“Joseph Smith uye Barika,” Misoro yeNyaya yeNhoroondo yeChechi
“Joseph Smith uye Barika,”
Joseph Smith uye Barika
Vatendi vaMazuva Ekupedzisira vanotenda kuti kusaita barika—muchato wemurume mumwechete nemukadzi mumwechete—ndiwo mutemo wemuchato wakadzikwa waIshe.1 Munguva dzebhaibheri, Ishe vakaraira vamwe vevanhu Vavo kuti vaite barika—muchato wemurume mumwechete nevakadzi vanopfuura mumwechete.2 Dzimwe nhengo dzokutanga dzeChechi yaJesu Kristu yaVatendi vaMazuva Ekupedzisira dzakagamuchirawo uye dzikateerera murairo uyu wakapuwa kuburikidza nevaporofita vaMwari.
Mushure mokugamuchira zvakazarurwa zvaimuraira kuti aite barika, Joseph Smith akachata navakadzi vakawanda uye akasuma tsika yacho kuna vamwe vake vapedyo. Musimboti uyu waiva pakati pezvikamu zveKudzorerwa zvainyanyisa kunetsa—kuna Joseph pachake iye uye kune dzimwe nhengo dzeChechi. Barika rakaedza rutendo uye rakamutsa rupokano nerupikiso. Vatendi vaMazuva Ekupedzisira vashoma pokutanga vakatambira kudzorerwa kwetsika yemubhaibheri iyo yaiva isingazikanwi zvachose kunzwisiso dzavo. Asi pashure vazhinji vakapupura kuzviitiko zvakasimba zvepamweya izvo zvakavabatsira kukunda kuzengurira kwavo uye zvikavapa kurudziro yokutambira tsika iyi.
Ruzivo ruzhinji pamusoro petsika yokutanga yebarika haruzivikanwi nokuda kwekuti vaitora chinhanho mairi vaikumbirwa kuchengeta zviito zvavo zviri muchivande. Rondedzero yenhoroondo yebarika rokutanga naizvozvo ishoma zvikuru: irondedzero shoma dzenguva iyoyo dzinopa ruzivo, uye ndangariro dzezvekare kazhinji hadzipi ruzivo kwaro. Vatendi vanorondedzera nyaya dzakakosha dzakati wandei dziri maererano netsika yebarika yakaitwa naJoseph Smith uye navamwe Vatendi vaMazuva Ekupedzisira vokutanga. Kuti uwane rumwe ruzivo maererano nebarika repakutanga ona “Plural Marriage in The Church of Jesus Christ of Latter-day Saints,” Gospel Topics Essays, topics.lds.org.
Misoro yeNyaya Inoenderana: Joseph Smith Jr., Emma Hale Smith, Fanny Alger, Nauvoo Expositor