nakigsulting Jehova!” (“Pagdayeg sa Tawo,” Mga Himno, nu. 19). Nagpasalamat kita sa Ginoo alang kang Joseph Smith ug sa iyang kaisog nga moadto nianang kakahoyan niadtong 1820, duol sa iyang balay sa Palmyra, New York.

Naghunahuna ko sa tanang katingalahan nga mga butang nga atong nahibaloan ug sa tanang butang nga anaa kanato. Akong minahal nga kaigsoonan, ang akong pagpamatuod kaninyo karong buntaga mao nga pagkabulahan gayod nato nga mahibalo sa tanan nga atong nahibaloan tungod kay kita adunay Joseph Smith, ang propeta niining kataposang dispensasyon sa panahon.

Kita nakasabot bahin sa katuyoan sa kinabuhi, kon kinsa kita.

Kita nakaila kon kinsa ang Dios; kita nakaila kon kinsa ang Manluluwas, tungod kay kita adunay Joseph, kinsa miadto sa kakahoyan isip usa ka batang lalaki, nagtinguha og kapasayloan sa iyang mga sala.

Sa akong hunahuna kini ang usa sa labing mahimayaon ug talagsaong mga butang nga mahibaloan ni bisan kinsa niining kalibotan—nga ang atong Langitnong Amahan ug si Ginoong Jesukristo mipakita sa Ilang Kaugalingon niining ulahing adlaw ug si Joseph giandam aron ipahiuli ang kahingpitan sa walay kataposan nga ebanghelyo ni Jesukristo.

Kita adunay Basahon ni Mormon. Pagkakatingalahan ug pagkatalagsaon nga gasa ang Basahon ni Mormon ngadto sa mga miyembro sa Simbahan. Kini ang laing saksi, laing tugon nga si Jesus mao ang Kristo. Kita aduna niini tungod kay si Joseph takos nga mokuha sa mga palid, dinasig sa langit aron hubaron kini pinaagi sa gasa ug gahom sa Dios ug aron ihatag ang basahon ngadto sa kalibotan.

Bisan kon ang akong mensahe karong buntaga yano ra, lawom kini, ug puno kini sa gugma alang kang Propeta Joseph Smith ug alang niadtong, akong kaigsoonan, kinsa mipaluyo kaniya ug andam nga mopaluyo kaniya sa iyang kabatan-on.

Gusto kong mohatag og pasidungog karong buntaga ngadto sa iyang inahan. Kanunay akong naghunahuna kon unsa gayod kadto kanindot nga sa dihang si Joseph miabot gikan nianang kasinatian didto sa Sagradong Kakahoyan ug misulti sa iyang inahan sa unsay nahitabo, si Lucy Mack Smith mituo kaniya.

Mapasalamaton ako sa iyang amahan ug sa iyang mga igsoong lalaki ug sa iyang mga igsoong babaye ug sa iyang pamilya, kinsa misuporta kaniya sa iyang dakong responsibilidad nga gihatag sa Ginoo kaniya nga mahimong propeta aron ipahiuli ang kahingpitan sa walay kataposang ebanghelyo ni Jesukristo sa makausa pa dinhi sa yuta.

Busa ang akong pagpamatuod karong buntaga mao nga ako nasayod nga si Jesukristo mao ang Manluluwas ug Manunubos sa kalibotan. Ako usab nasayod nga ang atong Langitnong Amahan ug si Ginoong Jesukristo nagpakita ug nakigsulti kang Joseph ug miandam kaniya aron mahimong propeta.

Ako nahingangha, ug segurado ako nga daghan kaninyo ang nahingangha usab, kon unsa kita ka bulahan nga mahibalo sa unsay atong nahibaloan bahin sa katuyoan sa atong kinabuhi, kon nganong ania kita dinhi, unsa ang atong paningkamotan nga buhaton ug tumanon sa atong inadlaw nga mga kinabuhi. Anaa kita sa proseso sa pagpaningkamot sa pag-andam sa atong mga kaugalingon, usa ka adlaw sa matag panahon, nga mahimong mas maayo, mahimong mas mabination, mahimong mas andam alang nianang adlawa, nga seguradong moabot, sa higayon nga kita mopauli balik ngadto sa presensya sa atong Langitnong Amahan ug ni Ginoong Jesukristo.

Mas nagkaduol na ako niana. Hapit na ko mag-95. Ang akong mga anak nag-ingon nga mas tigulang ko tan-awon kaysa akong edad, apan OK ra kana. Gibuhat nako ang kutob sa akong mahimo.

Apan sulod sa 50 ka tuig, mga kaigsoonan, ako adunay pribilehiyo nga makabisita sa tibuok kalibotan tungod sa akong katungdanan isip Kinatibuk-ang Awtoridad sa Simbahan. Nindot kini nga panalangin. Sa akong hunahuna hapit na nako malukop ang tanang bahin sa kalibotan. Nakahimamat ko sa mga miyembro sa Simbahan sa tibuok kalibotan.

Ah, unsa gayod ka dako sa akong gugma ninyo. Unsa ka mahimayaon kadto nga kasinatian—nga motan-aw sa inyong mga mata, maanaa uban kaninyo, ug mabati ang inyong gugma alang sa Ginoo ug alang sa Pagpahiuli sa ebanghelyo ni Jesukristo.

Hinaot nga ang atong Langitnong Amahan nagtan-aw kanato karon ug mopanalangin sa tanang gibuhat sa komperensiya. Ug hinaot nga anaa kanato ang Espiritu sa Ginoo sa atong mga kasingkasing, ug hinaot nga ang atong gugma alang sa ebanghelyo ni Jesukristo—ang atong minahal nga Manluluwas, si Ginoong Jesukristo—molambo samtang naningkamot kita sa pagserbisyo Kaniya ug sa pagsunod sa Iyang mga sugo ug mas mahisama Kaniya agi og resulta sa atong pagtambong sa kinatibuk-ang komperensiya. Bisan asa man kamo dinhi sa kalibotan, hinaot nga ang Dios mopanalangin kaninyo. Hinaot nga ang Espiritu sa Ginoo magauban kanato. Hinaot nga atong mabati ang gahom sa langit samtang manag-uban kita nga nagsimba niining sesyon sa komperensiya.

Akong ibilin kaninyo ang akong pagsaksi ug pagpamatuod nga ako nasayod nga si Jesus mao ang Kristo. Siya ang atong Manluluwas, ang atong Manunubos. Siya mao ang atong labing suod nga higala. Sa sagradong ngalan ni Jesukristo, amen.