Iosepha Semita ’e te fa’aipoipora’a vahine rau

Tē ti’aturi nei te feiā mo’a i te mau mahana hope’a nei ē, te fa’aipoipora’a hō’ē noa hoa—te fa’aipoipora’a o te hō’ē tane ’e te hō’ē vahine—’o te ture tumu ïa a te Fatu nō te fa’aipoipora’a.¹ I te tau o te Bibilia, ’ua fa’aue te Fatu i te tahi o tōna mau ta’ata ’ia fa’a’ohipa i te fa’aipoipora’a vahine rau—te fa’aipoipora’a o te hō’ē tane ’e hau atu i te hō’ē noa vahine.² ’Ua fāri’i ’e ’ua ha’apa’o ato’a te tahi mau melo mātāmua o Te ’Ēkālesia a Iesu Mesia i te Feia Mo’a i te mau Mahana Hope’a nei i teie fa’auera’a i hōro’ahia mai nā roto i te mau peropheta a te Atua.

I muri a’e i tōna fāri’ira’a i te heheura’a tei fa’aue iāna ’ia rave i te fa’aipoipora’a vahine rau, ’ua fa’aipoipo Iosepha Semita i te mau vahine e rave rahi ’e ’ua fa’a’ite i teie peu i te mau hoa piri. Tei roto teie parau tumu i te mau tuha’a fifi roa a’e o te Fa’aho’i-fa’ahou-ra’a mai—nō Iosepha iho ’e nō te tahi atu mau melo o te ’Ēkālesia. ’Ua riro te fa’aipoipora’a vahine rau ’ei tāmatara’a i te fa’aro’o ’e ’ua fa’atupu i te ’aimārōra’a ’e te pāto’ira’a. E mea iti roa te mau feiā mo’a i te mau mahana hope’a nei tei fāri’i, i te ha’amatara’a, i te fa’aho’i-fa’ahou-ra’a mai o teie peu nō roto mai i te Bibilia tei ’ore i mātauhia e rātou. Terā rā, i muri mai, e rave rahi o rātou tei fa’aite pāpū i te mau ’ohipa pae vārua pūai mau tei tauturu ia rātou ’ia upo’oti’a i ni’a i tō rātou mau mana’o tāpetepete ’e ’ua noa’a tō rātou itoito nō te fāri’i i teie peu.

E rave rahi mau parau nō ni’a i te ravera’a mātāmua o te fa’aipoipora’a vahine rau tei ’ore i ’itehia, nō te mea ’ua anihia i te mau ta’ata ’ia tāpe’a ’ōmo’e i tā rātou mau ’ohipa. Nō reira e mea varavara roa te parau tuatāpapara’a ’ā’amu nō te fa’aipoipora’a vahine rau : mea iti roa te mau papa’a parau nō terā tau e hōro’a nei i te tahi ha’amāramaramara’a, ’e nō te mau ha’amana’ora’a nō muri iho, e ’ere ato’a i te mea pāpū noa.’Ua fa’ati’a te feiā mo’a e rave rahi ’ā’amu faufa’a roa nō ni’a i te ’ohipa fa’aipoipora’a vahine rau a Iosepha Semita ’e a te tahi atu mau feiā mo’a mātāmua i te mau mahana hope’a nei . Nō te tahi atu mau ha’amāramaramara’a nō ni’a i te fa’aipoipora’a vahine rau, ’a hi’o i te « Fa’aipoipora’a vahine rau i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei », Vauvaura’a parau nō ni’a i te mau tumu parau o te ’evanelia, topics.lds.org.

Mau tumu parau e tū’ati : Joseph Smith Jr., Emma Hale Smith, Fanny Alger, Nauvoo Expositor